မတ်မလီု၊ အေဗရာ ၁၂
ညးစၞးဒပ်ပၞာန်ကဵု ဗော်ပျဳခိုင်ဖျိုဝ်တံ သီကေတ်လဝ်အဝဵု လ္တူဂကောံအလဵုအသဳ တွဵုရးမန်တၟိဂှ် တၚ်စၟဳစပရေၚ်မွဲမွဲသာ်ဟၟဲရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုင်မ် ရ။
အပ္ဍဲဂိတုအေဗရာ ၁၀ တုဲကၠုၚ်ဏံ ဂကောံအလဵုအသဳတွဵုရးမန်တၟိ သ္ကိုပ်ဝန်ဇၞော်ကေုာံ ဝန်ဇၞော် ၁၁ တၠတံ ဒုၚ်ဂတိယဵုသစ္စာ အပ္ဍဲစၠတ်ထဝ်တွဵုရးမန်တုဲ စယိုက်ဂၠေၚ်မံၚ်တာလျိုၚ်အိုတ်ယျ။
သွက်ပရေၚ်အုပ်ဓလီုသၞောဝ်ဓဝ်၊ ပရေၚ်တန်ကြန်ၜိုဟ်သြိုဟ်၊ ပရေၚ်ဇၞော်မောဝ်ဒေသ ကေုာံ ပရေၚ်ဇၞော်မောဝ်တောတက် ပရေၚ်မၞိဟ်ပရေၚ်ပိုန်ဒြပ်တံမ္ဂး နူကဵုဂကောံအလဵုအသဳတွဵုရးမန်တၟိဏံ အရာသွက်ဂွံပတေဟ်စဟၟဲပုဟ် ညးဒေသတံသ္ဂးမံၚ်အိုတ်ရ။
ဂကောံအလဵုအသဳတွဵုရးမန်တၟိဏံဝွံ ဟိုတ်နူဒှ်အလဵုအသဳ ညးဍုၚ်ကွာန်တံ ရုဲစှ်လဝ်ဟွံသေၚ်တုဲ တၚ်သွက်ဂွံစၟဳစဟၟဲပုဟ် ညးဒေသတွဵုရးမန် ဟွံမိက်ထမံက်ယၟုမွဲတၠ ဟီုကဵု ဌာန်ပရိုၚ်သြၚ်လောန်တိုင်မ် ရ။
“တင်စၟဳစဇၞော်ဇၞော် ဟၟဲပုဟ်။ အရာစၟဳစဟွံဂွံဂှ်တှ်ေ ဟိုတ်နူဒှ်အလဵုအသဳ တိုန်ကၠုၚ်နူပေါဲရုဲမာဲ ညးဍုၚ်ကွာန် ၅၀% ပါလုပ်ကၠုၚ်ချိုတ်တ်ပၠိုတ်တ်ဟွံသေၚ်တုဲ ဗွဲမဂၠိုၚ်စၟဳစ ဟွံဂွံပုဟ်။ သၞောတ်ဗဟဵုထိၚ်ချုက်ညးတံဂှ် ဆက်နွံမံၚ်ဖိုဟ်ရောၚ် ထေၚ်ကေတ်ရ။ ဟိုတ်ဂှ်ရ ဗွဲမဂၠိုၚ် ဟွံစၟဳစလဝ်ပုဟ်” သာ်ဝွံ သ္ဂးရ။
တုဲပၠန် ညးသ္ကိုပ်သ္ကပၠတရဴ အုပ်ဓုပ်အာတွဵုရးမန်ဂှ် ဒှ်မၞိဟ်နူဒပ်ပၞာန်တုဲ အခက်အခုဲညးဍုၚ်ကွာန်ကတဵုဒှ်မံၚ် ပ္ဍဲဗလးတိဍာံဍာံတံဂှ် သောၚ်ကလးကဵုဟွံမာန်တုဲ အတိုၚ်အခိုက်ဒပ်ပၞာန် ဆက်အုပ်ဓုပ်အာနကဵုအမိၚ်မွဲဟေၚ်ရ ဒှ်မာန်ရောၚ် ညးဆက်ဟီုရ။
အပ္ဍဲဂကောံအလဵုအသဳတွဵုရးမန် ဝန်ဇၞော် ၁၁ တၠနွံမံၚ်ဂှ် နူဒပ်ပၞာန်ကေုာံ ဗော်ပျဳခိုင်ဖျိုဝ်တံ ကေတ်လဝ်ဒၞာဲဝန်ဇၞော်ဂှ် ၈ ဒၞာဲ၊ ဗော်ညီသၟဟ်မန် ဝန်ဇၞော် ၂ တၠ၊ ဗော်တောတက်ကောန်ဂကူပအိုဝ် ဝန်ဇၞော် ၁ တၠ ကလိဂွံလဝ်ဒၞာဲရ။
ညးစၞးဒပ်ပၞာန်တံဂှ်တှ်ေ ဒုသ္ကိုပ်ပၞာန် အံၚ်ဝေန်တာန်ဂှ် နဒဒှ်သ္ကိုပ်ဝန်ဇၞော်တွဵုရးမန်၊ သ္ကိုပ်ဗိုလ်ဇၞော် ကျဝ်သွာမျေအ် ဂှ် ဝန်ဇၞော်ပရေၚ်ဂီုကၠီု ကေုာံ ပရေၚ်ဒေသပယျဵုကေတ်လဝ်ဒၞာဲရ။
အလဵုအသဳတွဵုရးမန်တၟိဏံဝွံ ဒးအာသၟဝ်ပရေၚ်ရပ်ဇုက် မၞိဟ်တြေံတံဒှ်တုဲ မုလေဝ်သွက်ဂွံစၟဳစဟွံဂွံပုဟ် ညးဒေသတွဵုရးမန် ဟွံမိက်ထမံက်ယၟု တၞဟ်မွဲတၠပၠန် ဟီုကဵု ဌာန်ပရိုၚ်သြၚ်လောန်တိုင်မ်ရ။
“နကဵုအဲမ္ဂးတှ်ေ မုလေဝ်ဟွံတၟေၚ်ပုဟ် ထေၚ်ရ။ ဆက်အာမံၚ် အတိုၚ်တြေံဟေၚ်ရ။ အရာဒးအာသၟဝ်တဲ ပရေၚ်ရပ်ဇုက်မၞိဟ်တြေံတံဂှ်တှ်ေ မုလေဝ်တၟေၚ်တၟဟ်ဟၟဲကွေံကွေံပုဟ်။ မုလေဝ်ဟွံစၟဳစလဝ်ပုဟ်။ သွက်ဒပ်ပၞာန်ညးတံ ဂွံပြေပြံၚ်ဟေၚ် ညးတံဆက်အာရောၚ်” သာ်ဝွံ သ္ဂးရ။
က္ဍိုပ်သ္ကိုပ်ပၞာန် ဒှ်ကၠုၚ်သမ္မတ ဟွံဒးပြိုၚ်လဝ်မာဲဝွံ ခါန်ကၞက်ကဵုလဝ် သ္ကိုပ်ဝန်ဇၞော်တွဵုရးမန်တၟိ ဒုသ္ကိုပ်ပၞာန် အံၚ်ဝေန်တာန်ဂှ်တှ်ေ အပ္ဍဲတွဵုရးမန် သွက်ပရေၚ်မၞိဟ်ပရေၚ်ပိုန်ဒြပ် ညးဍုၚ်ကွာန်တံ ဂွံဇၞော်မောဝ် ဖောအ်ဗြဳအာ လပါ်ကဏ္ဍနာနာတံဂှ် ဂစာန်တုဲကၠောန် အာရောၚ် ပ္ဍဲကောံဓရီုစၠတ်ထဝ် ဂိတုအေဗရာ ၁၀ တေံဂှ် ဟီုလဝ်ဂလာန်ရ။
တုဲပၠန် ပ္ဍဲအရာထမံက်အာရုပ်ရဴ သၞောတ်ပရေၚ်အုပ်ဓုပ်မ္ဂး သုၚ်စောဲအာသၞောတ်အုပ်ဓုပ် သ္ပဗဟဵုကဵုညးဍုၚ်ကွာန်တုဲ သွက်ဒေသ ဂွံတန်ကြန်ၜိုဟ်သြိုဟ်အာ ကေုာံ ပရေၚ်ဖောအ်ဗြဳတံဂှ်လေဝ် ဂစာန်ကၠောန်အာရောၚ် ကဵုလဝ်ကတိနွံရ။
ပရိုၚ် – သြၚ်လောန်တိုင်မ်
Photo – MOI