ၜဳကလေၚ်၊ မေ ၂
ပ္ဍဲကဵုတွဵုရးမန် ပွိုၚ်ဍုၚ်ၜဳကလေၚ် အကြာသ္ကုတ်ဂၠံၚ် ၜဳကလေၚ်-ယှိုဲလှေဂှ် သၟတ် ၂၃ တၠ ဒးဒုၚ်ရပ်ပဝ်တာတုဲ နူကဵုဒပ်ပၞာန်ကဵု ဗၠာဲသၟိၚ်တံအာတ်မံၚ်သြန် သွက်မွဲတၠမ္ဂး ၃၀၀ ကိုတ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်မ် ရ။
ဂကောံပံၚ်တောဲ ဒပ်ပၞာန်၊ ဗၠာဲသၟိၚ်ကဵု ဒပ်စဵုဒၞာညးဍုၚ်ကွာန်တံ ပ္ဍဲဂိတုအေဗရာ ၂၈-၂၉ အခိၚ်ဗ္တံတေံ သၟတ်ကလေၚ်ကၠုၚ် နူဝိုၚ်အာဝါဒေဝ်တံဂှ် မင်ရပ်ကေတ်မံၚ် ပ္ဍဲအကြာကွာန်ယှိုဲလှေကဵု ကွာန်နှေဟ်ဗလတံရ။
လ္တူသၟတ်ကလေၚ်ကၠုၚ် နူကဵုဝိုၚ်အာဝါဒေဝ်တံဂှ် မုလေဝ် သက်ဂွံဒးသၟာန်သၟုက် စၟဳစၟတ်ဟၟဲမွဲသာ် ဂကောံပံၚ်တောဲဒပ်ပၞာန်တံ ကော်ပတိုန်လ္တူကွဳစက်ဗွဲမပြဟ်တုဲ ရပ်ဏာလဝ်ရောၚ် ညးဆဵုလဝ်နမတ်တံဟီုရ။
သၟတ်ရဲကွာန်နှေဟ်ဗလ၊ ယှိုဲလှေ၊ တေတ်တိုကျောန်၊ ကျုၚ်ကမိသု၊ ကအ်ခမာကဵု ကွာန်ကရပ်လ္တူဍုၚ်ၜဳကလေၚ်တံ သၟတ်အာယုက်နွံအကြာ ၁၈- ၃၀ သၞာံ ၂၃ တၠတံ ဒဒုၚ်ရပ်လဝ်ရောၚ် ဂွံတီကေတ် နူညးမကြပ်ကဵုဒပ်ပၞာန်တံရ။
တံၚ်လဝ်ပဝ်တာသၟတ်တံဂှ်တှ်ေ ရပ်ထိၚ်လဝ် ပ္ဍဲရုၚ်ဗၠာဲသၟိၚ်ၜဳကလေၚ်ကဵု တမ်ဒပ်ခလရ ၈ နွံမံၚ်ပ္ဍဲၜဳကလေၚ်တုဲ သွက်ဂွံကလေၚ်ဗၠးကဵုဂှ် မွဲတၠမ္ဂး အာတ်လဝ်သြန် ၃၀၀ ကိုတ်ရောၚ်။
ပၞောဝ်ကဵု အပ္ဍဲသၟတ်ဒးဒုၚ်ရပ်တံမ္ဂး ရဲသ္ၚိကၟိန်သြန်ပြေပြံၚ် သၟတ် ၅ တၠတံဂှ် နုက်ကဵုသြန် ကလေၚ်ဗၠးတိတ်ကၠုၚ်တုဲ သၟတ်သှ်ေမံၚ်တံဂှ်တှ်ေ ဆက်တုဲဒးဒုၚ်ရပ်ထိၚ်လဝ်ဖိုဟ်ရ။
အပ္ဍဲတ္ၚဲတံဏံ ခြာဟွံလံမ္ဂး သၟတ်ဒးဒုၚ်ရပ်ထိၚ်လဝ်တံဏံ သွက်ဂွံဗလံၚ်ဗစိုပ်ဏာ ဇရေၚ်ဒပ်ပကောံကောန်ပၞာန်ကဵု ဘာဗတောန်ကွတ်ပၞာန်သ္ဇိုၚ်ဒေသတံဂှ် စဳဇန်လဝ်ရောၚ် ဂွံတီကေတ် နူညးမကြပ်ကဵုဒပ်ပၞာန်တံရ။
အတိုၚ်တၚ်နၚ် ဌာန်ပရိုၚ်သြၚ်လောန်တိုၚ်မ် ပကောံဂွံလဝ်မ္ဂး ပ္ဍဲတွဵုရးမန် နူလၟေၚ် ၁ စဵုကဵုစိုပ် လၟေၚ် ၂၄ ဘာဗတောန်ကွတ်ယိုက်ဝန်ပၞာန် ဒပ်ပၞာန်သီအဝဵု ပံက်မံၚ်လၟေၚ်ဂိတု တံဂှ် သၟတ်ဒးဒုၚ်ပကောံလဝ် သွက်ယိုက်ဝန်ပၞာန်ဂှ် ပေၚ်စိုပ်အာ ၅၀၀၀ ပြၚ်အာယျ။
ပရိုၚ် – သြၚ်လောန်တိုၚ်မ်
Photo – Social Media