ယှာတဝ်၊ အဝ်ဂါတ် (၂၂)
ဗ္ဒိုပ်ဖျေံသ္ဇိုၚ် ကံၚ်ဇြဳပၞာန် (၈) ဗ္ဒိုပ် နူအပ္ဍဲဍုၚ်ယှာတဝ် တွဵုရးကရေၚ်ဍာဲဂှ် ဂကောံဒပ်ပံၚ်ကောံ ဒပ်ပၞာန်ကရေၚ်ဍာဲတံ သီဂွံလဝ်ဂှ် Karenni Army Center-Kn.A.C လလောၚ်ပ္တိတ်လဝ်ရ။
ဗ္ဒိုပ်ဖျေံသ္ဇိုၚ်ကံၚ်ဇြဳပၞာန် လၟိဟ် ၅၃၅၀ (ဗ္ဒိုပ်တၚူသဵု) မပါလုပ် သီုကဵုဗ္ဒိုပ်ဖျေံသ္ဇိုၚ်ကံၚ်ဇြဳပၞာန် (၈) ဗ္ဒိုပ် နူအပ္ဍဲပွိုၚ်ဍုၚ်ယှာတဝ်တံဂှ် သီဂွံလဝ်ရောၚ် သာ်ဝွံ သ္ဂးလဝ်ရ။
ဗ္ဒိုပ်ဖျေံသ္ဇိုၚ်ကံၚ်ဇြဳပၞာန် လၟိဟ် (၅၃၅၀) (ဗ္ဒိုပ်တၚူသဵု) မၞုံပယျဵု သေံဇၞော်−ကယျာဂှ် ဒပ်ပၞာန်ကရေၚ်ဍာဲ ကဵု KNDF B17, B14 တံ ဗ္တိုက်သီလဝ် ဗွဲမစှ်ေကဵုသၞောတ်ဗျူဟာဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ကောန်ဒပ်ကံၚ်ဇြဳပၞာန် နူဗ္ဒိုပ်မသီဂွံလဝ်တံ ဂြိပ်တိတ်အာအိုတ်တုဲ စံၚ်ပလီုပလာ်လဝ် ဗ္ဒိုပ်တံဏံဂှ် ဂွံတီကေတ်ရ။
တုဲကၠုၚ် ဂိတုအဝ်ဂါတ် (၇) တေံ ကောန်ဒပ်ကံၚ်ဇြဳပၞာန် မတိတ်ကၠုၚ် နူဗ္ဒိုပ်တၚူသဵု ပွိုၚ်ဍုၚ်ယှာတဝ်ဂှ်ကဵု ဒပ်ပံၚ်ကောံ ဒပ်ပၞာန်ကရေၚ်ဍာဲ (KA), KNDF B12, B14, B17 တံဝွံ ပ္ဍဲဒၞါဲမွဲဒၞါဲ ပွိုၚ်ဍုၚ်ယှာတဝ်ဂှ် က္တဵုဒှ်လဝ် ပေါဲဗ္တိုက် (၃) ဝါတုဲ ပ္ဍဲဂိတုအဝ်ဂါတ် (၈) တေံဂှ်လေဝ် ဗ္ဒိုပ်ပေါန်ချံၚ်ကံၚ်ဇြဳပၞာန် လ္တူဂၠံၚ်ဇၞော် လွိုၚ်ကဝ်−ယှာတဝ်ဂှ် ဒပ်ပၞာန်ကရေၚ်ဍာဲကဵု ဂကောံဒပ်ပံၚ်ကောံတံ ဗ္တိုက်လဝ်တုဲ လ္ပာ်ဒပ်ကံၚ်ဇြဳပၞာန် (၁) တၠ ချိုတ်အာတုဲ ပွမဇီုကပိုက်တံ ဂၠိုၚ်လဝ်ဂှ် ဂွံတီကေတ်ရ။
သ္အာၚ်နူဂှ်ပၠန် ပ္ဍဲဂိတုအဝ်ဂါတ် (၉) တေံလေဝ် ပ္ဍဲပွိုၚ်ဍုၚ်ယှာတဝ်ဂှ် က္တဵုဒှ်လဝ် ပေါဲဗ္တိုက်ဇီုမုက် မွဲဝါတုဲ လ္ပာ်ကံၚ်ဇြဳပၞာန် (၇) တၠ ချိုတ်အာလဝ်ရ။
ပ္ဍဲကၟိန်ဍုၚ်ဗၟာ ဗွဲကြဴဒပ်ပၞာန်သီအဝဵုတုဲ ပ္ဍဲတွဵုရးကရေၚ်ဍာဲဂှ် ပေါဲဗ္တိုက်တံ က္တဵုဒှ်ဒၟံၚ်တုဲ ကံၚ်ဇြဳပၞာန်ဂှ် နကဵုဇြဟတ်ဂၠိုၚ်ၚ် ပ္ဍဲဗလးတိဏံဂှ် ထ္ပက်ဒၟံၚ်ပၞာန်တုဲ ပွမဗ္တိုက် ကဵုက္ၜၚ်ကျာတံဂှ်လေဝ် ကၠောန်သ္ပဒၟံၚ်ရ။
ပ္ဍဲတွဵုရးကရေၚ်ဍာဲဂှ် ဟိုတ်နူပေါဲဗ္တိုက် ဒပ်ကံၚ်ဇြဳပၞာန်ကဵု ဂကောံဒပ်စဵုဒၞါညးဒေသတံတုဲ လၟိဟ်ညးပါဲဒဴဘဲပၞာန် မၞုံဒၟံၚ် (၂) ကိုဋ်ပြၚ်တုဲ ဇွောံမစၞစ သွက်ညးပါဲဒဴဘဲပၞာန်တံလေဝ် နွံပၟိက်ဒၟံၚ် ကာမံက်တိုန်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်− Karenni Army Center-Kn.A.C