မတ်မလီု ၊ ဖေဖဝ်ဝါရဳ ၁၄
နူကဝ်မယှေန်ပၞာန် ဟိုတ်နူခုတ်ပိုင်ခြာစွံ ပရေၚ်ပတိတ်သြန်ဗါန်တုဲ ကမၠောန်ပရေၚ်ပိုန်ဒြပ် အဇာဍောတ် အဇာအဒေါဝ်တံကဵု ကမၠောန်ပရေၚ်ပိုန်ဒြပ်တံသီုဖအိုတ် သ္ဂောံဂေတ်အာမာန်ဒှ်မံၚ်အခက်ခုဲရောၚ် တၠကမၠောန်တံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
အကံက်ဓမ္မတာတံကီု အကံက်တၟေၚ်ကီု ၜိုတ်ကရိုက်စိုတ် ဗီုကၠာတေံပတိတ်ကေတ်မသြန်ဟွံဂွံ၊ ၜိုတ်ခုတ်စၟတ်ပိုင်ခြာလဝ်ဟေၚ် အခေါၚ်ပတိတ်နွံတုဲ ကမၠောန်ညးတံဂွံဂေတ်အာဂှ် ဒှ်မံၚ်အခက်အခုဲအိုတ်ရ။
ပ္ဍဲဖေဖဝ်ဝါရဳ ၅ ကၠောန်လဝ် ပေါဲဆဵုဂဗသၟာပရေၚ်ပိုန်ဒြပ်တံကဵု တၠကမၠောန် ပရေၚ်ကွတ်တဲကွတ်စက်ဍုၚ်ဗမာတံဂှ် ဥက္ကဌ ဗာန်ဗဟဵုဍုၚ်ဗမာ ဒဝ်တာန်န်သွိုဲ ဟိုတ်နူကဵုလဝ်စၞောန်ပၟိၚ်ရောၚ် ဂွံတီရ။
ပ္ဍဲဗွိုၚ်ပွဳပွူပရေၚ်ပိုန်ဒြပ် အပ္ဍဲဍုၚ်မ္ၚးဍုၚ်ဂှ် ဒဝ်လာကဵုထဝ်တံ ညံၚ်ဟွံဂွံစိုပ်အာဒၞာဲဝေင်သြန်တံတုဲ သွက်ဂွံပိုန်ခြာထောံ ပရေၚ်ပတိတ်သြန်ဗာန်ဂှ် ကဵုလဝ်စၞောန်ပၟိၚ် သ္ဂးရ။
မသြန်တံဂှ် အတိုၚ်ပၟိက်စိုတ်အာပတိတ်ကေတ်ဟွံဂွံတုဲ စနူကဵုပရေၚ်သွံရာန်ကပေါတ် အဇာဍောတ်အဇာအဒေါဝ် သွံရာန်မံၚ်ကဵုမသြန်တံလေဝ် ဒှ်အာအခက်အခုဲကီုရ ညးတၠကမၠောန်မွဲတၠ ဟီုကဵု ဌာန်ပရိုၚ် သြၚ်လောန်တိုၚ်မ်ရ။
“နူကဵုဗာန် သြန်ဍေံဟွံပတိတ်ကဵုပုဟ် သြန်ၜိုတ်လုပ်ကၠုၚ်အပ္ဍဲဍေံဂှ်ရ ဍေံကလေၚ်ပတိတ်ကဵုတှ်ေ ပ္ဍဲဍေံသြန်လုပ်အောန်တှ်ေ ပတိတ်ကဵုအောန်ရ။ ကိစ္စဒးရာန်ကပေါတ်သောဲသောဲဗြောဲတံ ဒးသောင်ကဵုမသြန်ဂှ် ဒှ်အာတင်ဝါတ်ရ သီုကဵုစရိတ်သၟာကမၠောန် ဒှ်အခက်အခုဲ။ ရဲသွံရာဘာတံ ရဲသွံကပေါတ်သတ်ဆုသတ်ဒုန်တံ ဒးသောင်ကဵု မသြန်ရတှ်ေ ဒှ်အခက်အခုဲကွေံ” သာ်ဝွံသ္ဂးရ။
တုဲပၠန် ဗီုကၠာတေံ ဗီုကရိုက်စိုတ်ပတိတ်ကေတ်မသြန်ဟွံဂွံ၊ အရိုဟ်ဟ်တ္ၚဲဒးကၠုၚ်ပါ်ပတိတ်ကေတ်မံၚ်တုဲ အခိၚ်လေဝ်အိုတ်ဂၠိုၚ်ကီု သြန်အိုတ်လေဝ်ဂၠိုၚ်တိုန်မံၚ်ရောၚ် ညးဆက်ဟီုရ။
ပ္ဍဲကဵုဗာန် ပံက်လဝ်အကံက်တၟေၚ် သပေဝ်ယှေဝ် မ္ဂး ပတိတ်ကေတ်မသြန်ပေၚ်ၚ်မာန်ရောၚ် ကဝ်မယှေန်ပၞာန် ဟီုဂး လလောၚ်တြးကီုလေဝ် ပြဟ်ဟ်ဏံ မုအကံက်သပေဝ်ယှေဝ်လေဝ် ပတိတ်ဟွံဂွံပုဟ် ဂွံတီရ။
ဟိုတ်နူကဝ်မယှေန်ပၞာန် ခုတ်စၟတ်ပိုင်ခြာသြန်တုဲ မွဲတ္ၚဲမ္ဂး သြန်ဗာန် ၜိုတ် ၂၀ ရ ပတိတ်ကေတ်မသြန်ဂွံတုဲ သြန်ဗာန်နွံမှလေဝ် ပါ်ပရအ်ပတိတ်ကဵု အကံက် သပေဝ်ယှေဝ်တံနွံညိညကီုရဂှ် ရဲတၠကမၠောန်တံဟီုတုဲ ဂွံတီရ။
ဟိုတ်နူကဝ်မယှေန်ပၞာန် ခုတ်စၟတ်ပိုင်ခြာလဝ် ပတိတ်သြန်ဗာန်ဂှ်ရ ပရေၚ်ပိုန်ဒြပ် အပ္ဍဲဍုၚ်ဗမာဗွဲမဂၠိုၚ် ကြပ်ဒးဒေါအ်ထောံမံၚ် အကာဲအရာ ဆိုအ်ဗခက်ခုဲတိုန်မာန်ရောၚ် တၠပညာပရေၚ်ပိုန်ဒြပ်တံ ကဵုလဝ်သတိနွံရ။
ပရိုၚ်-သြၚ်လောန်တိုၚ်မ်
Photo – CJ