မတ်မလီု၊ အေဗရာ ၁၂
အပ္ဍဲတွဵုရးမန် ကောန်ပၞာန်တၟိ စှ်ေနူဘာယိုက်ဝန်ပၞာန် မှာဇန် လၟေၚ် ၁ ယိုက်ဂၠေၚ်ကၠုၚ်တာလျိုၚ် ပေၚ်ၜါသၞာံတံဂှ် ကောန်ဒပ် ၁၄၀ တၠဟေၚ် ကလေၚ်စိုပ်ကၠုၚ်လဝ်သ္ၚိ မဒှ်ရ။
သွက်ကောန်ဒပ်ယိုက်ဝန်ပၞာန် ယိုက်ဂၠေၚ်လဝ်တာလျိုၚ် ပေၚ်အာ ၜါသၞာံတံဂှ် ပ္ဍဲဂိတုအေဗရာ ၁၁ ဒၞာဲရုၚ်ဌာန်ဂဥုပ်ဒပ်ရးအဂၞဲ ဍုၚ်မတ်မလီုဂှ် ကၠောန်ဗဒှ်ကဵုလဝ် အသေအဟာန်ပတိုန်ဂုဏ်စရာဲရ။
အတိုၚ်လိက်လလောၚ်တြး ကဝ်မယှေန်ပၞာန်မ္ဂး သွက်ကောန်ပၞာန် ၁၄၀ တၠတံဂှ် ဇိုန်ဏှၚ်အာပ်ပြာပ် ပတိုန်ကဵုလဝ်ဂုဏ်စရာဲ သီုကဵုတၞးလိက်စၟတ်သမ္တီ ယိုက်ဝန်ပၞာန်မှာဇန် (ဗီုပြၚ်-၁၂) ကေုာံ တဆိပ် ယိုက်ဝန်ပၞာန်မှာဇန်ရောၚ်ဂှ် ဂွံတီကေတ်ရ။
အတိုၚ်တၚ်နၚ် ဌာန်ပရိုၚ်သြၚ်လောန်တိုင်မ် ပကောံဂွံလဝ်မ္ဂး နူကဵုကဝ်မယှေန်ပၞာန်ဝွံ သွက်ဘာတန်ဗတောန် ယိုက်ဝန်ပၞာန်မှာဇန် လၟေၚ် ၁ တွဵုရးမန်ဂှ် ရပ်ပကောံကေတ်လဝ်သၟတ် ဟွံအောန်နူကဵု ၅၀၀ တၠရောၚ်။
ဟိုတ်ဂှ်ရ အပ္ဍဲကောန်ဒပ်တိတ်ဘာပၞာန် လၟေၚ် ၁ ၜိုတ်လၟိဟ် ၅၀၀ တံဂှ် ၁၄၀ တၠဟေၚ် ကလေၚ်စဴစိုပ်သ္ၚိမာန်တုဲ ကောန်ဒပ် ၃၆၀ တၠဂှ် ဒးချိုတ်အာ ပ္ဍဲအကြာပေါဲဗတိုက်ရောၚ် ကၠိုဟ်ကေတ်မာန်ရ။
ကောန်ဒပ်နူတွဵုရးမန် တိတ်ဘာပၞာန်လၟေၚ် ၁ တံဂှ် ဟိုတ်နူဒးဒုၚ်ဗလံၚ်ဏာ ပ္ဍဲဒေသလဝေၚ်ပၞာန် တွဵုရးရခေၚ် ကေုာံ တွဵုရးကရေၚ် ဂၠိုၚ်အိုတ်တုဲ လၟိဟ်ဒးချိုတ်လဝ်ဂၠိုၚ်အာရောၚ် ဂွံတီကေတ် နူပွဳဗွိုၚ်ဒပ်ပၞာန် CDM တံရ။
ပရိုၚ် – သြၚ်လောန်တိုင်မ်
Photo – MOI