နေပျဳဒဝ်၊ အေဗရာ ၁၂
အလဵုအသဳညးဍုၚ်ကွာန်တံ ရုဲစှ်လဝ်ဂှ် က္ဍိုပ်သ္ကိုပ်ပၞာန် ကြဴနူဖျေံထောံ သီကေတ်အဝဵုဍုၚ်တုဲ ညးဂစာန်မံၚ် ညံၚ်ဟွံဒးဗလးအဝဵုသီုဖအိုတ် ဟီုမ္ဂး ဆၜိုတ်အယာံမာတ် ပြံၚ်လှာဲကယျိုၚ်သၟးရဒှ်တုဲ မုဟွံတၟေၚ်တၞဟ်ခြာမံၚ် နူကဵုစၞောန်ဇာတ်တြေံတေံဂှ်ရ။
စနူအခိၚ်သီအဝဵု ၂၀၂၁ စဵုကဵုစိုပ်အခိၚ် ကၠောန်ပေါဲရုဲမာဲ သ္ကုတ်ကဵုသ္ကုတ်ဏံ နကဵုဒပ်ပၞာန် သ္ကိုပ်သ္ကပၠတရဴတုဲ အရာကြဴဇာကၠုၚ်လဝ် သွက်ဂွံသၠောဲပြံၚ်အပ်ပြာပ်တာလျိုၚ်ကၟိန်ဍုၚ် ကုဗော်ဇၞးမာဲတံဟီုဂှ် နတဲစှ်ေစှ်ေဂှ်တှ်ေ အဝဵုဂှ် ညံၚ်ဂွံနွံမံၚ်အပ္ဍဲတဲက္ဍိုပ်သ္ကိုပ်ပၞာန်ဟေၚ် ဆအယာံမာတ်ပြံၚ်လှာဲဗီုပြၚ်တုဲ ရပ်လဝ်ဇုက်ရောၚ်။
တၠုၚ်လအာ ဂကောံအလဵုအသဳကၟိန်ဍုၚ်တၟိ က္ဍိုပ်သ္ကိုပ်ပၞာန်ပၠတရဴလဝ်ဏံ ဒုၚ်လဝ်ယၟု အလဵုအသဳဒုၚ်ရုဲစှ် ဟီုကီုလေဝ် ညးဍုၚ်ကွာန်တံဆဂွံပါလုပ်လဝ်ညိညဓဝ်တုဲ ဒက်ပ္တန်လဝ် နကဵုညးတာလျိုၚ်ပၞာန်တြေံ ဗွဲမဂၠိုၚ်တံရောၚ်။
အပ္ဍဲဝန်ဇၞော် ၃၀ တၠ နူဌာနဝန်ဇၞော်ကၟိန်ဍုၚ် ၃၁ ဌာနမ္ဂး ညးတာလျိုၚ်ပၞာန်တြေံ ၂၁ တၠ ပါလုပ်မံၚ်တုဲ တုပ်တဴညံၚ်ရဴသာ်ဂှ်ကီု ဥက္ကဌကံၚ်သဳနေပျဳဒဝ် ကေုာံ သ္ကိုပ်ဝန်ဇၞော် ရးဒေသ/တွဵုရး ဗွဲမဂၠိုၚ်တံဂှ်လေဝ် ခါန်ကၞက်စုတ်လဝ် ညးတာလျိုၚ်ပၞာန်တြေံတံဂှ် ဂွံဆဵုကေတ်ရ။
သမ္မတမေန်အံၚ်လှိုၚ် ထမံက်ထ္ၜးမံၚ်ရုပ်ရဴညံၚ်ရဴဗီုပြၚ် အလဵုအသဳဒုၚ်ရုဲစှ်လဝ်ဂှ် ဒုၚ်သ္ဇိုၚ်ကဵုကောန်ကွးအရေၚ် ညးတာလျိုၚ်ပၞာန်တံတုဲ သွက်ဂွံထိၚ်ချုက်အဝဵုအိုဿီု ရန်တၟံလဝ်ရောၚ် နူကဵုဂကောံလ္ၚတ် ပရေၚ်ပၞာန်ကေုာံ ပရေၚ်ဂီုကၠီုဗၟာ MDSI သ္ၚဳဂၠိပ်ထံက်ထ္ၜးလဝ်ရ။
အပ္ဍဲကံၚ်သဳစဵုဒၞာကောန်ဂကူ ကေုာံ ပရေၚ်ဂီုကၠီု ကလေၚ်ဒက်ပ္တန်လဝ်တၟိဂှ်လေဝ် ဂဥုပ်ဒပ်တြေံက္ဍိုပ်သ္ကိုပ်ပၞာန်ဂှ် ကေတ်လဝ်ဒၞာဲသမ္မတဍုၚ်တုဲ ညးပါလုပ်ဂကောံကံၚ်သဳ ဗွဲမဂၠိုၚ်တံဂှ် ဒှ်မံၚ်သ္ကိုပ်ပၞာန်ကေုာံ ညးတာလျိုၚ်ပၞာန်တြေံတံသၟးဟေၚ် အုပ်ဓလီုလဝ်ရ။
အပ္ဍဲဏံ ဂဥုပ်ဒပ်ကေုာံ ဒုဂဥုပ်ဒပ် သီုကဵုဝန်ဇၞော်ဌာနစဵုဒၞာ၊ ဌာနကေၚ်ကာပရေၚ်အပ္ဍဲဍုၚ်ကေုာံ ဌာနဒေသပယျဵုတံဂှ် ဒှ်ညးတာလျိုၚ်ပၞာန်တံတုဲ ဒုသမ္မတ ၁ ဥူညိုသဝ် ဂှ်လေဝ် ဒှ်ညးဇၞူကမၠောန် နူဒပ်ပၞာန်မွဲ မဒှ်ရ၊ တုပ်သာ်ဂှ်ကီု ဥက္ကဌ စၠတ်ထဝ် ညးဍုၚ်ကွာန် ကေုာံ ဥက္ကဌစၠတ်ထဝ်ကောန်ဂကူ ညးၜါတၠဏံပၠန်ဂှ်လေဝ် ဒှ်ညးဇၞူကမၠောန် နူဒပ်ပၞာန်တံရ။
မွဲလပါ်ဂှ်မ္ဂး အပ္ဍဲကံၚ်သဳတေၚ်ဗၚ်ကဵုကသပ်ကၟိန်ဍုၚ် သမ္မတဒက်ပ္တန်ကဵုလဝ်ဂှ် ညးတာလျိုၚ်အဆံၚ်သၠုၚ်နူဒပ်တံ ပၠတရဴလဝ်တုဲ ဝန်ဇၞော်တြေံကေုာံ ညးကဵုကသပ်တံကီု သၟာပရေၚ်ဍုၚ်ကွာန်လ္ၚဵုတံဂှ် ခါန်ကၞက်စုတ်လဝ် ညးလုပ်ဂကောံကံၚ်သဳတံဂှ် ဂွံဆဵုကေတ်ရ။
နဒဒှ် ဥက္ကဌ ကံၚ်သဳတေၚ်ဗၚ်ကဵုကသပ်ဂှ် ဒုဂဥုပ်ဒပ်တြေံ ဥူသဵုဝေန် ကေုာံ ညးအုပ်ကာဂှ်တှ်ေ ဝန်ဇၞော်ပရေၚ်စဵုဒၞာတြေံ သ္ကိုပ်ပၞာန်တြေံ ဥူမိုၚ်မိုၚ်ဧ တံဂှ် ဂွံလဝ်တာလျိုၚ်တုဲ၊ ညးကဵုကသပ်က္ဍိုပ်သ္ကိုပ်ပၞာန်ဂှ် သ္ကိုပ်ပၞာန်ဒပ်ဍာ်တြေံ သ္ကိုပ်ပၞာန် မဵုအံၚ် ကေုာံ ဒံက်တာ ယေန်ယေန်နွာ တံဂှ်လေဝ် စုတ်လဝ် အပ္ဍဲကောန်ဂကောံတံရောၚ်။
က္ဍိုပ်သ္ကိုပ်ကွးဘာတၞောဝ်ဒတောဝ် ၈၈ တြေံ ဥက္ကဌ ဗော်ညးဍုၚ်ကွာန် ဥူကိုကိုဂျဳ ကေုာံ ဥက္ကဌ ဗော်ဖိတ်ဒရေဝ် ဒဳမဝ်ကရေတ်တေတ် ဒဝ်ချိုချိုကျဝ်ညိၚ်တံ ၜိုန်ရ ကျအာမာဲကီုလေဝ် ဒှ်ကၠုၚ်ကောန်ဂကောံ ကံၚ်သဳတေၚ်ဗၚ်ကဵုကသပ်ကီုရ။
တုဲပၠန် ဝန်ဇၞော်တြေံကဝ်မယှေန်ပၞာန် ဥူတာန်ယှိုဲ ကေုာံ ဥူကိုကိုလှိုၚ်၊ သီုကဵု ဒုဝန်ဇၞော် ပရေၚ်ကောန်ဍုၚ်အရၚ် ဥူဇြဝ်ဧမိုၚ်တံလေဝ် ဒှ်ကောန်ဂကောံကံၚ်သဳတုဲ၊ ညးကေၚ်ပါလုပ်လဝ် အပ္ဍဲကံၚ်သဳပၞာန်၊ ကဝ်မယှေန်ပၞာန် မာန်ညိၚ်မိုင် ကေုာံ ဒဝ်ဒွဲဗူ တံဂှ်လေဝ် ကဵုလဝ်တာလျိုၚ် ကောန်ဂကောံကံၚ်သဳ မဒှ်ရ။
အပ္ဍဲအရာဒက်ပ္တန်ကၟိန်ဍုၚ် ဒုၚ်သ္ဇိုၚ်ကဵုသၞောတ်ဒဳမဝ်ကရေဇြဳ ကေုာံဖိတ်ဒရေဝ်ဂှ် နူကဵုအလဵုအသဳတၟိ ညံၚ်ဂွံရေၚ်တၠုၚ်ကၠောန်အာ ပရေၚ်ၜိုဟ်လလမ်၊ ဒဳမဝ်ကရေဇြဳကေုာံ ပရေၚ်ညဳသၟဟ်ကောန်ဂကူတံ ကဏ္ဍနာနာမာန်တုဲ ဒက်ပ္တန်ကဵုတာလျိုၚ်ရောၚ် ပ္ဍဲဂလာန်သမ္မတ က္ဍိုပ်သ္ကိုပ်ပၞာန် ဟီုလဝ်ကၠာအိုတ်ဂှ်ရောၚ်။
နကဵုကံၚ်သဳတေၚ်ဗၚ်ကဵုကသပ်ဂှ် သွက်ဂွံထမံက်အာရုပ်ရဴ ပရေၚ်ဂီုကၠီုကေုာံ ပရေၚ်အုပ်ဓလီုသၞောဝ်ဓဝ်၊ ပရေၚ်ဆက်ဆောံ ဂၠးကဝ်၊ ပရေၚ်ၜိုဟ်လလမ်ကေုာံ အရာချူခၞံပတိတ်ဥပဒေတံမ္ဂး သွက်ဂွံကဵုအာကသပ်ကု အလဵုအသဳရောၚ်။
အပ္ဍဲပရေၚ်ဆက်ဆောံဂၠးကဝ်လေဝ် ကရောံဍုၚ်ဇိုၚ်ဝုတ်ဒိုဟ်တံဂှ် ညံၚ်ဂွံသၠုၚ်ပတိုန် ပရေၚ်ဆာန်ကၟိန်ဂှ် ကၠောန်အာတုဲ ပ္ဍဲဂကောံအာသဳယာန်ဂှ်လေဝ် ညံၚ်ဂွံကလိဂွံပရေၚ်ဆက်ဆောံ အတိုၚ်လၟေၚ်ဓမ္မတာမာန်ပၠန် ဂစာန်အာရောၚ် ပ္ဍဲဂလာန်သမ္မတဂှ် ဟီုလဝ်ရ။
တုဲပၠန် နကဵုအလဵုအသဳ သွက်ဂွံဒှ်အထံက်ပၚ် ကုပရေၚ်ညဳသၟဟ် ပရေၚ်မၞိဟ်၊ ပရေၚ်ဗဗွဲဓဝ် ကေုာံ ပရေၚ်ၜိုဟ်လလမ်တံကီု သွက်ပရေၚ်ဇၞော်မောဝ် ဖောအ်ဗြဳတောတက်ဍုၚ်ဂှ် ချပ်ဗ္စာကဵုအာ အခေါၚ်ဗၠးဒုဟ်ဒဏ် ထေက်ကြိုက်တံရောၚ် သ္ဂးရ။
အတးသကြႅာန်တိုန်တုဲ တ္ၚဲသၞာံမံက်ဏံမ္ဂး သွက်ဒဝ်အံၚ်သာန်သုကျဳ ကေုာံ ကောန်ထံၚ်ပရေၚ်ဍုၚ်ကွာန် သီုဖအိုတ်တံ ညံၚ်ဂွံထတ်ယုက် ဂီုကၠီုတုဲ သွက်ဂွံဗၠးတိတ်ပြဟ်ပြဟ်မာန် နူကဵုဂကောံကမၠောန် သၟတ်ဗဟဵု ဗော်အေန်အေဝ်ဒဳ (NLD) တံ ကၠောန်အာပရေၚ်ချဳဒရာၚ် ရာဒၞာပလံၚ်မေတ္တာဂှ် ညးဍုၚ်ကွာန်တံ သီုဖအိုတ် ညံၚ်ဂွံပါလုပ်ညိ ဗ္တိုက်ဖ္အောဝ်လဝ်ရောၚ်။
က္ဍိုပ်သ္ကိုပ်ပၞာန်သီအဝဵု ဥူမေန်အံၚ်လှိုၚ် ဟွံဒးလုပ်ပြိုၚ်ပေါဲရုဲမာဲ ကီုလေဝ် ဒှ်ကၠုၚ်သမ္မတကီု သီုကဵု ဒုသမ္မတၜါတၠတံဂှ် ဂတမုက်နာယက စၠတ်ထဝ်ကၟိန်ဍုၚ် ဒုၚ်ဂတိသစ္စာတုဲ ထပက်စၟတ်တဲ တုဲဒှ်အာ ပ္ဍဲဂိတုအေဗရာ ၁၀ တေံ မဒှ်ရ။ နကဵုက္ဍိုပ်သ္ကိုပ်ပၞာန် သ္ပပတမ်နူ သွက်မှပ်လ္ပအ်ညး ဒုၚ်သ္ဇိုၚ်ကဵု သီကေတ်လဝ်အဝဵုဍုၚ်ဂှ်တုဲ နူကဵု စၠတ်ထဝ်ညးဍုၚ်ကွာန် ဓယံက်ဒပ်ပၞာန် နူဗော်ပျဳခိုင်ဖျိုဝ် ပတိုန်ဂလာန်ဂှ် ဒှ်ကၠုၚ် ဒုသမ္မတတုဲဂှ် ထပ်တိုန်ဒှ်အာသမ္မတ ကၟိန်ဍုၚ်ရောၚ်။
ဟိုတ်ဂှ်ရ ပ္ဍဲအခိၚ်သီအဝဵုတေံ ဒက်ပ္တန်လဝ်ကဝ်မယှေန်ပၞာန် ကေုာံ ဂကောံအလဵုအသဳအဆံၚ်ၚ်တံဂှ် ပလီုထောံတုဲ ညံၚ်ရဴဗီုပြၚ်ညးဍုၚ်ကွာန် က္ဍိုပ်သ္ကိုပ်ပၞာန် ဒှ်ကၠုၚ်သမ္မတ ဆက်တုဲထိၚ်ချုက်အာအဝဵုဗဟဵုတုဲ သွက်ဂွံရပ်ဇုက်အုပ်ဓုပ်ဍုၚ် နကဵုဗီုပြၚ်တၟဟ်မွဲပၠန်ဂှ် ပၠတရဴ သ္ကိုပ်သ္ကအာရ။
နကဵုဂၠံၚ်ပၞော်တိတ် ပရေၚ်ဍုၚ်ကွာန် ဒပ်ပၞာန်သီအဝဵုမွဲ အရာမပြံၚ်စၞာံဇကုဒက်ပ္တန်ကၠုၚ် ဗီုပြၚ် အလဵုအသဳဒးဒုၚ်ရုဲစှ်ဏံဂှ် မုလေဝ်ပရေၚ်အပြံၚ်သၠာဲဟၟဲတုဲ သွက်မှာဇန်ညးဍုၚ်ကွာန်တံမ္ဂး ပရေၚ်ဘိုအ်ဂွံစၟဳစတၟေၚ်တၟဟ် မုလေဝ်ဟၟဲရောၚ် ညးဍုၚ်ကွာန်တံ ဟီုဂးမံၚ်အိုတ်ရ။
ပရိုၚ် – သြၚ်လောန်တိုင်မ်
Photo – Social Media