ပွေအ်ဖျူ၊ မေ ၂၁
အပ္ဍဲပွိုၚ်ဍုၚ်ပွေအ်ဖျူ ရးမကွေ ညးကၠုၚ်ဝေင်ပေါဲသဘၚ်သွံဖျာတံဂှ် ဂကောံသၟဝ်တဲဒပ်ပၞာန်ဗၟာတံ တံၚ်ပဝ်တာတုဲ ရပ်ချုက်မံၚ်ရောၚ် ညးဒေသတံ ဟီုလဴကဵုဌာန်ပရိုင်သြၚ်လောန်တိုၚ်မ်ရ။
ပေါဲသဘၚ်သွံဖျာ စပ္တံကၠောန်ကၠုၚ် နူဂိတုမေ ၁၂ တုဲကၠုၚ်တေံတုဲ ယဝ်ရ ကၠုၚ်ပေါဲသဘၚ်သွံဖျာမ္ဂး ဟွံရပ်ပုဟ်ဂှ် ဂကောံသၟဝ်တဲ ဒပ်ပၞာန်ဗၟာတံ ဗက်လလောၚ်တြးလဝ်ကီုလေဝ် ဂိတုမေ ၁၉ အခိၚ်ဗ္တံဂှ်တှ်ေ မၞိဟ်ဒးဒုၚ်ရပ်လဝ် ကြပ်ပေၚ် ၄၀ တၠရောၚ်။
“သ္ကိုပ်ပရေၚ်အုပ်ဓုပ်ဍေံတံကဵု ညးကြပ်ကဵုဒပ်ပၞာန်ဗၟာတံဟီုလဝ်ဂှ် ယဝ်ရအာဝေၚ်သဘၚ်ပေါဲသွံဖျာမ္ဂး ဟွံရပ်ပုဟ်၊ မၞိဟ်ဂၠိုၚ်တုဲ ဂဵုလဟဵုမံၚ်ကွေံကွေံရောၚ် ဗက်ဟီုမံၚ်အကြာကွာန်တံရ။ လၟုဟ်မ္ဂး သီုကွဳစက် သီုမၞိဟ် ရပ်ဏာဗွဲမဂၠိုၚ်ရ” သာ်ဝွံ ညးဒေသမွဲတၠ ဟီုလဴကဵုဌာန်ပရိုင်သြၚ်လောန်တိုၚ်မ်ရ။
ထ္ၜးဟိုတ် ပေါဲသဘၚ်သွံဖျာဏံတုဲ ကွဳစက်ကဵုကွဳလိုန်ဓါတ် ၂၀ မပြၚ် မၞိဟ်ကြပ် ၄၀ တၠ ဒးဒုၚ်ရပ်ဏာနွံရောၚ် ညးဗၠးတိတ်ကၠုၚ် နူဒးဒုၚ်ရပ်မွဲတၠ ဟီုရ။
မၞိဟ်ဒးဒုၚ်ရပ်လဝ်ဗွဲမဂၠိုၚ်ဂှ် ဒှ်ကောန်ကွာန် လပါ်သၟဝ်ကျာမုၚ်ချံၚ်တုဲ နူကွာန်ကုန်ဘာဇၞော် ကေုာံ ကွာန်ခိုၚ် ရဲပျူသဝ်ထဳတံ ရပ်လဝ်ရောၚ် ဟီုရ။
မၞိဟ်ဒးဒုၚ်ရပ်လ္ၚဵုတံမ္ဂး ဒးကလေၚ်နုက်ကဵုသြန် နူ ၃၀ ကိုတ် စဵုကဵု ၁၄၀ ကိုတ် ကဵုတုဲမှ ဂွံကလေၚ်ဗၠးတိတ်တုဲ မၞိဟ်သြန်ဟၟဲတံဂှ်တှ်ေ ဟွံဂွံဗၠးတိတ်ဏီပုဟ် ဂွံတီကေတ်ရ။
ပရိုၚ် – သြင်လောန်တိုၚ်မ်
Photo – CJ