ဖာပန်၊ ဂိတုမာတ် ၁၁
ပ္ဍဲခရိုၚ်ဖာပန် ဗော်သွးကောန်ဂကူကရေၚ် KNU ကွာန်ဗွဲမဂၠိုၚ်ဂှ် ၜၚ်ကျာဒပ်ကဝ်မယှေန်ပၞာန် ကြဳဖျေံလဝ်ဗုမ်ဆက်က်တုဲ သီုကဵုကောန်ၚာ်မပါလုပ် ညးဍုၚ်ကွာန် ပိတၠ ချိုတ်အာလဝ်နွံရဂှ် ဂွံတီနူကဵု ညးအခေါၚ်ဟီုဂးနွံ မဟာဒပ် ၅ KNU သ္ကိုပ်ဗိုလ်ဇၞော် သဝ်ကလေဝ်ဒိုဝ်ကဵု ဂကောံမှာဇန်ကရေၚ်တံရ။
ပ္ဍဲဂိတုမာတ် ၉ ဂှ် ၜၚ်ကျာဂျက်ဖိုက်တာ ဒပ်ကဝ်မယှေန်ပၞာန် ကြဳဖျေံဗုမ် ပန်မ ပ္ဍဲကွာန် တခေါ်တိုဘော တေဝ်မူဒေဝ်၊ ကွာန်တတာတေဝ်၊ ကွာန်တအိုဝ်ဒေဝ်ကဵု ကွာန်တခဝ်တိုဝ်ဗဝ် မၞုံပ္ဍဲဂအုံကွာန်တေဝ်မူဒေဝ် ပွိုၚ်ဍုၚ်လူတဝ် ခရိုၚ်ဖာပန် ဂှ်ရောၚ်။
ပ္ဍဲပရေၚ်ကြဳဗုမ်ဏံဂှ် ကောန်ၚာ်အယုက်ပိသၞာံမွဲတၠ ကေုာံ ညးဗျုဗျုမွဲတၠ ချိုတ်အာတုဲ ၅ တၠ ဒးအာဝပ်ရောၚ် ဂွံတီကေတ် နူကဵု သ္ကိုပ်ဗိုလ်ဇၞော် သဝ်ကလေဝ်ဒိုဝ် ကေုာံ ဂကောံမှာဇန်ကရေၚ် KPSN ရ။
ဟိုတ်နူဒပ်ကဝ်မယှေန်ပၞာန် ကြဳဗုမ်လ္တူကွာန်တံဏံတုဲ ဘာလ္ၚောဝ်ကျာ်ၜါမ၊ သ္ၚိ ၁၁ မ ဒးဒုၚ်လီုလာ်အာနွံရဂှ် ပ္ဍဲလိက်လလောၚ်တြး ဂကောံအထံက်အပၚ် ပရေၚ်ၜိုဟ်လလမ် ကရေၚ် KPSN ချူလဝ်ရ။
ပ္ဍဲဂိတုမာတ် ၈ ဂှ်လေဝ် ပ္ဍဲကွာန်မေဝ်ကဝ်လဝ် ပွိုၚ်ဍုၚ်ဒေါဲလိုဝ် ခရိုၚ်ဖာပန်ဂှ် ဟိုတ်နူဒပ်ကဝ်မယှေန်ပၞာန် ကြဳဗုမ်နကဵုၜၚ်ကျာတုဲ မၞိဟ်ဗြဴအယုက် ၂၃ သၞာံမွဲတၠ ချိုတ်အာတုဲ ကောန်ၚာ်မွဲတၠ ကေုာံ ညးတြုံမွဲတၠ ဒးအာဝပ်နွံရ။
ပ္ဍဲဂိတုမာတ် ၇ ဂှ်လေဝ် ဒပ်ကဝ်မယှေန်ပၞာန် ကြဳဗုမ်ဗတိုက်လဝ် ပ္ဍဲကွာန် နအ်ဝဳထ ပွိုၚ်ဍုၚ် ဒေါဲလိုဝ်တုဲ ၜိုန်ရညးဍုၚ်ကွာန်တံ ဟွံဒးဝပ်ချိုတ်အာကီုလေဝ် ဘာလကျာ်မွဲမ ကေုာံ သ္ၚိဌာန်တံ ဒးဗုမ်တုဲ လီုလာ်အာလဝ်နွံ ညးအခေါၚ်ဟီုဂးနွံ မဟာဒပ် ၅ သ္ကိုပ်ဗိုလ်ဇၞော် သဝ်ကလေဝ်ဒိုဝ် သ္ဂးရ။
ဒၞာဲတိဍာ် မဟာဒပ် ၅ ထိၚ်ချုက်လဝ် ခရိုၚ်ဖာပန်ဂှ် ဒၞာဲရုၚ်ဗျူဟာ ဖာပန် ညံၚ်ဟွံဂွံကျအာဂးတုဲ ဒပ်ကဝ်မယှေန်ပၞာန် ဒုၚ်ဒဝ်ဗတိုက်မံၚ် နကဵုၜၚ်ကျာဗွဲမသ္ကာတ်မြဟ်တုဲ နူဍုၚ်ကမမံၚ် ၜိုန်ရ ထပက်ကၠုၚ် ကရောၚ်ပၞာန်ဗလးတိကီုလေဝ် ဆက်တိုန်အာဂတတေံ ဟွံမာန်ဏီ ပုဟ် ဂွံတီ နူရိုဟ်ကၞက်ပရိုၚ်ဒေသတံရ။
ဒၞာဲခရိုၚ်ဖာပန် KNU ဂှ် ပ္ဍဲဂိတုဖေဖဝ်ဝါရဳ တုဲကၠုၚ်တေံ ဒပ်ကဝ်မယှေန်ပၞာန် ပန်လဝ် နကဵုဒရုၚ် ၈ ဝါ၊ နကဵုၜၚ်ကျာ ဂျက်ဖိုက်တာ ၂၁ ဝါ၊ ပန်လဝ်ကဵုလွဟ်ဇၞော် အကြာကွာန်ကဵု ဒၞာဲဌာန်ကမၠောန်တံတုဲ ညးဍုၚ်ကွာန်မွဲတၠ ချိုတ်အာ၊ ၜါတၠဂှ် ဒးအာလဝ်ဝပ်ရ။
ပ္ဍဲကဵုမဟာဒပ် ၅ ခရိုၚ်ဖာပန်သၟးဟွံက ပ္ဍဲတိဍာ်မဟာဒပ် ၃ ခရိုၚ် ညံၚ်လေဝ်ပေန်၊ မဟာဒပ် ၄ ခရိုၚ်ဗိက်-ထဝါဲ တံလေဝ် ဟိုတ်နူ ဒပ်ကဝ်မယှေန်ပၞာန်တံ ကြဳဗုမ်နကဵုၜၚ်ကျာ၊ ဒရုၚ်တံတုဲ ညးဍုၚ်ကွာန် လၟိဟ်ကဵုစှော် ချိုတ်အာလဝ်နွံတုဲ ပရေၚ်ဏံဂှ် အခိၚ်ကြဴနူ ပေါဲရုဲမာဲတုဲအာတုဲ ဂကောံသီအဝဵုတံ ဖံက်ပကဝ်လဝ် အခေါၚ်အရာမၞိဟ် ပဵုတုဲဂၠိုၚ်တိုန်မံၚ်ရောၚ် KNU ဟီုလဝ်ရောၚ်။
ပရိုၚ် – သြၚ်လောန်တိုၚ်မ်
Photo – KNU