မတ်မလီု၊ မေ ၁၉။
အပ္ဍဲကဵုတွဵုရးမန် ဗော်ညဳသၟဟ်မန် ကေုာံ ဗော်ပျဳခိုၚ်ဖျိုဝ် ဇၞးလဝ်မာဲဒၞာဲဂၠိုၚ်အိုတ် အပ္ဍဲပေါဲရုဲမာဲဒပ်ပၞာန်က္ဍိုက်ပ်ဂှ် ပြိုၚ်ပကာန်ပံက်ကၠုၚ်လဝ် ရုင်ညးစၞးအမာတ်စၠတ်ထဝ်တံ ရ။
ရုင်ညးစၞးအမာတ်စၠတ်ထဝ် ပံက်လဝ်တဏံဂှ်မ္ဂး ရန်ကဵု သွက်ပရေၚ်ဖောအ်ဗြဳဒေသ၊ ပရေၚ်အုပ်လဒမ်သၞောဝ်ဓဝ် ကေုာံ သွက်ဂွံဗိုၚ်သောၚ်ကလးကဵု အခက်အခုဲ ညးဍုၚ်ကွာန် ပ္ဍဲဒေသတံရောၚ် နူလပါ်ဗော်တံကဵုလဝ်သမ္တီနွံရ။ ဟိုတ်ဂှ်ရ ညးဍုၚ်ကွာန်အပ္ဍဲဒေသတံ အခက်အခုဲပြသၞာ ဒးဆဵုဂဗမံၚ်တံဂှ် ပ္ဍဲရုင်ညးစၞးအမာတ်စၠတ်ထဝ် ဆေၚ်စပ်တံဏံ တိုက်ရိုက်သဳကၠဳပတိုန်ထ္ၜးမာန်တုဲ မိက်ဂွံဆဵုညးတံမ္ဂး ကေတ်အခိၚ်ချိၚ်ကဵုတ္ၚဲမာန်ရောၚ် လလောၚ်တြးလဝ်ရ။
ညးဍုၚ်ကွာန်တံ သွက်ဂွံပတိုန်ထ္ၜးအခက်အခုဲပြသၞာ ဇရေၚ်ရုင်ညးစၞးအမာတ်စၠတ်ထဝ်တံဂှ် ဟွံပြေပြံၚ်တုဲ နကဵုညးစၞးတံဟေၚ် ထေက်ကဵု ဒးစှ်ေရေၚ်တၠုၚ်ကမၠောန် အပ္ဍဲဗလးတိရောၚ် ညးဒေသမတ်မလီု မွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“ခိုဟ်အိုတ်ဂှ်တှ်ေ ဥပမာ ပ္ဍဲအခိၚ်ပိုဲတံဒှ်ပြသၞာမ္ဂး ဍာံဍာံတှ်ေ အမာတ်စၠတ်ထဝ်တံ ဒးကၠုၚ်ဇရေၚ် ဆေင်ကၠေၚ်တုဲ အခက်အခုဲဗီုလဵုနွံရော။ ဒးစှ်ေဗလးတိတုဲ ဒးသၟာန်အခက်အခုဲ ညးဍုၚ်ကွာန်ရ။ ပိုဲတံဒးအာတေၚ် အပ္ဍဲရုၚ်ညးတံ၊ ဒးအာဟီု၊ ဒးအာကဵုကသပ်တံဟီုဂှ်တှ်ေ ဟွံပြေပြံၚ်ကွေံပုဟ်” သာ်ဝွံ သ္ဂးရ။
ပြဟ်ဟ်ဏံ ဗော်ညဳသၟဟ်မန်ဂှ် ပ္ဍဲပွိုၚ်ဍုၚ်ပံၚ်၊ ၜါသွာၚ်၊ မုဟ်ဍုၚ်၊ ဇြပ်ဗု ကေုာံ ပွိုၚ်ဍုၚ်ရေဝ် ဒၞာဲဇၞးလဝ်မာဲဗွဲမဂၠိုၚ် အပ္ဍဲပေါဲရုဲမာဲ လောန်ကၠုၚ်ဂှ် ဗက်ပံက်လဝ်ရုင် ညးစၞးအမာတ်စၠတ်ထဝ် တံရ။
တုပ်ညံၚ်ရဴသာ်ဂှ်ကီု နူဗော်ပျဳခိုၚ်ဖျိုဝ်လေဝ် ပ္ဍဲပွိုၚ်ဍုၚ် ကျာ်မြဟ်၊ မုဟ်ဍုၚ်၊ သဓီု ကေုာံ ပွိုၚ်ဍုၚ်ၜဳကလေၚ်တံဂှ် ပံက်လဝ်ရုင်ညးစၞးအမာတ်စၠတ်ထဝ်တံတုဲ ပွိုၚ်ဍုၚ်သှ်ေမံၚ်တံဂှ် သွက်ဂွံဆက်ပံက်အာ စဳဇန်လဝ်နွံရ။
ၜိုန်ရဗက်ပံက်မံၚ် ရုင်ညးစၞးအမာတ်စၠတ်ထဝ်တံကီုလေဝ် ဟိုတ်နူပရေၚ်စှ်ေဗလတိ ရေၚ်တၠုၚ်ကမၠောန်တံဟၟဲတုဲ စိုပ်တရဴဟွံမာန်ပုဟ် ညးဒေသပွိုၚ်ဍုၚ်ရေဝ်မွဲတၠ ပါ်ပါဲလဝ်ရ။
“ပရေၚ်ဏံ စိုပ်တရဴဟွံမာန်ပုဟ်။ ပြသၞာဇၞော်တိုန်မာန်ရောၚ် အဲထေၚ်ရ။ ဥပမာ ကိစ္စမက္တဵုဒှ်ပ္ဍဲဗလးတိမွဲမွဲဂှ် ရဲအာတေၚ်လဝ်ဇရေၚ်ညးတံ နကဵုလိက်တၚ်နၚ်စောဲတံလဝ်ဂှ် ဒှ်အရာဍာံစၟတ်ရောၚ် ယဝ်ရညးတံ ကေတ်စအာမ္ဂး အပ္ဍဲဗလးတိနတဲပကတိဂှ် သ္ၚောဲခြာအာမာန်ရောၚ် အဲထေၚ်ရ။ တုဲတှ်ေ စဵုကဵုလၟုဟ် ညးစၞးဇၞးလဝ် အပ္ဍဲဍုၚ်ပိုဲတံဂှ်လေဝ် စပ်ကဵုဍုၚ်ပိုဲဏံတုဲ ပရေၚ်ကၠုၚ်ပတိုန်ထ္ၜးလဝ် ဟွံဂွံဆဵုညာတ်ဏီပုဟ်” သာ်ဝွံ သ္ဂးရ။
တုဲပၠန် ဆၜိုတ်ပံက်လဝ် ရုင်ညးစၞးအမာတ်သၟးတုဲ ယဝ်ရ ဟွံစှ်ေရေၚ်တၠုၚ်သောၚ်ကလး အခက်အခုဲညးဍုၚ်ကွာန်တံ စဵုကဵုစိုပ်ဗလးတိမ္ဂး မုလေဝ်ပြေပြံၚ်အာ ဟွံမာန်တုဲ၊ ညးဍုၚ်ကွာန်တံ ဒးအာပတိုန်ထ္ၜး အခက်အခုဲ အပ္ဍဲရုၚ်ဟေၚ် ဟီုဂှ်တှ်ေ ထေက်ကဵု ဒးဒှ်ဟွံသေၚ်ရောၚ် ညးဆက်ဟီုရ။
အခိၚ်ကၠာတေံ ညးစၞးအမာတ်စၠတ်ထဝ်ဆေၚ်စပ်တံ စှ်ေအာ စဵုကဵုဗလးတိတံတုဲ သၟာန်အခက်အခုဲညးဍုၚ်ကွာန်တံကီု သၟာန်ဂလာန်အပ္ဍဲစၠတ်ထဝ်၊ ပံၚ်တောဲကဵုဌာနဆေၚ်စပ်တံတုဲ ကေၚ်သောၚ်ကလးကဵုလဝ် အိုတ်ရောၚ်။
ပြဟ်ဟ်ဏံဂှ်တှ်ေ ညးစၞးအမာတ်စၠတ်ထဝ် မံက်တိုန်ကၠုၚ် နူကဵုပေါဲရုဲမာဲဒပ်ပၞာန်တံဏံ ထ္ၜးဟိုတ်ကဵုပရေၚ်ဂီုကၠီုတုဲ ပရေၚ်စှ်ေသၟာန် စၟဳစၟတ်ရေၚ်တၠုၚ် အခက်အခုဲပွမကြေပ်ဂြတ်ညးဍုၚ်ကွာန်တံ စဵုကဵုစိုပ်ဗလးတိဂှ် ဍိုန်လျမံၚ် မဒှ်ရ။
အပ္ဍဲစၠတ်ထဝ်တွဵုရးမန်ဂှ် ဗော်ပျဳခိုၚ်ဖျိုဝ် ၁၁ ဒၞာဲ၊ ညးစၞးဒပ်ပၞာန် ၈ ဒၞာဲ ကေုာံ ဗော်ညဳသၟဟ်မန် (MUP) ၇ ဒၞာဲ က္လိဂွံလဝ် ခုၚ်အိုတ်ရ။
တုဲပၠန် ဗော်ညဳသၟဟ်ကောန်ဍုၚ်အရၚ်၊ ဗော်ဇၞော်မောဝ်တောတက် ကောန်ဂကူပအိုဝ်၊ ဗော်ညးဍုၚ်ကွာန်၊ ဗော်ပၠတရဴညးဍုၚ်ကွာန် ကေုာံ ဗော်ဇၞော်မောဝ်ဖိုလ်ပိုန်ဒြပ် ကောန်ဂကူတံလေဝ် က္လိဂွံလဝ် ညးစၞးမွဲမွဲဒၞာဲကီု မဒှ်ရ။
ပရိုၚ် – သြၚ်လောန်တိုၚ်မ်
Photo – Social Media