ဝါယှေန်တန်၊ မေ ၁၀။
စရင်စၟတ်ကာပၞုက် ပထမအသုတ် ယာန်ပဝ်ကလိုၚ် ဟွံတီယၟုတံ မပၞုက်လဝ်ဂၠိုၚ်ကဵုဗွဝ်စှ်သၞာံ ညံၚ်ရဴပ္ၚာန်ပဝ်တံဂှ် ပ္ဍဲဂိတုမေ ၈ နူရုၚ်ဌာန်ဂဥုပ်ပၞာန်အမေရိကာန် ပေန်တဂေါန် ပတိတ်ထ္ၜးလဝ်ရ။
သွက်ကောန်ဍုၚ်အမေရိကာန်တံ ဂွံလ္ၚတ်ကေတ် စရင်စၟတ်သမ္တီလဝ် ယာန်ပဝ်ကလိုၚ် ဟွံတီယၟုတံဂှ် စိုပ်အခိၚ်ယျရောၚ် ဝန်ဇၞော်စဵုဒၞာ ပဳ ဟတ်သေတ်ချ် ဗၟံက်ထ္ၜးလဝ် ပ္ဍဲမဳဒဳယာပရေၚ်မၞိဟ်ရ။
အပ္ဍဲပရူပရာမပြာကတ်တံမ္ဂး ပ္ဍဲသၞာံ ၁၉၆၉ တေံ သ္ကိုပ်ယာန်အာကာသ အပိုလို ၁၁ ဗတ်ဇ် အာလ်ဒေန် ဆဵုညာတ်လဝ်အရာမွဲဇၞော်တၟာဂလိုၚ် ပ္ဍဲဗဒါဲဗလးဂတီုတိဂိတုဂှ် ပါလုပ်ဒၟံၚ် မဒှ်ရ။
ပၞောန်စောန်န်လျးဂဵု အရံၚ်တၟးစူမံၚ်ဂှ် ဒှ်မာန်လျးလေသာရောၚ် စိုတ်သ္ကိုပ်ယာန်အာကာသဂှ် ဒးဒုင်စသိုၚ်လဝ် မဒှ်ရ။
ပ္ဍဲဖိုင်ဗဳဒဳယဵု တက်လဝ်နူကဵုကေၚ်မရာသွာၚ်ပၞာန် အလုံဂၠးကဝ်တံဂှ် တၚ်ဒုၚ်စဳရေၚ်မချူလဝ် နကဵုလိက်တံလေဝ် ပါလုပ်ဒၟံၚ်ရ။
ပ္ဍဲသၞာံ ၂၀၂၂ တေံ လတူမှာသၟိတ်ကြုက်လပါ်ဗၟံက်ဂှ် ဆဵုလဝ်အရာဝတ္ထု မနွံဗီုပြၚ်ဗဝ်မွဲ သီုကဵုအရာဝတ္ထုတၞဟ်ဟ်တံကီုတုဲ ပ္ဍဲလတူဍုၚ်အဳရတ်၊ သဳရဳယာ ကေုာံ ယူအေအဳ တံလေဝ် ဆဵုလဝ်အရာဝတ္ထု မပဝ်ကလိုၚ်မံၚ် နကဵုအသိၚ်ဟရိပ် ဟွံတုပ်ညးသ္ကံတံရ။
သွက်ဂွံထ္ၜးပျးဖိုင်ကာပၞုက်တံဂှ် သမ္မတ ဒဝ်နယ် ထရ ပ္ဍဲဂိတုဖေဖဝ်ဝါရဳတေံ ကဵုလဝ်စၞောန်ပညုၚ် ဇရေၚ်အေဂျေန်သဳဖိတ်ဒရေဝ်တံတုဲ လၟုဟ်ပတိတ်ထ္ၜးကဵုလဝ် မဒှ်ရ။
ယာန်ပဝ်ကလိုၚ်တံဏံဝွံ ဒှ်မာန်ယာန်ပဝ်ကလိုၚ် နူကောန်ဂြိုဟ် မကၠုၚ်နူဒၞာဲသ္ၚောဲဂၠးတိဏံတုဲ ညးလ္ၚတ်ပ္ၚာန်ပဝ်တံလေဝ် နွံမံၚ်ဗွဲမဂၠိုၚ်ရ။
ဖိုင် ၁၆၂ ဖိုင် မပတိတ်ကဵုလဝ် ပထမအသုတ်ဏံဂှ် သွက်ညးမိက်ဂွံလ္ၚတ် ဆေၚ်စပ်ကဵု ယာန်ပဝ်ကလိုၚ် ဟွံတီယၟုတံဂှ် ဂွံတီကေတ်တၚ်နၚ်ပရိုၚ်ဗွဲမဂၠိုၚ်ရောၚ် ပေန်တဂေါန် ဟီုရ။
အပ္ဍဲဖိုင်တံဏံမ္ဂး ပရေၚ်ဆက်စၠောံနူဌာနဝန်ဇၞော်ဍုၚ်သအာင်တြေံတံ၊ စရင်စၟတ်သမ္တီ FBI ကေုာံ စရင်စၟတ်သမ္တီ သ္ကိုပ်ယာန်အာကာသ နာသာ (NASA) တံ ပါလုပ်ဒၟံၚ်ရ။
ဖိုင်လ္ၚဵုတံဂှ်တှ်ေ နွံအာယုက် ဂၠိုၚ်ကဵုစှ်သၞာံယျတုဲ ဂလာန်ဟီုနူညးမဆဵုမတ်ဟီုလဝ် ဒဒှ်ရ ဂွံဆဵုကေတ်ပ္ၚာန်ပဝ်တံလေဝ် ပါလုပ်ဒၟံၚ်ရ။
ပ္ဍဲစရင်စၟတ်သမ္တီ FBI တံမ္ဂး အရာဝတ္ထုဗီုဏံတံဂှ် ဆဵုကေတ်လဝ် နူ ၅ စက္က စဵုကဵု ၁၀ စက္ကတံ နွံမံၚ်ရောၚ် ဗၟံက်ထ္ၜးလဝ်ရ။
အလဵုအသဳအမေရိကာန်ဂှ် စရင်စၟတ်သမ္တီ မဆဵုကေတ် သတ်လမျီုနွံမၞိဟ်ဟွံသေၚ်တံ ကေုာံ ယာန်ပဝ်ကလိုၚ် ဟွံတီယၟုတံဂှ် ထိၚ်ဒဝ်လဝ်ဗွဲမဂၠိုၚ်တုဲ ဟွံထ္ၜးပျးကဵု ဇရေၚ်မတ်ညးဍုၚ်ကွာန် ပၞုက်စွံလဝ်ရောၚ် ညးတာလျိုၚ်ထံၚ်ပရိုၚ်အမေရိကာန်တြေံ၊ ညးဖံက်ပတိတ်ပရိုၚ် ဒေဝ်ဗေတ် ဂရုချ် ဟီုလဝ်ရ။
နိဿဲ – The Guardian