ဗြဝတီ၊ အေဗရာ ၁၀
အပ္ဍဲတွဵုရးကရေၚ် ပွိုၚ်ဍုၚ်ဗြဝတဳ သွက်ဂွံသီကေတ် ကွာန်မေန်လက်ပါန် ကေုာံ ကွာန်ဖလူဂှ် နူကဵုဒပ်ကဝ်မယှေန်ပၞာန် နကဵုဇြဟတ်ဒပ်ဗွဲမဂၠိုၚ် ထပက်ကၠုၚ်ကရောၚ်ပၞာန်တုဲ ပေါဲဗတိုက်အကြာၜါလ္ပာ် သ္ကာတ်မြဟ်တိုန်မံၚ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုင်မ် ရ။
နူကဵုဒပ်ကဝ်မယှေန်ပၞာန် တတ်ကၠောံကၠုၚ် ဒဒန်ၜဳဂြာၚ် မၞုံအကြာ ပွိုၚ်ဍုၚ်ကအ်ကြိက် ကေုာံ ပွိုၚ်ဍုၚ်ဘာအၚ် တွဵုရးကရေၚ်တုဲ နူမွဲကဆံၚ်တတ်ကၠုၚ် ကြုၚ်ဒဵု၊ ဍုၚ်ကအ်ကြိက်တုဲ ကွဳစက်ယာန် ကရောၚ်ပၞာန် ၁၃ ဖ္ဍိုက်လဝ် ဇြဟတ်ဒပ်ပေၚ်ၚ်တံဂှ် စနူဂိတု အေဗရာ ၈ ပ္ဍဲအခိၚ်နူဂယးပြဟ်ဂှ် လုပ်စိုပ်ကၠုၚ် ဍုၚ်ဗြဝတဳရ။
အတိုၚ်ညးဒေသဖလူမွဲတၠ ဟီုမ္ဂး ဒပ်ကဝ်မယှေန်ပၞာန်ဝွံ နူကဵုဍုၚ်ဗြဝတဳမွဲကဆံၚ် အတိုၚ်ဂၠံၚ်ကွဳစက် ဗြဝတဳ-ဝဝ်လေ ပယျဵုသေံ-ဗၟာ နူကဵုကွာန်အၚ်ဂျေၚ်မျာၚ်ဂှ် ပတဝ်လဝ်ကဵု လ္ပာ်ကွာန်မေန်လက်ပါန်တုဲ ဗပေၚ်စုတ်မံၚ် ဇြဟတ်ဒပ်ရောၚ် ဂွံတီကေတ်ရ။
အပ္ဍဲဂိတုအေဗရာ ၉ အခိၚ်နူဂယးဂှ် ကရပ်ကွာန်ဖလူကေုာံ ကွာန်မေန်လက်ပါန်တံဂှ် အကြာကရောၚ်ပၞာန်ဒပ် ကဝ်မယှေန်ပၞာန် ကဵုဂကောံဇြဟတ်ပၠန်ဂတး မၞုံသၟဝ်မဟာဒပ် ၆ KNLA သ္ကိုပ်သ္ကတံၜါလ္ပာ် ပေါဲဗတိုက်ကတဵုဒှ်လဝ် ဗွဲမသ္ကာတ်မြဟ်တုဲ နူကဵုဒပ်ကဝ်မယှေန်ပၞာန် သုၚ်စောဲဗုမ်ပၟတ်တုဲ ကြဳဗတိုက်မံၚ်ရောၚ် ညးဒေသဖလူ သ္ဂးရ။
ဟိုတ်နူကဵုဒပ်ကဝ်မယှေန်ပၞာန် ကြဳဗုမ်ပၟတ် ပ္ဍဲကွာန်ဖလူကဵု ကွာန်မေန်လက်ပါန်တုဲ သ္ၚိဌာန်ညးဒေသတံ ပၟတ်တူအာအိုတ်ရောၚ် သ္ဂးရ။
ဟိုတ်နူပေါဲဗတိုက် ကတဵုဒှ်လဝ် ကရပ်ကွာန်မေန်လက်ပါန်ကဵု ကွာန်ဖလူတုဲ ညးဒေသကောန်ကွာန်တံ ဒးဂြိပ်ပါဲအာမံၚ်ဘဲပၞာန် လုပ်လ္ပာ်ဍုၚ်သေံလေဝ်နွံတုဲ၊ ညးဒးဂြိပ်ပါဲဘဲပၞာန် ဗွဲမဂၠိုၚ်တံဂှ်တှ်ေ ဂြိပ်ပါဲတိတ်အာ ဒၞာဲဗၠးဘဲဒဏ် ကရပ်ပ်တံဂှ် မဒှ်ရ။
နူကဵုဒပ်ကဝ်မယှေန်ပၞာန် စွံပွန်ဗတိုက်မံၚ် ဗ္ဒိုပ်ပါဲဘဲပၞာန် ညးဍုၚ်ကွာန်တံ နွံမံၚ်လၟိုန်တုဲ ညးဂြိပ်ပါဲဘဲပၞာန်တံဂှ်လေဝ် ဒးပြံၚ်သၠာဲမံၚ်ဒၞာဲ မွဲဏှမွဲဏှရောၚ် ဂွံတီကေတ်ရ။
ပရိုၚ် – သြၚ်လောန်တိုင်မ်
Photo – Social Media