လ္ဂုၚ်၊ အဝ်ဂါတ် (၁၈)
ကံၚ်ဇြဳပၞာန်သီအဝဵုဂှ် ထပ်ဆဵုဂဗအာ ကဵုဂကောံရပ်လွဟ်ကောန်ဍုၚ်အရၚ် မသဳကၠဳလဝ် ပရေၚ်ၜိုဟ်လလမ် (၁၀) ဂကောံတံ ပၠန်ရောၚ်ဂှ် သ္ကိုပ်ပၞာန်ဇၞော် မေန်အံၚ်လှာၚ် ဟီုဂးလဝ် ပ္ဍဲဂိတုအဝ်ဂါတ် (၁၆) တေံရ။
က္ဍိုပ်သ္ကိုပ်ပၞာန်ဂှ် အပ္ဍဲဂိတုဏံ သွက်ဂွံထပ်ဆဵုဂဗ ကုဂကောံရပ်လွဟ်ကောန်ဍုၚ်အရၚ် (၁၀) ဂကောံမာန်ဂှ် ဒဒှ်ရဂ္စါန်ဒၟံၚ်ဂှ်ကီု၊ ယဝ်ရဆဵုဂဗတုဲမ္ဂး အပ္ဍဲဂိတုသေပ်တေမ်ဗာ သွက်ဂွံထ္ပက်စၟတ်တဲ ပရေၚ်ၜိုဟ်လလမ်မာန်ဂှ် ဂ္စါန်လွဳပရာအာရောၚ် သ္ဂးလဝ်ရ။
ညးမၞုံအခေါၚ်ဟီုဂး ဂကောံက္ဍိုက်ပ်လၟေၚ်ကမၠောန်ပရေၚ်ၜိုဟ်လလမ် PPST သ္ကိုပ်ဗိုလ်ဇၞော် သဝ်ကျဝ်ညောအ်ဂှ် လ္ပာ်ကံၚ်ဇြဳပၞာန် အပ္ဍဲဂိတုအဝ်ဂါတ်ဏံ သွက်ဂွံဆဵုဂဗ ကု EAOs တံဂှ် ကဵုကၠုၚ်ပရိုၚ်ဟွံမွဲဂှ်ရ ပရူပရာမသဳကၠဳအာတံဂှ် ဒစးဒုၚ်ပ္ညဳပ္ညပ်လဝ်ဟွံမွဲဏီရောၚ် သာ်ဝွံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဆ္ဂး ယဝ်ဆဵုဂဗကဵု ကံၚ်ဇြဳပၞာန်မ္ဂး သွက်ဂွံဆဵုဂဗကဵု ဂကောံရပ်လွဟ်ကောန်ဍုၚ်အရၚ်တံ မွဲအလန်ဓဝ်မာန် ဒဒှ်ရဂ္စါန်အာရောၚ်ဂှ်ကီု၊ ညံၚ်ဂွိုအ်ဒှ် အကာဲအရာ ဟိုတ်နူကံၚ်ဇြဳပၞာန်ကော်ဘိက်တုဲ မ္ဒးအာစိုပ်ဆဵုဂဗဂှ် ရေၚ်တၠုၚ်အာရောၚ် သ္ဂးရ။
“ပ္ဍဲဂိတုတုဲကၠုၚ်တေံတှ်ေ ပ္ဍဲကဵုကိစ္စ ကဵုလဝ်အမိၚ်ဂစိုတ် ကုပူဂဵုပန်တၠဂှ် အပ္ဍဲကၟိန်ဍုၚ်လေဝ် ပရေၚ်ဇီုကပိုက်တံ နွံဒၟံၚ်တၟာဂလိုၚ်ရ၊ ပ္ဍဲကၟိန်ဍုၚ်သ္အာၚ်လေဝ် နနဲသာ်ဏံကီုရ၊ ဟိုတ်ဂှ်ရ ပ္ဍဲကဵုအကာဲအရာ မဆဵုဂဗအာ မွဲဝါပၠန်ဂှ် ဒဵုကဵုဗၞတ်ဗ္ၜတ်မွဲမွဲ ဖဵုဍေံနွံဏောၚ်၊ ဗီုလဵုဒှ်ဒှ်ရ၊ အခိၚ်လၟုဟ် ဒဵုကဵုတ္ၚဲဏံဂှ် ပါဲနူဟီုဂးဏာလဝ် ပ္ဍဲကောံဓရီုတုဲ ဂကောံလဵုဂှ် ဆဵုတ္ၚဲလဵုရော ပွမကဵုပရိုၚ် ဗွဲမလုပ်သၞောဝ်သာ်ဏံလေဝ် ဟွံမွဲပုဟ်၊ ကော်ဘိက်လဝ်လေဝ် ဟွံမွဲပုဟ်၊ နကဵုပိုယ်တံ ပ္ဍဲကဵု PPST ဂှ် ယဝ်ရဆဵုဂဗညးသ္ကအ်မွဲဝါပၠန်မ္ဂး မွဲဂကောံတုဲမွဲဂကောံ ဟွံသေၚ် ညံၚ်ဂွံဒှ်အကာဲအရာ ပံၚ်ကောံတုဲ ဆဵုဂဗမာန်ဂှ်လေဝ် ဂ္စါန်ကၠောန်အာရောၚ်” သာ်ဝွံ ညးမၞုံအခေါၚ်ဟီုဂး PPST သ္ကိုပ်ဗိုလ်ဇၞော် သဝ်ကျဝ်ညောအ် သ္ဂးရ။
PPST မထ္ပက်လဝ်စၟတ်တဲဒေါအ်ပန်ပှော်ဂှ်ဝွံ ပြသၞာပရေၚ်ဍုၚ်ကွာန် ညံၚ်ဂွံသောၚ်ကလး နနဲပရေၚ်ဍုၚ်ကွာန်မာန် အကာဲအရာဏံမွဲ ဂွံမံက်ကၠုၚ်ဂှ်ကီု၊ ညံၚ်ဂွံဒှ် ပေါဲသဳကၠဳပရေၚ်ဍုၚ်ကွာန် ညးပါလုပ်ထေက်တံအိုဿီု ဂွံပါလုပ်အာဂှ် ဂ္စါန်အာရောၚ် တုဲကၠုၚ်ဂိတုဂျူလာၚ် (၆) တေံ လလောၚ်ပ္တိတ်လဝ်ရ။
ပ္ဍဲကဵုဂကောံဒေါအ်ပန်ပှော် မသဳကၠဳလဝ် ပရေၚ်ၜိုဟ်လလမ် ကဵုကံၚ်ဇြဳပၞာန်ဂှ် ဗော်ဗၠးၜးရခေၚ် (ALP)၊ ဒပ်ပၞာန်ဒတုဲဖဵုဒဳမဝ်ကရေဇြဳကရေၚ် (DKBA)၊ ကံၚ်ဇြဳပရေၚ်ၜိုဟ်လလမ်ကရေၚ် (KNU/KNLA-PC) ၊ ကံၚ်ဇြဳကလေၚ်ဒက်ပ္တန်ရးသေံ (RCSS) ၊ ဗော်သွးဒဳမဝ်ကရေတ်တေတ်လာဟူ (LDU)၊ ဌာန်ဂအုပ်ပရေၚ်ဗၠးၜး ကောန်ဂကူပအိုဝ် (PNLO) ကေုာံ ဗော်ဍုၚ်မန်တၟိ (NMSP) တံ ပါလုပ်ရ။
ပ္ဍဲကဵုဂကောံ ဟွံဂွံထ္ပက်စၟတ်တဲ ဒေါအ်ပန်ပှော်တံဂှ် ဒှ်ဂကောံမာၚ်လာ မဒှ်မဟာမိတ်ဒဳမဝ်ကရေတ်တေတ်ကောန်ဂကူ (NDAA)၊ ဗော်တောတက်ရးသေံ (SSPP) ကေုာံ ဒပ်ပၞာန်ပရေၚ်ညဳသၟဟ်ဍုၚ် “ဝ” (UWSA) တံရ။
ကုဂကောံရပ်လွဟ်ကောန်ဍုၚ်အရၚ် EAOs မသှ်ေဒၟံၚ် သွက်ဂွံသဳကၠဳပရေၚ်ၜိုဟ်လလမ် ကဵုကံၚ်ဇြဳပၞာန်တံဂှ် ၜိုန်ရကော်ဘိက်လဝ် အလန်ဒုတိယကီုလေဝ် ဂကောံကလေၚ်လဝ်ပရိုၚ် သွက်ဂွံတိုန်စိုပ်သဳကၠဳဂှ် ဟွံမွဲဏီရောၚ် ညးမၞုံအခေါၚ်ဟီုဂး ကံၚ်ဇြဳပၞာန် သ္ကိုပ်ပၞာန်ဇြဝ်မေန်ထောန် ဒုၚ်လဝ်ဝန် ပ္ဍဲဂိတုအဝ်ဂါတ် (၂၇) တုဲကၠုၚ်တေံရ။
ပရိုၚ်−သြၚ်လောန်တိုၚ်(မ်)