လ္တူလိက်ကသုက်တၚ်တုပ်စိုတ်ဒေါံပန်ပှော်အလုံကၟိန်ဍုၚ် NCA ဂှ် အကြာဂကောံရပ်လွဟ်ကောန်ဍုၚ်အရၚ် EAO ပါလုပ်ဒၟံၚ် ပ္ဍဲပၠန်ဂတးက္ညၚ်တအ်ကဵု ဂကောံရပ်လွဟ်ကောန်ဍုၚ်အရၚ် တိုန်စိုပ်သဳကၠဳဒၟံၚ်ပရေၚ်ၜိုဟ်လလံ ကံၚ်ဇြဳပၞာန်ကော်ဘိက်လဝ်တအ်ဂှ် ပရေၚ်လစွံစိုတ် တၞဟ်ခြာဒၟံၚ်ညးသ္ကအ် နွံရ။
ဗော်သွးကောန်ဂကူကရေၚ် KNU မဒှ်ဂကောံရပ်လွဟ်ကောန်ဍုၚ်အရၚ်ဝှ်ကြံၚ်ဂှ်မ္ဂး လိက်ကသုၚ် NCA ဂှ် ဟိုတ်နူကံၚ်ဇြဳပၞာန် ဖံၚ်ပ္ကဝ်လဝ်တုဲ လိက်ကသုက်လီုလာ်အာတုဲဂှ်ရ သွက်ဂွံဒ္ဂေတ်ဗက် ဟၟဲရပုဟ်ဂှ် တုဲကၠုၚ်မွဲၜါတ္ၚဲတေံ ဟီုပ္တိတ်လဝ် ဗွဲမလုပ်သၞောဝ်ရ။ ဟိုတ်ဂှ်ရ စပ်ကဵု လစွံစိုတ် PNLO လ္တူလိက်ကသုက် NCA ကီု၊ ပရေၚ်ကံၚ်ဇြဳပၞာန် ဒ္ဂေတ်ဗက်ဒၟံၚ် လ္တူတၚ်ပါလုပ် ပ္ဍဲလိက်ကသုက်ဂှ် နွံ ဟၟဲကီု၊ တၚ်ပျးဌာန်ပါလုပ်ဒၟံၚ် ပ္ဍဲလိက်ကသုက် NCA တအ်ကီုဂှ် ဆက်စၠောံသၟာန်လဝ်ကဵု နာယက ဗော်သွးဗၠးၜးကောန်ဂကူပအိုဝ် (PNLO) သ္ကိုပ်ဗိုလ်ဇၞော် ခွောန်ဥက္ကာရ။
၁။ ကၠာအိုတ်ဏံ KNU ဂှ်တှ်ေ ဟိုတ်နူကံၚ်ဇြဳပၞာန် ဖံက်ပ္ကဝ်လဝ် လိက်ကသုက် NCA ဂှ်ရ လိက်ကသုက်လီုလာ်အာတုဲဂှ်ရ သွက်ဂွံဒးဒ္ဂေတ်ဗက် ဟၟဲရပုဟ် ဟီုကၠုၚ်လဝ် နွံရ။ လ္တူဏံ ဗီုလဵုညာတ်ကေတ်ရော။
NCA ဂှ် ဒှ်လိက်ကသုက်လီုလာ်အာ ဟွံသေၚ်ပုဟ်။ ဒှ်လိက်စံၚ်ပရေၚ်ဍုၚ်ကွာန် လုပ်သၞောဝ် ကၠတ်ထဝ် သ္ပလဝ်ဒ္တန်ရ။ ၜိုတ်ဏံဓဝ်ရ မမိက်ကဵု မွဲမွဲ၊ မၞိဟ်မွဲမွဲ ဟီုတိုန်ဗက်ဂှ် ဒးလီုဏောၚ် မုဏောၚ်ဟွံသေၚ်ပုဟ်၊ မိက်ဂွံပ္တိတ်ပရဲပရေၚ်ဍုၚ်ကွာန် သုၚ်စောဲလဝ်ဓဝ်ရ။ အတိုၚ်ဂၠံၚ်တရဴသၞောဝ်ဥပဒေတှ်ေ ဗၠေတ်မှာဒၟံၚ်။ မၞိဟ်မွဲမွဲဂှ်တှ်ေ ဟီုဂး ဗၠးဗၠးၜးၜးရ။ ဟိုတ်နူဟီုဗီုဏံတုဲ ပရေၚ်ဇီုကပိုက်ဒးလ္တူ NCA မုလေဝ် ဟၟဲပုဟ်။ ပရေၚ်လုပ်သၞောဝ်ဂှ် နွံဒၟံၚ် အတိုၚ်ဍေံနွံဒၟံၚ်ဂှ်ရ။ ကိစ္စဏံ သွက်ဂွံဒးဟီုဂးဂၠိုၚ်ၚ် ဟၟဲပုဟ်။
၂။ တၚ်ဂၞၚ်ပါလုပ်ဒၟံၚ် ပ္ဍဲလိက်ကသုက် NCA ပျးဌာန်လဝ် ဒးစဵုဒၞာကဵု ကောန်အရာပ်တအ်ဏောၚ်ဂှ်ကဵု အကာဲအရာဒှ်ဒၟံၚ် ပ္ဍဲဗလးမုက်တိလၟုဟ်ဏံ တၞဟ်ခြာဒၟံၚ် နွံရ။ လ္တူဏံ မုမိက်ဂွံဟီု နွံရော။
ဒပ်ပၞာန်ဂှ် ကၠောန်ဒၟံၚ်ညံၚ်ဂွံထိၚ်ဒဝ် သီုအလုမ်မွဲဍုၚ်ဂှ်တှ်ေ ပိုဲဟီုဟွံမာန်ပုဟ်။ နကဵုခရိုၚ်လွိုၚ်လေန်၊ ခရိုၚ်တံၚ်ဂျဳ တွဵုရးဍုၚ်သေံ သ္ကုတ်သၠုၚ်ကျာပိုဲဂှ်တှ်ေ ၜိုတ်တြဴပွိုၚ်ဍုၚ်ဂှ် ဗီုပြၚ်ဂှ် ဟၟဲရပုဟ်။ ပ္ဍဲတိဍာ်ထ္ပက်လဝ်စၟတ်တဲ NCA ဂှ်လေဝ် ဗီုဏံဟၟဲပုဟ်၊ ပ္ဍဲဒေသပအိုဝ် ဟွံဂွံထ္ပက်လဝ်စၟတ်တဲ NCA လေဝ် ဗီုပြၚ်ဏံ ဟွံဆဵုလဝ်ပုဟ်။ ဆ္ဂးပ္ဍဲဒၞာဲတၞဟ် အလုံမွဲကၟိန်ဍုၚ် က္တဵုဒှ်ဒၟံၚ်ဂှ်တှ်ေ ပိုဲဟွံမိက်ဟီုပါ်ပါဲပုဟ်။ ဆ္ဂး ပ္ဍဲတိဍာ်ပိုဲဂှ်တှ်ေ စပ်ကဵုညးဍုၚ်ကွာန်တုဲ လုပ်စိုပ်ပလီုပလာ်ပလာပ်ပထုဲလဝ်ဗီုဂှ် ဟၟဲပုဟ်။ ဒၟာနူတိဍာ်ပဋိပက္ခ ဟွံသေၚ်ဂှ်ရလေဝ်။
၃။ တုဲမွဲပၠန်ဂှ် နကဵုဒပ်ရပ်လွဟ် ပ္ဍဲလိက်ကသုက် NCA တအ်ဂှ် စပ်ကဵုအခေါၚ်အာကၠုၚ်ဗၠးၜးတုဲ ဗီုပြၚ်လဵု ပျးဌာန်လဝ်နွံကီုရော။
ဂကောံထ္ပက်လဝ်စၟတ်တဲ ပ္ဍဲ NCA ပိုဲတအ်ကဵုဒှ်၊ သီုဒပ်ပၞာန်ရ။ ကောန်ဍုၚ်အရၚ်သီုဖအိုတ်ဂှ် ယဝ်ရလုပ်တိတ် အာကၠုၚ် ပ္ဍဲတိဍာ်ထိၚ်ဒဝ်တအ်ဏောၚ်တှ်ေ ဒးပရဟ်ဒုၚ် ကဵုလဝ်ပရိုၚ် ပ္ညဳပ္ညပ်ၜါလ္ပာ်တုဲ သွက်ဂွံအာကၠုၚ်ဟီုဂှ် ပျးဌာန်လဝ် နွံရ။ ဣဏံဂှ် ဗွဲမဂၠိုၚ်တှ်ေ အကြာမွဲဂကောံကဵု မွဲဂကောံ။ ကဵုပရိုၚ်တုဲ အာကၠုၚ်ဂှ်တှ်ေ ဒှ်ဗီုပြၚ် ပိုဲဒ္ဂေတ်ဗက် NCA ရ။ စှ်လှ်ေမွဲလှ်ေ ဟွံဒ္ဂေတ်ဗက်လိက်ကသုက် NCA လေဝ် နွံရ။ ဒပ်ပၞာန်လေဝ် လဆောဝ်တှ်ေ ဟွံဒ္ဂေတ်ဗက်ပုဟ်။ ဗီုဂှ်ကီုရ ပ္ဍဲကဵုဂကောံထ္ပက်လဝ်စၟတ်တဲ NCA လေဝ် ကမၠောန်ပြဝ ဟွံဒ္ဂေတ်ဗက်တအ် နွံဒၟံၚ်ရ။ တိဍာ်ဇကု၊ တိဍာ်ဍေံ ဟွံကၠးဖ္ဍးတုဲ ပြဒ္ဒညာဒှ်ကၠုၚ်လေပ်လေဝ် နွံရ။ ဆ္ဂး ပြဒ္ဒညာဍာ်ဇမၠိၚ် ဟွံသေၚ်ပုဟ်။ ဒှ်ဒၟံၚ်လၟိုန်လေဝ် ဟွံသေၚ်ပုဟ်။ ဒှ်ကိစ္စချပ်ဂၞန်သဳကၠဳသီုၜါလ္ပာ် ဂွံဒၟံၚ်ရ။
၄။ ပ္ဍဲတိဍာ်ထိၚ်ဒဝ် ဂကောံမွဲမွဲလ္ပာ်ဂှ် လ္တူအာကၠုၚ်ကဵုယူနဳဖောၚ်ပၞာန်ပေၚ်ၚ် ဗီုလဵုညာတ်ကေတ်ရော။ လ္တူဏံ သဳကၠဳထ္ၜးကဵုညိ။
ပ္ဍဲဏံဂှ် ဣလဵု တိဍာ်ထိၚ်ရောဟီုဂှ် ဣလဵုရောဟီုတုဲ ပရေၚ်ကယျာန်ဓဝါတ် နွံဒၟံၚ် ညိညဇြိုၚ်သာရ။ လ္ၚဵုဂှ်လေဝ် ဇၟာပ်ဒၞာဲဒေါံလဝ်ပန်ပှော် အာကၠုၚ် ဂွံဒၟံၚ်ဏောၚ်ထေၚ် ဒၟံၚ်ညးသ္ကအ်ရ။ ဇေတ်တ်တေံဂှ် ဟိုတ်နူဒေါံပန်ပှော်တုဲ ပ္ဍဲဒၞာဲပိုၚ်ခြာလဝ်ဂှ် ပ္ညဳပ္ညပ်လဝ် သီုၜါလ္ပာ်နွံရ။ ဗွဲတၟေၚ်တှ်ေ ပ္ဍဲအခိၚ်ထ္ပက်စၟတ်တဲကဵု အလဵုအသဳတွဵုရးဂှ် တၚ်အပိုၚ်အခြာတိဍာ် ပါလုပ်ဒၟံၚ်ရ။ တိဍာ်ပါလုပ်ဒၟံၚ် ပ္ဍဲလိက်ကသုက်ပိုၚ်ခြာလဝ်ဂှ် ညးဂှ်လေဝ် ဟွံဟီုတးပါဲကယျာန်ဓဝါတ်ပုဟ်။ ပ္ဍဲကဵုတိဍာ်ဂှ်တှ်ေ ကၠောန်အတိုၚ်ဏံ ဂွံဒၟံၚ်ရ။ ယဝ်စိုပ်အာမ္ၚးဗွိုၚ်တိဍာ် ပါလုပ်ဒၟံၚ် ပ္ဍဲလိက်ကသုက်ဂှ်တှ်ေ ဒၞာဲဏံ ပရေၚ်ကယျာန်ဓဝါတ် နွံဒၟံၚ်ရ။ ဟိုတ်ဂှ်ရ ဂကောံဟွံကၠောန်လဝ်လိက်ကသုက်တိဍာ် ချိုတ်တ်ပၠိုတ်တ်ဂှ်တှ်ေ ပြဒ္ဒညာဒှ်ကၠုၚ်လေပ်ရ။
၅။ အလန်လကြဴအိုတ်ဏံ ပ္ဍဲဒေသ PNLO အုပ်ဓုပ်ထိၚ်ဒဝ်လဝ်ဂှ် ပရေၚ်ဂေတ်ကၚ်ဂီုကၠီု နွံဒၟံၚ်ဟာ၊ ယဝ်နွံတှ်ေ ဗီုပြၚ်လဵု ရေၚ်တၠုၚ်ဒၟံၚ်ရော။ ကၠောန်ဒၟံၚ် ပ္ဍဲဒေသထိၚ်ဒဝ် သက်က်ရဟာ၊ တုဲပၠန်ကေတ်လဝ်တၚ်တုပ်စိုတ်ကဵုဒပ်ပၞာန် ဗီုပြၚ်လဵုနွံရော။
နွံဒၟံၚ်ရ။ ဗွဲတၟေၚ်တၟေၚ် ပ္ဍဲဒေသဗဟဵုသၟးဟွံသေၚ် ပ္ဍဲပယျဵုဒၞက်တအ်ရ။ ပ္ဍဲပယျဵုဒၞက်ပိုၚ်ခြာလဝ်ဂှ် ဂကောံရပ်လွဟ် ဟွံတီယၟုတအ်လေဝ် ဂၠိုၚ်ဒၟံၚ်ဂှ်ရ ညးဂှ်လုပ်၊ ညးဂှ်တိတ်၊ ယဝ်ရရေၚ်တၠုၚ်ကိစ္စ ဒှ်လျိုၚ်ဝန် လ္တူညးဍုၚ်ကွာန်တအ်ဏောၚ်တှ်ေ တာဒၞာဒၟံၚ်ရ။ ဂေတ်ဒၟံၚ်ကၚ်လေဝ် နွံဒၟံၚ်။ ဂေတ်ကၚ် ပ္ဍဲဗွိုၚ်ပယျဵုဒၞက်တိဍာ်တုဲ ဒးစဵုဒၞာဒၟံၚ်ညးဍုၚ်ကွာန်တအ် နွံဒၟံၚ်ရ။ ဣဏံဂှ်လေဝ် ဒးစဵုဒၞာကဵု ညးဍုၚ်ကွာန်တအ်ဏောၚ်။ ပ္ဍဲ NCA လေဝ် ပါလုပ်ဒၟံၚ်ရ။