မာန္တလေဝ်၊ အေဗရာ ၂၆
သွက်ဂွံကလိဂွံ ပရေၚ်သ္ပစၟတ်သမ္တီ နူပွဳဗွိုၚ်ဂၠးကဝ်ကဵုအာသဳယာန်တံဂှ် အလဵုအသဳပြံၚ်လဝ်ဗီုပြၚ် ဒပ်ပၞာန်သီအဝဵု ဂစာန်ကၠောန်မံၚ်တုဲ လ္တူဂကောံပၠန်ဂတးတံဂှ် ထ္ၜးလဝ်အယောၚ်အလာ ပရေၚ်ၜိုဟ်လလမ်တုဲ အလဵုအသဳပၞာန် ဝေၚ်ကၠုၚ်ပၞာန် ပရေၚ်စိုတ်ဓါတ် အခိၚ်ဗွဲမကိတ်ညဳမွဲရ။
အတိုၚ်လိက်ပရိုၚ် တြးဝါဒအလဵုအသဳ ဗၟံက်ထ္ၜးချူလဝ်တံမ္ဂး အပ္ဍဲဂိတုအေဗရာ ၂၄ ဂှ် ပ္ဍဲကဵုရုၚ်ဌာန်ဂဥုပ် ရးပၞာန်ဒေသလဒေါဝ် ရးဒေသမာန္တလေဝ် ကၠောန်ဗဒှ်လဝ် အသေအဟာန်သၠောဲပအပ် ရဲဂကောံပၠန်ဂတး သၟတ်တြုံ ၄၇၀ တၠကဵု သၟတ်ဗြဴ ၄၇ တၠတံ ကုဇရေၚ်မိမ ဆေၚ်စပ်တံရ။
ရဲပတေဟ်ဒုၚ်တဲကၠုၚ် လၟေၚ်ကမၠောန် ပရေၚ်ၜိုဟ်လလမ်ဒပ်ပၞာန် လၟိဟ် ၅၀၀ ပြၚ်တံ နူကဵုဂကောံ KIA, AA, PLA လ္ၚဵု ကေုာံ PDF ဂမၠိုၚ် သီုကဵုလွဟ်မကမ်နာနာတံ ထပ်လုပ်ကၠုၚ် သၟဝ်ဗွိုၚ်သၞောဝ် ဥပဒေ ရောၚ်သ္ဂးရ။
ဣဏံဝွံ ကြဴနူကဵု သမ္မတဍုၚ် ဥူမေန်အံၚ်လှိုၚ် ဒှ်လဝ် က္ဍိုပ်သ္ကိုပ်ပၞာန်သီအဝဵုတြေံ ဟီုဂးလဝ် ဂိတုအေဗရာ ၂၀ ဏံ သွက်ပရေၚ် ၜိုဟ်လလမ် PDF တံ ညံၚ်ဂွံလုပ်ဖျေံလွဟ်တုဲ ကၠောန်ဗဒှ်ကၠုၚ်လဝ် ဗီုဏံရောၚ်။
ကၠောန်ဗဒှ်ကၠုၚ်လဝ် ဗီုဏံဂှ်တှ်ေ ဒှ်အရာ သွက်ပရေၚ်ဝေၚ်ပၞာန် စိုတ်ဓါတ် လ္တူဂကောံပၠန်ဂတးတံတုဲ မွဲလပါ်ပၠန်လေဝ် ဒၟာနူဟိုတ်နာနာသာ် ညးလုပ်ဖျေံလွဟ် သၟဝ်တဲဒပ်ပၞာန်တံလေဝ် နွံမံၚ်ညိညဒှ်မာန်ရောၚ် ညးလ္ၚတ်တံ သ္ဂးရ။
ရဲဒပ် PDF လ္ၚဵုတံ ဗှ်သၞာမိမကၟိန်သ္ၚိဌာန် ကလေၚ်စဴဝေၚ်သ္ၚိတုဲ သ္ၚောဲခြာမံၚ်ကဵုဒပ်ဍေံတံ နွံမာန်ကီုလေဝ် ရဲပြံၚ်လုပ်အာလပါ်တေံဂှ် ဟၟဲပုဟ်ဂှ် ညးမၞုံအခေါၚ်ဟီုဂး ရုၚ်သ္ကိုပ်ဝန်ဇၞော် အလဵုအသဳညဳသၟဟ် ကောန်ဂကူ NUG ဥူနေဖုၚ်လာတ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“နကဵုရဲဒပ် PDF မၞုံသၟဝ် Chain of command (လၟေၚ်အမိၚ်ကောပ်ကာဲ) ဌာနဝန်ဇၞော်ပရေၚ်စဵုဒၞာ အလဵုအသဳညဳသၟဟ်ကောန်ဂကူပိုဲတံဂှ် လ္ၚဵုမွဲၜါတၠ ကလေၚ်စဴအာဌာန်မိကၟိန်အိန်ထံၚ်ညးတံ နွံမာန်ရ။ တုဲတှ်ေ ညးစ္ဍးသ္ၚောဲခြာမံၚ်ကဵု ဒပ်တံလေဝ် နွံမာန်ရ။ အရာပရေၚ်တံဏံဂှ်တှ်ေ ပ္ဍဲဇၟာပ်ပ်ဒပ် နွံဒၟံၚ်ဖအိုတ်ရဏောၚ်။ ဆဂး လၟိဟ်သွက်ဂွံဒးဂွိၚ် ညံၚ်ကဵုရဲအာလုပ်ဖျေံလွဟ် ဟွံသေၚ်မ္ဂး အတိုၚ်ညးတံဟီု ရဲပြံၚ်လုပ်အာ လ္ပာ်ဒပ်ပၞာန်ဂှ်တှ်ေ ညိလေဝ်ဟၟဲပုဟ်ဂှ် ပိုဲတံဟီုဂွံ သောၚ်ၚ်ကၠးကၠးရ” သာ်ဝွံ သ္ဂးရ။
ၜိုန်ရ တြးလဝ်ဝါဒ ညးလုပ်ဖျေံလွဟ် ၅၁၇ တၠနွံမံၚ်ကီုလေဝ်၊ လွဟ်ပါကၠုၚ် ကရောံဍေံတံဂှ် နွံဆ ၃၁ ဇကိုအ်ဓဝ်တုဲ ပါဲနူဂှ် ဗုမ်ကၠဟ်တဲ/မဗုမ် ၄၈ မ၊ စက်ဟီုအရေဝ် ၁ မ၊ ဖျေဲမကမ်နာနာ ၃၅ မ၊ မကမ်နာနာ ၁၂၉၈ မ ကေုာံ မာၚ်နာနာ ၃ မဓဝ်ဟေၚ် သ္ကိုပ်ရးပၞာန် ဂွံဒုၚ်ကေတ်လဝ်တဲလဝ်ရ။
တုဲပၠန် ကပေါတ်ပၞာန်ပါကၠုၚ်ကရောံဍေံတံ လွဟ်၊ ဗုမ်ကၠဟ်တဲ၊ စက်ဟီုအရေဝ်တံဂှ် အတိုၚ်င္ၚုဟ်မး ခုတ်စၟတ်လဝ် ဖျေံကဵုလာပ်သြန်တုဲ ညးလုပ်ဖျေံလွဟ် မွဲတၠမ္ဂး ကဵုလဝ်ထံက်ပၚ် သြန်မွဲကိုတ်ဒကေဝ်ရောၚ် တြးလဝ်ဝါဒကီုရ။
မွဲလပါ်ပၠန် ညးလုပ်ကၠုၚ်ဖျေံလွဟ် ဇရေၚ်ဒပ်ပၞာန်တံဂှ် ဒှ်ရဲမံၚ်စံၚ်မံၚ် ဒေသရးဇၞော်မာန္တလေဝ်တံကီု၊ ရဲဒေသမကွေ၊ သီုရဲမံၚ်ဒၟံၚ် ပွိုၚ်ဍုၚ်နံၚ်ချိုဝ် သေံသၟဝ်ကျာလေဝ် ပါလုပ်မံၚ်ကီုရောၚ် ချူဗၟံက်လဝ်ဂှ် ဂွံဆဵုကေတ်ရ။
အပ္ဍဲဂိတုမာတ် ၁၉ တုဲကၠုၚ်ဏံ အခိၚ်ကၠောန်မံၚ် ကောံဓရီုစၠတ်ထဝ်တံဂှ်လေဝ် ရဲဂကောံပၠန်ဂတး ၅၀၀ ပြၚ် ကၠုၚ်လုပ်ဖျေံလွဟ်ကီုရောၚ် တြးလဝ်ဝါဒနွံရ။
ပ္ဍဲအခိၚ်တေံဂှ်လေဝ် ကၠောန်ဗဒှ်လဝ်အသေအဟာန် သၠောဲပအပ်ရဲလုပ်ဖျေံလွဟ် ကုဇရေၚ်မိမ ဆေၚ်စပ်တံ ပ္ဍဲကဵုဒၞာဲရုၚ် ဌာန်ဂဥုပ်ရးပၞာန် ဒေသလဒေါဝ်ဂှ်ကီုရောၚ်။
ဆဂး စပ်ကဵုပရေၚ်လုပ်ဖျေံလွဟ် နကဵုဂအုံဂအုံ ကလောအ်ကလောအ် သီုၜါအလန်ဏံ အရာတြးမံၚ်ဝါဒတံမ္ဂး နူကဵု ဂကောံရပ်လွဟ်ကောန်ဍုၚ်အရၚ်ကဵု ဂကောံပၠန်ဂတးဆေၚ်စပ်တံ ပတိတ်လိက်လလောၚ်တြးတုဲ ကလေၚ်ပလန်လဝ် ဗွဲမလုပ်သၞောဝ်တံဂှ် ဟွံဂွံဆဵုလဝ်ဏီပုဟ်။
ဒဒှ်ရ နကဵုဂကောံဒးဒုၚ်ဟီုဂးမံၚ် ပရေၚ်လုပ်ဖျေံလွဟ်တံ ဒှ်မံၚ်ပရိုၚ်ဗၠေတ်တ်ဂှ် နကဵုပရိုၚ်ဍာံဍာံ ဒးကလေၚ်ပတိတ်ကဵုထေက်ရောၚ် ညးအုပ်ကာ ဂကောံမဳဒဳယာပရိုၚ်ဗၟာဗၠးၜး ဥူတိုဝ်ဇြဝ်လာတ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“လပါ်ဒပ်ပၞာန်ဂှ်တှ်ေ ဂဥုပ်ဒပ်ပၞာန်တၟိလၟုဟ်ဏံဂှ် ညးတေံကၠုၚ်နူ ရဲထံၚ်ပရိုၚ်တုဲ ပရေၚ်လဝေၚ်ပၞာန် ပရေၚ်စိုတ်ဓါတ်ကဵု ပရေၚ်ဆက်ဆောံညးဍုၚ်ကွာန်တံဂှ် သုၚ်စောဲဂၠိုၚ်ကၠုၚ်ဏောၚ်။ လ္တူအရာဏံ ဂကောံပၠန်ဂတးတံလေဝ် နကဵုသၞောတ်စှ်ေစှ်ေ၊ ခိုဟ်အိုတ်ဂှ်တှ်ေ သွက်ပရိုၚ်ဗၠေတ်တ်တံဂှ် ကလေၚ်ပလန်ခၠေဝ်ဏာကဵုတုဲ ပရိုၚ်ဍာံတံဂှ် ပတိတ်ကဵုမ္ဂးတှ်ေ ကလေၚ်ပလီုသအး ဖအိုတ်ထောံ အရာတံဏံမာန်ရောၚ် ထေၚ်ရ။ တုဲတှ်ေ ဒးမၚ်ရံၚ်အာ ပရေၚ်ချဳဒရာၚ်လၟုဟ်တံချိုတ်တ်ပၠိုတ်တ်တုဲ နကဵုအရာပရေၚ်ဒုၚ်စသိုၚ်ဟွံပါ ဒုၚ်သ္ဇိုၚ်ကဵုတၚ်နၚ်တံဟေၚ် ဒးကလေၚ်ပလန်ခၠေဝ်ဏာထေက်ရောၚ် အဲမိက်ဂွံဟီုရအဴ” သာ်ဝွံ သ္ဂးရ။
ဒပ်ပၞာန်သီအဝဵု သီကေတ်လဝ်အဝဵုကၟိန်ဍုၚ် ပတေဟ်ကေတ်လဝ် နကဵုဇြဟတ်လွဟ်တုဲ နူကဵုပရေၚ်ပန်သၠေက်ဂစိုတ်လဝ် ညးထ္ၜးဆန္ဒၜိုဟ်ဟ်သြိုဟ်ဟ်တံတုဲ ဒှ်အာပရေၚ်ရပ်ကၠေၚ် ပန်ပှော် ပကီုပရာတ်တံဂှ်ဟေၚ် ဒှ်အရာဟရိုဟ်ပလံၚ်ဗစိုပ်ကဵုဏာ သွက်ပရေၚ်ပၠန်ဂတးရပ်လွဟ် မဒှ်ရ။
ဟိုတ်ဂှ်ရ သွက်ဂွံကုတ်ထပိုတ်ထောံရိုဟ်ကၞက် သၞောတ်တၠအဝဵုပၞာန် ညံၚ်ဂွံအိုတ်အးအာဂှ် ဂကောံရပ်လွဟ် နကဵုလၟိဟ်ကဵုကၠံကၠံတံ မံက်ကတဵုကၠုၚ်တုဲ အခိၚ်ဒပ်ပၞာန်ဗၟာ ကျမံၚ်ပေါဲဗတိုက်ဗလးတိတံဂှ်တှ်ေ ဂွံကဵုဖျုန်ကဵု PDF တံတုဲ စပတိတ်သုၚ်စောဲကၠုၚ် ဗျူဟာပါ်ဒကးတံရ။
ဆဂး လ္တူဗျူဟာ ဖျေံကဵုမံၚ်လာပ်သြန် ကုရဲလုပ်ကၠုၚ်ဖျေံလွဟ် သီုလွဟ်မကမ်တံဂှ် ရဲဂကောံပၠန်ဂတးတံ စိုတ်ဟွံလုပ်တုဲ ဒပ်ပၞာန်ဗၟာ ညံၚ်ဂွံဒေါမ်စှ်ေအာဂှ်ဟေၚ် ကၠောန်လဝ်ပရေၚ်ပၞာန် မာန်ကၠုၚ်ရ။
အပ္ဍဲအကာဲအရာဏံ ဇြဟတ်ပၞာန်ဒပ်ဗတိုက်တံ ဟောံဗြမ်အာတုဲ ဒးထောံကၠေံတိဍာ်ဗွဲမဂၠိုၚ်ကီု၊ မွဲအခိၚ်ဓဝ် ဟိုတ်နူဥပဒေယိုက်ဝန်ပၞာန် ကေုာံ နကဵုဇြဟတ်ဟရိုဟ်အရီုဗၚ် နူကဵု အလဵုအသဳကြုက်တုဲ ဒပ်ပၞာန်ဗၟာ ကလေၚ်ယာတိုန်က္ဍိုပ်မာန်တုဲ စိုပ်ကၠုၚ်အကာဲအရာ တ္ၚဲဏံရောၚ်။
ဟိုတ်ဂှ်ရ နူကဵုဒပ်ပၞာန်သီအဝဵု ဂစာန်ထမံက်ကၠုၚ်ရုပ်ရဴ နဒဒှ် အလဵုအသဳညးဍုၚ်ကွာန် ဒုၚ်ရုဲစှ်လဝ်တံတုဲ သွက်ဂွံဂွံ ပရေၚ်သ္ပစၟတ်သမ္တီ နူပွဳဗွိုၚ်ဂၠးကဝ် ကေုာံ အာသဳယာန်မာန်ဂှ်တှ်ေ ပတဝ်စွံကၠုၚ်အာရီုကဵု ပရေၚ်ၜိုဟ်လလမ် မဒှ်ရ။
သွက်ဂှ်ရ သမ္မတသီအဝဵု ဘိက်ပၟိၚ်လဝ် ဂကောံရပ်လွဟ်ကောန်ဍုၚ်အရၚ်တံ သွက်ဂွံလုပ်သဳကၠဳ ပရေၚ်ၜိုဟ်လလမ် အပ္ဍဲပွိုၚ် ၁၀၀ တ္ၚဲ ကၠာဟွံစိုပ် ဂိတုဂျူလာၚ် ၃၁ တုဲ သွက် PDF တံဂှ်တှ်ေ ဒးလုပ်ဖျေံလွဟ်ရောၚ်။
နကဵုဂကောံဒပ်ပၞာန် သွက်ဂွံဂွံမုက် ပ္ဍဲပွဳဗွိုၚ်ဂၠးကဝ်ဂှ်ဟေၚ် ကော်ဘိက်မံၚ်တုဲ ၜိုတ်တၠအဝဵုပၞာန်နွံအာမံၚ်ဂှ် ဆက်တုဲလုပ်အာပေါဲဗတိုက်ရောၚ် ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် MSRF မိတလဉာဏ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“သွက်အဝဵုရဲဂကောံပၞာန် ဍေံတံဂွံဗိုန်ဗတ် ရဲပြံၚ်ၜးလဝ်ကယျိုၚ်ကွာန်တံ သွက်ဂွံဂွံမုက်မတ် ပ္ဍဲပွဳဗွိုၚ်ဂၠးကဝ်ဓဝ်ရ။ ပ္ဍဲအခိၚ်ညးတံဟီုမံၚ် ပရေၚ်ၜိုဟ်လလမ်ဂှ်ဟေၚ် လ္တူညးဍုၚ်ကွာန်တံဂှ် ဆက်တုဲကြဳမံၚ်ဗုမ်နူဗလးကျာဂှ် ဆက်တုဲကၠောန်မံၚ်ဖိုဟ်ရ။ ဟိုတ်ဂှ်ရ ပရေၚ်ၜိုဟ်လလမ်ဂကောံဒပ်ပၞာန်ဂှ် ဟွံဍာံစၟတ်ပုဟ်၊ တုဲတှ်ေ စေတနာပရေၚ်ဍုၚ်ကွာန်ဟၟဲဟီုဂှ် တီကၠးမံၚ်။ ဟိုတ်ဂှ်ရ နကဵုပိုဲ ဒပ်ပၞာန်ပၠန်ဂတးဍုၚ်မန် MSRF ဂှ်တှ်ေ စဵုကဵုဒပ်ပၞာန် ဟွံကလေၚ်စဴစိုပ်ဒၞာဲဒပ်ပၞာန်ဍေံ၊ ယဝ်ရသၞောတ်တၠအဝဵုပၞာန် ဆက်နွံမံၚ်ဏီမ္ဂး ပိုဲတံဆက်တုဲ ရပ်အာလွဟ် တဝ်စၞေဟ်အာရောၚ်” သာ်ဝွံ သ္ဂးရ။
အပ္ဍဲဂိတုအေဗရာ ၂၃ ဂှ်တှ်ေ အပ္ဍဲကဵုရးဒေသကဵု တွဵုရး ၉ ဒၞာဲ ပွိုၚ်ဍုၚ် ၆၀ ပွိုၚ်ဍုၚ် ဒၞာဲဂကောံပၠန်ဂတးတံ ထိၚ်ချုက်လဝ်တံဂှ် သွက်ဂွံထပ်သုၚ်စောဲ အကာဲအရာကာမံက်တိုန် ကေုာံ အမိၚ်ပရေၚ်အုပ်ဓုပ်ပၞာန်ဂှ် အလဵုအသဳပၞာန် ပြံၚ်လဝ်ဗီုပြၚ် လလောၚ်တြးလဝ် ပၠန်ရောၚ်။
အပ္ဍဲကဵု ပွိုၚ်ဍုၚ် ထပ်ဒးဒုၚ်လလောၚ်တြးလဝ် အကာဲအရာကာမံက်တိုန် ကေုာံ အမိၚ်ပရေၚ်အုပ်ဓုပ်ပၞာန်တံဂှ် စနူဂိတုအေဗရာ ၂၃ တုဲ စဵုကဵုပွိုၚ် ၉၀ တ္ၚဲလုပ်အဝေၚ်ရောၚ် ပ္ဍဲလိက်လလောၚ်တြးဂှ် ဗၟံက်ထ္ၜးလဝ်ရ။
မွဲလပါ်တေံပၠန် အပ္ဍဲပွိုၚ် ၁၀၀ တ္ၚဲဂှ် သွက်ဂွံဆဵုဂဗသဳကၠဳအာ ဘိက်ပၟိၚ်အာလဝ် ဂကောံရပ်လွဟ် ကောန်ဍုၚ်အရၚ်တံတုဲ ရဲဒပ် PDF ၅၀၀ ပြၚ်တံဂှ်တှ်ေ လုပ်ဖျေံလဝ်လွဟ် ပ္ဍဲဇရေၚ်ဒပ်ပၞာန်ဂှ် တြးမံၚ်ဝါဒ မဒှ်ရ။
ဣဏံဝွံ ဒှ်သဘဴကၠောန်မံၚ် နဲကဲရပ်ပၟတ်မွဲလပါ် ဍာ်မွဲလပါ်တုဲ လ္တူအကာဲအရာ ဂကောံဇြဟတ်ပၠန်ဂတးတံ ညဳသၟဟ်ကၠုၚ်မံၚ်တံဂှ် ၜိုဟ်လဵုဒပ်ပၞာန်ဗမာ ဖေက်လကိုတ်မံၚ်ရောဟီုတှ်ေ ဒှ်အရာပရေၚ်ထမံက်ထ္ၜးမွဲရောၚ် ဥူနေဘုၚ်လာတ် ဟီုစၟတ်သမ္တီလဝ်နွံရ။
ပရိုၚ် – သြၚ်လောန်တိုၚ်မ်
Photo – MOI