တနၚ်သဳ၊ မေ ၁၉။
အပ္ဍဲကဵုရးတနၚ်သဳ ပွိုၚ်ဍုၚ်တနၚ်သဳ ဂအုံကွာန်တကူဂှ် ပေါဲဗတိုက်ဟၟဲကီုလေဝ် နူကဵုဒပ်ကဝ်မယှေန်ပၞာန် ထပ်ကြဳဗုၚ်ဗတိုက်လဝ် နကဵုပါရာမဝ်တာရောၚ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
လောန်ကၠုၚ်ဂိတုမေ ၁၆ အခိၚ်တ္ၚဲစေၚ်ဂှ် ပါရာမဝ်တာ ၅ မ ပဝ်တိတ်ကၠုၚ် နူဒပ်ပၞာန်ကျာဗိက်တုဲ ၂ မဂှ် ကြဳဖျေံလဝ်ဗုၚ် အပ္ဍဲဂအုံကွာန်တကူ ဂကောံကွာန်သ္ၚိတြဴမ ကဵုကွာန်ဒဵုတၟအ်ရ။
ဟိုတ်နူကြဳဖျေံဗုၚ်ဂှ်ရ ပ္ဍဲဂကောံကွာန်သ္ၚိတြဴမဂှ် ဗုမ်ခတိုဟ်အာ လပါ်လက်ကရဴသ္ၚိ မွဲမတုဲ ဖွာမေ အာယုက် ၇၀ ပြၚ်အဃော ခေပ်မံၚ်သတ်ဂှ် ဒးအာဝပ် ပ္ဍဲဇိုၚ်နွံမံၚ်ရောၚ် ညးတြုံဒေသမွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ဒပ်ကဝ်မယှေန်ပၞာန် သုၚ်စောဲပါရာမဝ်တာ ကြဳဖျေံဗုၚ်ဗတိုက်လဝ်ဏံ အပ္ဍဲရးတနၚ်သဳမ္ဂး ဒှ်အလန်ပထမကၠာအိုတ်ရောၚ် သ္ဂးရ။
မွဲလပါ်ဂှ်တှ်ေ ၜိုန်ရပေါဲဗတိုက်ဟၟဲကီုလေဝ် ပ္ဍဲပွိုၚ်ဍုၚ်တနၚ်သဳ ဂအုံကွာန်တကူဂှ် ဒပ်ကဝ်မယှေန်ပၞာန် ကၠုၚ်ကြဳဗုၚ်ဗတိုက်မံၚ် နူကဵုဗလးကျာ မွဲဏှမွဲဏှနွံတုဲ အကြာညးဒေသတံမ္ဂး ပရေၚ်ဒှ်ဒွိၚ် ဂွိၚ်ဖေက်တံ သၠုၚ်တိုန်မံၚ် မဒှ်ရ။
အပ္ဍဲဂိတုမေ ၁၃ လောန်ကၠုၚ်တေံလေဝ် ပ္ဍဲဘာတန်သၠုၚ် ကွာန်တကူဂှ် ဒပ်ကဝ်မယှေန်ပၞာန် သုၚ်စောဲၜၚ်ကျာဂျက်ဖိုက်တာတုဲ ကြဳဗုၚ် ဗတိုက်လဝ်ဂှ် ခဒမ်ဘာၜါထပ် ၜါမ၊ သီုခဒမ်ဘာ ဗွဲမဂၠိုၚ် ဒးအာတုဲ လီုလာ်အာလဝ်ရောၚ် ဂွံတီကေတ်ရ။
ပရိုၚ် – သြၚ်လောန်တိုၚ်မ်
Photo – Social Media