သွက်ဂွံသောၚ်ကလး ပရေၚ်ကၟိန်ဍုၚ်ဗၟာဂှ် ပံၚ်တောဲရေၚ်တၠုၚ်အာကဵု ဍုၚ်သ္အာၚ်တံရောၚ် PPST လလောၚ်ပ္တိတ်

လ္ဂုၚ်၊ အံက်တဝ်ဗာ (၂၉)

ပ္ဍဲအရာသောၚ်ကလး ပြသၞာရေၚ်ဍုၚ်ကွာန် ကၟိန်ဍုၚ်ဗၟာဂှ် ညံၚ်ဂွံဒှ်ကၠုၚ် ပေါဲသဳကၠဳပရေၚ်ဍုၚ်ကွာန် ညးမဆက်စပ်အိုဿီု ဂွံပါလုပ်ဂှ် ပံၚ်တောဲရေၚ်တၠုၚ်အာကဵု အာဇြဳယာန် မပါလုပ် သီုကဵု ဍုၚ်သ္အာၚ်တံရောၚ်ဂှ် PPST လလောၚ်ပ္တိတ်လဝ်ရ။

ပ္ဍဲဂိတုအံက်တဝ်ဗာ စၟတ်တ္ၚဲ (၂၇) ကေုာံ စၟတ်တ္ၚဲ (၂၈) ဂှ် ကၠောန်သ္ပလဝ်ကောံဓရီု ဂကောံက္ဍိုက်ပ်လၟေၚ်ကမၠောန်ပရေၚ်ၜိုဟ်လလမ် (PPST) နူကဵုလပှ်ကျာတုဲ သဳကၠဳပ္ညဳပ္ညပ်လဝ် ပရူပရာကိစ္စ ပရေၚ်ဍုၚ်ကွာန်လၟုဟ်၊ ပရေၚ်ပၞာန်၊ ပရေၚ်ၜိုဟ်လလမ်၊ ပရူကိစ္စ စပ်ကဵုပရေၚ်စဵုဒၞါကောန်အရာပ်တံ၊ ပရေၚ်ဗ္စာရဏာမၞိဟ်တံ ကေုာံ လၟေၚ်ကမၠောန်အဓာန်ဂတတံ မဒှ်တဴရ။

နကဵု PPST သွက်ဂွံသောၚ်ကလး အကြေပ်ဂြတ်ပရေၚ်ဍုၚ်ကွာန်လၟုဟ်တံ ဗွဲမသၟဟ်ကဵု တၚ်နွံပၟိက် နတဲပရေၚ်ဍုၚ်ကွာန်ကၟိန်ဍုၚ်ဗၟာဂှ်ကီု၊ သွက်ဂွံကဵုပွစဵုဒၞါ ကုကောန်အရာပ်တံမာန် ကေုာံ သွက်သ္ဂောံဂွံအရီုဗၚ် ပရေၚ်ဗ္စာရဏာမၞိဟ်တံမာန်ဂှ် ပံၚ်တောဲရေၚ်တၠုၚ်အာကဵု ကၟိန်ဍုၚ်သ္အာၚ်တံရောၚ် သ္ဂးရ။

ပ္ဍဲလၟေၚ်ဒဒှ် ဘာဗ္တောန်လိက် မၞုံကွာန် (လက်ယက်ကုန်း) ၊ ပွိုၚ်ဍုၚ်ဒဳပေဝ်ယေန်၊ ရးဒေသဇၞော်တၞၚ်သဳ ကေုာံ လၟေၚ်ဒဒှ် ကွာန်အဏာတ်ပါ၊ ဍုၚ်ဖာက၊ တွဵုရးကချေၚ်တံ မက္တဵုဒှ်လဝ် ခြာဟွံလအ်ဏီတံဂှ် စကာဇြဟတ် ဗွဲမဂၠိုၚ်ဂၠေၚ်တုဲ ဒၟါနူဒးဒုၚ်ဗ္တိုက်လဝ် နူကဵုက္ၜၚ်ကျာဂှ်ရ ညးဍုၚ်ကွာန်တံ ဒးဆောံလေၚ်လဝ်လမျီုအိုတ်တုဲ ဒးဒှ်လၞီလၞာ်အောန်စိုတ်ဂှ် PPST လလောၚ်ပ္တိတ်လဝ်ရ။

ဟိုတ်နူပရူဒဒှ်တံဏံတုဲ လ္တူမဂ္စါန်ပ္တိတ်ကၠုၚ်ဇြဟတ် သွက်ဂွံသောၚ်ကလး ပြသၞာပရေၚ်ဍုၚ်ကွာန် နကဵုနဲကဲပရေၚ်ဍုၚ်ကွာန်တံဂှ် ဒၟါနူဒတုဲဖဵု မဒှ်လက်သန်နုက်တံ မံက်ကၠုၚ်လဝ်ဂှ်ရ နကဵုညးမဆက်စပ်တံ ပြဝ မကဵုသာပရေံကၠုၚ် ကုပဋိပက္ခပရေၚ်ဍုၚ်ကွာန်၊ ပရေၚ်ပၞာန် မက္တဵုဒှ်ဒၟံၚ်လၟုဟ်တံ သာ်လဵုဟွံဟီု သွက်ဂွံဝေၚ်ပါဲကဵုအိုတ်ဂှ်ကီု ညံၚ်ဂွိုအ်ကလေၚ်ဒးဂိုဟ်ကဟောံကီုဂှ် PPST ဖ္တိုက်ဖ္အောဝ်လဝ်ရ။

နကဵု PPST သွက်ဂွံဒတူလိုၚ်အာ လ္တူမူသ္ဇိုၚ် (၃) တၚ် သွက်ဂွံသောၚ်ကလး ပြသၞာပရေၚ်ဍုၚ်ကွာန် နနဲပရေၚ်ဍုၚ်ကွာန်ကီု၊ ညံၚ်ပေါဲသဳကၠဳပရေၚ်ဍုၚ်ကွာန် မဍိုက်ပေၚ်တဴကဵု အဓိပ္ပာယ် သီုကဵုညးမဆက်စပ်တံအိုဿီု သ္ဂောံပါလုပ်တံဂှ်ကီု ကေုာံ သွက်ဂွံကဵုပွစဵုဒၞါ ကုကောန်အရာပ်တံ ဒှ်တမ် ဒဒှ်ရဒတူလိုၚ်အာ ခိုၚ်ၚ်ကၠိုက်က်ရောၚ်ဂှ် သ္ဂးလဝ်ရ။

သ္အာၚ်နူဂှ်ပၠန် သွက်သ္ဂောံဂွံ ပရေၚ်ၜိုဟ်လလမ် မတန်တဴအာ ဍာ်ဇမၠိၚ်မာန် ကေုာံ သွက်ဂွံဒက်ပ္တန်ကၟိန်ဍုၚ်ပံၚ်ကောံ ဖေဝ်ဒရာဒဳမဝ်ကရေဇြဳမာန်ဂှ် ပ္တိတ်ဇြဟတ် ဂ္စါန်ရေၚ်တၠုၚ်အာ ပ္ဍဲအကြာဇွိုန်လပှ် ပရေၚ်ဍုၚ်ကွာန်လၟုဟ်တံဏံ တန်န်ကြန်န်ရောၚ်ဂှ် PPST လလောၚ်ပ္တိတ်လဝ်ရ။

ပရိုၚ်−သြၚ်လောန်တိုၚ်(မ်)