မတ်မလီု၊ အေဗရာ ၁၁
ကောံဓရီုစၠတ်ထဝ်တွဵုရးမန်ဂှ် ဒေါအ်ဇူအာ ပွိုၚ်ၜါဂိတုကဝက်တုဲ စၠတ်ထဝ်တွဵုရးမန် တတိယဝါ ကောံဓရီုလၟေၚ်ဍာံ အလန်ဒုတိယ ဂတဏံဂှ် သွက်ဂွံကလေၚ်ကၠောန်ဗဒှ်အာ အပ္ဍဲဂိတုဂျူလာၚ်တေံ ရောၚ် ဂွံတီကေတ် နူစၠတ်ထဝ်တွဵုရးရ။
ကောံဓရီုလၟေၚ်ဍာံအလန်ပထမ စၠတ်ထဝ်တွဵုရးမန် တတိယဝါဂှ် စနူဂိတုမာတ် ၂၀ တေံကၠောန်ဗဒှ်လဝ် ပွိုၚ်ဒစာံတ္ၚဲတုဲ၊ ဂိတုအေဗရာ ၁၀ ဂှ်တှ်ေ ဒှ်ကောံဓရီုစၠတ်ထဝ် တ္ၚဲလက္ကရဴအိုတ်ရောၚ်။
အခိၚ်ကောံဓရီု စၠတ်ထဝ်ဒေါအ်ဇူမံၚ်ဏံမ္ဂး ညးစၞးအမာတ်တံ ညံၚ်ဂွံစွံအာရီုကၠောန်အာ အရာကိစ္စဇၞော် သွက်ညးဍုၚ်ကွာန် ရဲကဵုလဝ်မာဲတံညိဂှ် ဥက္ကဌစၠတ်ထဝ်တွဵုရးမန် ဥူတိတ်ထိုဲ ဗ္တိုက်ဖ္အောဝ်လဝ် အပ္ဍဲတ္ၚဲကောံဓရီု လက္ကရဴအိုတ်ဂှ်ရ။
တုဲပၠန် နကဵုညးစၞးစၠတ်ထဝ်တံဂှ် ညံၚ်ဂွံဒှ်ညးဗပေၚ်ကဵုပၟိက်ဆန္ဒ ညးဍုၚ်ကွာန်တံမာန်ဂှ် ဂစာန်ကၠောန်အာညိဂှ်လေဝ် ဟီုဗကန်လဝ်ရ။
အပ္ဍဲကောံဓရီု အလန်ပထမ စၠတ်ထဝ်တွဵုရးမန်တတိယဝါဂှ် သ္ပဒတန်ခါန်ကၞက်ကဵုလဝ် သ္ကိုပ်ဝန်ဇၞော်တွဵုရးမန် ကေုာံ ဝန်ဇၞော် အလဵုအသဳတံကီု၊ ဂဥုပ်နာဲဗ္စာတွဵုရး၊ ဂဥုပ်သၟာဥပဒေတွဵုရး ကေုာံ ဂဥုပ်စၟဳစၟတ်စရၚ်တွဵုရးတံကီုရ။
တုဲပၠန် ကမ္မတဳဆေၚ်စပ်ကဵုပရေၚ်စၠတ်ထဝ် ၅ ဂကောံဂှ် သ္ပဒတန်ဒက်ပ္တန်လဝ်တုဲ ဒၞာဲဥက္ကဌ ၄ ဂကောံဂှ်တှ်ေ နူကဵုဗော်ပျဳခိုင်ဖျိုဝ် ကေတ်လဝ်ဒၞာဲရ။
ပရိုၚ် – သြၚ်လောန်တိုင်မ်
Photo – MOI