ဇြပ်ဗု၊ မေ ၂၁
အပ္ဍဲတွဵုရးမန် ပွိုၚ်ဍုၚ်ဇြပ်ဗု ကွာန်ပြဳ ဒကဲဂၠံၚ်အာ ဇြပ်ဗု – ကွာန်အနၚ်ဂှ် ဂွံဆဵုညာတ်လဝ် ဇွမၞိဟ်တြုံ ၂ တၠ ကၠေၚ်ဒက်လဝ်ကဵု ဇုက်တုဲ ဒးဒုၚ်ပန်ဂစိုတ်လဝ် နကဵုသေနတ်ရောၚ် ညးဒေသတံ ဟီုလဴကဵုဌာန်ပရိုင်သြၚ်လောန်တိုၚ်မ်ရ။
အပ္ဍဲဂိတုမေ ၂၀ ၜိုတ်အခိၚ်နူဂယး ၉ နာဍဳဂှ် ဒၞာဲဂၠံၚ်ဇြပ်ဗု – ကွာန်အနၚ်ဂှ် ညးဒေသတံ ဆဵုညာတ်လဝ် ဇွမၞိဟ်တြုံ ၂ တၠ ဒးဒုၚ် ကၠေၚ်ဒက်လဝ်ကဵုဇုက်တုဲ ချိုတ်မံၚ်လံက်မိုပ်ရောၚ်။
မၞိဟ်တြုံချိုတ်လဝ် ၂ တၠဏံဂှ် ဒှ်ညးဂှ်ရော ဗက်ဂၠိုက်ဂၠာဲသၟာန်သၟုက်မံၚ်ယၟုတုဲ ဂွံဆဵုညာတ်လဝ် ဒၞာဲမကမ်ဖံက် လုပ်အာလဝ် ပ္ဍဲကဵုသြိုဟ်၊ ပ္ဍဲကအ် ကေုာံ ပ္ဍဲဒဳတံကီု ဒးလဝ်ဝပ်တုဲ ကၞေၚ်ကဵုမုက်တံဂှ်လေဝ် ဂုဟ်ပဍူမံၚ်ကီုရ။
ဇွမၞိဟ်တြုံ ၂ တၠ ဒးဒုၚ်ကၠေၚ်ဒက်ပန်ဂစိုတ်လဝ်ဏံဂှ် ဂကောံရီုဗၚ်ဟံၚ်ပြာ်တံ ဗလံၚ်ဗ္စိုပ်ကဵုလဝ် ရုၚ်ဂဥုဲညးဍုၚ်ကွာန် ပွိုၚ်ဍုၚ်ဇြပ်ဗုရောၚ် ဂွံတီကေတ်လဝ်ရ။
ဂိတုမေ ၁၄ တုဲကၠုၚ်တေံလေဝ် ပ္ဍဲပွိုၚ်ဍုၚ်ဇြပ်ဗု ကွာန်သခါန်ဂျဳ ကရပ်ဇိုၚ်ဂၠံၚ်ကွဳစက် ရေဝ်-ဇြပ်ဗု ဂှ် မၞိဟ်တြုံ ၃ တၠ ကၠောန်ကမၠောန် ဗက်လံက်ကၠေၚ်တိတံ ကၠေၚ်ဒက်လဝ်ကဵုဇုက်တုဲ ဒးဒုၚ်ပန်ဂစိုတ်လဝ်ဂှ် ဂွံဆဵုညာတ်လဝ်ဇွကီုရ။
အပ္ဍဲပွိုၚ်ဍုၚ်ဇြပ်ဗု အကြာတ္ၚဲတံဏံ ပရူပရာညးဍုၚ်ကွာန် ကောန်အရာပ်တံ ကၠေၚ်ဒက်လဝ်ကဵုဇုက်တုဲ ဒးဒုၚ်ပန်ဂစိုတ်မံၚ်ဂှ် အဆက်ဆက်ဒှ်မံၚ်ဂှ်ရ သွက်ပရေၚ်ဂီုကၠီု ညးဒေသတံဂှ် ဒှ်မံၚ်ဂဝိၚ်ဖေက်လကိုတ်မံၚ် ဗွဲမလောန်ရောၚ် သ္ဂးရ။
ပရိုၚ် – သြင်လောန်တိုၚ်မ်
Photo – CJ