မတ်မလီု၊ အေဗရာ ၁၁
အပ္ဍဲတွဵုရးမန် သွက်ပရေၚ်မၞိဟ် ပရေၚ်ပိုန်ဒြပ်ညးဍုၚ်ကွာန်တံ ကဏ္ဍနာနာ ညံၚ်ဂွံဇၞော်မောဝ် ဖောအ်ဗြဳတဴတက်တိုန်ဂှ် ဂစာန်ကၠောန်အာရောၚ် သ္ကိုပ်ဝန်ဇၞော်တွဵုရးမန်တၟိ ဒုသ္ကိုပ်ပၞာန် အံၚ်ဝေန်တာန် ဟီုရ။
ကောံဓရီုစၠတ်ထဝ်တွဵုရးမန် ကၠောန်ဗဒှ်လဝ် ပ္ဍဲဂိတုအေဗရာ ၁၀ ဏံ အခိၚ်ဟီုဂလာန်ဂှ်တှ်ေ သ္ကိုပ်ဝန်ဇၞော်တၟိ ဒုသ္ကိုပ်ပၞာန် အံၚ်ဝေန်တာန် ကဵုလဝ်ကတိပါၚ် ဟီုဂးဏာကီုရ။
သ္ကိုပ်ဝန်ဇၞော်တၟိ ဒုသ္ကိုပ်ပၞာန် အံၚ်ဝေန်တာန်ဂှ် ပ္ဍဲတွဵုရးမန် ပရေၚ်ပညာ၊ ပရေၚ်ထတ်ယုက်၊ တဵုလွဳ၊ လွဳလွတ်၊ ညံၚ်ဂွံကလိဂွံဍာ် ကေုာံ သွက်သ္ဂောံဂွံဓာတ်လလဳတံဂှ်လေဝ် ဂစာန်ကၠောန်အာရောၚ် သ္ဂးရ။
အရာသွက်ဂွံထမံက်အာရုပ်ရဴ သၞောတ်ပရေၚ်အုပ်ဓုပ်ဂှ် သုၚ်စောဲအာ သၞောတ်အုပ်ဓုပ်ခိုဟ်ဆာဲ သ္ပလဝ်ဗဟဵုကဵု ညးဍုၚ်ကွာန်တုဲ သွက်ဒေသဂွံတန်ကြန်ညိၚ်ဝပ် ကေုာံဇၞော်မောဝ်တဴတက်ဖောအ်ဗြဳ တံဂှ်လေဝ် ဂစာန်အာရောၚ် ဟီုရ။
တုဲပၠန် အရာမထိၚ်ပ္ညဳညးသ္ကံ အကြာတိုင်ခဳ ခၞံပတိတ်ဥပဒေ၊ တိုင်ခဳပရေၚ်အုပ်ဓုပ်ကေုာံ တိုင်ခဳ စဳရေၚ်သၞောဝ်ဓဝ်တံဂှ် ဒဂေတ်ဗက်အာ အတိုၚ်သ္ဇိုၚ်သၞောဝ်ဥပဒေတုဲ သွက်ပရေၚ်ဇၞော်မောဝ်တဴတက်ဒေသ ဂှ်လေဝ် ကရောံစၠတ်ထဝ် ကၠောန်အာဍာ်ဒကေဝ်ညဳညဳရောၚ် ဟီုဂးလဝ်ရ။
ညးစၞးစၠတ်ထဝ်ဒပ်ပၞာန် ဒုသ္ကိုပ်ပၞာန် အံၚ်ဝေန်တာန်ဝွံ အပ္ဍဲကောံဓရီု စၠတ်ထဝ်တွဵုရးမန်ကၠောန်ဗဒှ်လဝ် ဂိတုအေဗရာ ၆ တေံဂှ် ညးဒစဵုဒစးဟၟဲ သ္ပဒတန်ခါန်ကၞက်လဝ် မဒှ်ရ။
ပရိုၚ် – သြၚ်လောန်တိုင်မ်
Photo – MOI