ဘာအၚ်၊ အေဗရာ ၁၁
ကြဴနူသ္ပဒတန် ပဋိညာဉ်ကဝ်တူလေဝ် ကာလပၠန်ဂတးတုဲဒှ်အာတုဲ ဒက်ပတန်လဝ် ကံၚ်သဳတေၚ်ဗၚ်ကဵုကသပ် ကေုာံ ကံၚ်သဳပရေၚ်အုပ်ဓုပ် ကဝ်တူလေဝ်တုဲယျရောၚ် နူကဵုဗော်သွးကောန်ဂကူ ကရေၚ် KNU လလောၚ်တြးလဝ် ပ္ဍဲဂိတုအေဗရာ ၁၀ ရ။
စနူဂိတုမာတ် ၃၁ စဵုကဵုစိုပ် ဂိတုအေဗရာ ၂ ကၠောန်ဗ္ဒျ်လဝ် ပေါဲသဳကၠဳဆေၚ်စပ်ကဵု အရာဒက်ပ္တန် ဖိတ်ဒရေဝ်ယူနေတ် ကဝ်တူလေဝ် သ္ပဒတန်ဏာ မူအပြောံပဋိညာဉ်ကဝ်တူလေဝ် ကာလပၠန်ဂတး မချူပဠေဝ်ကၠုၚ်လဝ် ပွိုၚ် ၂ သၞာံပြၚ်ဂှ်ရောၚ်။
မွဲအခိၚ်ဓဝ် ကရောံသ္ပဒတန်အာ ပဋိညာဉ်ကဝ်တူလေဝ် ကာလပၠန်ဂတးဏံ ဒက်ပ္တန်လဝ် ကံၚ်သဳတေၚ်ဗၚ်ကဵုကသပ် ကဝ်တူလေဝ် KCC ကေုာံ ကံၚ်သဳပရေၚ်အုပ်ဓုပ်ကဝ်တူလေဝ် KGC အတိုၚ်ၝောံပိုဒ် ၃၊ ပိုဒ် ၃ ကေုာံ ၝောံပိုဒ် ၃၊ ပိုဒ် ၄ နူပဋိညာဉ်ကဝ်တူလေဝ်ရောၚ် KNU သ္ဂးလဝ်ရ။
တာလျိုၚ်ကံၚ်သဳတေၚ်ဗၚ် ကဵုကသပ်ကဝ်တူလေဝ် KCC ဂှ်တှ်ေ ပ္ဍဲအရာဗၟံက်ရုပ်ရဴဒက်ပ္တန် ဖိတ်ဒရေဝ်ယူနေတ်ကဝ်တူလေဝ်ဂှ် ညံၚ်ပရေၚ်သ္ပစၞး နူဒေသန္တရတံ ဂွံသ္ကာတ်မြဟ်တိုန် ကေုာံ သွက်ဂွံကလိဂွံ တၚ်ကသပ်ဂၞန် ကေုာံ ပရေၚ်ထံက်ပၚ်နဲကဲပညာ နွံပၟိက်တံဂှ် သွက်ဂွံရေၚ်တၠုၚ် ပၠတရဴအာတုဲ စရၚ်ယၟုပူဂဵုမပါလုပ် ပ္ဍဲ KCC တံဂှ် ပြဟ်ဟ်ဏံ သ္ပဒတန်တုဲဒှ်ယျရောၚ် KNU ဟီုရ။
တာလျိုၚ် ကံၚ်သဳပရေၚ်အုပ်ဓုပ် ကဝ်တူလေဝ် KGC ဂှ်တှ်ေ စနူဌာန ၇ ဌာန နူအပ္ဍဲဌာနအုပ်ဓုပ် KNU မၞုံ ၁၂ ဌာနတုဲ သွက်ဌာနတံဏံ ညံၚ်ဂွံပါလုပ်အာသၠဲသၠဲလးလး ကေုာံ ဇြဟတ်ဌာနအစောန်စရာဲ ဍာ်ဒကေဝ် ညံၚ်ဇြဟတ်ပဵုခိုဟ်အာ အတိုၚ်သၞောတ်ဗ္ၜတ်ပရေၚ်အုပ်ဓုပ် မခိုဟ်ဆာဲရောၚ် ပ္ဍဲလိက်လလောၚ်တြး ဗၟံက်ထ္ၜးလဝ်ရ။
တုဲပၠန် ဌာနပရေၚ်ညးဗြဴ၊ သၟတ်၊ ကောန်ၚာ်တံဂှ် ဒက်ပ္တန်လဝ်နဒဒှ် ဌာနမရနုက် ၈ သွက် KGC တုဲ စရၚ်ယၟုသ္ကိုပ်ဌာန ၈ ဌာန မပါလုပ်ပ္ဍဲ KGC တံဂှ်လေဝ် ပြဟ်ဟ်ဏံ သ္ပဒတန်တုဲဒှ်ယျရောၚ်ဂှ် ပါမံၚ် ပ္ဍဲလိက်လလောၚ်တြးရ။
ပ္ဍဲပဋိညာဉ်ကဝ်တူလေဝ်ဂှ် ဒုၚ်သ္ဇိုၚ်ကဵုလၟေၚ်ပရေၚ်ကမၠောန် ဒက်ပ္တန်ဖိတ်ဒရေဝ် “နူသၟဝ်တိုန်လ္တူ” တုဲ အခိၚ်ဒက်ပ္တန်ဖိတ်ဒရေဝ် ယူနေတ်ကဝ်တူလေဝ်မွဲဂှ် ဆက်စၠောံပ္ညဳပ္ညပ်ကဵု ဖိတ်ဒရေဝ်ယူနေတ် တၞဟ်ဟ်တံတုဲ ဗတိုက်အာသၞောတ်တၠအဝဵုပၞာန် ကဏ္ဍနာနာကေုာံ သွက်ဂွံပြံၚ်သၠာဲအာ ကာလပြံၚ်သၠာဲကၠောံအာ ကြဴနူကာလ ပၠန်ဂတးလောန် ဗွဲမၞုံကဵုသၞောတ်စှ်ေစှ်ေဂှ် ဒှ်လဂါံဇိုၚ်ကိစ္စဇၞော်မွဲရောၚ် နူကဵု KNU သ္ဂးရ။
ပဋိညာဉ်ကဝ်တူလေဝ် ကာလပၠန်ဂတး သ္ပလဝ်ဒတန်လၟုဟ်ဂှ် သွက်ညးဍုၚ်ကွာန်ဂမၠိုၚ် ဂွံတီလ္ၚတ်မာန်ဂှ် ခြာဟွံလံ သွက်ဂွံ လလောၚ်တြးပတိတ်အာနွံတုဲ ဆေၚ်စပ်ကဵုတင်ပရူပရာ ပ္ဍဲပဋိညာဉ်ဂှ် ယဝ်ရမိက်ဂွံသၟာန်ကီု တၚ်ကဵုကသပ်ကီုနွံမ္ဂး ဆက်စၠောံအာ အဳမေလ် ကေုာံ လၟေၚ်ဖုန် Signal တံမာန်ရောၚ် လလောၚ်တြးလဝ်ရ။
စပ်ကဵု ပဋိညာဉ်ကဝ်တူလေဝ်တုဲ E-mail: [email protected] ကေုာံ Signal +66 98 687 9384, +66 80 228 0996 တံဂှ် ဆက်စၠောံသၟာန်၊ ကဵုကသပ်မာန်ရောၚ် ဗၟံက်ထ္ၜးလဝ်ရ။
ဒုၚ်သ္ဇိုၚ်ကဵု ပဋိညာဉ်ကဝ်တူလေဝ် ကာလပၠန်ဂတးတုဲ နကဵုပရေၚ်ပၠတရဴပရေၚ်ဍုၚ်ကွာန် KNU ကေုာံ ညးစၞးနူ ၇ ခရိုၚ်တံ မွဲကရောံကဵု ဍာ်ဒကေဝ်သၞောတ်ဗ္ၜတ်ပါ်ပရအ်လဝ်တံတုဲ သွက်ဖိတ်ဒရေဝ်ယူနေတ်ကဝ်တူလေဝ် မၞုံကဵုပရေၚ်သ္ပစၞးဍိုက်ပေၚ်၊ မၞုံကဵုအခေါၚ်ပတိတ်သၞောဝ် အလဵုအခေါၚ်ခၞံဗ္ဒျ်ကေတ်ဇကုဂှ် အတိုၚ်နဲကဲဒဳမဝ်ကရေဇြဳ ဆက်တုဲထမံက်အာရုပ်ရဴရောၚ် နူဗဟဵု KNU လလောၚ်တြးကဵုလဝ်သမ္တီနွံရ။
ပရိုၚ် – သြၚ်လောန်တိုင်မ်
Photo – KNU