မတ်မလီု၊ အဝ်ဂါတ် (၁၆)
ပ္ဍဲဆေၚ်ကၠေၚ်စက် နူအပ္ဍဲတွဵုရးဍုၚ်မန်တံ ဗွဲကြဴကၠေၚ်ပိုတ်အိုတ်တုဲ အခက်အခုဲသွက်ဂွံရာန်တံ မၞုံကၠုၚ်ဂှ်ရ ကမၠောန်အဇာဍောတ်၊ အဇာလဒေါဝ် SME တံ စဒေါအ်ဇူကၠုၚ်အိုတ်ဂှ် တၠကမၠောန် SME တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကမၠောန်အဇာဍောတ်၊ အဇာလဒေါဝ် SME တံဂှ်ဝွံ အပ္ဍဲကာလဒပ်ပၞာန်သီအဝဵု ပွိုၚ်မွဲသၞာံဘာ်ပြၚ် ဗွဲကြဴပၟတ်ဓာတ်လလဳ ဟွံမှာန်တံကဵု ၚုဟ်ကၠေၚ်စက် သၠုၚ်တိုန်ကၠုၚ် ကဵုဆဂှ်တုဲ ဟိုတ်နူအခက်အခုဲ ရာန်ဟွံဂွံတံဂှ်ရ ကမၠောန်တံ ဒးဒေါအ်ဇူကၠုၚ်အိုတ်ရ။
တၠကမၠောန် SME မွဲတၠဂှ် မ္ၚးနူရာန်ကၠေၚ်စက် ၜိုတ်နွံပၟိက်ဟွံဂွံဂှ် ဒၟါနူၚုဟ်ဖျာသၠုၚ်တိုန်ဒၟံၚ် ကဵုဆဂှ်ရ ကမၠောန်တံ ဒးဒေါအ်ဇူလဝ် ယာယဳရ။
“ပၟတ်ဂှ် ဟွံကၠုၚ်၊ ကၠေၚ်ဂှ် ဟွံမွဲဟီုတှ်ေ ဒှ်ဒဒိုက်အိုတ်၊ ဟွံပြေပြံၚ်အိုတ်ရ၊ ပၟတ်ဂှ် ပ္ဍဲလ္ပာ်အပိုၚ်အခြာဒေသကွတ်စက်ဏံတှ်ေ သာပရေံရ၊ ဍာံဍာံတေံ ၜိုန်ရလ္ပာ်တၞဟ်ဟ် လီုကီုလေဝ် လ္ပာ်ဒေသကွတ်စက် မကၠောန်ဒၟံၚ် ကမၠောန်ဇေတ်တ်တံ ထေက်ကဵုဒးမှာန်ရ၊ လ္ပာ်ဏံ ပၟတ်စက်ဂှ် ဗၚုဟ်ဟွံဂွံရ၊ ဗၚုဟ်စက်တုဲ ကၠောန်ဟီုဂှ် အိုတ်ဂၠိုၚ်နူ တွဵုတွဵုဏီ၊ တုဲတှ်ေ ကၠေၚ်ဂှ်လေဝ် ၜိုတ်နွံပၟိက် ဟွံဂွံပုဟ်၊ ဇၟာပ်လှုဲနွံလေဝ် ဟွံဂွံပုဟ်ဟီုတှ်ေ လ္ၚဵုဂှ် က္တဵုဒှ်အာ စဵုကဵု ဒးဒေါအ်ဇူထောံ ကမၠောန်တံ မွဲချိုန်ခဏရ၊ ညးလ္ၚဵုတံမ္ဂး စဵုကဵု ဒးဒေါအ်ထောံကမၠောန်ဂှ် ဒှ်အာအိုတ်ရ” သာ်ဝွံ သ္ဂးရ။
ကမၠောန် SME တံဝွံ ဟိုတ်နူရာန်ကၠေၚ်စက် ၜိုတ်နွံပၟိက် ဟွံဂွံဂှ်ကီု၊ အခိၚ်ဗွဲမလအ်လ ဒးမၚ်ရာန်ဒၟံၚ်ဂှ်ကီု၊ ဆေၚ်ကၠေၚ်လ္ၚဵုတံမ္ဂး ဟိုတ်နူသွံဒၟံၚ်ကဵု အပိုၚ်အခြာတံဂှ်ရ ဒးဆဵုဒၟံၚ် အခက်အိုတ်ရ။
တၠကမၠောန် SME မွဲတၠဂှ်လေဝ် အပ္ဍဲကာလဒပ်ပၞာန်သီအဝဵု ပွိုၚ်မွဲသၞာံဘာ်ပြၚ်ဂှ် ဒၟါနူအခက်အခုဲ ပၟတ်ဓာတ်လလဳ ဟွံမှာန်တံကဵု ရာန်ကၠေၚ်စက်ဟွံဂွံတံဂှ်ရ ပရေၚ်ဇီုကပိုက် လ္တူကမၠောန် SME တံဂှ် က္တဵုဒှ်ဒၟံၚ် ပရေံပရေံရ။
“လၟုဟ်ရဂှ် ဗ္ကန်ကၠေၚ်စက် ကဵုပဳပါဂှ် ဗ္ကန်ဟွံဂွံပုဟ်၊ ဗ္ကန်ဟွံဂွံပုဟ်ဟီုတှ်ေ ဗီုဏံရ အာရေၚ်ကေတ် ပ္ဍဲဆေၚ်တုဲ ဒးရာန်ဒၟံၚ်ဂှ် ခက်ခုဲဒၟံၚ်ရ၊ သွက်ကမၠောန် ဂွံဂေတ်ဂြိပ်ဟီုဂှ် ခက်ခုဲဂှ် ခက်ခုဲအာရ၊ ၚုဟ်ဂှ်တှ်ေ သၠုၚ်အာရ၊ အခိၚ်မိက်ဂွံဗ္ကန်လၟုဟ်လေဝ် ဂွံဟွံမာန်ပုဟ်၊ ပ္ဍဲဍေံတံ ကဵုဟွံမာန်ပုဟ်၊ အေဂှ်တှ်ေ အဏံ သွက်ဂွံပံက်အေန်ဂျေန်ဂှ် ရေၚ်တုဲ ဒးအာရာန်ဒၟံၚ်ရ၊ ၚုဟ်ဂှ်တှ်ေ တိုန်ဒၟံၚ်ကဵုဆရ၊ ပ္ဍဲကဵုရုၚ်ကမၠောန်တံဂှ်တှ်ေ ဒေါအ်ထောအ်လဝ် မွဲတဲကၠာရ” သာ်ဝွံ သ္ဂးရ။
အခိၚ်လၟုဟ် ဒၟါနူအခက်အခုဲ ကၠေၚ်ဓာတ်တုဲ ကမၠောန်အဇာဍောတ်၊ အဇာဒေါဝ် SME တံ ဗဒါဲကဝက်ပြၚ် ဒးဖအောန်ဖျေံကၠုၚ် ကမၠောန်တံတုဲ ဍာ်ဇမၠိၚ် ယဝ်ရဆဵုဂဗကၠုၚ်မ္ဂး ကမၠောန်သီုဖအိုတ် ဒေါအ်ဒေၚ်အာမာန်ရောၚ် တၠကမၠောန် SME တံ သ္ဂးအိုတ်ရ။
ပ္ဍဲတွဵုရးဍုၚ်မန်ဂှ် ကမၠောန်အဇာဍောတ်၊ အဇာဒေါဝ် SME အပံၚ် (၂၀၀၀၀) ပြၚ် နွံဒၟံၚ်တုဲ သၟာကမၠောန် ဗဒါဲဒလာဲ ဒတူလိုၚ်ဒၟံၚ် လ္တူကမၠောန်တံဏံ မၞုံဒၟံၚ် ဂၠိုၚ်ကဵုကိုဋ်ရ။
ဆ္ဂး ကမၠောန် SME တံဝွံ ဗွဲကြဴဒပ်ပၞာန်သီအဝဵုတုဲ သွက်ကမၠောန် ဆက်တုဲဂွံဒတူလိုၚ်ဂှ် ဒးဆေၚ်ဒၟံၚ်မုက်ကဵု အခက်အခုဲနာနာသာ်ရ။
ပရိုၚ်−သြၚ်လောန်တိုၚ်(မ်)