အရာဘိက်ပၟိၚ် ပရေၚ်ၜိုဟ်လလမ် အပ္ဍဲပွိုၚ် ၁၀၀ တ္ၚဲဏံ ဒှ်ကမၠောန်မာန်ဟာ

နေပျဳဒဝ်၊ ဂိတုအေဗရာ ၂၂

သမ္မတသီအဝဵု ဥူမေန်အံၚ်လှိုၚ်ဝွံ နကဵုဂကောံအလဵုအသဳညးတံ ပၠမံၚ်တရဴဂှ် ပရေၚ်ၜိုဟ်လလမ် အပ္ဍဲပွိုၚ် ၁၀၀ တ္ၚဲဏံမ္ဂး သွက် PDF တံ ဂွံလုပ်ဖျေံလွဟ်ဂှ် ဘိက်ပၟိၚ်လဝ်တုဲ၊ သွက် EAO တံဂှ်တှ်ေ ညံၚ်ဂွံဆဵုဂဗသဳကၠဳအာဂှ် ကဵုလဝ်အရေဝ်နွံရ။

အပ္ဍဲကောံဓရီု ဂကောံအလဵုအသဳကၟိန်ဍုၚ် ကၠောန်ဗဒှ်လဝ် ဂိတုအေဗရာ ၂၀ ဂှ် ဒပ်ပၞာန်သီအဝဵု မပြံၚ်သၠာဲလဝ်ဗီုပြၚ် အလဵုအသဳ ညးဍုၚ်ကွာန်မွဲမ္ဂး ဆေၚ်စပ်ကဵုကိစ္စ သွက်ဂွံရပ်စပ်အာ အပ္ဍဲပွိုၚ် ၁၀၀ တ္ၚဲဏံဂှ် ဟီုဂးဏာလဝ်ရ။

နကဵု PDF တံဂှ်တှ်ေ ဟိုတ်နူပြသၞာပရေၚ်ဍုၚ်ကွာန် မကတဵုဒှ်ကၠုၚ် နူသွဟ်ပေါဲရုဲမာဲ ၂၀၂၀ ပရေၚ်မာဲအလီတံဂှ် ဟွံဒုၚ်သောၚ်ကလး နကဵုနဲကဲပရေၚ်ဍုၚ်ကွာန် ဟိုတ်နူ ရုဲစှ်ကေတ် လၟေၚ်ဂၠံၚ်တရဴ ရပ်လွဟ်တုဲ မံက်ကတဵုကၠုၚ်လဝ်ရောၚ် ဥူမေန်အံၚ်လှိုၚ် ဟီုရ။

ဣဏံဝွံ ဟိုတ်နူပၟိက်ဆန္ဒ ညးမိက်ဂွံဒှ်သမ္မတတုဲ သီကေတ်အဝဵုဍုၚ် နကဵုဇြဟတ်လွဟ်ဂှ် ပၠုပ်လဝ်ကၟိန်ဍုၚ် သၟဝ်ပရေၚ်အုပ်ဓုပ်ပၞာန်၊ တုဲပၠန် နကဵုဗီုပြၚ်ညးဍုၚ်ကွာန် သွက်ဂွံဆက်အုပ်ဓုပ်အာဂှ် ဒှ်တၚ်ထ္ၜးဟိုတ် ညးတံဟီုလလောၚ်လဝ် ရမျှာၚ်ဗလံၚ်ထပ်မံၚ် ဂၠိုၚ်ကဵုအလန်ရ။

အခိၚ်လၟုဟ်ဏံမ္ဂး အလဵုအသဳဒးဒုၚ်ရုဲစှ် မံက်ကတဵုကၠုၚ် နဲကဲဒဳမဝ်ကရေဇြဳဂှ် ယိုက်ဂၠေၚ်မံၚ်တာလျိုၚ်တုဲ ရဲဒုၚ်ယၟု PDF တံ ဂွံလုပ်ကၠုၚ်သၟဝ် ဗွိုၚ်သၞောဝ်ဥပဒေဂှ် သွက်ဂွံဘိက်ပၟိၚ် ရပ်စပ် ရေၚ်တၠုၚ်အာရောၚ် ညးသ္ဂးရ။

စွံအပိုၚ်အခြာအခိၚ်တ္ၚဲ ကၞောတ်ဂိတုဂျူလာၚ် ၃၁ တုဲ ရဲ PDF တံ အပ္ဍဲပွိုၚ် ၁၀၀ တ္ၚဲဏံ သွက်ပရေၚ်ၜိုဟ်လလမ် ညံၚ်ဂွံကၠုၚ်အိုတ်ညိဂှ် ဘိက်ပၟိၚ်လဝ်သၟးဟွံက သီုကဵုဆဵုဂဗသဳကၠဳ ကေုာံ ညံၚ်ဂွံလုပ်ဖျေံလွဟ် ပ္ဍဲဗွိုၚ်ဥပဒေပရေၚ်ၜိုဟ်လလမ်ဂှ် ဟီုဂးလဝ်ရောၚ် ဥူမေန်အံၚ်လှိုၚ် ဟီုလဝ်ရ။

ဟိုတ်နူ ဒုၚ်ဂိုၚ်ကေတ်လဝ်မူ သွက်ဂွံၚးတးပလီုပလာ် သၞောတ်တၠအဝဵုပၞာန် ညံၚ်ဂွံအိုတ်အးဂှ်ရ ကိစ္စဂွံလုပ်ဖျေံလွဟ်ဂှ်တှ်ေ ဇမ္ၚောဲမံၚ်ကဵု နတဲစှ်ေစှ်ေရောၚ် နူဒပ်ပၞာန်တိုင်ခဳကွးဘာ ညးမၞုံအခေါၚ်ဟီုဂး ဒပ်ပံၚ်ကောံတမ်ကညၚ် SRA ကိုမေန်ဟာန်ထက် ဟီုကဵု ဌာန်ပရိုၚ်သြၚ်လောန်တိုၚ်မ် ရ။

“ဂကောံမံက်ကတဵုကၠုၚ် အပ္ဍဲပၠန်ဂတးတမ်ကညၚ်တံဂှ် ဒုၚ်ဂိုၚ်ကေတ်မူဏံတုဲ မံက်ကတဵုကၠုၚ်အိုတ်ရ။ အဓိက သွက်ဂွံၚးတးပလီုပလာ်သၞောတ်တၠအဝဵုပၞာန်ညံၚ်ဂွံအိုတ်အး၊ မူပလီုပလာ် ပၞာန်ပိဂကူညံၚ်ဂွံအိုတ်အးဂှ် ရပ်ဂိုၚ်ကေတ်တုဲ မံက်ကတဵုကၠုၚ်ရ။ ဟိုတ်နူဒှ်မံၚ်ဗီုဂှ်တုဲ ဂကောံတဝ်စၞေဟ်မံၚ်တံ သွက်ဂွံကၠုၚ်ဟီုအရေဝ် ပရေၚ်ၜိုဟ်လလမ်၊ သွက်ဂွံလုပ်ဖျေံလွဟ်ဂှ်တှ်ေ နတဲစှ်ေစှ်ေ ဇမ္ၚောဲမံၚ်ဗွဲမလောန်ဏီ။ အဲညာတ်ကေတ် ဗီုဏံရ။” သာ်ဝွံ သ္ဂးရ။

ဂကောံရပ်လွဟ် မံက်ကတဵုကၠုၚ်လဝ် ဟိုတ်နူ ပွမသီအဝဵုတံမ္ဂး နကဵုယၟုဒှ်ဒှ်၊ နကဵုဂကောံကောန်ဍုၚ်အရၚ်ဒှ်ဒှ်၊ နကဵုဒေသဒှ်ဒှ် ပရေၚ်သ္ပစၞးတံ ၜိုန်ရ ဟွံတုပ်သၟဟ်ကီုလေဝ်၊ အတိုၚ် Ideology အိုၚ်ဒီယိုလိုဂျီ ကေုာံ Identity အိုၚ်ဒၚ်နတီ တံ ၜိုန်ရတၞဟ်ခြာမံၚ် နွံကီုလေဝ် နကဵုပရေၚ်ဒုၚ်သ္ဇိုၚ်မ္ဂး သွက်ဂွံၚးတးပလီုပလာ် သၞောတ်တၠအဝဵုပၞာန် ဒဵုကဵုအိုတ်အးဂှ်တှ်ေ တုပ်သၟဟ်မံၚ်ညးသ္ကံရ။

တုဲပၠန် ဂကောံဒပ်ပၞာန်တံဂှ်ရ ဟိုတ်နူဟွံကလေၚ်ဆုတ်တိတ် နူပရေၚ်ဍုၚ်ကွာန်ဂှ်ရ ဒးဂဗဆဵုမံၚ်ကဵု အကာဲအရာတ္ၚဲဏံတုဲ လ္တူပရေၚ်ၜိုဟ်လလမ် ညးတံမဟီုမံၚ်တံဂှ် အရာသွက်ဂွံပတေဟ်စ ဟၟဲရောၚ် ကိုမေန်ဟန်ထက် ထံက်ထ္ၜးရ။

စပ်ကဵု ဂကောံရပ်လွဟ်ကောန်ဍုၚ်အရၚ် EAO တံမ္ဂး သီုဂကောံထပက်လဝ်စၟတ်တဲ NCA ကီု ဂကောံဟွံဂွံထပက်လဝ် စၟတ်တဲတံကီုဂှ် ကၠာဟွံစိုပ် ဂိတုဂျူလာၚ် ၃၁ ညံၚ်ဂွံဆဵုဂဗသဳကၠဳဂှ် သမ္မတသီအဝဵု ဘိက်ပၟိၚ်လဝ်ရောၚ်။

တင်တၟေၚ်ဂှ်တှ်ေ ဂကောံရပ်လွဟ်ကောန်ဍုၚ်အရၚ် ထပက်လဝ် စၟတ်တဲ NCA မပါလုပ်မံၚ် ပ္ဍဲပၠန်ဂတးတံဂှ် ကော်ဏာယၟုဂကောံ KNU၊ CNF ကေုာံ ABSDF တံတုဲ ဘိက်ပၟိၚ်လဝ်ရ။

ဂကောံပိဂကောံဏံမ္ဂး ပ္ဍဲအကြာပရေၚ်သီအဝဵုဏံ ကရဴလဝ်စးကဵု လိက်ကသုက်တုပ်စိုတ်ဒေါအ်ပန် အလုံဍုၚ် NCA တုဲ KNU ကေုာံ CNF ဂှ် မွဲကရောံကဵုဂကောံပၠန်ဂတးတၞဟ်တံ ပၠတရဴပါလုပ်မံၚ် အပ္ဍဲကံၚ်သဳပၠတရဴဖိတ်ဒရေဝ် SCEF ရောၚ်။

တၠုၚ်လအာ ပရေၚ်အလုံဍုၚ်ဗၟာမွဲဂှ် နကဵု မွဲဂကောံမွဲဒပ်သၟး ကဵုသ္ဂုတ်သွာတ် သောၚ်ကလးအာဟွံမာန်တုဲ အခိၚ်လၟုဟ်ဏံ ဒက်ပ္တန်လဝ် SCEF တုဲတုဲမံၚ်ဂှ်ရ လ္တူဂှ်ဟေၚ် ဒတူလိုၚ်အာရောၚ် ညးနွံအခေါၚ်ဟီုဂး မုက်ဒပ်ကောန်ဂကူချေၚ် CNF သလိုၚ်ထက်နဳ ဟီုကဵု ဌာန်ပရိုၚ်သြၚ်လောန်တိုၚ်မ်ရ။

“ပိုဲတံ ပ္ဍဲအခိၚ်လၟုဟ် ဒက်ပ္တန်လဝ် SCEF တုဲတှ်ေ လ္တူအရာတင်ဒတူလိုၚ်ပရေၚ်ဍုၚ်ကွာန် SCEF ဂှ်ဟေၚ် ပိုဲတံဒတူလိုၚ်မံၚ် မဒှ်ရ။ ဟိုတ်ဂှ်ရ အရာကော်ဘိက်မံၚ်လၟုဟ်တံဂှ် နကဵုပိုဲတံမွဲဂကောံမွဲဒပ်ဟေၚ် အရာကၠောန်ဂွံ ဟွံသေၚ်တုဲ ပရေၚ်ပါလုပ်ဂကောံဇြဟတ်သီုဖအိုတ်၊ လစွံစိုတ်သဘဴဓဝ်၊ ပရေၚ်ဒုၚ်ဂိုၚ်ကေတ် ပရေၚ်ဍုၚ်ကွာန်ဘုံ စတမ် ဒှ်ကၠုၚ်အရာမလှဲလးဗွဲမလောန်တုဲ ဟိုတ်ဂှ်ရ နကဵုပိုဲတံမ္ဂး လ္တူအရာကော်ဘိၚ်လဝ်တံဂှ် ချပ်ဗ္စာကီု၊ သဳကၠဳကီု ပရေၚ်ဗီုတံဏံဂှ် မုလေဝ်ပိုဲတံဟွံကၠောန်ပုဟ်” သာ်ဝွံ သ္ဂးရ။

အလဵုအသဳညဳသၟဟ်ကောန်ဂကူ NUG ကေုာံ CRPH မပါလုပ် သီု K3C မကော်ခဴစ KIO၊ KNU၊ KNPP ကေုာံ CNF တံမ္ဂး သွက်ဂွံၚးတးပလီုပလာ် သၞောတ်တၠအဝဵုပၞာန် ဒဵုကဵုအိုတ်အးတုဲ ပ္ဍဲကၞောတ်ဂိတုမာတ် တုဲကၠုၚ်ဏံဂှ် ဒက်ပ္တန်လဝ် ကံၚ်သဳပၠတရဴ ဖိတ်ဒရေဝ် SCEF တုဲ ထပ်သ္ပလဝ်ဒတန် မူဝါဒ တင်ဒတူလိုၚ်ဘုံတံ နွံရ။

အပ္ဍဲဂှ်တှ်ေ ပွမဖာဲနုက်ပ္တိတ် ပရေၚ်သီအဝဵုပၞာန် ဒဵုကဵုအိုတ်အးတုဲ ဒပ်ပၞာန်လုပ်ပါမံၚ် ပ္ဍဲပရေၚ်ဍုၚ်ကွာန်ဂှ် ညံၚ်ဂွံတုဲဒှ်အိုတ်ကၠက်အာ၊ ညံၚ်ဂွံပလီုထောံ သ္ဇိုၚ်သၞောဝ်ဥပဒေ ၂၀၀၈ ဒဵုကဵုအိုတ်အး ကေုာံ သွက်ဂွံဗတိုက်သရိုဟ်အာ ပရေၚ်အရာဂစာန်မံၚ် ညံၚ်ကဵုသၞောဝ်ဏံ ဂွံဂျိုၚ်တိုန်ကၠုၚ်တံ ပါလုပ်မံၚ်ရ။

တုဲပၠန် သွက်ဂွံချူခၞံပတိတ် သ္ဇိုၚ်သၞောဝ်ဥပဒေ ဒုၚ်သ္ဇိုၚ်ကဵု သၞောတ်ဖိတ်ဒရေဝ် ကေုာံ ဒဳမဝ်ကရေဇြဳ ညးဆေၚ်စပ်တံသီုဖအိုတ် ဒုၚ်တဲမာန်တုဲ အတိုၚ်သၞောဝ်မံက်တိတ်ကၠုၚ်ဂှ် ညံၚ်ဂွံဒက်ပ္တန်အာ ကၟိန်ဍုၚ်ပံၚ်ကောံ ဖိတ်ဒရေဝ်ဒဳမဝ်ကရေဇြဳတၟိဂှ် နဒဒှ် သဘဴလစွံစိုတ် မူဝါဒဘုံမွဲ စုတ်လဝ်ရ။

အပ္ဍဲပရေၚ်ဘိက်ပၟိၚ် ပရေၚ်ၜိုဟ်လလမ်ဂှ်လေဝ် နုက်ပ္တိတ်စွံလဝ် NUG ၊ ဒုၚ်သ္ဇိုၚ်ကဵုသ္ဇိုၚ်သၞောဝ်ဥပဒေ ၂၀၀၈ ကေုာံ NCA တံဂှ်ရ အကြာဂကောံဒပ်ပၞာန်ကဵု ဂကောံပၠန်ဂတးတံ သွက်ဂွံဒဇီုမုက်ညးသ္ကံ ပ္ဍဲဝိုၚ်သဳကၠဳဂှ်တှ်ေ အရာတၞဟ်ခြာမံၚ်တံ ဇၞော်မံၚ်ဗွဲမလောန်ဏီရ။

လပါ်ဂကောံဒပ်ပၞာန်တံ ဘိက်ပၟိၚ်ကော်ထပၠုပ်မံၚ် သွက်ဂွံပါလုပ် ဝေၚ် သၟဝ်ဗွိုၚ်မူဝါဒ ညးတံဖျေံဇန်လဝ် မွဲလပါ်ဓဝ်ဂှ်တုဲ အရာ သွက်ဂွံထမံက်အာရုပ်ရဴ ပရေၚ်ၜိုဟ်လလမ် ဟွံဒုၚ်သ္ဇိုၚ်ကဵု ပရေၚ်သဳကၠဳ ပ္ညဳပ္ညပ်တံမ္ဂး အံၚ်ဇၞးအာမာန်ဟွံသေၚ်ရောၚ် ညးလ္ၚတ်တံ ထံက်ထ္ၜးမံၚ်ရ ။

သွက်ဂွံသဳကၠဳအာ ပရေၚ်ၜိုဟ်လလမ် ကုဂကောံရပ်လွဟ် ကောန်ဍုၚ်အရၚ် ပါလုပ်မံၚ်ကရောံပၠန်ဂတးတံမ္ဂး နူကဵုအလဵုအသဳ ဒေသကရပ်ညးတံ ကဵုဇြဟတ်ဟရိုဟ် ဆက်စၠောံကၠုၚ်မာန်ရောၚ် က္ဍိုပ်သ္ကိုပ်ကွးဘာတြေံ ကိုမေန်တွိုဲတေတ် သ္ၚဳဂၠိပ်လဝ်ရ။

“လပါ်အလဵုအသဳညးဍုၚ်ကွာန်တံ မွဲကဆံၚ်နူကဵုအလဵုအသဳဒေသတံ ကဵုကၠုၚ်ဇြဟတ်ဟရိုဟ်မာန်၊ ဆက်စၠောံကၠုၚ်မာန် ဗီုတံဏံလေဝ် ဒှ်ကၠုၚ်မာန်ရ၊ သွက်တၠုၚ်လအာ အကာဲအရာပရေၚ်ဍုၚ်ကွာန်ဂတဏံ။ ဆဂး ဗီုပိုဲတံညာတ်ဂှ်တှ်ေ ညံၚ်ကဵုဇြဟတ်ဟရိုဟ်ကြုက်ဂှ်တှ်ေ ဍုၚ်တံဏံ (သေံကဵု အိန္ဒိယ) သ္ကာတ်မြဟ်တိုန်အာမာန်ဟၟဲပုဟ်။ ဥပမာ ဍုၚ်သေံမ္ဂးတှ်ေ ယဝ်ရပံက်ဂၠံၚ်အာယှတုဲ ကူသာန်အာကၠုၚ်ဂွံအာမ္ဂးတှ်ေ လ္တူဂကောံပၠန်ဂတးတံ ကဵုကၠုၚ်ဇြဟတ်ဟရိုဟ်ဂၠိုၚ်နူဂှ် ဆက်နွံအာမာန် ဟွံထေၚ်ပုဟ်။ ဟိုတ်ဂှ်ရ သွက်ဂွံသဳကၠဳပရေၚ်ၜိုဟ်လလမ် ကရောံမေန်အံၚ်လှိုၚ်ဂှ်တှ်ေ ယဝ်ရၜတ်ကၞာတ်ကဵုကြုက်မ္ဂးတှ်ေ နူလပါ်အလဵုအသဳဍုၚ်တၞဟ်တံ အရာကဵုဇြဟတ်ဟရိုဟ်တံ နွံမာန်ကီုလေဝ် အောန်ရောၚ် ထေၚ်ကေတ်ရ” သာ်ဝွံ သ္ဂးရ။

ဟိုတ်နူလဝေၚ်ပၞာန် ၁၀၂၇ ဂှ် ဒးဒုၚ်ဇြဟတ် အလဵုအသဳကြုက်တုဲ ဒပ်ကိုဝ်ကန့် MNDAA ကေုာံ ဒပ်တအာၚ် TNLA တံ ဒေါအ်ပန်ပှော်ကဵုဒပ်ပၞာန်ဗမာတုဲ ပ္ဍဲပၠန်ဂတးဂှ် ဒးဒေါအ်ဇူလဝ် မွဲအခန်ရောၚ်။

တုဲပၠန် နူကဵု TNLA လေဝ် သွက်ဂွံသဳကၠဳဂၠာဲသွဟ် ပြသၞာ ပရေၚ်ဍုၚ်ကွာန် နကဵုနဲကဲပရေၚ်ဍုၚ်ကွာန် ကရောံအလဵုအသဳဗၟာတၟိ ဂှ် စၟဳစလဝ်ရောၚ် ပလံၚ်ဗစိုပ်လဝ် လိက်သဝဏ်ရ။

မွဲလပါ်ပၠန်ဂှ်လေဝ် ဂကောံမဟာမိတ်ကောဒေံ ဒပ်ပၞာန်အာရက္ခ AA ဂှ်တှ်ေ ဆက်တုဲ ဒှ်မံၚ်ပေါဲဗတိုက်ကဵု ဒပ်ပၞာန်ဗမာဖိုဟ်တုဲ ညံၚ်ရဴသာ် ဂှ်ကီု ဗော်သွးကောန်ဂကူကရေၚ် KNU လေဝ် ပ္ဍဲကဵုဒေသမန်၊ ကရေၚ်၊ ရးဗဂေါတံဂှ် ပ္ဍဲဂိတုအေဗရာဏံ သီကေတ်လဝ်ဗဒိုပ်ပၞာန် ဗမာ ၄ ဒၞာဲဟွံအောန်တုဲ အခိၚ်လၟုဟ်ဏံလေဝ် ပေါဲဗတိုက်ဆက်ဒှ်မံၚ် ဖိုဟ်ရောၚ်။

ဥူမေန်အံၚ်လှိုၚ် သ္ဂးမံၚ်ဂှ်တှ်ေ ညးတံ မိက်ဂွံဂွံပရေၚ်ၜိုဟ်လလမ် ရောၚ်၊ ယဝ်ရကၟိန်ဍုၚ်ဟွံညိၚ်ဝပ်မ္ဂး ကိစ္စပရေၚ်ဇၞော်မောဝ်တံဂှ် မုလေဝ်ကၠောန်ဟွံဂွံ၊ ကၠောန်ပရေၚ်ၜိုဟ်လလမ်တုဲ ညိၚ်ဝပ်တုဲမှ ကမၠောန်ပရေၚ်ဖောအ်ဗြဳတံ ကၠောန်ဂွံရောၚ် သ္ဂးရ။

ဟိုတ်ဂှ်ရ ပ္ဍဲပရေၚ်ၜိုဟ်လလမ်ဂှ် ဗက်အာတ်မိက်မံၚ် အရာဒှ်ဟွံမာန် တံတုဲ သွက်ဂကောံဇကု ဂွံတန်ကြန်ဗိုန်ဗတ်ဟေၚ် ကၠောန်အာမံၚ်မ္ဂး ဗၠေတ်ရောၚ်မဒှ်တုဲ အရာထေက်ကဵုဒးကၠောန်တံဂှ် ကၠောန်အာရောၚ် ဘပဠလဝ်ဏီရ။

ဟိုတ်နူကော်ဘိက်ပၟိၚ် ပရေၚ်ၜိုဟ်လလမ်ဟွံပြေပြံၚ်ဂှ်ရ အကာဲအရာ ဒးထမံက်ရုပ်ရဴပရေၚ်လဝေၚ်ပၞာန် မံက်ကတဵုကၠုၚ်မာန်ရောၚ်ဂှ် နူကဵုညးတာလျိုၚ် သုတေသနသွာၚ်ပၞာန် MDSI ကိုနံၚ်ယော ဟီုကဵု ဌာန်ပရိုၚ်သြၚ်လောန်တိုၚ်မ်ရ။

“ပိုဲတံဂွံမိၚ်မံၚ်ဂှ်တှ်ေ လ္ပာ်မွဲတေံ သွက်ဂွံကလေၚ်ပလန်ထပက်ပၞာန်ဂှ် ဗီုပြၚ်ကောပ်ကာဲလဝေၚ်ပၞာန်တံ ပြံၚ်သၠာဲထမံက်မံၚ်ရုပ်ရဴနွံရောၚ် နူပရိုၚ်သွာၚ်ပၞာန်တံ ဂွံမိၚ်တီမံၚ်တုဲ ကြဴနူပရေၚ်ဘိက်ပၟိၚ်ၜိုဟ်လလမ် ကၠာကိုန်အစဳဇန် ၁၀၀ တ္ၚဲညးတံတုဲဒှ်တှ်ေ ဟိုတ်နူဘိက်ပၟိၚ်ပရေၚ်ၜိုဟ်လလမ် ဟွံပြေပြံၚ်တုဲ ဒးထမံက်ရုပ်ရဴပရေၚ်လဝေၚ်ပၞာန်ရောၚ် လဟီုသ္ဂး ဗီုပြၚ်တံဏံလေဝ် ဒှ်ကၠုၚ်မာန်ဏောၚ်။ ပေါဲဗတိုက်ကလေၚ်ပလန်တံလေဝ် ဗွဲမလှဲလးဇၞော်ဇၞော် ကတဵုဒှ်ကၠုၚ်မာန်ရောၚ် ပိုဲတံထေၚ်ကေတ်ရ” သာ်ဝွံ သ္ဂးရ။

အပ္ဍဲအခိၚ်လၟုဟ်ဝွံတှ်ေ ပါဲနူဒေသသေံသၟဝ်ကျာတံတုဲ အပ္ဍဲရးသကိုၚ်၊ မကွေ၊ ဗဂေါ၊ တနၚ်သဳ ကေုာံ ဒၠာဲဒေသကောန်ဍုၚ်အရၚ် ဂကောံဒပ်ပၠန်ဂတးတံ ချဳဒရာၚ်ဇြဟတ်တဴမံၚ်တံဂှ် ဒပ်ပၞာန် ကြဳဖျေံမံၚ်ဗုမ်၊ ဗီုဂှ်ကီု ပေါဲဗတိုက် အကြာၜါလ္ပာ်လေဝ် ဆက်တုဲ ကတဵုဒှ်မံၚ်ဖိုဟ်ရောၚ်။

နကဵုပရေၚ်ပံၚ်ကောံအာက္ဍိုပ် ပရေၚ်ဍုၚ်ကွာန်ကဵုသွာၚ်ပၞာန်တံ ဒက်ပ္တန်လဝ် ဒပ်ပံၚ်ကောံကံၚ်သဳပၠတရဴ ဖိတ်ဒရေဝ် SCEF ဂှ်တှ်ေ အပ္ဍဲသွာၚ်ပၞာန်မ္ဂး ဒက်ပ္တန်လဝ်သၞောတ်ဗဟဵုကောပ်ကာဲတုဲ သွက်ဂွံချူခၞံအာ မဟာဗျူဟာပၞာန် အုပ်ဓလီုအာ အလုံဍုၚ်မွဲမာန် ရောၚ်ဂှ် ဝန်ဇၞော်ပရေၚ်စဵုဒၞာ NUG ကဵုလဝ်သမ္တီရ။

ပရိုၚ် – သြၚ်လောန်တိုင်မ်

Photo – MOI