စကာရာမာန်တိုဝ်၊ ဨပရဴ ၁၈
စပ်ကဵုပရေၚ်အခေါန်ဖလှာ သမ္မတဒဝ်နေဝ်ထြာမ် မဗတးဗတန်ကၠုၚ် ပရေၚ်သွံရာန်ဗၞိက် အလုံဂၠးမွဲဂှ်တုဲ သ္ကိုပ်အုပ်ဓုပ် တွဵုရးဂဴလဳဝှဝ်နဳယျာ မၞုံယၟု ဂါဗေန် နျူသေန် စောဲကၠုၚ်လဝ်ဂဗုတ်တုဲ ဒှ်တၚ်ကော်ဆဴ ကုပရေၚ်အခေါန်ဖလှာဂှ်ရ။
ပရေၚ်တွဵုရးမွဲ မစောဲကၠုၚ်ဂဗုတ် အလန်ကိုပ်ကၠာအိုတ် စပ်ကဵုအခေါန်ဖလှာဏံဂှ်ဝွံ နကဵုထြာမ် ဂွံလလောၚ်ပ္တိတ် အမိၚ်တၟေၚ်ဂှ်တုဲ ကော်ဆဴလဝ် အခေါၚ်အဝဵု နွံပ္ဍဲညးရ။
တွဵုရးဂဴလဳဝှဝ်နဳယျာဝွံ လ္တူဂၠးတိဏံ ဒှ်တွဵုရး ပိုၚ်ပြဳလဝ်ပရေၚ်ပိုန်ဒြပ်ဇၞော်အိုတ် မရနုက်ကဵုပဉ္စပတုဲ ဇြဟတ်ပရေၚ်ပိုန်ဒြပ် ခိုဟ်နူကဵုဍုၚ်လ္ၚဵုတအ်ဂှ်ဝွံ ပ္ဍဲဍုၚ်အမေရိကာန်ဂှ် ဒှ်တွဵုရး ကၠောန်ပ္တိတ်ဗၞိက် ကေုာံ ကၠောန်ပ္တိတ်ဗၞိက် ပရေၚ်တဵုလွဳ ဂၠိုၚ်အိုတ်မွဲရ။
သ္ၚိဗု မဟီုကၠုၚ်လဝ် သွက်ဂွံဗ္တိုက်သရိုဟ် ပရေၚ်ဟွံသၟဟ်တး အပ္ဍဲပရေၚ်သွံရာန်ဗၞိက်နာနာတုဲ မစၞောန်ပျးလဝ်အခေါန်ဖလှာဂှ် တးပါဲလဝ် ပရေၚ်စောဲဂဗုတ်ဏံဂှ်တုဲ သွက်ဂွံဟံၚ်ပြာ် သွာၚ်ကမၠောန်အမေရိကာန်ဂှ် ဆက်ရပ်စပ်အာ အခေါၚ်အဝဵုကာတၟေၚ်ဏောၚ်ဂှ် ဟီုရ။
ပ္ဍဲကဵုပေါဲသောၚ်ကလးလိက်ပရိုၚ် မကၠောန်ဗဒှ်လဝ် ပ္ဍဲကမၠောန်ကၠောန်ပ္တိတ် (ဗာဒံစေ့) မဒှ်ဗၞိက်ပရေၚ်တဵုလွဳဇၞော်အိုတ် ပ္ဍဲတွဵုရးဂဴလဳဝှဝ်နဳယျာဂှ် ဒဒှ်ရသ္ကိုပ်အုပ်ဓုပ်တွဵုရး နျူသေန်ကဵု ဂအုပ်ညးရေၚ်တၠုၚ်ဂဗုတ် ရံက်ဗောန်တာတံ စောဲလဝ်ဂဗုတ်ဂှ် ဟီုလဝ်ရ။
နူဂိတုဂျာန္နဝါရဳတုဲကၠုၚ်တေံဂှ် အလဵုအသဳတွဵုရး ဂဴလဳဝှဝ်နဳယျာ မစောဲလဝ်ဂဗုတ် ၁၅ ဝါဂှ် ဟိုတ်နူထြာမ် ကံက်ကၠုၚ်အခေါန်ဂှ်တုဲ တွဵုရးညးတံ ဒးဒုၚ်ဇီုကပိုက် ဟွံဗဗွဲဓဝ်ပုဟ်ဂှ် ဟီုရ။
ပရေၚ်စၞောန်ပျးအခေါန်ဖလှာဂှ် နူကဵုကၠတ်ထဝ်ရ အခေါၚ်ကၠောန်နွံတုဲ နကဵုသမ္မတ စပ်ကဵုလလောၚ်ပ္တိတ်ဒၟံၚ် တၚ်လလောၚ်တြးအမိၚ်တၟေၚ်တံဂှ်တုဲ အလဵုအသဳဂဴလဳဝှဝ်နဳယျာ ပ္တိတ်လဝ်သၟာန်ရ။
Ref: BBC