နျူဒေလဳ၊ အဝ်ဂါတ် (၁၆)
ကၟိန်ဍုၚ်အိန္ဒိယဝွံ ကၠုၚ်စိုပ် အပ္ဍဲပွိုၚ် (၂၅) သၞာံဂတဏံ ပ္ဍဲကဵုပရေၚ်စဵုဒၞါ၊ ပရေၚ်နဲကွတ်ပညာဒေတ်ဂျေတ်ဒဴ(လ်) ကေုာံ ပါဝါ နကဵုမူဝါဒ သ္ဂောံထံက်ပၚ်ကဵု ပရေၚ်ကၠောန်ပ္တိတ်အပ္ဍဲကၟိန်ဍုၚ်တံဂှ် ဒဒှ်ရရန်တၟံလဝ် ညံၚ်ဂွံဒှ်ကၠုၚ် ကၟိန်ဍုၚ်ဖောအ်ဗြေဝ်တုဲရောၚ် သာ်ဝွံ သ္ကိုပ်ဝန်ဇၞော် နရာန်ဒရာမဵုဒဳ ဟီုဂးလဝ်ဂလာန် ပ္ဍဲတ္ၚဲကောန်ဂကူ ဂိတုအဝ်ဂါတ် (၁၅) တေံရ။
တၞဟ်နသ္ဂောံပ္တိုန်ဂုဏ်စရာဲ တ္ၚဲဗၠးၜး မရနုက်ကဵု (၇၅) ဝါ မဂွံလဝ် ပရေၚ်သၠးပွး နူသၟဝ်တဲ ကိုဝ်လိုဝ်နဳဗျိတိၚ်ဂှ်တုဲ ပ္ဍဲမဟီုဂးဂလာန် နူကဵုဒပ်ယာဗ္ကေတ် မၞုံဒေလဳဂှ် မေဿတာမဵုဒဳဝွံ ညးသၟတ်ဂမၠိုၚ် သွက်ဂွံစွံတၚ်ရန်တၟံ ဇၞော်ဇၞော်ဂှ်ကဵု သွက်ဂွံထမံက်ဗဒှ် သၞာံခိုဟ်အိုတ်တံ သွက်ကၟိန်ဍုၚ်ဂှ် ဖ္တိုက်ဖ္အောဝ်လဝ်ရ။
“ပ္ဍဲမွဲအာယုက်ပိုယ် ကၠုၚ်စိုပ် အပ္ဍဲ (၂၅) သၞာံဏံ ဒးပြံၚ်လှာဲ အိန္ဒိယ ညံၚ်ဂွံဒှ် ဍုၚ်ဖောအ်ဗြေဝ်တုဲရောၚ်၊ ဣဏံဂှ် ဒှ်တၚ်သ္ဂုတ်သွာတ်ဇၞော်ဇၞော်မွဲတုဲ ပိုယ်တံ ၜိုတ်အစောန်နွံ ဒးကၠောန်ထေက်ရောၚ်” သာ်ဝွံ ဟီုဂးလဝ်ရ။
အိန္ဒိယဝွံ ပ္ဍဲဂၠးကဝ်ဏံ ဒှ်ကၟိန်ဍုၚ် ပရေၚ်ပိုန်ဒြပ်ဇၞော်အိုတ် မရနုက်ကဵုတြဴတုဲ ပရေၚ်ပိုန်ဒြပ်အိန္ဒိယဝွံ ပ္ဍဲသၞာံ ၂၀၅၀ တေံ အမေရိကာန် ကဵု ကြုက်တုဲမ္ဂး ဒှ်ကၠုၚ် ကၟိန်ဍုၚ်တတိယဇၞော်အိုတ်ဂၠးကဝ်မာန်ဂှ် ညးစိုန်သ္ကီုတံ သ္ဂးလဝ်ရ။
ဆ္ဂး အခိၚ်လၟုဟ် သြန်လုပ်မၞိဟ်မွဲ ပွဳပွူ (၂၀၀၀) အမေရိကာန်ဒဝ်ဠာဂှ်ဝွံ ယဝ်ရ ဒးပ္တောံၜတ်ကဵု ကၟိန်ဍုၚ်တောတက်တုဲတံမ္ဂး သဝ်ဒၟံၚ်ဏီဂှ် သ္ဂးရ။
အိန္ဒိယ သတီုလၟိဟ်မၞိဟ် ဗၞတ် (၁.၄) ဗဳလျာန်မၞုံဂှ်ဝွံ အပ္ဍဲသၞာံကၠုၚ်စိုပ်ဏံ နဒဒှ်ကၟိန်ဍုၚ်လၟိဟ်မၞိဟ်ဂၠိုၚ်အိုတ် ဂၠးကဝ် သွက်ဂွံၜက်တိုန်အာ ဍုၚ်ကြုက်ဂှ် မၞုံဒၟံၚ်ရ။
ကၟိန်ဍုၚ် ဗီုကဵုအမေရိကာန်တံဂှ် ညာတ်ဒၟံၚ်အိန္ဒိယ နဒဒှ်ကၟိန်ဍုၚ်အနာဂတ် မကော်ဆဴကဵု ပွမအုပ်ဓလီုကြုက် ပ္ဍဲအာယှ ကဵု မ္ၚးအာယှတံရ။
သမ္မတအမေရိကာန် ဂျဵုဗိုၚ်ဒေန်ဂှ် ဟီုဂးတဴဂလာန်မိပ်စိုတ် သွက်တ္ၚဲကောန်ဂကူ ဍုၚ်အိန္ဒိယဂှ်တုဲ ကၠုၚ်စိုပ်အပ္ဍဲသၞာံဂတဂတဏံ သွက်ဂွံသောၚ်ကလး တၚ်ကော်ဆဴဂၠးကဝ်တံဂှ် အမေရိကာန် ကဵု အိန္ဒိယတံဝွံ ဒဒှ်ရ ဒှ်” အဖဝ်မိတ် ဟွံမွဲဟွံတုဲ” တံရောၚ်ဂှ် ဟီုဂးလဝ်ရ။
Ref: The Straitstime