နယူးဒေလဳ၊ မေ ၁၂။
အခိၚ်ပေါဲပၞာန်ဒေသလပါ်ဗၟံက်အဒေါဝ် ဆက်တ္တဵုဒှ်မံၚ်တုဲ သွက်ဂွံသောၚ်ကလးအာ ပြသၞာၚုဟ်မးကၠေၚ်ဍေၚ်ဂၠးကဝ် သၠုၚ်တိုန်မံၚ်ဂှ် ကောန်ဍုၚ်အိန္ဒိယတံ ညံၚ်ဂွံကၠောန်ကမၠောန်နူသ္ၚိ၊ ညံၚ်ဂွံယှအ်ရာန်ထဝ် ကေုာံ ညံၚ်ဂွံထိင်ပရေၚ်အာတရဴ ဍုၚ်သအာၚ်တံဂှ် သ္ကိုပ်ဝန်ဇၞော် နရေန်ဒရာ မဝ်ဒဳ ဖတိုက်ဖ္အောဝ်လဝ်ရ။
နကဵုအစဳဇန်ဟအေတ်သုၚ်စောဲ ညံၚ်ရဴအခိၚ်ကဝ်ဗေတ်တံဂှ် ပရေၚ်သုၚ်စောဲကၠေၚ်ဍေၚ် အပ္ဍဲအိန္ဒိယ ယအ်စှ်ေအာမာန်တုဲ ပရေၚ်သုၚ်စောဲသြန်ဍုၚ်သအာၚ် သက်သာအာရောၚ် မဝ်ဒဳ ဟီုရ။
ပမာဏကၠေၚ်ဍေၚ်နွံပၟိက် ၉၀ က္ဍိုပ်ကၠံဂှ် နူဍုၚ်သအာၚ် ဍုၚ်အိန္ဒိယ ဒးရာန်ပၠုပ်နၚ်မံၚ်ဂှ် ကြဴနူပေါဲပၞာန်အဳရာန်စက္တဵုဒှ်ကၠုၚ်တုဲ လၟိဟ်သြန်ဒးသုၚ်စောဲ သွက်ကၠေၚ်ဍေၚ်တံဂှ် ဂၠိုၚ်တိုန်အာရ။
နူကဵုအဳရာန် ကၟာတ်ဆိုအ်လဝ် ပ္ၚံက်ၜဳဟဝ်မုဇ် ဒှ်ဒၞာဲကိစ္စဇၞော် သွက်အရာကၠေၚ်ဍေၚ်ဂၠးကဝ်ဂွံဇွောဝ်အာဂှ် လၟုဟ်မ္ဂး လောန်ကၠုၚ် ၜါဂိတုကဝက်ပြၚ်ယျရောၚ်။
ပ္ဍဲပေါဲအသေအဟာန်မွဲ ကၠောန်ဗဒှ်လဝ် လပါ်ဍုၚ်ဟိုက်ဒရာဗတ် လပါ်သၠုၚ်ကျာ ပ္ဍဲဂိတုမေ ၁၀ လောန်ကၠုၚ်ဂှ် ဂလာန်အာတ်မိက် မဝ်ဒဳ စဵုကဵုအခိၚ်လၟုဟ်မ္ဂး ဒှ်ဂလာန်သ္ကာတ်မြဟ်အိုတ်ရောၚ် ရဲလ္ၚတ်တံ ဟီုရ။
“စိုတ်ဓါတ်ဆာန်ဂကူဟီုဂှ် မိက်ဂွံအာသၠးလမျီုဇကု ပ္ဍဲပယျဵုၜိုတ်ဂှ်ဓဝ် ကော်ခဴစဟွံသေၚ်ပုဟ်။ ဆေင်စပ်မံၚ်ကဵု တာလျိုၚ်သွက်ဍုၚ် နကဵုသမ္တီနွံနွံမံၚ်စံၚ်တန်တဴအာတံ အရာတာလျိုၚ်ဇကုတံ ညံၚ်ဂွံတုဲဒှ် ရေၚ်တၠုၚ်အာရ” သာ်ဝွံ မဝ်ဒဳ ဟီုရ။
ပ္ဍဲအကာဲအရာလၟုဟ်ဏံ ဒၞာဲကိစ္စဇၞော် သွက်ဂွံပကောံသြန်ဍုၚ်သအာၚ် ပိုဲတံဒးကဵုဖျုန်တုဲ ဒးဟအေတ်အာရောၚ် မဝ်ဒဳ ထပ်ဟီုရ။
သွက်ရဲသၟာဗ္ၚတံလေဝ် ညံၚ်ဂွံယှအ်ဖျေံကဝက် သုၚ်စောဲအာဝါဲဓါတ်ကီု ညးဍုၚ်ကွာန်တံလေဝ် ညံၚ်ဂွံသုၚ်စောဲအာကၠုၚ် ဗီုကဵုကွဳပၟတ်ဟရိပ်ပြဟ်တံညိ သ္ကိုပ်ဝန်ဇၞော် ဖတိုက်ဖ္အောဝ်လဝ်ရ။
ပရေၚ်ဇီုကပိုက်လဝ်တံ ပ္ဍဲဂိတုမေ ၁၁ ဂှ် ဆဵုညာတ်လဝ် အပ္ဍဲဖျာအိန္ဒိယတံတုဲ သွက်ၚုဟ်မးဖျာယှေဝ်ယာ အိန္ဒိယတံ ဂွံစှ်ေအာဂှ် ဂလာန်ဟီုတွံ မဝ်ဒဳဏံ ဒှ်ဟိုတ်မွဲတၚ်ရောၚ် ရဲလ္ၚတ်တံ ဟီုရ။
ဟိုတ်နူပေါဲပၞာန်အဳရာန်တုဲ ပွမဇီုကပိုက်ပရေၚ်ပိုန်ဒြပ်တံ ဇမၠိၚ်အာမာန်ရောၚ်ဂးတုဲ ပရေၚ်စိုတ်ဒှ်ဒွိၚ်တံ မံက်ဂတဝ်ဒၟံၚ်ရ။
လတူဆေၚ်သွံကၠေၚ်ဍေၚ်အလဵုအသဳတံ ၜိုန်ရဒးဒုၚ်ကဵုမံၚ် ဇြဟတ်ဟရိုဟ်ဂၠိုၚ်တိုန်ကီုလေဝ် ၚုဟ်မးကၠေၚ်ဓါတ် ကေုာံ ဒဳဇြေဝ်တံ ညံၚ်ဟွံဂွံသၠုၚ်ပတိုန်အာ နူအိန္ဒိယ ဖျေံလဝ်သ္ဂုတ်သွာတ်ရ။
ပ္ဍဲကဏ္ဍကမၠောန်ဗွဲမဂၠိုၚ်တံ ဂွံဆဵုမံၚ် ပရေၚ်ဇီုကပိုက်နာနာတံတုဲ ကမၠောန်စက်ရုံတံ လၟိဟ်ကဵုလ္ၚီ ဒှ်မံၚ်အန္တရာဲအိုတ်ရ။
ဟိုတ်နူပမာဏမ ပရေၚ်ကဵုအထံက်ပၚ်ဝါဲဓါတ် ယအ်စှ်ေမံၚ်တုဲ သတ်ဆုသတ်ဒုန်တံ တိတ်အောန်မာန်တုဲ ၚုဟ်မးစၞစသုၚ်ဇွောံမတံ သၠုၚ်တိုန်မာန်ရောၚ်ဂးတုဲ ပရေၚ်ဒှ်ဒွိၚ်တံ သၠုၚ်တိုန်ဒၟံၚ်ရ။
ဆဂး ပရေၚ်ဇီုကပိုက်လတူသြန်အိန္ဒိယ ရူပဳဂှ် သ္ကတ်မြဟ်အိုတ်တုဲ အပ္ဍဲသတ္တဟလောန်ကၠုၚ်တံမ္ဂး ၚုဟ်မးသြန်စှ်ေအာ စဵုကဵုဒးစွံစၟတ်သမ္တီလဝ်ရ။
နိဿဲ – BBC