ဗြဝတီ၊ အေဗရာ ၂၂
အပ္ဍဲတွဵုရးကရေၚ် ပွိုၚ်ဍုၚ်ဗြဝတီ ဒေသမေန်လက်ပါန် ကေုာံ ဖလူတံ အကြာပေါဲဗတိုက်ၜါလ္ပာ် ကတဵုဒှ်မံၚ်ဂှ် နူကဵု ဒပ်ကဝ်မယှေန်ပၞာန် ထပ်ကြဳစုတ်ဗုမ်ပၟတ်ဂှ်ကီု ပ္ဍဲဝဝ်လေဂှ်လေဝ် ဟိုတ်နူလွဟ်ဇၞော် ဒပ်ပၞာန်ဗမာပန်ဏာတုဲ ညးဍုၚ်ကွာန် ဒေသလ္ၚဵုတံ ဒးဝပ်နွံရောၚ် ဂွံတီကေတ် နူတမ်ရိုဟ်ပရိုၚ်ဒေသရ။
အပ္ဍဲဂိတုအေဗရာ ၂၀ တေံ ပ္ဍဲဍုၚ်ဗြဝတီ လ္ပာ်သၠုၚ်ကျာ ကရပ်ပယျဵုသေံ ပ္ဍဲပါၚ်လုပ်ကွာန် မေန်လက်ပါန် ဒၞာဲဗ္ဒိုပ် ညးပါဲဒဴဘဲပၞာန်တြေံဂှ် နူကဵုဒပ်ကဝ်မယှေန်ပၞာန် သုၚ်စောဲဒရုၚ်တုဲ အခိၚ်ဒေါဝ်တ္ၚဲဂှ် ကြဳဗုမ်ပၟတ်မွဲဝါ၊ အခိၚ်သဝ်တ္ၚဲဂှ် ကြဳဗုမ်ပၟတ်မွဲဝါ သီုဖအိုတ်ၜါဝါ ထပ်ကြဳစုတ်ဗုမ်တုဲ ဗတိုက်လဝ်ရောၚ် ညးဒေသမွဲတၠ သ္ဂးရ။ အပ္ဍဲပါၚ်ဂၠံၚ်လုပ်ကွာန် မေန်လက်ပါန် နူကဵုဒပ်ကဝ်မယှေန်ပၞာန် ကြဳဗုမ်ပၟတ်ဗတိုက်လဝ်ဂှ် မၞိဟ်ဒးဝပ်ချိုတ်လဝ်တံ ဟၟဲကီုလေဝ်၊ ပ္ဍဲဒၞာဲတာဲတြေံ ညးဂြိပ်ပါဲဘဲပၞာန်တံ မံၚ်ကၠုၚ်လဝ်တံဂှ် ပၟတ်တဴအာ ဇၞော်ကဵုဇြဟတ် မဒှ်ရ။
နူကဵုဒပ်ကဝ်မယှေန်ပၞာန်ဝွံ နကဵုဗုမ်ပၟတ် ကြဳဗတိုက်လဝ် လ္တူကွာန်မေန်လက်ပါန် ဂၠိုၚ်ကဵုအလန်တုဲ သ္ၚိဌာန် ဟွံအောန်နူကဵု ၃၀ မ ဆောံလေၚ် ပၟတ်တဴလီုလာ်အာလဝ်နွံရဂှ် ညးဒေသမွဲတၠဟီုတုဲ ဂွံတီလဝ်ရ။ ကွာန်မေန်လက်ပါန်ကဵု ကွာန်ဖလူတံဂှ် နူကဵုဒပ်ကဝ်မယှေန်ပၞာန် ထပက်မံၚ်ကရောၚ်ပၞာန်ဗလးတိ လံကၠုၚ်ကဵုဂိတုဂၠိုၚ်ကီုလေဝ် ဟိုတ်နူဒပ်ပၠန်ဂတးတံ ဒုၚ်တဝ်စၞေဟ်လဝ်ဂှ်ရ ဒပ်ကဝ်မယှေန်ပၞာန် ဒးဝပ်ဂိလောန်အာတုဲ ဆက်တိုန်ဂတဟွံမာန် ဒးကလေၚ်ဆုတ်စဴမံၚ် ဂၠိုၚ်ကဵုအလန်ရောၚ်။
ဟိုတ်ဂှ်ရ ဒပ်ကဝ်မယှေန်ပၞာန် စွံပွန် လ္တူကွာန်ကေုာံ ညးဍုၚ်ကွာန် တံတုဲ ကၠောန်ပရေၚ်သအးဇ္ၚးဒၞာဲပွန် ဒှ်မာန်ဂှ်ကီု ဟွံသေၚ်မ္ဂး ဟိုတ်နူ ဒပ်ပၠန်ဂတးတံနွံမံၚ်တုဲ ဗက်ပန်ခြော်မံၚ်ကြာန်န်ရောၚ် ညးဒေသ တမ်ရိုဟ်ပရိုၚ်တံ သ္ၚဳဂၠိပ်လဝ်ရ။
တုဲပၠန် အပ္ဍဲပွိုၚ်ဍုၚ်ဗြဝတီ နူကဵုဗဒိုပ်ဗျူဟာဝဝ်လေ ကရပ်ပယျဵုသေံ ပ္ဍဲဂိတုအေဗရာ ၂၀ ဂှ် ဒပ်ကဝ်မယှေန်ပၞာန် သုၚ်စောဲလွဟ်ဇၞော် ပန်ပၠုပ်ဏာ အပ္ဍဲဍုၚ်ဝဝ်လေတုဲ ညးဍုၚ်ကွာန်ကောန်ဒေသလ္ၚဵုတံ ဒးဝပ်နွံ စမြိုၚ်ဒၞာဲလ္ၚဵုတံလေဝ် လီုလာ်အာနွံရောၚ်။
ဗဒိုပ်ဗျူဟာဝဝ်လေ ဒပ်ကဝ်မယှေန်ပၞာန်ဂှ် ဒၟာနူရဲဒပ်ပၠန်ဂတးတံ ကၟာတ်ဆိုအ်လဝ်ဂှ်ရ နူကဵုဒပ်ပၞာန်ဗမာ သုၚ်စောဲပၞာန်ကျာတုဲ ဗတိုက်မံၚ်ဂှ်ကီု စၞစဇွောံမကဵု ကပေါတ်ပၞာန်တံဂှ်လေဝ် ပလံၚ်ဖျေံကဵုမံၚ် ပ္ဍဲဒၞာဲကုန်ဗဒိုပ်ဂှ်ကီုရောၚ် ဂွံတီကေတ်ရ။
ပရိုၚ် – သြၚ်လောန်တိုင်မ်
Photo – CJ