နယူဒေလဳ၊ ဗေကျေန်၊ မေ ၉။
ရဲပူရိသာဒ်ပေါဲဗဝ် ပြကောတိကိုတ်ဗွဲမဂၠိုၚ် ပ္ဍဲဍုၚ်အိန္ဒိယ ကေုာံ ကြုက်တံဂှ် သွက်ဍုၚ်ညးတံ ပေါဲပြိုၚ်ဗဝ်ဂၠးကဝ် ထ္ၜးပျးကဵုဟာ ဟွံထ္ၜးပျးကဵုဟာ အကာဲအရာ ဟွံချိုတ်ပၠိုတ်မံၚ်ဏီရ။
ကာမ္မဏဳ သွက်ဂွံထ္ၜးပျးကဵုတံကဵု ဂကောံဗဝ်ဂၠးကဝ် ဖဳဖာ (FIFA) တံ ဟွံဂွံတၚ်တုပ်စိုတ်ဏီပုဟ်။
သွက်ဂွံစပေါဲပြိုၚ်ဗဝ်ဂၠးကဝ် သၟေဟ်မံၚ်ဆသတ္တဟညိညဓဝ်ဂှ် တၚ်တုပ်စိုတ် သွက်ဂွံထ္ၜးပျးကဵုဟွံဂွံဏီဟီုဂှ် ဒှ်အရာဓမ္မတာဟွံသေၚ်ပုဟ်။
တၚ်တုပ်စိုတ် သွက်ဂွံထ္ၜးပျးကဵုရုပ်ရမျှာၚ်တံဂှ် အခိၚ်ကၠာပေါဲပြိုၚ်ဟွံစဏီ ဂိတုဗွဲမဂၠိုၚ်တေံ ဒးကေတ်လဝ်တၚ်တုပ်စိုတ် မဒှ်ရ။
ဆေၚ်စပ်ကဵုစရိတ်ၚုဟ်မးသြန်အိုတ် သွက်ဂွံထ္ၜးပျးကဵုပေါဲပြိုၚ်ဗဝ်ဂၠးကဝ်ဂှ် အကြာဖဳဖာ ကေုာံ ကာမ္မဏဳရုပ်ရမျှာၚ်တံ ဆက်တုဲ မွဲလပါ်ကဵုမွဲလပါ် တံင်ဂြဲမံၚ်ဖိုဟ်ဏီရောၚ် မဳဒဳယာအပ္ဍဲၜါဍုၚ်တံ ဗၟံက်ထ္ၜးလဝ်ရ။
ကြုက်ကဵု အိန္ဒိယတံ ဆက်သဳကၠဳမံၚ်တုဲ ပရေၚ်ဏံ ဒးဆက်စွံအာဓဝ်ပတေဟ်ရောၚ် ၜိုန်ရဟီုကီုလေဝ် ဆေၚ်စပ်ကဵု ၚုဟ်မးသြန်ဒးအိုတ် သွက်ဂွံထ္ၜးပျးကဵုဂှ်တှ်ေ မုလေဝ်ကဵုလဝ်စၟတ်ဟၟဲဏီပုဟ်။
နူကဵုဍုၚ် ကေုာံ ပယျဵုဒေသ အပံၚ်ဖအိုတ် ၁၈၀ ဒၞာဲတံ သွက်ဂွံထ္ၜးပျးကဵု ပေါဲပြိုၚ်ဗဝ်ဂၠးကဝ်ဂှ် ကေတ်လဝ်တၚ်တုပ်စိုတ် အကြာဖဳဖာ တုဲဒှ်ယျရောၚ် ဂွံတီကေတ်ရ။
ဆဂး ပ္ဍဲအရာမထ္ၜးပျးကဵု ပေါဲပြိုၚ်ဗဝ်ဂၠးကဝ် သၞာံ ၂၀၂၆ ဂှ် ဍုၚ်မွဲသ္ကေမ်တဲသၟေဟ်မံၚ် တၚ်တုပ်စိုတ်ဟွံဂွံဏီတံဂှ် အိန္ဒိယ ကေုာံ ကြုက် ပါလုပ်မံၚ် မဒှ်ရ။
လၟိဟ်မၞိဟ်အာပံၚ်ၜါဍုၚ်ဏံမ္ဂး နွံမံၚ်ၜိုတ် ပိဂအုံ မွဲဂအုံ နူကဵုလၟိဟ်မၞိဟ်အလုံဂၠးကဝ် မဒှ်ရ။
နူကဵုဖဳဖာဂှ် တမ်မူလတေံ သွက်ဂွံထ္ၜးပျးကဵု ပေါဲဗဝ် လ္တူလိုင်ရုပ်ရမျှာၚ် CCTV ဍုၚ်ကြုက်ဂှ် ကော်ပတန်လဝ်င္ၚုဟ်မး သြန်ဒဝ်လာ ၃၀၀ ပြကောတိကိုတ်ရောၚ် ဂွံတီရ။
ပ္ဍဲအခိၚ်လၟုဟ်ဏံတှ်ေ နူကဵုဖဳဖာ ယှအ်ဖျေံကဵုလဝ်ၚုဟ်မး အကြာသြန်ဒဝ်လာ ၁၂၀-၁၅၀ ပြကောတိကိုတ် ရောၚ် ဌာန်ပရိုၚ် Beijing Daily အလဵုအသဳထိၚ်ချုက်လဝ်ဂှ် ဗၟံက်ထ္ၜးရ။ ဆဂး ၚုဟ်မးတံဏံဂှ်တှ်ေ ဇၞော်မံၚ်နူကဵု လၟိဟ်သြန် ရုပ်ရမျှာၚ် CCTV သုၚ်စောဲမာန်ရောၚ် သ္ဂးရ။
ဟိုတ်နူဍုၚ်ကြုက် ဟွံအံၚ်ဇၞးလဝ် ပေါဲစၟတ်ခဍိုဟ်ဇိုၚ် သွက်ဂွံပြိုၚ်ဗဝ်ဂၠးကဝ်တုဲ ပ္ဍဲကြုက် ညးစိုတ်လုပ်စတံ အောန်မာန်ရောၚ် ဌာန်ပရိုၚ်ဂှ် ဗၟံက်ထ္ၜးလဝ်ရ။
ဟိုတ်နူအခိၚ်ဟွံတုပ်ညးသ္ကံ အကြာကြုက် ကေုာံ အမေရိကာန်လပါ်သၟဝ်ကျာတုဲ ဒှ်မံၚ်အခိၚ်ဂယးပြဟ် အပ္ဍဲကြုက်ဂှ် ညးစိုတ်လုပ်စတံ အောန်မာန်ရောၚ် ပ္ဍဲပရိုၚ်ဂှ် ဗၟံက်ထ္ၜးလဝ်ရ။
အကြာအိန္ဒိယ ကေုာံ ဖဳဖာ လေဝ် တၚ်တုပ်စိုတ် သွက်ဂွံထ္ၜးပျးကဵုရုပ်ရမျှာၚ် ဟွံဂွံဏီကီုလေဝ် နူကဵုမဳဒဳယာအပ္ဍဲဍုၚ်တံ ဟီုဂှ်တှ်ေ ခြာဟွံလံ ဂွံကၠုၚ်တၚ်တုပ်စိုတ်မာန်ရောၚ် ပ္ဍဲပရိုၚ်တံ သ္ဂးလဝ်ရ။
နိဿဲ – BBC