ဘာအၚ်၊ အေဗရာ ၁၀
အပ္ဍဲကဵုထံၚ် ခရိုၚ်ဘာအၚ် ဗော်သွးကောန်ဂကူကရေၚ် KNU ကောန်ထံၚ်နွံမံၚ် ၃၈ တၠတံဂှ် ကဵုအခေါၚ်ဗၠးဒုဟ်ဒဏ်ယျရောၚ် နူကဵုဗဟဵု KNU ပ္ဍဲဂိတုအေဗရာ ၉ ပတိတ်လိက်လလောၚ်တြးရ။
နူကဵုထံၚ်ခရိုၚ် ဘာအၚ်ဂှ် ကောန်ထံၚ်ညးတြုံ ၃၅ တၠ၊ ကောန်ထံၚ်ညးဗြဴ ၃ တၠ၊ သီုဖအိုတ် ၃၈ တၠတံဂှ် ပ္ဍဲဂိတုအေဗရာ ၆ ဂှ် ကဵုလဝ်အခေါၚ်ဗၠးဒုဟ်ဒဏ်ရောၚ်။
ကဵုအခေါၚ်ဗၠးဒုဟ်ဒဏ်ဏံဝွံ ရန်ကဵု သ္ၚိကၟိန်အိန်ထံၚ်ညးတံ ဂွံကလေၚ်မံၚ်အာညးသ္ကံ မွဲစွံမွဲကရောံ တုပ်ပ်မာန်ဂှ်တုဲ ညးမၞုံကဵုဒဂေတ်ပဋိပတ်ခိုဟ်၊ ညးအာယုက်ဇၞော်တံ ကေုာံ ညးမၞုံကဵုယဲဝေဒနာတံဂှ် စွံအဓိကတုဲ ရုဲစှ်စၟဳစၟတ်လဝ်ရောၚ်ဂှ် ပ္ဍဲလိက်လလောၚ်တြး ဗၟံက်ထ္ၜးလဝ်ရ။
ညးကလိဂွံလဝ် အခေါၚ်ဗၠးဒုဟ်ဒဏ်တံဂှ် ညံၚ်ဟွံဂွံထပ်ကၠောန်ဒုဟ်ဗၠေတ်တ်ပၠန်ဂှ် ညးတာလျိုၚ် KNU ခရိုၚ်ဘာအၚ်တံ ကဵုလဝ်သြဝါဒတုဲ သီုထံက်ပၚ်ကဵုစရိတ်အာတရဴကေုာံ စရိတ်စတံဂှ်ကီု ညံၚ်ဂွံစိုပ်အာကွာန်ညးတံ ဗွဲမဂီုကၠီုဂှ်လေဝ် စဳဇန်ဖန်ဇန်ကဵုလဝ်ရောၚ် သ္ဂးရ။
အပ္ဍဲကဵုအခန်ကၞာ ကဵုအခေါၚ်ဗၠးဒုဟ်ဒဏ်ကောန်ထံၚ်တံဂှ် ညးအုပ်ကာ KNU ခရိုၚ်ဘာအၚ် ပဒိုသဝ်ပါဒဳဖိုဝ်၊ ဂဥုပ်ဗၠာဲသၟိၚ် ခရိုၚ်ဘာအၚ် သဝ်မံၚ်ကျဳ ကေုာံ က္ဍိုပ်သ္ကိုပ်ညးတာလျိုၚ်တၞဟ်တံ တိုန်စိုပ်လဝ်ရောၚ် အတိုၚ်လိက်လလောၚ်တြးဂှ် ဂွံတီကေတ်ရ။
ကောန်ထံၚ် ကလိဂွံအခေါၚ်ဗၠးဒုဟ်ဒဏ်တံဏံဂှ် ဒှ်ကောန်ဒုဟ် အမှုရာဇဝတ် ဗီုလဵုရောဟီုဂှ် လပါ်ဗဟဵု KNU ပတိတ်လိက် လလောၚ်တြး ကဵုလဝ်သမ္တီမွဲမွဲသာ် ဟၟဲဏီပုဟ်။
ပရိုၚ် – သြၚ်လောန်တိုင်မ်
Photo – KNU