တၚ်ဆက်စၠောံသၟာန်သွဟ်လဝ်ကဵု ညးအုပ်ကာနာနာ ဗော် SNLD သိုၚ်လုက်။
ဗော်ဒဳမဝ်ကရေဇြဳကောန်ဂကူသေံ (SNLD) ဂှ် သွက်ဟွံပတိုန်စၟတ်သမ္တီ ပ္ဍဲကဝ်မယှောန်ပေါဲရုဲမာဲကၟိန်ဍုၚ် ကံၚ်ဇြဳပၞာန်ဂှ် ဖျေံကၠုၚ်လဝ် သ္ဂုတ်သွာတ်ရ။ ကိစ္စဟွံပတိုန်စၟတ်သမ္တီဂှ် ပ္ဍဲဂိတုမာတ်ချ် စၟတ်တ္ၚဲ (၁၆) ကေုာံ စၟတ်တ္ၚဲ (၁၇) တုဲကၠုၚ်တေံ ဖျေံကၠုၚ်လဝ်သ္ဂုတ်သွာတ် ပ္ဍဲကောံဓရီု ကဝ်မတဳဗဟဵုရ။ ဟိုတ်ဂှ်ရ စပ်ကဵု ဟိုတ်ဗော် (SNLD) ဂွံဖျေံကၠုၚ်သ္ဂုတ်သွာတ် သွက်ဟွံဂွံပတိုန်စၟတ်သမ္တီကီု၊ စပ်ကဵုပရေၚ်ချဳဒရာၚ် ပရေၚ်ဍုၚ်ကွာန်ဆက်ရေၚ်တၠုၚ်ကၠောန်အာ ဂတဏံကီု၊ လစွံစိုတ် ဗော် (SNLD) ပ္ဍဲလ္တူဒးဒုၚ်ပလီုဗော်ကီုတအ်တုဲ ဆက်စၠောံသၟာန်သွဟ်လဝ်ကဵု ညးအုပ်ကာနာနာဗော် (SNLD) သိုၚ်လုက်ရ။
-ကိုပ်ကၠာအိုတ်ဏံ စပ်ကဵုအကာဲအရာ (SNLD) ဂွံဒးဖျေံကၠုၚ်သ္ဂုတ်သွာတ် သွက်ဟွံဂွံပတိုန်စၟတ်သမ္တီဗော်တုဲ ဟီုထ္ၜးကဵုညိ။
ဟွံဒှ်ပတိုန်စၟတ်သမ္တီဂှ်တှ်ေ ဟိုတ်ဍေံ နွံဒၟံၚ်ၜါဂကူရ။ မွဲဂှ်တှ်ေ ဂွံကေတ်တၚ်လစွံစိုတ်ကောန်ဗော်ပိုဲဂှ် ကေတ်ဟွံမာန်ရ။ ကောန်ဗော်ဂှ် မံၚ်ဒၟံၚ် အလုံမွဲတွဵုရး။ အလုံမွဲတွဵုရးသေံ တုဲပၠန်တွဵုရးကချေၚ်၊ တွဵုရးကရေၚ်ဍာဲတအ်လေဝ် နွံဒၟံၚ်ရ။ အာဇရေၚ်ညးတအ်တုဲ ဂွံကေတ်တၚ်လစွံစိုတ်ဟီုဂှ် ပရေၚ်ဆိုအ်ဗ စပ်ကဵုပရေၚ်ဂီုကၠီု နွံရ။ တုဲပၠန် အခိၚ်လေဝ်အောန်ဒၟံၚ်။ ဂွံအခိၚ်ၜိုတ်ၜါဂိတုဓဝ်ဂှ်ရ သွက်ပိုဲဂွံအာ ဆဵုဂဗကဵုညးတအ် ဂွံကေတ်တၚ်လစွံစိုတ် ဂွံသရောပ်သ္ၚဳဂၠိပ်ဟီုဂှ် ကၠောန်သ္ပ ဍိုက်က်ပေၚ်ၚ် ဟွံမာန်ရ။ ဣဏံဂှ်မွဲတၚ်ရ။ တုဲမွဲတၚ်ပၠန်ဂှ် ပေါဲရုဲမာဲဏံ ဆလအ်ကၠောန်ရောဟီုဂှ် ညးဆေၚ်စပ်တအ် လလောၚ်တြးလဝ် ချိုတ်တ်ပၠိုတ်တ်ဟၟဲဏီဂှ်လေဝ် သွက်ပိုဲ ဂွံဖျေံသ္ဂုတ်သွာတ်ဂှ် ဒှ်ကိစ္စခက်ခုဲ မွဲသာ်ရ။ ဟိုတ်နူဟိုတ်ၜါသာ်ဏံတုဲ သွက်ပိုဲဂွံဆက်ပတိုန်စၟတ်သမ္တီ ဒှ်ဟွံမာန်ပုဟ်ဂှ် ဖျေံကၠုၚ်သ္ဂုတ်သွာတ်ရ။
-ဒၟာနူဟွံပတိုန်စၟတ်သမ္တီတုဲ စပ်ကဵုအကာဲအရာ ဒးဒုၚ်ပလီုဗော်မာန်ကီု သီုကဵုပရေၚ်ဂီုကၠီုကောန်ဗော်တအ်တုဲ ဗီုပြၚ်လဵု ပတှ်ေကေတ်လဝ်ရော။
ဆၜိုတ်ဟွံဆက်ပ္တိုန်စၟတ်သမ္တီ နဒဒှ်ဗော်ပရေၚ်ဍုၚ်ကွာန်ဓဝ်ဂှ် ပိုဲက္လိလောန်လဝ် ဒုဟ်ဒဏ်ဟွံသေၚ်ပုဟ်လေဝ် ဗော်မွဲဗော်ဂှ် ဒက်ပ္တန်လဝ် တုဲတုဲဒၟံၚ်ရ။ ဍေံဟွံမိက်ဆက်တန်တဴ နဒဒှ်ဗော် ဆက်တန်တဴဟွံမာန် ဟွံမိက်ဒတူလာၚ်ရပုဟ်တှ်ေ ဆၜိုတ်ဟွံပ္တိုန်စၟတ်သမ္တီဓဝ်ဂှ် အရာဏံ ဒှ်က္လိလောန်လဝ် ဒုဟ်ဒဏ်ဟွံသေၚ်ပုဟ်။ ဟိုတ်နူဖံက်ပ္ကဝ်လဝ် သၞောဝ်ဥပဒေကၟိန်ဍုၚ်ဟွံသေၚ်ဂှ်ရ သွက်ပိုဲ ဂွံဇီုကပိုက်ဒးဇၞော်ဇၞော်ဂှ် နွံဟွံသေၚ်ရ။ သွက်ဂွံဒှ်ဒုဟ်မမိက်ကဵုမွဲမွဲ ဂွံကေတ်အရေဝ်မမိက်ကဵုမွဲမွဲဟၟဲပုဟ်ဂှ် ပတှ်ေကေတ်လဝ်ရ။ မွဲလပါ်ပၠန်လေဝ် သွက်ပိုဲဂွံဒးချပ် ဟွံသေၚ်ပုဟ်လေဝ်ဏး။ တၚ်သ္ဂုတ်သွာတ် UEC ၊ တုဲတဴကဵု ပ္ဍဲလတူ UEC နွံကဵုပရေၚ်လ္ဂူတပ်တးရ။
-ဟွံပတိုန်စၟတ်သမ္တီ နဒဒှ်ဗော်ပရေၚ်ဍုၚ်ကွာန်ပုဟ်ဟီုတှ်ေ လကြဴ သွက်ဂွံဆက်ကၠောန်အာ ပရေၚ်ချဳဒရာၚ် ပရေၚ်ဍုၚ်ကွာန်ဗီုပြၚ်လဵု နွံရော။
နူစဒက်ပ္တန်ဗော်ပရေၚ်ဍုၚ်ကွာန်ဟီုဂှ်တှ်ေ ပိုဲဒးလုပ်ပေါဲရုဲမာဲဏောၚ်။ ဒးလုပ် ပ္ဍဲပရေၚ်ဍုၚ်ကွာန်ကၠတ်ထဝ်ဏောၚ် ပါလုပ်တုဲတှ်ေ ဒးပျးဌာန် သၞောဝ်ဥပဒေ ဒှ်ဒတုဲဖိုလ် သွက်ညးဍုၚ်ကွာန်တအ်ဏောၚ်။ ပ္ဍဲကဵုသွာၚ်ပရေၚ်အုပ်ဓုပ်ဂှ် ဒးပါလုပ်ရီုဗၚ်ဏောၚ်ဟီုဂှ်တှ်ေ ဣဏံဂှ် အကာဲအရာကၠိုဟ်ကေတ်လဝ် သီုညးဖအိုတ်ရ။ ဆ္ဂး အတိုၚ်အကာဲအရာပရေၚ်ဍုၚ်ကွာန်ကၟိန်ဍုၚ်ပိုဲဏံ ဗော်ပရေၚ်ဍုၚ်ကွာန် ဟီုမွဲနဲပၠန်တှ်ေ ဗော်ပရေၚ်ဍုၚ်ကွာန် ဗ္ဒာဲဒလာဲကဵုပေါဲရုဲမာဲဟေၚ် ရေၚ်တၠုၚ်ကၠောန်ကဵု ပရေၚ်ဍုၚ်ကွာန်မာန်ဟွံသေၚ်။ နကဵုဂကောံ ဟွံလုပ်ပေါဲရုဲမာဲလေဝ် ပ္ဍဲကိစ္စပရေၚ်ဍုၚ်ကွာန် သွာၚ်လုပ်ကၠောန်ဂွံ နွံဒၟံၚ်တၟာဂလိုၚ် သှ်ေဒၟံၚ်ဏီရ။ ကိစ္စလၟေၚ်ကမၠောန်ဒက်ပ္တန်ပရေၚ်ၜိုဟ်လလံကဵုဒှ် ပါလုပ် ပ္ဍဲကိစ္စရီုဗၚ်ညးဍုၚ်ကွာန်တိုက်ရိုက်ကဵုဒှ် သွက်ဂၠံၚ်တရဴအာဒၟံၚ် ဖေတ်ဒရေဝ်ကဵုဒဳမဝ်ကရေဇြဳ ကၟိန်ဍုၚ်ပိုဲ နွံဒၟံၚ်ပၟိက်ဂှ် ပ္ဍဲကမၠောန်သ္ပသုတေသနကဵုဒှ် ကၠောန်သ္ပ သၠဲသၠဲလးလးမာန်မံၚ်ဏီရ။ ကိစ္စတအ်ဏံ ကၠောန်မာန်ဏောၚ်။ သွက်ဂွံကၠောန်လေဝ် ပၟိက်နွံဒၟံၚ်ရ။ ကၠောန်ညးသ္ကအ်ဏောၚ် လပါ်အဲချပ်လဝ်ရ။
-လၟုဟ်တှ်ေ ဗော်ပရေၚ်ဍုၚ်ကွာန် ပတိုန်လဝ်စရၚ်စၟတ်သမ္တီ ပ္ဍဲကဝ်မယှေန်ကံၚ်ဇြဳပၞာန် ဗ္ဒာဲဒဵုကဵု (၃၀) ဗော်ယျ။ ဗော်တအ်ဏံဂှ် ပေါဲရုဲမာဲကၠုၚ်စိုပ်ဂတဏံ ဒှ်ပၞော်တိတ်ပရေၚ်ဍုၚ်ကွာန်ဏောၚ် ညးတအ်ညာတ်ကေတ်လဝ်ရ။ နကဵု SNLD ဗီုလဵုညာတ်ကေတ်ရော။
အရာဏံဂှ်တှ်ေ ဟိုတ်နူဒှ်တၚ်ဒုၚ်ဂိုၚ်ကေတ် မွဲလ္ပာ်တအ်ဂှ်ရ ပိုဲဟွံမိက်ပါ်ပါဲရ။ တၚ်ပတှ်ေလ္ပာ်ပိုဲဂှ်တှ်ေ တၞဟ်ခြာဒၟံၚ်ကဵု အရာဏံညိညရ။ ပေါဲရုဲမာဲပရေၚ်ဍုၚ်ကွာန် စကၠုၚ်လဝ် နူကဵု ၁၉၉၀ တေံဂှ် တုဲဒှ်အာ ပ္ဍဲကဵုမွဲၜါတ္ၚဲ မွဲၜါသၞာံဏံရ။ ဆ္ဂးဂှ် ကိစ္စတုဲဒှ်အာဂှ် ပ္ဍဲအရာကလေၚ်ပိုက်တမ်ဂၠာဲရိုဟ်လေဝ် ပရေၚ်အလဵုအသဳပြံၚ်သၠာဲ၊ ပရေၚ်ညးအုပ်ဓုပ်ပြံၚ်လှာဲ ၜိုတ်ဏံရ ပ္တဝ်ဒၟံၚ်က္ဍိုပ်။ ဝိုတ်စွံလဝ် အပြံၚ်သၠာဲသၞောတ် အပြံၚ်သၠာဲခေတ်ညးသ္ကအ်ရ။ တၚ်နွံပၟိက် သွက်ကၟိန်ဍုၚ်ဇေတ်တ်ဂှ် လ္တူနူပရေၚ်ပြံၚ်သၠာဲအလဵုအသဳဂှ် ပရေၚ်ပြံၚ်သၠာဲသၞောတ် ခေတ်ဂှ် သာတုဲ ဒးကဵုဖျုန်ဏောၚ်။ လုကဴဟွံစိုပ်လ္ပာ်ဂှ်ဏီတှ်ေ ပိုဲဒးဂေတ်သ္ပဝ်ဒၟံၚ်တုဲ ပၞာန်ပ္ဍဲဍုၚ်လေဝ် ညိၚ်ဟွံမာန်၊ ၜိုဟ်ဟွံမာန် တုဲဒှ်ဟွံမာန်မွဲသာ် ဂေတ်ဂေၚ်ဒၟံၚ်ဗီုဏံဂှ် ပိုဲဂွိၚ်ဖေက်ဒှ်ရ။ ဣဏံဂှ် တၚ်ဒှ်ဓဝိၚ်လ္ပာ်ပိုဲရ။
-လကြဴအိုတ်ဏံ နကဵု SNLD မုမိက်ဂွံဟီုဗ္ကန်ကဵု ကောန်ဗော်ကီု သီုကဵုညးထံက်ဂလာန်ဗော်တအ် ဂလာန်ပရိုၚ်ဗီုလဵုနွံရော။ ဗော် SNLD ဂှ် နူကဵုစဒက်ပ္တန်တေံဂှ် ပ္ဍဲလၟေၚ်ဂၠံၚ်တရဴ သွက်ဂွံဒက်ပ္တန်ကၟိန်ဍုၚ်ပံၚ်ကောံဖေတ်ဒရေဝ်ဇေတ်တ်ဂှ်ရ ဒတူလာၚ် ချဳဒရာၚ်ကၠုၚ်လဝ်ရ။ ဟီုတှ်ေ သွက်ကၟိန်ဍုၚ်ဖေတ်ဒရေဝ်ဒဳမဝ်ကရေဇြဳ ဂွံမံက်ဂတဝ်တိုန်ကၠုၚ် SNLD နွံဒၟံၚ်လၟိုန်ဏောၚ်။ နကဵုဗီုပြၚ်အယောၚ်အလာ ဗော်ပရေၚ်ဍုၚ်ကွာန်ဟွံသေၚ်မွဲသာ် နူကဵုလ္ပာ်မုက်လိက်ပရေၚ်ဍုၚ်ကွာန်မွဲလ္ပာ်တေံ ဒတူလာၚ်ဒၟံၚ် သွက်ညးဍုၚ်ကွာန်တအ် လၟိုန်ရဏောၚ်ဂှ် အဲမိက်ဂွံပ္တိုန်ထ္ၜးဏာရ။