နေပျဳဒဝ်၊ ဂိတုမေ ၂
ရဲသၟာကမၠောန်တိတ်ဍုၚ်မ္ၚးတံ စၞးဒးအာကၠောန်ကမၠောန် ပ္ဍဲကဵု ဍုၚ်သအာၚ်ဂှ် ယဝ်ရကၠောန်အပ္ဍဲဍုၚ် ဒၞာဲမၞုံကဵုပရေၚ်ဂီုကၠီုဘဝမ္ဂးတှ်ေ အခေါၚ်အရာ သွက်ဂွံတောတက်ဇၞော်မောဝ်နွံမံၚ်ရောၚ် သမ္မတသီအဝဵု ဥူမေန်အံၚ်လှိုၚ် ဟီုရ။
အပ္ဍဲလိက်သဝဏ်လွှာ မပလံၚ်ဗစိုပ်ကဵု အသေအဟာန် တ္ၚဲသၟာကမၠောန်ဂၠးကဝ် ဂိတုမေ ၁ ဏံဂှ် သမ္မတသီအဝဵု ဟီုဂးလဝ် ကုသၟာကမၠောန်တံ အတိုၚ်ဗီုဏံရ။
သၟာကမၠောန်ဆုဲပြံၚ်ဌာန်ဒၞာဲ ကောန်ဍုၚ်ဗၟာ အာကၠောန်ကမၠောန် ပ္ဍဲဍုၚ်သအာၚ်တံဂှ် ဒးမံၚ်သၟဝ်ဥပဒေဍုၚ်ညးတံ ဟေၚ်ဂှ်တုဲ သၟာကမၠောန်လ္ၚဵုတံ ဒးဒုၚ်ဍဵုဍိုက်မံၚ် ဟွံမွဲကဵုဗဗွဲဓဝ် နွံမံၚ်ရောၚ် သ္ဂးရ။
ဟိုတ်ဂှ်ရ စၞးနူအာကၠောန်ဍုၚ်သအာၚ်တံဂှ် ကၠောန်အပ္ဍဲဍုၚ်တုဲ ညံၚ်ကောန်ဍုၚ်သီုဖအိုတ် ဂွံမံၚ်စံၚ်အာ ဗွဲမမိပ်မြဟ်ၜိုဟ်လလမ် သၟဝ်ဓယံက်ကၟိန်ဍုၚ်မာန် ညံၚ်ဂွံရေၚ်တၠုၚ်ကဵုအာညိဂှ် ညးဗ္တိုက်ဖ္အောဝ်လဝ် ကုဌာနဝန်ဇၞော်ကဵု ဂကောံမဆေၚ်စပ်တံရ။
အပ္ဍဲဍုၚ်ဂှ် အခေါၚ်အရာပရေၚ်တောတက်နွံ ၜိုန်ရဟီုမံၚ်ကီုလေဝ်၊ နတဲစှ်ေစှ်ေဂှ်တှ်ေ သြန်ဂိတုဂွံမံၚ်တံဂှ် စလေဝ်ဟွံရုံဂပ်တုဲ ပ္ဍဲဒၞာဲကမၠောန်ဂှ်လေဝ် အရာတၠကမၠောန်တံ ပရေၚ်ဖံက်ပကဝ်မံၚ် ဥပဒေဂှ် ဟွံရပ်စပ်၊ ပရေၚ်ကေတ်အရဝ် ကဵုဒုဟ်ဟၟဲဂှ်ရ သၟာကမၠောန်တံ ဒးတိတ်အာဍုၚ်သအာၚ်အိုတ်ရဂှ် ညးမရီုဗၚ်ရေၚ်တၠုၚ် ကိစ္စသၟာကမၠောန်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“အဓိကဂှ်တှ်ေ ဍုၚ်သအာၚ်ဂှ် ညးဂှ်မိက်ဂွံတိတ်အာရော။ ပ္ဍဲဍုၚ်သအာၚ်လေဝ် ကမၠောန်ဏံပၠန်ရ ဒးကၠောန်မံၚ်။ သြန်ဂိတုပိုဲဏံဂွံဂှ်တှ်ေ သွက်ဂွံစလေဝ် ဟွံရုံဂပ်တုဲ၊ ဒးအာဒၞာဲသြန်ဂိတုခိုဟ်နူဏံ ဒၞာဲမၞုံကဵုအခေါၚ်အရာတံဂှ်ရ ဒးတိတ်အာရ။ တုဲတှ်ေ ဆေၚ်စပ်ကဵု ဒၞာဲကမၠောန်တံ။ ၜိုန်ရဥပဒေတံနွံမံၚ်ကီုလေဝ် နကဵုဗီုပြၚ်နာနာသာ်ဂှ် လပါ်ရဲတၠကမၠောန်တံ ဖံက်ပကဝ်မံၚ်အိုတ်နွံ။ ညံၚ်ဟွံဂွံဖံက်သၞောဝ်ဂှ် ဒးရပ်စပ်ကဵု။ အခေါၚ်အရာသၟာကမၠောန်တံဂှ် ဒးမၚ်မွဲကဵု။ ယဝ်ရၜါတၚ်ဏံနွံမံၚ်တှ်ေ ဗွဲတၟေၚ် ဟွံတိတ်ပုဟ်” သာ်ဝွံ သ္ဂးရ။
တုဲပၠန် အတိုၚ်အကာဲအရာလၟုဟ်မ္ဂး ကြဴနူသီအဝဵုတုဲ သၟာကမၠောန်တံ သြန်လုပ်သြန်တိတ် ဟွံညဳသၟဟ်တုဲ ပရေၚ်တိတ်ဍုၚ်သအာၚ်ဂှ်လေဝ် ဆက်နွံအာမံၚ်ဏီ၊ ယဝ်ရ ဟွံမိက်ကဵုသၟာကမၠောန်တံ တိတ်ဍုၚ်သအာၚ်မ္ဂး ညံၚ်ဂွံကလိဂွံသြန်ဂိတုခိုဟ်ဟ်ဂှ် ဒးရေၚ်တၠုၚ် ကဵုရောၚ် ညးဆက်ဟီုရ။
ရဲအပ္ဍဲဍုၚ်တံ မိက်ဂွံအာကၠောန်ကမၠောန် တိတ်ဍုၚ်သအာၚ် ဗွဲမဂၠိုၚ်တံဂှ်တှ်ေ ဟိုတ်နူဥပဒေယိုက်ဝန်ပၞာန် အလဵုအသဳပၞာန်၊ ပရေၚ်ဍုၚ်ကွာန်ဟွံတန်ကြန်၊ င္ၚုဟ်ကပေါတ်တံ သၠုၚ်တိုန် ဗွဲမလောန်ကာဲ ကေုာံ အခက်အခုဲပရေၚ်မံၚ်စံၚ် စသုၚ်နာနာတံ မဒှ်ရ။
ဟိုတ်နူ တင်အခက်အခုဲတံ ဒှ်မံၚ်ဗီုဏံတုဲ ညးမိက်ဂွံတိတ်ဍုၚ်သအာၚ်တံမ္ဂး နူကဵုဂၠံၚ်တရဴလုပ်သၞောဝ်တံဂှ် မွဲကဆံၚ် အာမံၚ်ဍုၚ်ဇိုၚ်ဝုတ်ဒိုဟ်တံလေဝ်နွံ ညံၚ်ရဴသာ်ဂှ်ကီု၊ ညးလ္ၚဵုတံဂှ်တှ်ေ အာမံၚ်နကဵုဂၠံၚ်တရဴ ဟွံလုပ်သၞောဝ်တုဲ ဒးဒုၚ်ရပ်မံၚ်တံလေဝ် နွံမံၚ်ရောၚ်။
တုဲပၠန် ညးအာဍုၚ်သအာၚ် နကဵုဂၠံၚ်တရဴ ဟွံလုပ်သၞောဝ်လ္ၚဵုတံဂှ်တှ်ေ ဒးအလီသြန် နကဵုညးစအကြာတံကီု၊ ဒးဒုၚ်ကူသာန်မၞိဟ်၊ ဒးဒုၚ်သွံစတံသၟးဟွံက သီုကဵုဒးဒုၚ် ပရေၚ်ရေက်ကးဇြောတ်ဆီ သြန်ဂိတုတံလေဝ် မွဲဏှမွဲဏှ ကတဵုဒှ်မံၚ်ရောၚ် ညးမရီုဗၚ်ပရေၚ် သၟာကမၠောန်တံ သ္ဂးရ။
အပ္ဍဲဍုၚ်ဗၟာဂှ် ကြဴနူဒပ်ပၞာန်သီအဝဵုတုဲ ဟိုတ်နူပရေၚ်ဍုၚ်ကွာန် ဟွံတန်ကြန်ကီု ဒၟာနူဥပဒေယိုက်ဝန်ပၞာန်တံတုဲ ဇြဟတ်သၟတ်တံ ဗွဲမဂၠိုၚ် တိတ်စိုပ်အာဍုၚ်သအာၚ်အိုတ်တုဲ အာကၠောန်မံၚ် ကမၠောန် တံ ဆက်တုဲသၠုၚ်တိုန်မံၚ် ဖိုဟ်ရ။
ပရိုၚ် – သြၚ်လောန်တိုၚ်မ်
Photo – Social Media