နေပျဳဒဝ်၊ မေ ၂
က္ဍိုပ်သ္ကိုပ်ညးဍုၚ်ကွာန် ဒဝ်အံၚ်သာန်သုကျဳ ဒးဒုၚ်ရပ်ထိၚ်လဝ် နကဵုဘဝကောန်ထံၚ် ၜက်အာ ၁၉၀၀ တ္ၚဲပြၚ်ကီုလေဝ် နူကဵုအလဵုအသဳပၞာန်သီအဝဵု ဟွံဗလးကဵုဏီတုဲ စကာသုၚ်စောဲကၠုၚ်မံၚ် နဒဒှ်ပးဒၞန် အပ္ဍဲကဵုပရေၚ်ဍုၚ်ကွာန်ကေုာံ ပရေၚ်ကလုတ်တမာန်ရ။
ပ္ဍဲအခိၚ်ဒပ်ပၞာန်သီအဝဵု ဒက်ပ္တန်ကၠုၚ် နဒဒှ်အလဵုအသဳပြံၚ်လဝ် ဗီုပြၚ်ညးဍုၚ်ကွာန် နူပေါဲရုဲမာဲဏံ သွက်ဂွံဗလးကဵု ဒဝ်အံၚ်သာန်သုကျဳဂှ် ဒးဒုၚ်မံၚ်ဇြဟတ်ဟရိုဟ် နူပွဳဗွိုၚ်ဂၠးကဝ်ကီု သီုကဵုကုလသမဂ္ဂ ကေုာံ အာသဳယာန်တံရ။
အခိၚ်အလဵုအသဳပၞာန် ကလေၚ်ကွာ်မံၚ် လ္တူလၟေၚ်တရဴဒဳမဝ်ကရေဇြဳဂှ် ညံၚ်ဂွံဒှ်အလဵုအသဳ သ္ပစၞးဍုၚ်ဗၟာမွဲတုဲ ညံၚ်ဂွံကလိဂွံ ပရေၚ်သ္ပစၟတ်သမ္တီ ဗွဲမလုပ်သၞောဝ် နူကဵုအလဵုအသဳဂၠးကဝ် ကေုာံ ဂကောံနာနာတံဂှ် ဂစာန်မံၚ်ရ။
အပ္ဍဲအကာဲအရာဏံ ဝန်ဇၞော်ပရေၚ်ဍုၚ်သအာၚ်ကြုက် ဝမ်ယိ စိုပ်ကၠုၚ်နေပျဳဒဝ်တုဲ အပ္ဍဲၜါပိတ္ၚဲဂှ်ဟေၚ် ဒဝ်အံၚ်သာန်သုကျဳဂှ် နကဵုအလဵုအသဳပၞာန် ယှအ်ဖျေံကဵုဒုဟ်ဒဏ် တြဴဂအုံ မွဲဂအုံတုဲ ဒုဟ်ဒဏ်မသှ်ေမံၚ်တံဂှ် သွက်ဂွံဆက်ဒုၚ်အာ ပ္ဍဲသ္ၚိအတိုၚ်မစၟတ်သမ္တီ ကဵုလဝ်မွဲဒၞာဲဂှ်ရ။
အလဵုအသဳပၞာန် ပြံၚ်လဝ်ယၟုတၟိဝွံ လလောၚ်တြးပြံၚ်စွံဏာ ဒဝ်အံၚ်သာန်သုကျဳတုဲ အရာထိၚ်ဒဝ်လဝ်အပ္ဍဲသ္ၚိဂှ် ဒှ်အရာ သုၚ်စောဲပရေၚ်ဆက်ဆောံမှာဇန် (PR) ကေုာံ အကွက်ဂွံဝေၚ်ပရေၚ်ဍုၚ်ကွာန် မွဲသာ်ကီုရောၚ် Burma Campaign UK ပတိတ်လိက် ကဵုလဝ်သတိနွံရ။
ယဝ်ရဗလးကဵု ဒဝ်အံၚ်သာန်သုကျဳတုဲ သွက်ဂကောံဒပ်ပၞာန်တံဂှ် မုလေဝ်ကိစ္စဟၟဲ ညးတံညာတ်ကေတ် အခိၚ်ဂှ်မှလေဝ် ညံၚ်ရဴဗီုပြၚ် ကလေၚ်ဗလးကဵုပေၚ်ၚ်ရောၚ် က္ဍိုပ်သ္ကိုပ်ကွးဘာတြေံ ကိုမေန်တွိုဲတေတ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“နကဵုပရေၚ်ဍုၚ်ကွာန် သွက်ဂွံယှအ်ဖျေံဇြဟတ်ဟရိုဟ်တုဲ ယှအ်ကဵုဟာ ပိုဲတံသ္ၚေဝ်မၠာ်ဂွံ ဗီုဏံရ။ မွဲတၚ်ချိုတ်ပၠိုတ်မံၚ်ဂှ်တှ်ေ ဂကောံဒပ်ပၞာန်တံ ဗလးကဵု နကဵုစေတနာဟွံသေၚ်တုဲ အပ္ဍဲကဵုအကွက်ဗီုပြၚ် ဍေံတံမဖန်ဇန်လဝ်တုဲတုဲ ဍေံတံဖျေံလဝ်ပၞော်ဗီုပြၚ်အိုဿီု ဍိုက်ပေၚ်တုဲမှ ယဝ်ရဗလးကဵုဒဝ်အံၚ်သာန်သုကျဳတုဲ မုအရာကိစ္စလေဝ်ဟွံဒှ်မှ ဍေံတံတော်တၟော်အခိၚ်စိုပ်ကၠုၚ်ဗီုဂှ်မှလေဝ် သွက်ဂွံဗလးကဵုပေၚ်ၚ်ရောၚ် အဲညာတ်ကေတ်ရအဴ” သာ်ဝွံ သ္ဂးရ။
အလဵုအသဳကြုက် မထံက်ဂလာန်လဝ် အလဵုအသဳပၞာန်ဂှ် ဒဝ်အံၚ်သာန်သုကျဳဂှ်တှ်ေ ဒှ်မိတ်သဟာဲတြေံ ဍုၚ်ကြုက်တုဲ လ္တူအကာဲအရာညးဂှ်တှ်ေ စွံမံၚ်ဂရုလၟိုန်ရောၚ် ညးမၞုံအခေါၚ်ဟီုဂး ဌာနဝန်ဇၞော် ပရေၚ်ဍုၚ်သအာၚ်ကြုက် ဟီုပတိတ်လဝ် အပ္ဍဲပေါဲသောၚ်ကလးပရိုၚ် ဂိတုအေဗရာ ၃၀ ရ။
ဣဏံဝွံ ဆေၚ်စပ်ကဵုလၟေၚ်တရဴ ဝန်ဇၞော်ပရေၚ်ဍုၚ်သအာၚ်ကြုက် ဝမ်ယိ အာစိုပ်လဝ်နေပျဳဒဝ် ပ္ဍဲဂိတုအေဗရာ ၂၆ တေံဂှ် အရာမဆဵုဂဗ တက်လဝ်ကျာသဳကၠဳလဝ်ကဵု သမ္မတ ဥူမေန်အံၚ်လှိုၚ် ဂှ်တုဲ ပရူဒဝ်အံၚ်သာန်သုကျဳ ဂှ် သဳကၠဳလဝ်နွံဟာ ဟွံပါဟာဂှ် ရဲပရိုၚ် AFP သၟာန်လဝ်တုဲ ကလေၚ်သောၚ်ကလးကဵုလဝ်ရောၚ်။
မွဲအဆက်ဓဝ်ဂှ်ဟေၚ် ဒဒှ်ရ ဒဝ်အံၚ်သာန်သုကျဳ လမျီုဂျိုၚ်မံၚ်ဏီဂှ် ညံၚ်ဂွံထ္ၜးသက်သဳ ရဲချဳဒရာၚ်ဒဳမဝ်ကရေဇြဳတံ ဂစာန်ဗရုပချဳမံၚ် လ္တူအန်လာၚ်တုဲ ဂိတုအေဗရာ ၃၀ အခိၚ်ဗ္တံဂှ် နူကဵုဌာန်ရုပ်ရမျှာၚ် အလဵုအသဳတံ ပတိတ်ထ္ၜးလဝ် ဗီုရုပ်မွဲတၞးကဵု ပရိုၚ်မွဲပိုဒ်ဍောတ် မဒှ်ရ။
ဆဂး လ္တူဒဝ်အံၚ်သာန်သုကျဳဂှ် နူကဵုဒဏ်ထံၚ်သၞာံဇမၠိၚ် စောဲစပ်ဖျေံလဝ်တံဂှ် ကဵုဏာအခေါၚ် ဗၠးဒုဟ်ဒဏ်ဟွံသေၚ်တုဲ ဆၜိုတ်အရာမပြံၚ်စွံဒၞာဲ ကဵုဆက်ဒုၚ်အာဒုဟ်ပၠန် မဒှ်ရ။
ဣဏံဝွံ ပရေၚ်ရဲဒပ်ပၞာန်တံ ကၠောန်ကၠုၚ်မံၚ်လၟိုန်န်ရဒှ်တုဲ ရဲပွဳဗွိုၚ်ဂၠးကဝ်တံကီု အပ္ဍဲပရေၚ်ဍုၚ်ကွာန် ဂကောံဒပ်ပၞာန်တံ ခၠန်ဗဂေတ်လဝ်ဂှ် မတ်ညံၚ်ဟွံဂေတ်ဗက်အာ ကိစ္စဇၞော်ကွေံကွေံရောၚ် ညးမၞုံအခေါၚ်ဟီုဂး ရုၚ်သ္ကိုပ်ဝန်ဇၞော် အလဵုအသဳညဳသၟဟ် ဂကူ NUG ဥူနေဘုန်းလတ် ဟီုကဵု ဌာန်ပရိုၚ်သြၚ်လောန်တိုၚ်မ် ရ။
“ရဲပွဳဗွိုၚ်ဂၠးကဝ်တံ ဂကောံပၞာန်တံ ပလှ်ေဝေၚ် ဗဂေတ်မံၚ်ပရေၚ်ဍုၚ်ကွာန်ရ။ လ္တူဂကောံဒပ်ပၞာန်တံဏံ ကၠောန်မံၚ် မတ်ညံၚ်ဟွံဂေတ်အာ ညံၚ်ဟွံဂွံထုဲအာဂှ် ကိစ္စဇၞော်ကွေံမံၚ်။ ဟိုတ်ဂှ်ရ ဣဏံဂှ် ဒှ်ပရေၚ်ဍေံတံ ကၠောန်ကၠုၚ်မံၚ်လၟိုန်န်ရဏောၚ်။ လၟုဟ်လေဝ် စကာသုၚ်စောဲမလိက် House Arrest House Arrest ဂၠိုၚ်ၚ်ရ။ ဣဏံလေဝ် ဟွံဍာံပုဟ်ဂှ် ပိုဲတံမိက်ဂွံကဵုသတိ ကုပွဳဗွိုၚ်ဂၠးကဝ်တံရအဴ”သာ်ဝွံ သ္ဂးရ။
အပ္ဍဲဇရေၚ်သ္ၚိ ဒဝ်အံၚ်သာန်သုကျဳ စၟတ် ၅၄ ဂၠံၚ်ဌာန်ဇၞူ တက္ကသိုလ် ဂှ်လေဝ် ဟွံကလေၚ်စိုပ်၊ ပ္ဍဲကၠအ်ကၠေၚ်လ္တိုပ်လေဝ် ဟွံစိုပ်ကၠုၚ်တုဲ၊ ပ္ဍဲဒၞာဲလဵု စွံလဝ်ညးဗီုပြၚ်လဵုရောဂှ်တှ်ေ ချိုတ်တ်ပၠိုတ်တ် ဟွံဂွံတီဏီပုဟ် ညးဆက်ဟီုရ။
အတိုၚ်လလောၚ်တြး ရုပ်ရမျှာၚ်တြးဝါဒ အလဵုအသဳပၞာန်မ္ဂး စၞးဒဝ်အံၚ်သာန်သုကျဳ ဒုၚ်မံၚ်ဒုဟ်ဒဏ် အပ္ဍဲထံၚ်နေပျဳဒဝ်ဂှ်တှ်ေ သွက်ဂွံဆက်ဒုၚ်အာဒုဟ်ဒဏ် မသှ်ေမံၚ်တံ ပ္ဍဲသ္ၚိ မစၟတ်သမ္တီကဵုလဝ် မွဲဒၞာဲဂှ် ပြံၚ်စွံကဵုလဝ်ရောၚ် သ္ဂးရ။
ဣဏံဝွံ နကဵုသမ္မတအလဵုအသဳပၞာန် သ္ပပူဇဴတ္ၚဲဗုဒ္ဓဒှ်ဒှ်၊ နကဵု ပရေၚ်ဓရ်ဗ္စာရဏာမၞိဟ်ဒှ်ဒှ်၊ နကဵုစေတနာမေတ္တာ ကၟိန်ဍုၚ်ဂးတုဲ အတိုၚ်လၟေၚ်ဥပဒေ ရာဇဝတ် ၝောံပိုဒ် ၅၄၁၊ ပိုဒ်ပါ် (၁) တုဲ ညံၚ်ဂွံဆက်ဒုၚ်အာဒုဟ်ဒဏ် ပ္ဍဲသ္ၚိမစၟတ်သမ္တီလဝ် မဒှ်ရ။
ဆဂး ပ္ဍဲဒၞာဲလဵု သ္ၚိမွဲလဵု ပြံၚ်စွံ ဗီုပြၚ်လဵုစွံလဝ်ရောဂှ်တှ်ေ သောဲသောဲဗြောဲဗြောဲ လလောၚ်တြးလဝ်ဟၟဲဂှ်ရ သွက်ဂွံစၟတ်သမ္တီ နဒဒှ်အရာထိၚ်ဒဝ်အပ္ဍဲသ္ၚိဂှ် ဒှ်ဟွံမာန်ရောၚ် ပါ်ပါဲမံၚ်အိုတ်ရောၚ်။
မွဲလပါ်ပၠန် သွက်ဒဝ်အံၚ်သာန်သုကျဳ ညးမၞုံအဝဲအာယုက် ၈၀ သၞာံဏံဂှ် နွံမံၚ်ပၟိက်မံၚ်ကဵု ပရေၚ်လွဳလွတ်ထတ်ယုက်ကီု သီုဂွံအခေါၚ် ဂွံဆဵုဂဗကု ဂကောံသၟာဥပဒေတံကီု၊ ဂကောံသ္ၚိကၟိန်၊ ကောန်ဗော်တံ နွံဟာ ဟၟဲဟာ တၚ်တံဏံလေဝ် သွက်ဂွံဒးသၟာန် နွံမံၚ်မဒှ်ရ။
ၜိုန်ရပြံၚ်စွံဒၞာဲ ဒဝ်အံၚ်သာန်သုကျဳကီုလေဝ် နကဵု ပရေၚ်မၚ်မွဲရံၚ်စံၚ် ပရေၚ်ဂီုကၠီုပေၚ်ပေၚ် ဒှ်မာန်တုဲ ဒှ်ပရေၚ်အပြံၚ်သၠာဲတၟေၚ်မွဲ ဟွံသေၚ်ရောၚ် ဥူနေဘုၚ်လာတ် ထံက်ထ္ၜးရ။
“အကာဲအရာဂှ်တှ်ေ ယဝ်ရပြံၚ်ဒၞာဲကွေံမ္ဂးတှ်ေ ၜိုန်ရဟွံမံၚ်ပ္ဍဲထံၚ်ကီုလေဝ် ဒၞာဲမွဲဒၞာဲဟွံတီဂှ် နကဵုပရေၚ်မၚ်မွဲရံၚ်စံၚ်ပရေၚ်ဂီုကၠီုပေၚ်ပေၚ်ဂှ် ဒှ်မံၚ်အဓိပ္ပါယ် ဗီုပြၚ်မစွံလဝ် ပ္ဍဲထံၚ်ဖိုဟ်ဏောၚ် အဓိကမိက်ဂွံဟီုရ။ အကာဲအရာဂှ် မုလေဝ်ဟွံတၟေၚ်ပြံၚ်သၠာဲအာပုဟ် ပိုဲတံမိက်ဂွံဟီုဏာ သောၚ်ၚ်ကၠးကၠးရအဴ” သာ်ဝွံ သ္ဂးရ။
အပ္ဍဲရုပ်ဗီုတၞး မပတိတ်ထ္ၜးလဝ် နူဌာန်ရုပ်ရမျှာၚ်ဂှ် ဒဝ်အံၚ်သာန်သုကျဳ၊ ညးတာလျိုၚ်ပၞာန် ကေုာံ ညးတာလျိုၚ် ဗၠာဲသၟိၚ် ကျိုၚ်လဝ် ယူနဳဖံၚ် ၂ တၠတံ ဂဇအ်မံၚ်မွဲစွံကီုလေဝ် ပ္ဍဲအခိၚ်လဵု တက်ကေတ်လဝ်ရုပ်ဏံဂှ် ဗၟံက်ထ္ၜးလဝ်ဟၟဲတုဲ သွက်ဂွံဒဒှ် သံသယနာနာတံ မံက်တိတ်ကၠုၚ်မံၚ်ရောၚ်။
စဵုကဵုလၟုဟ် မိညးတံ ဒးဒုၚ်ရပ်ထိၚ်လဝ် နဒဒှ် ပးဒၞန်ဖိုဟ်တုဲ ပရေၚ်သွက်ဂွံဆက်စၠောံပွဳဗွိုၚ်မ္ၚးဂှ်လေဝ် ပိုတ်ကၠက်မံၚ်အိုတ်တုဲ နဒဒှ်ကောန်မွဲတၠမ္ဂး မုပရိုၚ်လေဝ် ဟွံဂွံတီဏီပုဟ် ကောန်တြုံ ဒဝ်အံၚ်သာန်သုကျဳ ကိုထိၚ်လေန် သ္ဂးရ။
သွက်အရာဏံ တၚ်နၚ်သ္ပဒတန်ဂွံ ဒဝ်အံၚ်သာန်သုကျဳ လမျီုဂျိုၚ်မံၚ်ဏီ၊ အခေါၚ်ဆက်စၠောံကဵုညး ကေုာံ သွက်ညးဂွံဗၠးၜးမာန် ညံၚ်ဂွံထ္ၜးကဵုသက်သဳ ခိုၚ်ၚ်ကၠိုက်က်ဂှ် ပ္ဍဲအကံက်ဇာဖိုၚ် မှာဇန်ညးဂှ် ချူအာတ်မိက်လဝ်ရ။
အတိုၚ်တၚ်နၚ် ဌာန်ပရိုၚ်ရိုက်တာ ဗၟံက်ထ္ၜးလဝ် ပ္ဍဲဂိတုမေ ၁ မ္ဂး စပ်ကဵု ဒဝ်အံၚ်သာန်သုကျဳ မပြံၚ်စွံလဝ် ပ္ဍဲသ္ၚိအလဵုအသဳပၞာန်မွဲဒၞာဲဂှ် သွက်ဂွံဆဵုဂဗကု ဂကောံသၟာဥပဒေညး ပ္ဍဲတ္ၚဲအဒိုတ်ဂတဏံဂှ် စဳဇန်လဝ်နွံမံၚ်တုဲ ဒဝ်အံၚ်သာန်သုကျဳ တန်တဴနွံမံၚ် အပ္ဍဲနေပျဳဒဝ်ဖိုဟ်ရောၚ် ဂွံတီကေတ်ရ။
အခိၚ်သောၚ်ကလးပြသၞာ ပရေၚ်ဍုၚ်ဗၟာ မမံက်တိုန်ကၠုၚ် ဟိုတ်နူ ပၞာန်သီအဝဵုဏံမ္ဂး နကဵုဥက္ကဌဗော် က္ဍိုပ်သ္ကိုပ်ညးဍုၚ်ကွာန် ဒဝ်အံၚ်သာန်သုကျဳ ယဝ်ရဟွံပါလုပ် ဆဵုဂဗသဳကၠဳပ္ညဳပ္ညပ်မ္ဂး ဂၠံၚ်တရဴသောၚ်ကလးဂှ် ကလိဂွံမာန်ဟွံသေၚ်ပုဟ် နူကဵုဗော်အေန်အေဝ်ဒဳ NLD ကဵုလဝ်သမ္တီရ။
ပရိုၚ် – သြၚ်လောန်တိုၚ်မ်
Photo – Social Media