ဗုက်ပျေၚ်၊ အေဗရာ ၂၆
အပ္ဍဲကဵုရးတနၚ်သဳ အကြာဍုၚ်ဗုက်ပျေၚ်ကဵု ဍုၚ်ပျဳဂျဳမဏ္ဍိုင် ဗဒိုပ်ပၞာန်ဗိုတာ နွံမံၚ်လ္တူဂၠံၚ်ကၟိန်ဍုၚ်ဂှ် ဗတိုက်သီကေတ်လဝ်မာန်ယျ နူကဵုခရိုၚ်ဗိက်-ထဝါဲ KNU ပတိတ်လဝ် လိက်လလောၚ်တြးရ။
ဗဒိုပ်ဗိုတာ ဇြဟတ်ဒပ်ကဝ်မယှေန်ပၞာန် မၞုံ ၄၀ ပြၚ်ဂှ် နူကဵုဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA တံ စဗတိုက်ကၠုၚ်လဝ် နူဂိတုအေဗရာ ၂၀ စဵုစိုပ်ဂိတုအေဗရာ ၂၄ ဂှ်တှ်ေ သီကေတ်ဏာ သီုအလုံမွဲဗဒိုပ်မာန်ရ။
အပ္ဍဲပေါဲဗတိုက်သီဗဒိုပ်ဏံဂှ် ကောန်ဒပ်ကဝ်မယှေန်ပၞာန်တံ ထောံလဝ်ဗဒိုပ် ဂြိပ်ပါဲတိတ်အာအိုတ်တုဲ အလုံမွဲဗဒိုပ် စံၚ်ပလီုထောံပၟတ်ရဂှ် ညးတာလျိုၚ်လလေၚ်ပရိုၚ် ခရိုၚ်ဗိက်-ထဝါဲ KNU ဟီုကဵု ဌာန်ပရိုၚ်သြၚ်လောန်တိုၚ်မ် ရ။
အပ္ဍဲကဵု ပေါဲဗတိုက်သီဗဒိုပ် ဗိုတာဏံဂှ် နူကဵုဒပ်ပၞာန်ဗၠးၜး ကောန်ဂကူ ကရေၚ် KNLA မဟာဒပ် (၄) တမ်ဒပ် (၂၀၃) ကဵု ဂကောံဒပ်ပံၚ်ကောံပၠန်ဂတးတံ ပံၚ်တောဲ ပါလုပ်ဗတိုက်လဝ် မဒှ်ရ။
အပ္ဍဲဂိတုမာတ် ၁၅ တုဲကၠုၚ်ဏံလေဝ် ပ္ဍဲရးတနၚ်သဳ ပွိုၚ်ဍုၚ်တယိတ်ချံၚ် ကွာန်မေန်ဒပ် ဖျေံလဝ်ဗဒိုပ်ပၞာန် နူတုဲကၠုၚ် ၃၀ သၞာံပြၚ်ဂှ်လေဝ် ဒပ်ပံၚ်ကောံ KNLA တံ ဗတိုက်သီကေတ်လဝ် ကီုရောၚ်။
ပရိုၚ် – သြၚ်လောန်တိုၚ်မ်
Photo – KNU/PDF