မတ်မလီု၊ အေဗရာ ၂၆
အပ္ဍဲကဵုတွဵုရးမန် ၜိုန်ရအလဵုအသဳတၟိ ပြံၚ်သၠာဲကၠုၚ်ကီုလေဝ် ပ္ဍဲဍုၚ်ဇၞော်မတ်မလီုဂှ် ကမၠောန်ပရေၚ်ရေၚ်တၠုၚ် ဂကောံဗဂဵုလဟဵု သာယာတံ ဍိုန်လျမံၚ်ဖိုဟ်ရောၚ် ညးဍုၚ်ကွာန်တံ ဟီုကဵု ဌာန်ပရိုၚ်သြၚ်လောန်တိုၚ်မ် ရ။
ပရေၚ်ရေၚ်တၠုၚ် ဂကောံဗဂဵုလဟဵုသာယာ မပ္တံကဵု ပရေၚ်သီဟၟိက်၊ ပဠေဝ်ပဠေတ်ဂၠံၚ်ဒဒန်အပ္ဍဲဍုၚ်၊ ပရေၚ်ပါ်ပရအ်ကဵုဍာ် သီုကမၠောန် ပရေၚ်ရေၚ်တၠုၚ်ဗဂဵုလဟဵု နာနာသာ်တံမ္ဂး ဒှ်မံၚ်အကာဲအရာ ဗီုပြၚ် ဟၟဲကဵုစေဝ်ပၞောန်တံရောၚ်။
အတိုၚ်လဟီု ညးဍုၚ်ကွာန်တံမ္ဂး ကွဳစက်သီဂိုၚ်ဟၟိက်တံဂှ် ဟွံလုပ်ကၠုၚ်သီအကြာအရာပ် ဗီုကၠာတေံတုဲ ဒၞာဲကြပ်ဂှ် ညးဒေသတံ ဇၟာပ်ပ်တ္ၚဲ ထောံကှ်မံၚ်ဟမှိက်ဂှ်ရ ဒၞာဲပွဳပွူဂှ်ဗွဲမဂၠိုၚ် ကၠိပပ်မံၚ်အိုတ် ရ။
ဟိုတ်နူကမၠောန် ရေၚ်တၠုၚ်ဗဂဵုလဟဵုတံ ဍိုန်လျမံၚ်တုဲ ပရေၚ်သ္အးဇ္ၚး သာယာအပ္ဍဲဍုၚ်လေဝ် လီုလာ်ကၠုၚ်မံၚ်ရောၚ် ညးဍုၚ်ကွာန်မွဲတၠ ဟီုရ။
ကွဳစက်သီဂိုၚ်ဟၟိက်ဌာနဗဂဵုလဟဵုတံ ၜိုန်ရဟွံကၠုၚ် လၟေၚ်ဍာံဍာံကီုလေဝ် အပ္ဍဲအကြာအရာပ်တံမ္ဂး သွက်အခေါန် သီဂိုၚ်ဟၟိက် ဗဂဵုလဟဵုဂးတုဲ ၆ ဂိတုမွဲဝါ ကံက်မံၚ်လၟိုန်ဂှ်ကီု ကွဳစက်သီဂိုၚ်ဟၟိက် ဌာနဗဂဵုလဟဵုဂှ်လေဝ် အပ္ဍဲပွိုၚ်မွဲဂိတုဂှ် စိုပ်ကၠုၚ်ဆၜိုတ် ၃ အလန်ဓဝ်ဂ်ရ သွက်ညးဍုၚ်ကွာန်တံမ္ဂး ဒှ်မံၚ်အခက်အခုဲ ကွေံကွေံရောၚ်။
အပ္ဍဲကဵုလက်ထက်အလဵုအသဳကၠာတေံ သွက်ကမၠောန်ရေၚ်တၠုၚ် ပရေၚ်ဗဂဵုလဟဵု သီဂိုၚ်ဟၟိက်ဂှ် ထပ်ရာန်ဗပေၚ်လဝ် ကွဳစက်ဂိုၚ်ဟၟိက်တုဲ အတိုၚ်တ္ၚဲချိၚ်လဝ်တံမ္ဂး စိုပ်ကၠုၚ်မံၚ်လၟေၚ်ဍာံကီုလေဝ် ကြဴနူသီအဝဵုတုဲ ပရေၚ်ရေၚ်တၠုၚ်ဗဂဵုလဟဵုတံ ယအ်စှ်ေအာရ။
အပ္ဍဲဍုၚ်မတ်မလီု ကြဴနူကဵုဒပ်ပၞာန်သီအဝဵုတုဲ ကမၠောန်ရေၚ်တၠုၚ် ပရေၚ်ဗဂဵုလဟဵုတံသၟးဟွံက ပရေၚ်ရေၚ်တၠုၚ် အကြာဌာနတၞဟ်တံလေဝ် ဒးထပက်သြန်တုဲမှကၠောန်ကဵုဂှ်ကီု ၊ ပရေၚ်ရေၚ်တၠုၚ်ကမၠောန် ဗီုကၠာတေံဟွံကၠောန်ကဵုတုဲ ယဝ်ရတေၚ်စိုပ်ဒၞာဲ ဆေၚ်စပ်တံမ္ဂးတှ်ေလေဝ် မုမှဘိုၚ်ရေၚ်တၠုၚ်ဖန်ဖက် ကေတ်ကဵုအရေဝ် ဟၟဲရောၚ် ဂွံတီကေတ် နူညးဍုၚ်ကွာန်တံရ။
ပရိုၚ် – သြၚ်လောန်တိုၚ်မ်
Photo – CJ