ကအ်သံၚ်၊ အေဗရာ ၂၈
ပ္ဍဲရးတနၚ်သဳ ပွိုၚ်ဍုၚ်ကအ်သံၚ် ပွိုၚ်ဍုၚ်ဗုက်ပျေၚ်ဂှ် ကောန်ပၞာန်စှ်ေဘာယိုက်ဝန်ပၞာန်မွဲတၠ သီုကဵုလွဟ်မကမ်တံ ကၠုၚ်လုပ်ဖျေံလွဟ်ဂှ် နူတမ်ဒပ် ၁ ခရိုၚ်ကအ်သံၚ် လလောၚ်တြးလဝ်ရ။
ကောန်ပၞာန်စှ်ေလဝ်နူဘာယိုက်ဝန်ပၞာန်မွဲတၠ နူတမ်ဒပ်ခလရ ၂၂၄ ဖျေံလဝ်သ္ဇိုၚ် ပ္ဍဲပွိုၚ်ဍုၚ်ဗုက်ပျေၚ်ဂှ် ပ္ဍဲဂိတုအေဗရာ ၂၂ တုဲကၠုၚ်ဏံ ကၠုၚ်လုပ်ဖျေံလွဟ် ဇရေၚ်တမ်ဒပ် ၁ ခရိုၚ်ကအ်သံၚ် သီုကဵုလွဟ်မကမ်တံရ။
ကောန်သ္ဂံၚ်ယိုက်ဝန်ပၞာန် ကိုပံက်ဂျဳ အာယုက် ၃၃ သၞာံ ကၠုၚ်လုပ်ဖျေံလွဟ်ဂှ် နူဒပ်ကဝ်မယှေန်ပၞာန် သွက်ညးတေံဂွံယိုက်ဝန်ပၞာန် ပကောံကေတ်လဝ်နနဲအတေၚ်အဓမ္မတုဲ တိုန်လဝ်ဘာယိုက်ဝန်ပၞာန် လၟေၚ် ၁၇ ရ။
နူဂှ်မွဲကဆံၚ် စိုပ်ကၠုၚ် ခလရ ၂၂၄ ပွိုၚ်ဍုၚ်ဗုက်ပျေၚ်တုဲ အခိၚ်ထပက်မံၚ်ကရောၚ်ပၞာန် ပ္ဍဲဂၠံၚ် ပျဳဂျဳမဏ္ဍိုင်-ရတနာပုၚ် ဂှ် ညးတေံဂြိပ်တိတ်ကၠုၚ်လဝ် လုပ်ဖျေံလဝ်လွဟ် သီုကဵုလွဟ် MA 1 မွဲဇကိုအ်၊ ဖျေဲမကမ် ၃ မ ကဵု မကမ် ၂၈၀ မရောၚ် သ္ဂးရ။
ပ္ဍဲဂိတုအေဗရာ ၁ သၞာံအာ တုဲကၠုၚ်တေံလေဝ် ပ္ဍဲပွိုၚ်ဍုၚ်ကအ်သံၚ်ဂှ် ကောန်ပၞာန်စှ်ေဘာမွဲတၠ နူကဵုဘာယိုက်ဝန်ပၞာန် လၟေၚ် ၁၁ ဂြိပ်တိတ်ကၠုၚ်တုဲ လုပ်ဖျေံလွဟ် ပ္ဍဲဂကောံဒပ်စဵုဒၞာညးဍုၚ်ကွာန်ဂှ် ဂွံတီလဝ်ရ။
ပရိုၚ် – သြၚ်လောန်တိုၚ်မ်