နေဗျဳဒဝ်၊ နိုဝမ်ပါ ၁၄
အတိုၚ်အလဵုအသဳပၞာန် အာတ်လဝ်ဗာတ်ဂျက်ထပ်ဗပေၚ် သွက်သၞာံပရေၚ်ဘဏ္ဍာ ၂၀၂၆ – ၂၀၂၇ ဂှ် နူကဵုစၠတ်ထဝ်သ္ပဒတန် ပ္ဍဲကောံဓရီုစၠတ်ထဝ်ကၟိန်ဍုၚ် ကၠောန်လဝ်နိုဝမ်ပါ ၁၂ ဂှ်ရ။
အာတ်လဝ်ဗာတ်ဂျက်ထပ်ဗပေၚ် သွက်သၞာံပရေၚ်ဘဏ္ဍာ ၂၀၂၆ – ၂၀၂၇ ဂှ် အမာတ်စၠတ်ထဝ် ၄ တၠတံ သဳကၠဳတုဲ ပါ်မာဲဖျေံသ္ဂုတ်သွာတ်ဂှ် မာဲထံက်ဂလာန် ၄၈၁ မာဲ၊ မာဲဒစဵုဒစး ၁၉ မာဲ၊ မာဲမံၚ်အကြာ ၂၈ မာဲ သ္ပလဝ်ဒတန် မဒှ်ရ။
ဗာတ်ဂျက်ထပ်ဗပေၚ် သွက်သၞာံပရေၚ်ဘဏ္ဍာ ၂၀၂၆ – ၂၀၂၇ ဂှ် အာတ်မိက်လဝ် ၇၄၀၀ ဗဳလဳယာန်တုဲ အပ္ဍဲဏံ သွက်ဒပ်ပၞာန် စရိတ်ပရေၚ်စဵုဒၞာ ရပ်စပ်သုၚ်စောဲအာ ၂၅၀၀ ဗဳလဳယာန်ဒကေဝ် ပြၚ်ရောၚ်။
သွက်ဒပ်ပၞာန် စရိတ်ပရေၚ်စဵုဒၞာ ရပ်စပ်သုၚ်စောဲလဝ် ၇၉၅၀ ဗဳလဳယာန်ဒကေဝ်ပြၚ် ဂွံအခေါၚ်ရပ်စပ်သုၚ်စောဲကီုလေဝ် သှ်ေမံၚ်သွက် ၄ ဂိတုဏံ အာတ်ဗာတ်ဂျက်သွက်ဂွံထပ်ဗပေၚ် သြန်ဗဳလဳယာန် ၂၅၀၀ ပြၚ်ရ။
သွက်သၞာံပရေၚ်ဘဏ္ဍာ ၂၀၂၆ – ၂၀၂၇ ဏံ သွာၚ်ဒပ်ပၞာန်ဗမာ သုၚ်စောဲသြန်သွက်ပရေၚ်စဵုဒၞာ သြန်ဗဳလဳယာန် ၁၀၀၀၀ ပြၚ် ဂၠိုၚ်နူကဵု လက်ထက်အလဵုအသဳ NLD တေံ ၜိုတ် ၄ အဆ သၠုၚ်တိုန်အာရ။
အခိၚ်ညးဍုၚ်ကွာန်တံ ဝါတ်ကျာတ်ကြေပ်ဂြတ်မံၚ်ဏံ သၠုၚ်ပတိုန်လဝ် စရိတ်ဒပ်ပၞာန်ရပ်စပ်သုၚ်စောဲဂှ် ပရေၚ်ပါ်ပါဲ အကြာညးဍုၚ်ကွာန်တံ နွံမံၚ်ရ။
ပ္ဍဲလက်ထက် ဂဥုပ်သ္ကိုပ်ဒပ်တၟိ ပွိုၚ် ၅ ဂိတုဏံ စနူ ၂၀၂၆ ဂိုအေဗရာ စိုပ်ဂိတုအဝ်ဂတ်ဂှ် ဒပ်ပၞာန်ကျာ အာဗတိုက်လဝ် အပ္ဍဲအလုံမွဲဍုၚ် ဟွံအောန်နူကဵု ၁၅၈၃ ဝါ နွံကၠုၚ်လဝ်ဂှ် ဂွံတီနူကဵုတၚ်နၚ် ဂကောံပရေၚ်သုတေသန ISP-Myanmar ရ။
ဒၞာဲညးဍုၚ်ကွာန်တံ တန်တဴမံၚ်စံၚ် ပ္ဍဲကဵုကွာန်တံ စမြိုၚ်ဒၞာဲပရေၚ်ထတ်ယုက်ကဵု ပညာတံဂှ် ပတဝ်လဝ်တုဲ ပန်စုတ်မံၚ်ဂၠိုၚ်ၚ် ကလိလောန်လဝ် သ္ဂးရ။
နူကဵု ၂၀၂၁ အကြာအခိၚ်သီအဝဵု ပွိုၚ် ၅ သၞာံဏံ စရိတ်သွက်ဒပ်ပၞာန်ဗမာတံဂှ် အတိုၚ် ဗီုဒးစိုတ်ပၟိက်နွံဂှ် ဒပ်ပၞာန်ဗမာ ပတိတ်ကေတ်မံၚ်သြန်ကီု ကၠောန်ပေါဲရုဲမာဲတုဲ နူကဵုစၠတ်ထဝ်ဍေံတံ ဟွံကလေၚ်ထပိုတ်သြန်မွဲသာ် ကဵုအခေါၚ်ဒပ်ပၞာန် ရပ်စပ်သုၚ်စောဲမံၚ်ဖိုအ်ရ။
ပရိုၚ်-သြၚ်လောန်တိုၚ်မ်
Photo – MOI