မတ်မလီု ၊ ဖေဖဝ်ဝါရဳ ၁၄
တရဴပၠန်ဂတးစိုပ်ကၠုၚ် ပွိုၚ် ၅ သၞာံတုဲ ဘဲဒဏ်ဍောၚ်ၜိုတ်ဂှ် သီုညးဖအိုတ်တံဒးဒုၚ်စသိုၚ်ကီုလေဝ် ဒဵုကဵုဂကောံပၞာန်တံဏံ ညံၚ်ဂွံဒေါမ်စှ်ေအာဒးဆက်ဂစာန်အာရောၚ် သ္ကိုပ်ဝန်ဇၞော် ဟီုရ။
ပ္ဍဲဖေဖဝ်ဝါရဳ ၁၂ ကၠောန်လဝ်အခန်ကၞာအန်လိုၚ် တ္ၚဲချုက်လိက်ကသုက် ပေၚ်လုၚ် မရနုက်ကဵု ၇၉ ဝါဂှ် သ္ကိုပ်ဝန်ဇၞော် အလဵုအသဳညဳသၟဟ်ဂကူ NUG မာန်ဝေင်ခိုၚ်တာန် ဟီုလဝ်ရ။
ၜိုန်ရ တရဴကြံၚ်မ္ၚိုဟ်မံၚ် အကြာတၚ်ကော်ဆောနာနာတံ ဟိုတ်နူပံၚ်ကောံကၠောန်လဝ်မာန် ကလိဂွံကၠုၚ်လဝ် ပေါဲအံၚ်ဇၞးတံဂှ် ဒှ်ဇြဟတ်သွက်ဂွံဆက်တရဴဂတတေံမာန် နကဵုစၟတ်သမ္တီဝင်သှ်ေၜက်အာမံၚ် ညးသ္ဂးလဝ်ရ။
ဂကောံပၠန်ဂတးတံကီု ဒပ်ပၞာန်တံကီု လပါ်ညးကဵုညး တင်ဇြဟတ်ခိုဟ် တၚ်ဍိုန်လျတံ ဗီုညးကဵုညးနွံမံၚ်တုဲ လပါ်ညးကဵုညး လၟောင်လၟေတ်ဍောၚ်စိုတ်ပရေၚ်ပၞာန် ဇြဟတ်ဟရိုဟ်ဇၞော်ဇၞော်တံ ဍိုက်လဝ်ရောၚ် ညးခါတ်အကာဲပၞာန်တံ ပါ်ပါဲလဝ်ရ။
ဟိုတ်နူရမျှာၚ်ကမြေဲဂမၠိုၚ်ရ တရဴပၠန်ဂတး ဒးဍေၚ်ၜိုဟ်အာမဒှ်တုဲ ညးဍုၚ်ကွာန်ဒးထံက်ပၚ်မံၚ်တံ ဖေက်စိုတ်အိုတ်အာဂှ်ဒးဂွိၚ်မံၚ်ရောၚ် ဗိုလ်ဇၞော် CDM ဇြေန်ယဝ် သ္ၚဳဂၠိပ်ရ။
“ဟိုတ်နူရမျှာၚ်ကမြေဲတံဂှ် (ပၠန်ဂတး) ဒှ်မံၚ်တရဴလၟောၚ်လၟေတ်ရောၚ်။ ပ္ဍဲဗလးဗတိဂှ် ပ္ဍဲပွိုၚ် ၅ သၞာံဏံ စိုပ်ကၠုၚ်မံၚ်တရဴ ဗီုပြၚ်မွဲယျ။ မၞိဟ်နွံမံၚ်ဗလးတိတံဂှ် ဍောၚ်ၜိုတ်ကီုလေဝ် တီမံၚ်အကာဲအရာဇကုတုဲ ဟွံဍောၚ်ကွေံကွေံပုဟ်။ ညးဍုၚ်ကွာန် ဒးကဵုမံၚ်အထံက်ပၚ်ဂှ်ရ ဍောၚ်ၜိုဟ်အာ။ (တရဴပၠန်ဂတး) ဍောၚ်ၜိုတ်အာ ကိစ္စဟၟဲပုဟ်။ စိုတ်အိုတ်အာဂှ်ဏောၚ် ဒးဖေက်” သာ်ဝွံ သ္ဂးရ။
ပြဟ်ဟ်ဏံ နကဵုပရေၚ်ပၞာန် NUG ထပ်သီဂွံတိဍာ်တၟိ ဟၟဲကီုလေဝ် တိဍာ်လ္ၚဵုသီဂွံလဝ်ကၠာတေံဂှ် ဒပ်ပၞာန်ဗၟာကလေၚ်ထပက်ပၞာန်တုဲ ကလေၚ်ပါအာလဝ်နွံရ။
အတိုၚ်တင်နၚ်ပရိုၚ်တံမ္ဂး ဒၞာဲဂကောံရပ်လွဟ်ကောန်ဍုၚ်အရၚ်ကဵု ဒပ်ပၠန်ဂတးတံထိၚ်ချုက်လဝ် ၁၀၀ ဍုၚ်ပြၚ်နွံလဝ်ဂှ် လၟုဟ် ဒပ်ပၞာန်ဗမာကလေၚ်ဂွံဏာ ၜိုတ် ၁၃ ဍုၚ်။ အပ္ဍဲဂှ် NUG ကဵု PDF တံ သီဂွံလဝ် ၜိုတ် ၁၀ ဍုၚ်ကီုလေဝ် လၟုဟ်ၜိုတ် ၇ ဍုၚ်ရ ဆက်ထိၚ်လဝ် ဏီရောၚ်။
မွဲလပါ်ဂှ် NUG ကဵု K3C တံပံၚ်ကောံတုဲ သွက်ဂွံကၠောန်အာပရေၚ်ပံၚ်ကောံမွဲ ဒုသ္ကိုပ်ပၞာန်ဇၞော် ဂေါန်မဝ် ကဵုလဝ်သမ္တီဂှ် ပံၚ်ကောံဆက်တရဴကၠောန်အာမာန်မ္ဂး ပဵုတုဲစိုပ်တရဴမာန်ရောၚ် သ္ကိုပ်ဝန်ဇၞော် မာန်ဝေၚ်ခိုၚ် ဟီုလဝ်ရ။
ပ္ဍဲကဵုသၞာံဏံ ဒၞာဲဒေသအညာ ဂကောံဇြဟတ်ပၠန်ဂတးတံထိၚ်ချုက်လဝ်ဂှ် ဒပ်ပၞာန်ဗမာသၠုၚ်အသိၚ်ပၞာန်တံ ဘိုအ်ဂွံကလေၚ်ဗတိုက်အာနွံရဂှ် ညးခါတ်အကာဲပၞာန်တံသ္ၚဳဂၠိပ်လဝ်ရ။
မွဲလပါ်ဂှ် ဗွိုၚ်ပၞာန် ညံၚ်ဂွံဍိုန်စှ်ေအာကၠောန်တုဲ လ္တူဂကောံရပ်လွဟ်ကောန်ဍုၚ်အရၚ်တံဂှ် ဒပ်ပၞာန်ကော်ဘိက်ကၠုၚ် ပရေၚ်ၜိုဟ်လလမ်ကဵု ဒေါအ်ပန်ပှော်ယာယဳမာန်ရောၚ် အကာဲအရာနွံရ။
မွဲလပါ်ပၠန် ပံၚ်တောဲအာကဵုညးဍုၚ်ကွာန် ထံက်ဂလာန်ညးတံတုဲ ဗတိုက်သရိုဟ်အာ ပရေၚ်သူပုန်ရပ်လွဟ်တံရောၚ် ဂဥုပ်သ္ကိုပ်ပၞာန်ဇၞော် မေန်အံၚ်လှိုၚ် ဟီုလဝ်ရ။
နကဵုပရေၚ်ဍုၚ်ကွာန် NUG ဆဵုဂဗမံၚ်ကဵု က္ဍိုပ်သ္ကိုပ်မဟာမိတ်တံကဵုဂကောံဇြဟတ်ပၠန်ဂတးတံတုဲ ညံၚ်ဂွံသၠုၚ်ပတိုန်အာပရေၚ်ပၞာန် ဂစာန်မံၚ်ရောၚ် သ္ကိုပ်ဝန်ဇၞော် မာန်ဝေၚ်ခိုင်တာန် ဟီုရ။
ယဝ်ရ ထမံက်အာရုပ်ရဴ ဇြဟတ်ပရေၚ်ပံၚ်ကောံညဳသၟဟ်တံဟွံမာန်မ္ဂး အတိုၚ်ဗီုပြၚ်ဒပ်ပၞာန်ဗမာ ပလေဝ်ပလေတ်စလဝ် ပရေၚ်ပၞာန်လၟုဟ်ဏံတှ်ေ တရဴပၠန်ဂတး ပဵုတုဲခက်ခုဲကၠုၚ်မာန်ရောၚ် ညးတာလျိုၚ် ဂကောံသုတေသန လ္ၚတ်ပရေၚ်ပၞာန်ကေုာံ ပရေၚ်ဂီုကၠီု MDSI ကိုနံၚ်ယော ထံက်ထ္ၜးရ။
“ပ္ဍဲအကာဲအရာ သၞောတ်ထ္ၜတ်မွဲမွဲဂှ် ဒးထမံက်ထ္ၜးကဵု ပရေၚ်ဇြဟတ်ပံၚ်ကောံတံဏောၚ်။ ယဝ်ရ အတိုၚ်တၠုၚ်လအာ နွံပၟိက် သွက်သၞာံ ၂၀၂၆ ဏံ ပြံၚ်လှာဲကဵု ဟွံမာန်တှ်ေ တရဴပၠန်ဂတးဏံ ပဵုတုဲခက်ခုဲမာန်ဏောၚ်။ ဇြဟတ်ဟရိုဟ် သွက်ဂကောံဇြဟတ်ပၠန်ဂတးတံ ထပ်ဇီုကပါ်ကၠုၚ်မာန် ညာတ်ရ။ မုဟိုတ်ရော ကံၚ်သဳပၞာန်တံ Institution မွဲ ဍေံပကောံလဝ်မာန်။ ဇြဟတ်သြန်ကဵု လွဟ်ဇၞော်တံဂှ် လပါ်ဍေံတံ ခိုဟ်မံၚ်တုဲ သွက်အကြာဂကောံဇြဟတ်ပၠန်ဂတးတံဂှ် ဒှ်တင်ဝါတ်ခက်ခုဲမာန်။ ဗွဲမဂတာပ်အခိၚ် ပိုဲဒစးဒုၚ် ပလေဝ်ပလေတ်လဝ်မာန်မှ၊ ကိစ္စဇၞော်ကွေံဏောၚ်” သာ်ဝွံ သ္ဂးရ။
ဂကောံဇြဟတ်ပၠန်ဂတး NUG၊ KIO, KNU, KNPP, CNF တံ ပ္ဍဲကဵုဂိတုဖေဖဝ်ဝါရဳဏံ ဒက်ပတန်မံၚ် ပရေၚ်ပံၚ်ကောံအာက္ဍိုပ် မဒှ်ရ။
ကေတ်ခန်လ္ၚတ် ပရေၚ်ပၠန်ဂတးပွိုၚ် ၅ သၞာံဂှ်တုဲ ညံၚ်သ္ဂောံဂွံပရေၚ်အာက္ဍိုပ်ကၟောန်န်မွဲ ဒက်ပတန်တုဲ ညံၚ်ဂွံအာစိုပ် ဇရေၚ်ကၟိန်ဍုၚ်ဖက်ဒရေဝ်ဒဳမဝ်ကရေသဳ ပြဟ်ဟ်မာန် ရန်တၟံလဝ်ရောၚ် ညးအခေါၚ်ဟီုဂးနွံ CNF သလိုၚ်ထက်နဳ ဟီုလဝ်ကဵု ဌာန်ပရိုၚ်သြၚ်လောန်တိုၚ်မ်ရ။
မွဲလပါ်ပၠန် ပ္ဍဲဂိတုဖေဖဝ်ဝါရဳမံက်ဏံ ကောံဓရီုသ္ကိုပ်ဒပ်ဇၞော် ဒပ်ပၞာန်စဵုဒၞာညးဍုၚ်ကွာန် ဌာဝန်ဇၞော်ပရေၚ်စဵုဒၞာ NUG ဂှ် ပွိုၚ် ၅ တ္ၚဲ ကၠောန်လဝ်ကောံဓရီုတုဲ သဳကၠဳလဝ်တင်ရန်တၟံ ၂၀၂၆ ဂှ် ဂွံတီလဝ်နူလိက်လလောၚ်တြးရ။
သွက်ပေါဲအံၚ်ဇၞးပရေၚ်ပၠန်ဂတး ညံၚ်ဂွံစိုပ်တရဴဗွဲမပြဟ်မာန် ပရေၚ်ထပက်ပၞာန်တံညံၚ်ဂွံကၠောန်အာမာန် ဒးဂစာန်ကၠောန်အာ ပရေၚ်ဒက်ပတန်ဒပ်ကဵုလၟေၚ်ကမၠောန်ပလေဝ်စ ပရေၚ်ပၞာန်တံရောၚ် ပ္ဍဲလိက်လလောၚ်တြး ချူလဝ်ရ။
ပရိုၚ်-သြၚ်လောန်တိုၚ်မ်
Photo – NUG