ၜဳကလေၚ်၊ အေဗရာ ၂၈
ပ္ဍဲတွဵုရးမန် ပွိုၚ်ဍုၚ်ၜဳကလေၚ် အပ္ဍဲဗဒိုပ်ဝေၚ်တာပါန်ဂှ် ကရောၚ်ပၞာန်ကၠုၚ်ကဵုမံၚ်ရီုဗၚ် သွက်ဒပ်ပၞာန်ဗမာ ကၠုၚ်ဗပေၚ်ကဵုမံၚ်ဇြဟတ်တံ ချိုတ်ကီုဒးဝပ်ကီု ဂၠိုၚ်မံၚ်ကွေံကွေံရောၚ် က္ဍိုပ်သ္ကိုပ်ဂကောံပၠန်ဂတး နူကဵုမုက်ပၞာန်တံ ဟီုကဵု ဌာန်ပရိုၚ်သြၚ်လောန်တိုၚ်မ် ရ။
အပ္ဍဲဗဒိုပ်ဝေၚ်တာပါန် ဇြဟတ်ပၞာန်နွံမံၚ်ၜိုတ် ၁၀၀ ပြၚ်တံဂှ် စနူဂိတုအေဗရာ ၁၄ တေံဂှ်ရ ဂကောံဇြဟတ်ပၠန်ဂတး နွံမံၚ်သၟဝ် KNLA သ္ကိုပ်သ္ကလဝ်တံဂှ် သွက်ဂွံသီကေတ်ဗ္ဒိုပ်ဏံ ကၠောန်မံၚ်ပေါဲဗတိုက် ဂှ်ရောၚ်။
ဟိုတ်နူပေါဲဗတိုက်သီဗဒိုပ်ဏံတုဲ ညံၚ်ဗဒိုပ်ဏံ ဟွံဂွံစှ်ေအာဂှ် နူကဵုဒပ်ကဝ်မယှေန်ပၞာန် သုၚ်စောဲဇြဟတ်ပၞာန်ကျာတုဲ ဒုၚ်တဝ်စၞေဟ်မံၚ် ဇၞော်ကဵုဇြဟတ်တုဲ နူကဵုဗလးတိတံဂှ်လေဝ် ဗလံၚ်ဏာမံၚ်ကရောၚ်ပၞာန်ရီုဗၚ် ၜါကရောၚ်ပၞာန်ကီုရောၚ်။
အပ္ဍဲကရောၚ်ပၞာန်ရီုဗၚ် ၜါကရောၚ်ပၞာန်ဏံဂှ် ကရောၚ်ပၞာန် ဒု-သ္ကိုပ်တမ်ဒပ် ခမရ (၁) ဒုသ္ကိုပ်ဗိုလ်ဇၞော် ကျဝ်တူ က္ဍိုက်လဝ်က္ဍိုပ်တံဂှ်တှ်ေ ကောန်ပၞာန်တံ ချိုတ်ဒးဝပ်ဂၠိုၚ်လောန်တုဲ လုပ်ဖျေံလွဟ်ကီု ဂြိပ်တိတ်အာနူဒပ်ပၞာန်ကီု နွံမံၚ်ရောၚ် သ္ဂးရ။
ပြဟ်ဟ်ဏံမ္ဂး ပ္ဍဲဗွိုၚ်ပွဳပွူကွာန်ဝေၚ်တာပါကဵု ကွာန်ဂြိပ်ပၞဟ်တံဂှ် ကရောၚ်ပၞာန်ရီုဗၚ်ဒပ်ပၞာန်ဗၟာတံ ဆက်နွံမံၚ်တုဲ ဂကောံဇြဟတ်ပၠန်ဂတးတံ KNLA သ္ကိုပ်သ္ကမံၚ်တံဂှ် ဆက်တုဲကၟာတ်ဆိုအ်လဝ်တုဲ ဗတိုက်မံၚ်ဖိုဟ်ရ။
မွဲလပါ်ပၠန်လေဝ် ညံၚ်ဗဒိုပ်ဝေၚ်တာပါဏံ ဟွံဂွံစှ်ေအာဂှ် နူကဵုဒပ်ကဝ်မယှေန်ပၞာန် ကြဳမံၚ်ဗုမ်နူၜၚ်ကျာ ဇၟာပ်ပ်တ္ၚဲဂှ်တှ်ေ သ္ၚိဌာန်ညးဒေသ ၆၀ ဟွံအောန်တံ ဒးအာတုဲ လီုလာ်အာရ။
ဂကောံဇြဟတ်ပၠန်ဂတး ဒပ်ပၞာန်ဗၠးၜးကောန်ဂကူကရေၚ် KNLA သ္ကိုပ်သ္ကလဝ်တံဂှ် စနူဂိတုအေဗရာ ၁၂ တေံဂှ်ရ ဗတိုက်သီကေတ်ဂွံလဝ် ဗဒိုပ်လေဝ်ကေ ပ္ဍဲပွိုၚ်ဍုၚ်ၜဳကလေၚ်တုဲ ကြဴနူဂှ် ဆက်တုဲကၠောန်မံၚ် ပေါဲဗတိုက်သီဗဒိုပ် ဝေၚ်တာပါန် ပၠန်ရ။
ဟိုတ်နူပေါဲဗတိုက်သီဗဒိုပ်လေဝ်ကေ ကေုာံ ဝေၚ်တာပါန်တံတုဲ ညးဒေသနူကွာန် လေဝ်ကေ၊ မျေတ်ကျိုဝ်၊ ကျိုဝ်ဝိုၚ်၊ ဝေၚ်တာပါန်၊ မေန်သဝ်တံ လၟိဟ် ၁၃၀၀၀ ပြၚ် ထောံဌာန်ဒၞာဲဝါဲတုဲ ဒးဂြိပ်ပါဲမံၚ်ဘဲပၞာန်တံဂှ် နူကဵု KNU ခရိုၚ်သဓီု ကဵုလဝ်သမ္တီ လလောၚ်တြးလဝ်နွံရ။
ပရိုၚ် – သြၚ်လောန်တိုၚ်မ်