နေပျဳဒဝ်၊ အေဗရာ ၁၂
လၟေၚ်တရဴ ပရေၚ်ဒေါအ်ပန်ပှော်အလုံမွဲဍုၚ် NCA ဂှ် နကဵုညး ဟွံဒှ်ညံၚ်ဂွံဒှ် ဆက်တုဲဒးထမံက်အာရုပ်ရဴရောၚ် က္ဍိုပ်သ္ကိုပ်ပၞာန် ဟွံဒးပြိုၚ်မာဲ ဒှ်ကၠုၚ်သမ္မတဂှ် ဟီုလဝ်ရ။
အပ္ဍဲဂိတုအေဗရာ ၁၀ လောန်ကၠုၚ်ဏံ ဥူမေန်အံၚ်လှိုၚ် ဒှ်ကၠုၚ်သမ္မတတုဲ အခိၚ်ဟီုဂလာန် ကုပူဂဵုအဆံၚ်ကၟိန်ဍုၚ်၊ ဂကောံအလဵုအသဳကၟိန်ဍုၚ်၊ သ္ကိုပ်ဝန်ဇၞော်ရးဒေသကေုာံ တွဵုရး သီုကဵုဒုဝန်ဇၞော်တံဂှ် ဟီုစုတ်လဝ်ဂလာန်ဏံရောၚ်။
အပ္ဍဲကဵုပေါဲရုဲမာဲနာနာ ၂၀၂၀ တေံဂှ် စပ်ကဵုမာဲအလီ၊ မာဲကမၠတ် ဟိုတ်နူဟွံသ္ၚေဝ်မၠာ်ရံၚ် ဗွဲမဍာံစၟတ်တုဲ နကဵုလညာတ်သမ္တီ ဗၠေတ်ဗၠေၚ်တံကီု ပရေၚ်ပလီုပလာ် နူကဵုအပ္ဍဲဍုၚ်၊ မ္ၚးဍုၚ်တံတုဲ ပရေၚ်ရုသံၚ်ပကီုပရာတ် ကတဵုဒှ်ကၠုၚ် အလုံဍုၚ်မွဲရောၚ် သမ္မတ ဥူမေန်အံၚ်လှိုၚ် သ္ဂးရ။။
လ္တူအရာဏံ ဂကောံရပ်လွဟ်ကောန်ဍုၚ်အရေၚ်လ္ၚဵု လစွံစိုတ်ဟွံတပ်တးတံလေဝ် အခိၚ်ပေါဲရုသံၚ်မံၚ်ဂှ် လုပ်လးသကဝ်၊ ဒၞာဲပၟတ်တူဂှ်ထ္ၜကဵုကျာတုဲ ဍုၚ်ညံၚ်ဂွံ စှ်ေက္တိုၚ်ဒဒိုက်နာနာသာ်တံဂှ် နကဵုနဲကဲနာနာ ဖန်ဇန်ပလီုပလာ်ကၠုၚ်လဝ်ရောၚ် စောဲစပ်လဝ်ရ။
အခိၚ်လၟုဟ်ဏံ ဒးဆဵုဂဗမံၚ် သဘဴလစွံစိုတ်တၞဟ်ခြာဒၟံၚ်ဂှ်ကီု၊ ပၟိက်ကဵုဆန္ဒ အရာထေက်ကဵုဒးဒှ်ထေက်တံ သောၚ်ကလးမံၚ် နကဵုနဲကဲရပ်လွဟ်တံဂှ် ဒှ်အရာဗၠေတ်ဗၠေၚ်မံၚ် ဗွဲမလောန်ရောၚ် ဒးတီဒးဒုၚ်တဲတုဲ ရံၚ်ကဵုဂုဏ်ဖဵုတသိုက်ဍုၚ် ကေုာံ ညးဍုၚ်ကွာန်သွက်အနာဂတ်ကၟိန်ဍုၚ်မ္ဂး အရာဗၠေတ်ဗၠေၚ်မံၚ်ဏံဂှ် ဗွဲမဂတာပ်အခိၚ် ထေက်ကဵုဒးပလေဝ်ပလေတ်အာရောၚ် သ္ဂးရ။
နကဵုဂကောံရပ်လွဟ်ကောန်ဍုၚ်အရေၚ်ကေုာံ ညးကၠောန်ဗဒှ်မံၚ် ပရေၚ်ပကီုပရာတ်တံလေဝ် အရာဍာံကဵု ဗၠေတ်၊ ခိုဟ်ကဵုပရေံ၊ ဖဵုကဵုဒုဟ်တံဂှ် ဒးချပ်ဗ္စာချိုတ်တ်ပၠိုတ်တ်တုဲ သွက်ဂုဏ်ဖဵုတသိုက်ဍုၚ်ကေုာံ ညးဍုၚ်ကွာန်ဂှ် ညံၚ်ဂွံပံၚ်တောဲကၠောန်အာ မွဲကရောံညိဂှ် ဗ္တိုက်ဖ္အောဝ်လဝ်ရ။
သမ္မတ ဥူမေန်အံၚ်လှိုၚ်ဝွံ ပြသၞာဍုၚ်ဗၟာ ကတဵုဒှ်မံၚ်လၟုဟ်ဂှ် သီုညးဖအိုတ် ညံၚ်ဂွံသဳကၠဳပ္ညဳပ္ညပ်ဂၠာဲအာသွဟ် နကဵုပရေၚ်ညဳသၟဟ်ဇြဟတ်တၟိတံတုဲ တဲညဳကသုညဳ ညံၚ်ဂွံဒက်ပ္တန်အာဍုၚ်တၟိညိဂှ် ဘိက်ပၟိၚ်လဝ်ရ။
ပရိုၚ် – သြၚ်လောန်တိုင်မ်
Photo – MOI