ကျာ်ထဝ်၊ ဖေဖဝ်ဝါရဳ ၁၄
တွဵုရးမန် ပွိုၚ်ဍုၚ်ကျာ်ထဝ် ဟိုတ်နူကဝ်မယှေန်ပၞာန် ထပက်ကရောံပၞာန်ဒှ်ပေါဲဗတိုက်ဂှ်ရ ညးဍုၚ်ကွာန်မွဲဠက်ပြၚ် ဒးဂြိပ်ပါဲမံၚ်အိုတ်ရောၚ် နူကဵု KNU ဗဟဵု လလောၚ်တြးလဝ်ရ။
ကရောၚ်ပၞာန်ဒပ်ကဝ်မယှေန်ပၞာန် ဇြဟတ်ၜိုတ် ၂၅၀ စနူဖေဖဝ်ဝါရဳ ၉ ဂှ် ထပက်ကၠုၚ်ကရောၚ်ပၞာန် လုပ်ကၠုၚ်ကွာန်ခရုဲကဵု ဂအုံကွာန်ဝေင်ကါန်တံရ။
ကရောၚ်ပၞာန်ဒပ်ကဝ်မယှေန်ပၞာန် ထပက်ကၠုၚ်တုဲ တ္ၚဲစိုပ်ကၠုၚ်ဂအုံကွာန်ခရုဲ ကရပ်ကွာန်သေတ်ကွေင်ဂှ်ရ ဒှ်ပေါဲဗတိုက်ကဵု ဂကောံဇြဟတ်ပၠန်ဂတးဒပ်ပံၚ်တောဲတံရ။
အကြာၜါလပါ် ပေါဲဗတိုက်ဒှ်သ္ကာတ်မြဟ် ဟိုတ်နူဒပ်ကဝ်မယှေန်ပၞာန်ပန်လွဟ်ဇၞော်ဂှ်တုဲ ညးဒေသ ကွာန်သေတ်ကွေၚ်ကဵုမုက္ခမအ်တံ ချိုတ် ၃တၠ ဒးဝပ် ၃ နွံတုဲ ကောန်ကွာန်အခိုင် ဥူကျက်ဥဂှ် ဒပ်ကဝ်မယှေန်ပၞာန် ပန်ဂစိုတ်လဝ် မဒှ်ရ။
ဟိုတ်နူ ကရောၚ်ပၞာန်ဒပ်ကဝ်မယှေန်ပၞာန်ထပက်ဂှ်ရ ပ္ဍဲပွိုၚ်ဍုၚ်ကျာ်ထဝ် ဂအုံကွာန်အလူ၊ ဂအုံကွာန်ကၠအ်ဗျာတ်၊ ဂအုံကွာန်ခရုဲကဵု ဂအုံကွာန်ဝေၚ်ကာန်တံသီုဖအိုတ်နွံမံၚ် ၁၉ ကွာန်ဂှ် ညးဒေသ ၁၂၀၀၀ ပြၚ် ဒးပါဲမံၚ်ဘဲပၞာန်ရ။
ရဲဒဴပၞာန်တံဏံဂှ် ပြဟ်ဟ်ဏံ နွံမံၚ်ပၟိက်ကဵု ဒၞာဲမံၚ်၊ စၞစဇွောံမကဵု ဂဥုဲနာနာ ပရေၚ်ရီုဗၚ်ထံက်ပင်ဗ္စာရဏာမၞိဟ်တံ ဗွဲမဂတာပ်အခိၚ်ဒးရီုဗၚ်ထက်ရောၚ် နူကဵုဗဟဵု KNU လလောၚ်တြးလဝ်ရ။
အတိုၚ်ညးဒေသတံဟီုမ္ဂး ဒဵုကဵုဖေဖဝ်ဝါရဳ ၁၃ ဂှ် ကရောၚ်ပၞာန်ဏံဆက်ဖျေံလဝ်ဒပ် ပ္ဍဲကရပ်ကွာန် ပလိုၚ်တၟံဖိုအ်ရောၚ် ဂွံတီရ။
ပရိုၚ်-သြၚ်လောန်တိုၚ်မ်
Photo – KNU