ဗြဝတီ၊ အေဗရာ ၂၆
အပ္ဍဲကုန်ဗဒိုပ်ဗျူဟာပၞာန်ဗမာ ဍုၚ်ဝဝ်လေ ခရိုၚ်ဗြဝတီ တွဵုရးကရေၚ် ပယျဵုသေံ-ဗၟာဂှ် ပေါဲဗတိုက် အကြာဒပ်ကဝ်မယှေန်ပၞာန်ကဵု ဂကောံဇြဟတ်ပၠန်ဂတးတံ သ္ကာတ်မြဟ်မံၚ်ရောၚ်ဂှ် ဂွံတီနူ တမ်ရိုဟ်ပရိုၚ်ဒေသတံရ။
ဒပ်ပၞာန်ဗၠးၜးကောန်ဂကူကရေၚ် KNLA မဟာဒပ် ၆ သ္ကိုပ်သ္ကလဝ် ဂကောံဇြဟတ်ပၠန်ဂတးတံဂှ် သွက်ဂွံ သီကေတ် ဗ္ဒိုပ်ကုန်ဗျူဟာ ပၞာန်ဗမာ ကရပ်ဍုၚ်ဝဝ်လေဂှ် ကောံဗိုၚ်ကၟာတ်ဆိုအ်ဗတိုက်မံၚ် လအ်ကၠုၚ်ကဵုဂိတုဂၠိုၚ်တုဲ လပါ်ဒပ်ကဝ်မယှေန်ပၞာန် ညံၚ်ဗဒိုပ်ဟွံဂွံစှ်ေအာဂှ် သုၚ်စောဲပၞာန်ကျာအဓိကတုဲ ဒုၚ်တဝ်စၞေဟ်စဵုဒၞာမံၚ် ဇၞော်ကဵုဇြဟတ်ရ။
ဗဒိုပ်ကၚ်ဒၞာလဝ် ဗျူဟာဝဝ်လေ ဗွဲမဂၠိုၚ်တံဂှ် နူကဵုဒပ်ပံၚ်ကောံဇြဟတ်ပၠန်ဂတးတံ သီကေတ်ဂွံလဝ်တုဲ သွက်ဂွံသီကေတ် ဒၞာဲကုန်ဗဒိုပ်ဗျူဟာ အဓိကသှ်ေမံၚ်ဂှ် ထပက်ပၞာန်ဗတိုက်ကၠုၚ်မံၚ်တုဲ ပ္ဍဲဂိတုအေဗရာ ၂၅ ဂှ်တှ်ေ ပေါဲဗတိုက်အကြာၜါလ္ပာ် သ္ကာတ်မံၚ် အိုတ်အစောန်ရောၚ် တမ်ရိုဟ်ပရိုၚ်ညးဒေသမွဲတၠ သ္ဂးရ။
ရမျှာၚ်ပေါဲဗတိုက် လွဟ်ဗြုမံၚ်အကြာၜါလ္ပာ်တံ ဂွံမိၚ်မံၚ်အဆက် ဟွံပိုတ်တုဲ ညံၚ်ရဴပေါဲပၞာန်ဂၠးကဝ် ကတဵုဒှ်မံၚ် ပ္ဍဲကဵုဍုၚ်ဝဝ်လေရောၚ် အကာဲအရာပေါဲဗတိုက်သ္ကာတ်မြဟ်မံၚ်ရဂှ် ညးဒေသဝဝ်လေမွဲတၠ ဟီုရ။
ညံၚ်ဗျူဟာဝဝ်လေ ဟွံဒးဒုၚ်သီဂှ် နူကဵုဒပ်ကဝ်မယှေန်ပၞာန် သုၚ်စောဲဒရုၚ်တုဲ ဗတိုက်ဂှ်ကီု၊ ပန်မံၚ်ကဵုလွဟ်ဇၞော်သၟးဟွံက ကြဳဗုမ်ဗတိုက်မံၚ်ကဵုၜၚ်ကျာတံဂှ်ရ အကြာအရာပ် လ္တူဍုၚ်ဝဝ်လေ မၞုံကရပ်ဗျူဟာဂှ်မ္ဂး မကမ်လွဟ်ဇၞော်တံ မွဲဏှမွဲဏှ ဒတုံစှ်ေခတိုဟ်မံၚ်တုဲ ကောန်ကွာန်တံဒးလဝ်ဘဲဝပ် သ္ၚိဌာန်လီုလာ်အာကီု နွံရ။
မွဲလပါ်ပၠန်ဂှ်လေဝ် သွက်ဂွံကဵုကၠုၚ်ဇြဟတ်အရီုဗၚ် ကုဗျူဟာဝဝ်လေမာန်ဂှ် နူကဵုဒပ်ကဝ်မယှေန်ပၞာန် ဒုၚ်သ္ဇိုၚ်လ္ပာ်သၠုၚ်ကျာဍုၚ်ဗြဝတီ ပ္ဍဲဗွိုၚ်ဍုၚ်လေကေကဝ်တုဲ ပါ်ပရးစွံလဝ် ကရောၚ်ပၞာန်နာနာတံဂှ် ထပက်မံၚ်ကရောၚ်ပၞာန်တုဲ လပါ်ကွာန်မေန်လက်ပါန်ကဵု ကွာန်ဖလူဂှ်လေဝ် ပေါဲဗတိုက်ဆက်ကတဵုဒှ်မံၚ်ဖိုဟ်ရ။
အပ္ဍဲဂိတုအံက်တဝ်ဗါသၞာံတုဲကၠုၚ်ဏံ နူကဵုဒပ်ကဝ်မယှေန်ပၞာန် ကြဴနူသီကေတ်လဝ် ဍုၚ်တၟိလေကေကဝ်တုဲဂှ် ဆက်ထပက် ကရောၚ်ပၞာန် လပါ်ကွာန်မေန်လက်ပါန်ကဵု ကွာန်ဖလူတံကီုလေဝ်၊ စဵုကဵုစိုပ်ကၞောတ်ဂိတု အေဗရာသၞာံဏံဂှ် သီကေတ်ၜါကွာန်ဏံ ဟွံမာန်ဏီသၟးဟွံက ညးဒးဘဲဝပ်ဆောံလေၚ်လဝ်ဗွဲမဂၠိုၚ်နွံတုဲ အတိုၚ်ရန်လဝ် ဆက်တိုန်ဂတ အာစိုပ်ဟွံမာန်ဏီရောၚ် ဂွံတီကေတ် နူတမ်ရိုဟ်ပရိုၚ်သွာၚ်ပၞာန်ရ။
အပ္ဍဲကဵုပေါဲဗတိုက်ဒှ်လဝ် ကွာန်မေန်လက်ပါန်ကဵု ကွာန်ဖလူတံဂှ် နူကဵုဒပ်ကဝ်မယှေန်ပၞာန် သ္ပပဓါန် သုၚ်စောဲလဝ်ဇြဟတ် ရဲတိတ်နူဘာယိုက်ဝန်ပၞာန် ညးဍုၚ်ကွာန်တံဂှ် ဗလံၚ်လဝ်အပ္ဍဲကဵုမုက်ပၞာန်ဂတအိုတ်တုဲ ကောန်ပၞာန်တၟိ ယိုက်ဝန်ပၞာန်တံဗွဲမဂၠိုၚ် ဒးဝပ်ချိုတ်အာလဝ်ဂၠိုၚ်ကွေံကွေံရောၚ် ဂကောံဇြဟတ်ပၠန်ဂတးတံ ဗၟံက်ထ္ၜးလဝ်တုဲ ဂွံတီလဝ်ကီုရ။
ပရိုၚ် – သြၚ်လောန်တိုၚ်မ်
Photo – PDF