ၜဳကလေၚ်၊ မေ ၂
ပ္ဍဲတွဵုရးမန် ပွိုၚ်ဍုၚ်ၜဳကလေၚ် အကြာကာလပေါဲဗတိုက်သီဗဒိုပ် လေဝ်ကေကဵု ဝေၚ်တာပါန်ဂှ် ဟိုတ်နူၜၚ်ကျာဒပ်ပၞာန်ကြဳဗုမ်တုဲ သ္ၚိဌာန် ၃၀၀ ပြၚ် ပၟတ်တဴလီုလာ်အာလဝ်နွံဂှ် ဂွံတီနူ တၚ်နၚ်ခရိုၚ်သဓီု ဗော်သွးကောန်ဂကူကရေၚ် KNU ရ။
စနူဂိတုအေဗရာ ၂ စဵုကဵုစိုပ် ၃၀ အပ္ဍဲကာလကြပ်ပွိုၚ်မွဲဂိတုဂှ် ပ္ဍဲကွာန်ဝေၚ်တာပါန်၊ ဝေၚ်တာပါန်လ္တူ၊ မျေတ်ကျိုဝ်၊ လေဝ်ကေ၊ ကျံက်ဖျာတံဂှ် ဇၟာပ်ပ်တ္ၚဲ နူကဵုဒပ်ကဝ်မယှေန်ပၞာန် ဗတိုက်မံၚ်ကဵု နူဗလးကျာရ။
ဟိုတ်နူဒပ်ကဝ်မယှေန်ပၞာန် ဗတိုက်လဝ်နူဗလးကျာဂှ် ကွာန်လေဝ်ကေဂှ် သ္ၚိဌာန် ၁၀၀ ပြၚ် လီုလာ်ဆောံလေၚ်အာတုဲ ဒှ်မံၚ်အကာဲအရာ ကြပ်လီုလာ်အာမံၚ် သီုအလုံမွဲကွာန်ရ။
ဂကောံဇြဟတ်ပၠန်ဂတး မၞုံသၟဝ်တဲ ဒပ်ပၞာန်ဗၠးၜးကောန်ဂကူကရေၚ် KNLA သ္ကိုပ်သ္ကတံ ပ္ဍဲဂိတုအေဗရာ ၁၂ ဂှ် သီဗတိုက်ဂွံဏာလဝ် ဗဒိုပ်လေဝ်ကေတုဲ ကြဴနူဂှ် ဆက်ကၠောန်မံၚ်ပေါဲဗတိုက်သီဗဒိုပ် ဝေၚ်တာပါန်ရောၚ်။
ဟိုတ်နူပေါဲဗတိုက်သီဗဒိုပ်ဂှ် ညးဒေသ ၁၃၀၀၀ ပြၚ် ထောံဌာန်ဒၞာဲဝါဲ ဒးဂြိပ်ပါဲမံၚ်ဘဲပၞာန်ဂှ် လၟုဟ်ပြဟ်ဟ်ဏံမ္ဂး နွံမံၚ်ပၟိက် အရီုအဗၚ် စၞစဇွောံမကဵု ဂဥုဲတံ ဗွဲမဂတာပ်တဲရောၚ် ညးအုပ်ကာ ခရိုၚ်သဓီု KNU ပဒိုသဝ်ဧနိုင် ဟီုကဵု ဌာန်ပရိုၚ်သြၚ်လောန်တိုၚ်မ် ရ။
အပ္ဍဲပေါဲဗတိုက်သီဗဒိုပ် လအ်ကၠုၚ်ကြပ်ပွိုၚ်မွဲဂိတုဏံမ္ဂး ပရေၚ်ချိုတ် ဒးဝပ်သီုၜါလ္ပာ် ဂၠိုၚ်တိုန်ကၠုၚ်မံၚ်တုဲ နူကဵုဒပ်ကဝ်မယှေန်ပၞာန်လေဝ် ညံၚ်ဗဒိုပ်ဍေံတံ ဟွံဂွံစှ်ေအာဂှ် စကာသုၚ်စောဲ ကရောၚ်ပၞာန် ရီုဗၚ်တံကီု သီုကဵုကြဳဗုမ်ဗတိုက်မံၚ်ကဵုၜၚ်ကျာ ဆက်က်တုဲ ဒုၚ်တဝ်စၞေဟ်မံၚ် မဒှ်ရ။
ပရိုၚ် – သြၚ်လောန်တိုၚ်မ်
Photo – KNU