မတ်မလီု၊ အေဗရာ ၂၈
ပ္ဍဲကဵုတွဵုရးမန် နူကဵုဘာကတ်ဗတောန်ယိုက်ဝန်ပၞာန် လၟေၚ် ၁ စဵုကဵုစိုပ် လၟေၚ် ၂၄ ဒပ်ပၞာန်သီအဝဵု ပံက်ကၠုၚ်မံၚ်လၟေၚ်ဂိတုဂှ် ညးဒးဒုၚ်ပကောံယိုက်ဝန်ပၞာန် စိုပ်အာ ၅၀၀၀ ပြၚ်ယျရောၚ်။
အပ္ဍဲဂိတုအေဗရာ ၂၇ အခိၚ်နူဂယးဂှ် ဒပ်ပၞာန်သီအဝဵု စပံက်ကၠုၚ်လဝ် ဘာကတ်ဗတောန်ယိုက်ဝန်ပၞာန်ညးဍုၚ်ကွာန် လၟေၚ် ၂၄ ဒၞာဲကဵုရုၚ်ဌာန်ဂဥုပ်ပၞးန်ရးအဂၞဲ မဒှ်ရ။
အတိုၚ်တၚ်နၚ် ဌာန်ပရိုၚ်သြၚ်လောန်တိုၚ်မ် ပကောံဂွံလဝ်ဂှ်တှ်ေ အပ္ဍဲကဵုတွဵုရးမန်ဂှ် ဘာပၞာန်မွဲမွဲအလန်မ္ဂး အောန်အိုတ် ကောန်ပၞာန်ယိုက်ဝန်ပၞာန် ၂၀၀ နူကဵုဒပ်ပၞာန်သီအဝဵု ရပ်ပကောံကၠုၚ်လဝ်နွံရ။
ညးဒးဒုၚ်ပကောံလဝ် သွက်ဘာယိုက်ဝန်ပၞာန်ညးဍုၚ်ကွာန် လၟေၚ် ၂၄ ဏံဂှ်တှ်ေ ဒှ်မံၚ်ညးဒးဒုၚ်ရပ်ပဝ်တာအကြာဂၠံၚ်တံ၊ ကြဴနူဒးဒုၚ်ရပ်တုဲ ဒးဒုၚ်ကလေၚ်သွံစလဝ် နဒဒှ်ကောန်ပၞာန်ယိုက်ဝန်ပၞာန်တံ ဗွဲမဂၠိုၚ် ပါလုပ်မံၚ်အိုတ်ရ။
ပ္ဍဲအခိၚ်ဗ္တံ သၟတ်တံ တိတ်ဂၠံၚ်အာကၠုၚ်မ္ၚးမ္ဂး စောဲစပ်ထောံ ဖံက်ပကဝ်အမိၚ်ဒေသန္တရဂှ် တံၚ်ရပ်ကေတ်ပဝ်တာတုဲ ဒပ်ပၞာန်ဗမာကဵု ဒပ်ဗၠာဲသၟိၚ်တံ ပကောံကေတ်လဝ် ကောန်ပၞာန်ယိုက်ဝန်ပၞာန်တံရောၚ် ညးဒေသတံ ဟီုမံၚ်ရ။
လ္တူသၟတ်ဒးဒုၚ်ရပ်ပဝ်တာတံဂှ်ပၠန် မွဲတၠမ္ဂး စနူကဵုသြန် ၅၀ ကိုတ် စဵုကဵု ၈၀ ကိုတ် ကလေၚ်သွံစမံၚ်ကဵု ဇရေၚ် သ္ကိုပ်အုပ်ဓုပ်ကွာန်ဆေၚ်စပ်တံဂှ် ပၠန်ရ။
မွဲလပါ်ပၠန်လေဝ် ညံၚ်ဂွံပံက်အာ ဘာတန်ဗတောန်ယိုက်ဝန်ပၞာန်ညးဍုၚ်ကွာန် ဇၟာပ်ပ်ဂိတုတံမာန်ဂှ် လ္ထုဂကောံပရေၚ်အုပ်ဓုပ်ဆေၚ်စပ်တံဂှ် ဒပ်ပၞာန်သီအဝဵု ကဵုမံၚ်ဇြဟတ်ဟရိုဟ် ဗီုပြၚ်နာနာတံနွံမံၚ် မဒှ်ရ။
ပရိုၚ် – သြၚ်လောန်တိုၚ်မ်
