ကာရာကာတ်သ်၊ ဖေဖဝ်ဝါရဳ ၁၀
ရဲသ္ကံဇကု က္ဍိုပ်သ္ကိုပ်ဒစဵုဒစး ဟန်ပါဗလို ဂူအာန်နဳပါဟာ ကလေၚ်ဗၠးတိတ်ကၠုၚ်တုဲ ဗၞတ်ပိုၚ်ခြာနာဍဳဂှ် ဒးဒုၚ်တံၚ်ရပ်ဏာဓရတ်ပၠန် က္ဍိုပ်သ္ကိုပ်ဒစဵုဒစးဗၚ်နဳဇဲလာ မာရဳယာ ကိုရဳနာ မာချာဒို ဟီုရ။
ပ္ဍဲကဵုအရာပ် လအ်ခိုရဟ်သ် ဍုၚ်ဇၞော်ကာရာကာတ်ဂှ် က္ဍိုပ်သ္ကိုပ်ဗော် Justice First ဂူအာန်နဳပါဟာ ဒးဒုၚ်ရပ်ဏာဒှ်မာန်ရောၚ် ညးကလိဂွံလာဘ်ပရေၚ်ၜိုဟ်လလမ် မာချာဒို ဟီုလဝ်ပ္ဍဲဖေဖဝ်ဝါရဳ ၈ ရ။
ရဲရပ်လွဟ် ကယျိုၚ်အရာပ်တံ စိုပ်ကၠုၚ်နကဵုကွဳစက် ၄ မတုဲ ရပ်ဏာညးတေံဗွဲအတေၚ်အဓ္ဓမရောၚ် မေတ်သေတ် မာချာဒို ဖေဖဝ်ဝါရဳ ၉ တေံ ချူလဝ်ပ္ဍဲမဳဒဳယာမဟာဇန် ရ။
ဒုဥက္ကဌတြေံ စၠတ်ဓဝ်ကောန်ဂကူ ဂူအာန်နဳပါဟာ ဒးဒုၚ်စုတ်ထံၚ် ၈ ဂိတုတုဲ ဗၠးတိတ်ကၠုၚ်လဝ် ကရောံသၟာပရေၚ်ဍုၚ်ကွာန်ဂမၠိုၚ် မဒှ်ရ။
နူမွဲဒၞာဲကဵု မွဲဒၞာဲ ဂူအာန်နဳပါ အခိၚ်ပြံၚ်အာဒၞာဲဂှ် ရဲဂကောံဇြဟတ်တၠအဝဵုဍဵုဍိုက်မံၚ်တံ တံၚ်ရပ်ဂြဲဏာမၞိဟ် မဒှ်ရောၚ် ဗော်ဗဟဵု-တဲပုၚ်ညးတေံ ဟီုရ။
ချိၚ်ထ္ၜးလွဟ်ကဵု ညးပါမံၚ်ကရောံညးတေံတံတုဲ ရပ်စုတ်ပၠုပ်ဏာ ဂူအာန်နဳပါ ပ္ဍဲကွဳစက်မွဲမအတေၚ်ရောၚ် ဂွံတီရ။
ယဝ်ရကဵုအန္တရာဲ ဂူအာန်နဳပါမ္ဂး သမ္မတယာယဳ ဒေဝ်လ်သဳရိုဒရဳဂေါတ်၊ ဥက္ကဌသဘၚ်သဳကၠဳကောန် ဂျအ်ရိုဒရဳဂေါတ်ကဵု ဝန်ဇၞော်ပရေၚ်ကေၚ်ကာအပ္ဍဲဍုၚ် ဒဳအိုဝ်ဒါဒို ကာဗေဝ်လ်လို ဒးကေတ်ကဵုတာလျိုၚ်ရောၚ် ဗော် Justice First ဟီုလဝ်ရ။
ညံၚ်ဂွံအာတ်မိက်ကဵု သွက်ဂူအာန်နဳပါ ဂွံဗၠးတိတ်မာန်ကေုာံ အလဵုအသဳဍဵုဍိုက်မံၚ် ရဲဒစဵုဒစးတံဂှ် ညံၚ်ဂွံဒေါအ်အာမာန် သွက်ဂွံဖန်ဇန်ကဵု ဗတိုက်ဖအောဝ်လဝ် ဍုၚ်ဂၠးကဝ်တံရောၚ် ဗော်ဏံ ဟီုလဝ်ရ။
အပါ ဂူအာနဳပါ ဗၠးတိတ်ယျ ကောန်ညးတေံ ရာမန် ချူပတိုန်လ္တူမဳဒဳယာမဟာဇန်တုဲ ခြာဟွံလံ ညးတေံ ဒးဒုၚ်တံၚ်ရပ်ဏာ မဒှ်ရ။
မၞိဟ် ၃၀ ကလေၚ်ဗၠးတိတ်လဝ် ပ္ဍဲဖေဖဝ်ဝါရဳ ၈ ဂှ် ဂူအာန်နဳပါလေဝ် ပါလဝ်မဒှ်တုဲ ညးတေံဒးဒုၚ်တံၚ်ရပ်ဏာတုဲ အပါညးတေံ လမျီုနွံမံၚ်ဏီဂှ် ညံၚ်ဂွံထ္ၜးကဵုသက်သဳ ရာမန် အာတ်မိက်လဝ်ရ။
ဟိုတ်နူကော်လဝ်ဆောကဵု သွဟ်ပေါဲရုဲမာဲ ၂၀၂၄ ဂှ် ဂူအာန်နဳပါ ဒးဒုၚ်စောဲအမှု ပရေၚ်ပကီုပရာတ်၊ ပွမဖံက်သစ္စဍုၚ်နိဂီုတုဲ ဒးဗက်အောပ်မံၚ်ရ။
ဒပ်ဂီုကၠီုဗၚ်နဳဇဲလာ ဂၠိုက်ဂၠာဲဆဵုအာညးတေံတုဲ ပ္ဍဲသၞာံ ၂၀၂၅ ဂိတုမေဂှ် ရပ်ဏာလဝ် မဒှ်ရ။
ညံၚ်ဂွံကၟာတ်ထောံပါၚ် ညးပါ်ပါဲကေုာံ ဒစဵုဒစးအလဵုအသဳတံဂှ် ပ္ဍဲလက်ထက် သမ္မတ နဳကိုလာတ် မာဒူရို ရပ်ကၠေၚ်လဝ် မၞိဟ်ဗွဲမဂၠိုၚ်ရောၚ် ရဲဒစဵုဒစးကေုာံ ဂကောံအခေါၚ်အရာမၞိဟ်တံ ဟီုရ။
Ref:BBC