ဍာ်ဗု၊ အေဗရာ ၂၂
အပ္ဍဲရးတနၚ်သဳ ပွိုၚ်ဍုၚ်ဍာ်ဗု ဒေသ နဗုလေဝ်ဂှ် နူကဵု ဒပ်ကဝ်မယှေန်ပၞာန် လုပ်ဍိုက်သီဗတိုက်ဏာ ပေါဲမ္ၚဵုထပ်တဲမွဲတုဲ ရပ်ဏာညးဍုၚ်ကွာန် ကောန်ဒေသ ၂၀ ပြၚ်ရဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်မ် ရ။
အပ္ဍဲဂိတုအေဗရာ ၂၀ အခိၚ်နူဂယး ၅ နာဍဳပြၚ်ၚ်ဂှ် ဒပ်ကဝ်မယှေန်ပၞာန် ဖျေံသ္ဇိုၚ် ဒၞာဲကိုန်အစဳဇန် သၞေဟ်ၜၚ်ဇြိုဟ် ဇြုၚ်ပရေၚ်ပိုန်ဒြပ်တၟေၚ် ထဝါဲတံ လုပ်သီဗတိုက်လဝ် ပ္ဍဲကွာန်ထိၚ်ဂျဳ သ္ၚိသ္ပမံၚ် ပေါဲမ္ၚဵုထပ်တဲမွဲဂှ်ရောၚ်။
ပေါဲမ္ၚဵုထပ်တဲဏံဂှ်တှ်ေ ဟိုတ်နူဒှ်မံၚ်ပေါဲမ္ၚဵုထပ်တဲ ရဲကောန်သ္ဂံၚ် ဒပ်စဵုဒၞာညးဍုၚ်ကွာန်မွဲတၠတုဲ ရဲဒစုက်ဓလူ (ဒလန်)တံ ကဵုပရိုၚ်တုဲ နူကဵုဒပ်ကဝ်မယှေန်ပၞာန် ကၠုၚ်လုပ်ဍိုက်သီဗတိုက်လဝ်ရောၚ် သ္ဂးရ။
အပ္ဍဲအရာ လုပ်သီဗတိုက်ဂှ်မ္ဂး ကောန်ဗၠာဲညးတံ ကေုာံ ကောန်ဝုတ်ညးတံ ညးၜါတၠဂှ် ဂြိပ်ဗၠးအာတုဲ မိကောန်ဗၠာဲညးတံ သီုကဵု ညးဍုၚ်ကွာန်ကောန်ဒေသဟွံအောန်နူ ၂၀ တၠ သှ်ေမံၚ် ပ္ဍဲပေါဲမ္ၚဵုထပ်တဲဂှ် နူကဵုဒပ်ကဝ်မယှေန်ပၞာန် ရပ်ဏာလဝ်နွံရဂှ် ညးတြုံဒေသမွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ် ရ။
ဒပ်ကဝ်မယှေန်ပၞာန် လုပ်သီလဝ်ပေါဲမ္ၚဵုထပ်တဲဏံဂှ်တှ်ေ ဖျေံလဝ်သ္ဇိုၚ် ပ္ဍဲဘာလကျာ် ကွာန်ထိၚ်ဂျဳတုဲ ဆက်ဗက်ရပ်ထိၚ်မံၚ် ညးဍုၚ်ကွာန်ကောန်ဒေသတံတုဲ စဵုကဵု စိုပ်အခိၚ်ဒေါဝ်တ္ၚဲဂှ်လေဝ် ဟွံဗၠးကဵုဏီပုဟ် ဂွံတီကေတ်ရ။
စနူဂိတုအေဗရာ ၁၉ တေံဂှ် ဒပ်ကဝ်မယှေန်ပၞာန် တိတ်ကၠုၚ်နူဗဒိုပ် ကိုန်အစဳဇန်သၞေဟ်ၜၚ်ဇြိုဟ်တုဲ ထပက်ကၠုၚ်ကရောၚ်ပၞာန် ပ္ဍဲဒေသ နဗုလေဝ် ဇြုၚ်ပရေၚ်ပိုန်ဒြပ်တၟေၚ် ထဝါဲရောၚ် ဂွံတီရ။
ပရိုၚ် – သြၚ်လောန်တိုၚ်မ်
Photo – Social Media