တဳဟဳရာန်၊ အေဗရာ ၁၀
အပ္ဍဲဂိတုအေဗရာ ၈ တုဲကၠုၚ်ဏံ အေဿရေ ဗတိုက်လက်ဗနန်ဂှ် ဒှ်အရာဖံက်ပကဝ် တင်တုပ်စိုပ်ဒေါအ်ပန်ပှော် အမေရိကာန်-အဳရာန် ကၠးကၠးရောၚ် ဒုဝန်ဇၞော်ပရေၚ်ဍုၚ်သအာၚ်အဳရာန် ဟီုရ။
အပ္ဍဲဂိတုအေဗရာ ၈ ဟိုတ်နူအေဿရေဗတိုက်တုဲ မၞိဟ် ၂၀၃ တၠ ချိုတ်အာလဝ်ရောၚ် နူကဵုဌာနပရေၚ်ထတ်ယုက် လက်ဗနန် စောဲစပ်လဝ်ရ။
ယဝ်ရလပါ်အမေရိကာန် ဒေါအ်ကၠေံအရာဂၠာဲသၞဗတိုက်တံမ္ဂး ပ္ၚံက်ၜဳဟဝ်မုဇ်ဂှ် ကလေၚ်ပံက်ကဵုရောၚ် အဳရာန် ဟီုလဝ်ရ။
အပ္ဍဲဍုၚ်ဗေရောတ် ဟိုတ်နူကတဵုဒှ်လဝ် အကာဲအရာဒးဖေက်လကိုတ်တံတုဲ မူဝါဒဍာ်ဇမၠိၚ် အေဿရေဂှ်တှ်ေ သွက်ဂွံဗတိုက်ဖအိုတ်ကၠေံရောၚ် ဌာန်ပရိုၚ်ဗဳဗဳသဳ ဗၟံက်ထ္ၜးလဝ်ရ။
စဵုကဵုလပါ်အဳရာန်တုပ်စိုပ်ဒေါအ်ပန်ပှော်ညးသ္ကံဍာံဍာံဂှ် ဒပ်ပၞာန်အမေရိကာန်တံ ဆက်နွံအာပ္ဍဲဒေသဂှ်ရောၚ် သမ္မတအမေရိကာန် ဒဝ်နယ်ထရ ဟီုရ။
အမေရိကာန် ကဵု အဳရာန် ဒေါအ်ပန်ပှော်ညးသ္ကံ ၜိုန်ရလလောၚ်တြးလဝ် ပ္ဍဲဂိတုအေဗရာ ၇ ကီုလေဝ် ဆေၚ်စပ်ကဵုအဳရာန်တုပ်စိုပ်ဍာံ ဟွံဍာံဂှ် ပရေၚ်ကယျာန် နွံမံၚ်ရ။
အပ္ဍဲကဵုတင်တုပ်စိုပ်ကဵုအဳရာန်ဂှ်တှ်ေ အရာဟွံပတိတ်လွဟ်နျူကလဳယျာ၊ အရာကလေၚ်ပံက်ပ္ၚံက်ၜဳဟဝ်မုဇ်တံ ပါလုပ်မံၚ်ရောၚ် ထရသ္ဂးရ။
ဆဂး စဵုကဵုစိုပ်ဂိတုအေဗရာ ၈ ဂှ် နူကဵုအဳရာန် ဆက်ကၟာတ်လဝ် ပ္ၚံက်ၜဳဟဝ်မုဇ်ဖိုဟ်တုဲ လပါ်အမေရိကာန်ဂှ်တှ်ေ ပရေၚ်တတ်ကၠောံအာကၠုၚ်ဂှ် ပြေပြံၚ်ကၠုၚ်ယျရောၚ် ဟီုလဝ်ရ။
အကြာဏံ အဂႅလိက် ဒုၚ်တၠုၚ်ပရေၚ်ဒေါအ်ပန်ပှော် အမေရိကာန် ကဵု အဳရာန်တုဲ သွက်တင်တုပ်စိုပ် ဂွံဗိုန်ဗတ်အာဂှ် ဆက်ကၠောန်အာရောၚ် ဟီုရ။
ညးစၞးအဳရာန်တံ သွက်ဂွံသဳကၠဳကဵုအမေရိကာန် ပ္ဍဲအေဿလာမ်မာဗတ်ဂှ် ကၠုၚ်မံၚ်ယျရောၚ် အမာတ်ကလုတ်အဳရာန် နူပါကေဿတာန် ချူဗၟံက်ပတိုန်လဝ် ပ္ဍဲမဳဒဳယာမှာဇန်ကီုလေဝ် ကြဴနူဂှ် ကလေၚ်ပလီုထောံရ။
နကဵုအေဿရေတှ်ေ ဂကောံဟိတ်ဇဗဝ်လာ ပ္ဍဲလက်ဗနန်ဂှ် နွံမံၚ်ဒၞာဲလဵုဒှ်ဒှ် ဗတိုက်အာရောၚ် သ္ကိုပ်ဝန်ဇၞော် နေတန်ညာဟု ဟီုလဝ်ရ။
Ref:BBC