မတ်မလီု၊ အဝ်ဂါတ် (၂၀)
ပ္ဍဲတွဵုရးဍုၚ်မန် အပ္ဍဲကာလဒပ်ပၞာန်သီအဝဵု ပွိုၚ်မွဲသၞာံပြၚ်ဂှ် ၚုဟ်သ္ၚု သၠုၚ်တိုန်ကၠုၚ် (၂) ပြၚ်ရောၚ် တၠကမၠောန်ပရေၚ်သွံရာန်သ္ၚုတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ၚုဟ်သ္ၚုဝွံ ကြဴနူဒပ်ပၞာန်သီအဝဵုတုဲ သ္ၚု (ပေါ်ဆန်) မွဲရိုက်ဂှ် နူ (၃၂၀၀၀) ဒ္ကေဝ် ၚုဟ်သၠုၚ်တိုန်ကၠုၚ် စဵုကဵု (၆၅၀၀၀) ဒ္ကေဝ်တုဲ သ္ၚု (ဧည့်မထ) သ္ၚုကြံၚ်ဂှ်လေဝ် မွဲရိုက် နူ (၂၅၀၀၀) ဒ္ကေဝ်ဂှ် ၚုဟ်သၠုၚ်တိုန်ကၠုၚ် စဵုကဵု (၄၅၀၀၀) ဒ္ကေဝ်ရ။
ၚုဟ်သ္ၚုဝွံ ဗွဲကြဴဒပ်ပၞာန်သီအဝဵုတုဲ ကပေါတ်တမ်ရိုဟ် သွက်ပရေၚ်တဵုလွဳတံ ၚုဟ်သၠုၚ်တိုန်ကၠုၚ်ကီု၊ ခရိတ်ပရေၚ်ပလံၚ်ဗစိုပ်တံ ကေုာံ ခရိတ်အိုတ်နာနာတံ သၠုၚ်တိုန်ဒၟံၚ် ကဵုဆဂှ်ရ ၚုဟ်က္ဍၚ်တိုန်ကၠုၚ်ကီုရ။
အခိၚ်လၟုဟ်ဂှ် ဒၟါနူသြောံသှ်ေ အောန်ဒၟံၚ်ဂှ်တုဲ ကြဴနူၚုဟ်သြောံ သၠုၚ်တိုန်ကၠုၚ်တုဲဂှ် ၚုဟ်သ္ၚုလေဝ် ဗက်တိုန်ကၠုၚ်ရဂှ် တၠကမၠောန်ပရေၚ်သွံရာန်သ္ၚုမွဲတၠ ဟီုရ။
“ၚုဟ်သြောံဂှ် ဟွံစှ်ေပုဟ်၊ ပ္ဍဲကၟာဝက်တှ်ေ ၚုဟ်သြောံ စဵုကဵု (၂၀) ကိုဋ်ဂးရ၊ နူကဵုကၟာဝက် ဂွံစိုပ်စက်ဏံဂှ် (၂၀) ကိုဋ်ပြၚ်အာရ၊ ၜိုတ် (၂၀) ကိုဋ်ကဵု (၆) ဠက် နွံရောၚ်၊ ဆ္ဂး ၚုဟ်ရာန်လၟုဟ်ဂှ် ဒးကလေၚ်သွံမ္ဂး သာအာတၟာဂလိုၚ်ရ၊ ပ္ဍဲသၟာဗ္ၚတံဂှ် သြောံဟွံမွဲစကွေံကွေံရ၊ ရဲလ္ဂုၚ်တံ သေဌဳလ္ၚဵုတံရ ရာန်လဝ်တုဲ အေဂှ်တှ်ေ ကဵုလ္ၚီ ကဵုဠက် နွံတှ်ေ နွံဏောၚ်၊ ပ္ဍဲသၟာဗ္ၚတံဂှ် ဟွံမွဲပုဟ်” သာ်ဝွံ သ္ဂးရ။
သ္အာၚ်နူဂှ်ပၠန် ပ္ဍဲအရာမဗုတ်သြောံတံဂှ်လေဝ် ဟွံဂွံပၟတ်ဓာတ်လလဳ လၟေၚ်ၚ်ဂှ်ရ ဒးသုၚ်စောဲဒၟံၚ် ကၠေၚ်စက်တံ အဓိကတုဲ အခက်အခုဲ ရာန်ကၠေၚ်စက် ၜိုတ်နွံပၟိက် ဟွံဂွံတံဂှ်ကဵု ၚုဟ်က္ဍၚ်တံဂှ်လေဝ် တၠကမၠောန်တံ ဒးဆေၚ်ဒၟံၚ်မုက်ရ။
ပ္ဍဲဗွဝ်ဖျာသ္ၚု အပ္ဍဲဍုၚ်ဂှ် ဒၟါနူၚုဟ်သ္ၚု ဆက်သၠုၚ်တိုန်ဒၟံၚ်ဂှ်ရ မၞိဟ်ရာန်ပကောံ စဵုကဵုဟွံမွဲ အောန်ကြဳကၠုၚ်တုဲ ပရေၚ်သွံရာန် ညိၚ်ဒၟံၚ်ရ။
တွဵုရးဍုၚ်မန်ဝွံ ဒှ်တွဵုရး တိဨက သြောံ (၇) ကိုဋ်ပြၚ်နွံတုဲ လၟေၚ်သၞာံ လၟိဟ်သ္ၚု အပံၚ်န (၄၃၀) ကိုဋ်ပြၚ် တိတ်ဒၟံၚ်ရ၊ သြောံမတိတ်ကၠုၚ်တံဂှ် ဗုတ်ထကးတုဲ ပလံၚ်ပ္တိုန်သွံတြးဒၟံၚ် ရးဒေသ ကေုာံ တွဵုရးလ္ၚဵုတံရ။
ပရိုၚ်−သြၚ်လောန်တိုၚ်(မ်)