ပ္ဍဲရးဒေသတၞၚ်သြဳ ဇြဟတ်ဒစဵုဒစးပၠန်ဂတးခိုဟ်ဒၟံၚ်ဂှ် ပ္ဍဲမွဲကာလဒပ်ပၞာန်သီအဝဵု ပွိုၚ်ၜါသၞာံပြၚ်ပြၚ်ဏံ ဒပ်စဵုဒၞာညးဍုၚ်ကွာန်တအ်ဂှ် ကေတ်ကၠုၚ်ဒၞာဲ စိုပ်ကၠုၚ် စဵုကဵုဗွိုၚ်ဗ္ဒာဲဍုၚ်တုဲ ပေါဲဗတိုက်ဆေၚ်မုက် က္တဵုဒှ်ကၠုၚ်ဒၟံၚ်ကဵု ဒပ်စဵုဒၞာညးဍုၚ်ကွာန်တအ် ကၠေတ်ကၠုၚ်ဒၟံၚ်ရ။ အတိုၚ်ဂကောံသုတေသန ပ္ဍဲဒေသဂှ်မွဲဂကောံ ဟီုဂးလဝ်မ္ဂး ဒေသမၞုံရးဒေသတၞၚ်သြဳဗွဲမဂၠိုၚ်ဂှ် ဒပ်စဵုဒၞာညးဍုၚ်ကွာန်တအ် အုပ်ဓုပ်လဝ်မာန်တုဲ ဒပ်ကံၚ်ဇြဳပၞာန် ဒးဒုၚ်ဗတိုက်ဒၟံၚ် ခြာဟွံလအ်ဟွံလအ်ဂှ် ပြံၚ်သၠာဲကၠုၚ်ဗျူဟာပၞာန်ရဂှ် လလောၚ်တြးလဝ်ရ။
ဟိုတ်ဂှ်ရ စပ်ကဵုအကာဲအရာပရေၚ်ပၞာန် ပ္ဍဲရးဒေသတၞၚ်သြဳ ၜါလ္ပာ်ကီု၊ ပရေၚ်ဒပ်ကံၚ်ဇြဳပၞာန် ပြံၚ်သၠာဲကၠုၚ်ဗျူဟာပၞာန်ကီု၊ အကာဲအရာဒပ်စဵုဒၞာညးဍုၚ်ကွာန်တအ် ထိၚ်ဒဝ်အုပ်ဓုပ်တိဍာ်မာန်ကၠုၚ်တအ်တုဲ ဆက်စၠောံသၟာန်လဝ်ကဵု ညးတာလျိုၚ်ဒပ်စဵုဒၞာညးဍုၚ်ကွာန် (ပကဖ) ရးတၞၚ်သြဳ ကိုသတာရ။
၁။ ကၠာအိုတ်ဏံ စပ်ကဵုအကာဲအရာပၞာန် ရးဒေသတၞၚ်သြဳတုဲ ဟီုထ္ၜးကဵုညိ
ပြဟ်ဟ်ဏံ လ္ပာ်ခရိုၚ်ထဝါဲရ ပရေၚ်ချဳဒရာၚ် နွံဒၟံၚ်။ ခရိုၚ်ဗိက်ဂှ်တှ်ေ ပ္ဍဲပွိုၚ်ဍုၚ်ပလဝ်ဂှ် PDF တအ် ချဳဒရာၚ်ဒၟံၚ် ဒၞာဲကရပ်သ္ကုတ်ဂၠံၚ်ကၟိန်ဍုၚ်ဂှ် နွံရ။ ဒၞာဲဖျေံလဝ်ဗဒိုပ်နွံဒၟံၚ်တုဲ ပရေၚ်ချဳဒရာၚ်လ္ပာ်ဂှ် နွံဒၟံၚ်။ လ္ပာ်ဗုက်ပျေန်လေဝ် အတိုၚ်ဗီုတြေံရ။
၂။ သ္ကုတ်လကြဴဏံ လ္ပာ်ကံၚ်ဇြဳပၞာန် ထ္ပက်ကရောၚ်ပၞာန် နွံဒၟံၚ်ဏီဟာ။ ပေါဲဗတိုက်ရော ဆက်ဒှ်ဒၟံၚ် လ္ပာ်ဒၞာဲလဵုရော။
လ္ပာ်ဍေံတအ်ဂှ် တန်တဴကဵု ပရေၚ်ချဳဒရာၚ်လ္ပာ်ပိုဲတုဲ ဗီုပြၚ်ကလေၚ်ပၠန်တဲရ နွံ။ လ္ပာ်ထဝါဲလေဝ် ထ္ပက်ဒၟံၚ်ကရောၚ်ပၞာန် နွံ။ လ္ပာ်ပလဝ်ဟီုတှ်ေလေဝ် ဒၞာဲဍေံတအ်ထိၚ်ဒဝ်လဝ်ဂှ် သာတုဲကြပ်လုပ်ကၠုၚ်ဒၟံၚ်ဂှ်ရ လ္တူဂှ် လ္ပာ်ဍေံတအ် ဗီုပြၚ်ပလေဝ်ပလေတ်လဝ်တံဒပ် နွံရ။ လ္တူပရေၚ်ပိုဲချဳဒရာၚ်ဂှ် ဗက်တုဲ ဒှ်ဒၟံၚ်ဗီုပြၚ် က္လေၚ်ပၠန်ဒၟံၚ်တဲရ။
၃။ ဟီုတှ်ေ ဒၞာဲဒပ်စဵုဒၞာညးဍုၚ်ကွာန် PDF တအ် နွံဒၟံၚ်ဂှ် ထ္ပက်ကရောၚ်ပၞာန် ဗီုအခိၚ်ကၠာတေံဟွံမာန်ရပုဟ် ဒှ်ဒၟံၚ်ဗီုပြၚ်ဂှ်ဟာ။
ပ္ဍဲထဝါဲဂှ်တှ်ေ ထ္ပက်ဒၟံၚ်ဖိုဟ်ရ။ ပ္ဍဲခရိုၚ်သှ်ေနူဂှ် ဟၟဲပုဟ်။ ပ္ဍဲခရိုၚ်ကအ်သံၚ် ဟၟဲပုဟ်။ ဒၞာဲ PDF တအ် နွံဒၟံၚ်ဂှ်တှ်ေ ဍေံတအ်တီဒၟံၚ် တုဲတုဲရလေဝ်။ ဍေံတအ်ထ္ပက်ကရောၚ်ပၞာန်ဟီုဂှ် ယဝ်ဂၠံၚ်တရဴ VIP ပၟိက်ဇၞော်နွံတှ်ေ ယဝ်ကေတ် ပ္ဍဲဂၠံၚ်တှ်ေကေတ်ဏောၚ်။ ကၠုၚ်ကေတ်ကေတ်သက်က်ဂှ် ဟၟဲပုဟ်။ တုဲပၠန် ပရေၚ်သၠာဲပြံၚ်ဒပ် နွံဏောၚ်။ ဂိတုပလံၚ်ဇွောံမ နွံဏောၚ်။ ဗီုကဵုပ္ဍဲဂိတုဂှ်တှ်ေ ဍေံတအ်ထ္ပက်ကၠုၚ် ဗီုပြၚ်ကရောၚ်ပၞာန်ရ။ ဗီုပြၚ်ဗတိုက်ဗဒိုပ်တၞဟ်ခြာဂှ်တှ်ေ အောန်စှ်ေအာဂှ် နွံဒၟံၚ်ရ။
၄။ လ္တူလ္ပာ်ကံၚ်ဇြဳပၞာန်ပြံၚ်သၠာဲကၠုၚ်ဗျူဟာဂှ် ဗီုလဵုညာတ်ရော။ လ္တူဏံ သ္ၚဳဂၠိပ်ထ္ၜးကဵုညိ။
ပြံၚ်သၠာဲကၠုၚ်ဂှ်တှ်ေ ဇြဟတ်ဍေံတအ်ရ။ အဓိကဂှ် ဇြဟတ်ကံၚ်ဇြဳပၞာန် မၞုံပ္ဍဲရးဂှ်လေဝ် ပလံၚ်ဏာလဝ် ပ္ဍဲတွဵုရး ပရေၚ်ပၞာန်ကြံၚ်မ္ၚိုဟ်ဒၟံၚ် လ္တူနူပိုဲဂှ် နွံရ။ လ္ပာ်ဏံလေဝ် သ္ဂံၚ်ဗတိုက် ပၞာန်ဍေံတအ်ဂှ် နွံဆၜိုတ်လၟိဟ်ဓဝ်ရ။ ပ္ဍဲဗလးမုက်တိဇေတ်တ်ဂှ် ၜိုန်ရဇြဟတ်မၞိဟ်နွံကီုလေဝ် ဇြဟတ်ဗတိုက်ဂှ် အောန်စှ်ေအာကွေံကွေံယျ။ အခိၚ်ထ္ပက်ကၠုၚ်ကရောၚ်ပၞာန် ၜိုတ်ဂွံညာတ်ကေတ်လဝ်တှ်ေ ညးအယုက်ဇၞော်ဗျုတအ် ပါကၠုၚ်ဒၟံၚ် ဂွံဆဵုကေတ်လဝ်ဂှ်တှ်ေ လ္ပာ်ဂွံထ္ပက်ပၞာန်ဂှ် ဒဵုဂလိုၚ်ဂှ် ကၠောန်ဟွံမာန်ရပုဟ်။ လ္ပာ်ဍေံတအ် ဗီုပြၚ်ပလေဝ်ပလေတ်ကၠုၚ်ပၞာန်ဒုၚ်ဂှ် ဂွံဆဵုကေတ်ရ။
၅။ နကဵုဒပ်စဵုဒၞာညးဍုၚ်ကွာန်တအ် နကဵုဗျူဟာဗီုလဵု၊ နဲကဲဗျူဟာလဵု သွက်ဂွံဆက်လုပ်အာပေါဲဗတိုက် ပလေဝ်ပလေတ်လဝ်ရော။
တၚ်စဳမာန်ပိုဲ ပွိုၚ်မွဲသၞာံ နွံဒၟံၚ်ရ။ မဟာဗျူဟာဂှ် ကမၠောန်လုပ်ပေါဲဗတိုက် ဖျေံလဝ်သ္ဂုတ်သွာတ်တအ်ဂှ် နွံရ။ တအ်ဏံဂှ် ကၠောန်ဒၟံၚ်လၟိုန်ရ။ လ္ပာ်ပိုဲဂှ်တှ်ေ သွက်ဂွံတိုန်ဂတတေံရ နွံဒၟံၚ်။ ပြဟ်ဟ်ဏံ ပွိုၚ်ဍုၚ်လ္ၚဵုဂှ်တှ်ေ ပရေၚ်ပၞာန်ဂှ် ဟွံက္တဴပုဟ် ဒှ်ဒၟံၚ်ပကတိရဏောၚ်ဟီုကီုလေဝ် အာဒၟံၚ် အတိုၚ်တၚ်ရန်တၟံပၞာန်ပိုဲ လၟိုန်ရ။ ပ္ဍဲလ္ပာ်ပလဝ်လေဝ် ဍေံတအ်ပန်ဒၟံၚ်နွံရ။ ဍေံတအ်ပန်ဒၟံၚ် မွဲဒၞာဲဓဝ်ဟွံသေၚ်ပုဟ်။ ဗိုၚ်ကောံပန်ဒၟံၚ်လေဝ် နွံ။ လ္ပာ်တၞၚ်သြဳလေဝ် ဒုၚ်ပန်ဒၟံၚ် နွံ။ ဒုၚ်ပန်ဒၟံၚ် ပ္ဍဲဍုၚ်ဇၞော်ဂှ်တှ်ေ ပ္ဍဲပလဝ်ကဵု တၞၚ်သြဳနွံဒၟံၚ်ရ။ ပွိုၚ်ဍုၚ်သှ်ေနူဂှ်တှ်ေ ဒှ်စအောန်ဒၟံၚ်။ ပ္ဍဲလံၚ်လုၚ်တှ်ေ အာပန်ပန်ဒၟံၚ် စမြိုၚ်ဌာနဆေၚ်စပ်တအ် နွံရ။ ပ္ဍဲထဝါဲဂှ် သ္ၚိဒၟံၚ်ဝန်ဇၞော်တအ် စမြိုၚ်ကၠတ်ထဝ်တအ် အာပန်ပှ်ောဒၟံၚ်တအ်ဏံ နွံရ။
၆။ ပ္ဍဲအကာဲအရာဏံဂှ် လ္ပာ်ကံၚ်ဇြဳပၞာန် ဗီုပြၚ်လဵုကၠောန်ကၠုၚ်မာန် ညာတ်ကေတ်လဝ်ရော။ ကုတ်ဗပိုတ်ပန်ဂကူဂှ်ရော ကၠောန်ဒၟံၚ် ဗီုပြၚ်လဵုနွံရော။
လ္ပာ်ဍေံတအ်ဂှ် အတိုၚ်ပရေၚ်ပၞာန် ဟွံဂွံစေဝ်လ္တူရပုဟ်ဟီုတှ်ေ သာတုဲ တက်ပၠုပ်စိုတ်ဖေက် ပ္ဍဲညးဍုၚ်ကွာန်တအ်ဏောၚ်။ သာတုဲကၠောန်ကၠုၚ် ပရေၚ်ရပ်ဒက်၊ ပျဲပျာံပြိုက်ဂစိုတ်၊ ချဳဒရာၚ်ကၠုၚ်ဏောၚ်။ အကာဲအရာပၞော်တိတ်လ္ပာ်ဍေံဟၟဲ လၟုဟ်လေဝ် ကၠောန်ဒၟံၚ်ယျ။ အာဂတနူဏံတှ်ေ သာတုဲ အကာဲအရာသွက်ပရေံကၠုၚ် နွံရ။ တော်ကဵုဒေသကွာန်ရးတအ်တှ်ေ ဍေံတအ်သာတုဲ သ္ပကၠုၚ်ဂရုကဵုဍုၚ်ဇၞော်ရ။ ညးမံၚ်ဒၟံၚ်ပ္ဍဲဍုၚ်ဇၞော်တအ်ဂှ်တှ်ေ သ္ကုတ်လကြဴဏံ သာတုဲ အကာဲအရာ သွက်ဂွံကြေပ်ဂြတ်ကၠုၚ်နွံရ။ ပ္ဍဲလ္ပာ်ပလဝ်ဂှ်တှ်ေ ကောန်ကွာန်တအ်နွံဒၟံၚ်။ အတိုၚ်ပရေၚ်နွံပၟိက်ညးဍုၚ်ကွာန် ပ္ဍဲကွာန်တအ်ဂှ် ယဝ်နွံပၟိက်ကဵု ဇွောံမတအ်၊ သ္ၚုတအ်တှ်ေ သွာၚ်ပလံၚ်ဗစိုပ်ကပေါတ်ဗၞိက်ဂှ် ကောန်ကွာန်တအ်နွံဒၟံၚ်တုဲ ကုတ်ဗပိုတ်ထောံဏောၚ် ဟွံထေၚ်ပုဟ်။ အဓိကဂှ် ကုတ်ထပိုတ်ထောံ ဂၠံၚ်ထံက်ပလံၚ်ဍေံတအ်ဏောၚ်။ ဍေံတအ်ဂၠိုက်ဂၠာဲဓမံက်ပ္တိတ်ဒၟံၚ် လ္ပာ်ဂကောံဇြဟတ်ပၠန်ဂတးတအ် ဟွံဂွံ ညံၚ်ဂဂွံနွံရ။ ကၠောန်ကၠုၚ်ပရေၚ်ကေတ်အရေဝ်ကဵုဒုဟ်ဒဏ် နကဵုသံသယနွံဂှ် ဂွံဆဵုကၠုၚ်ရ။
၇။ အကာဲအရာဗတိုက်ကၠုၚ်ဍုၚ်ဇၞော်နွံဒၟံၚ်ဏောၚ်ဟီုတှ်ေ မုမိက်ဂွံဟီုကဵုညးဍုၚ်ကွာန် ပ္ဍဲဍုၚ်ဇၞော်တအ် နွံရော။
အဓိကဂှ် ပၟိက်ဇၞော်ဒၟံၚ်ပ္ဍဲပိုဲဂှ် တၚ်ဂၞၚ်ပရိုၚ်ရ။ ကံၚ်ဇြဳပၞာန်ဂှ် ပ္ဍဲဒေသဍေံတအ်ထိၚ်ဒဝ်လဝ်ဂှ် ဖန်ဇန်လဝ် စပ်ကဵုပရေၚ်ဂီုကၠီု နွံဒၟံၚ်ရ။ တအ်ဏံဂှ် ဒးတီလဝ် ဗွဲမဂတာပ်အခိၚ်ဏောၚ်။ ဇြဟတ်ဒပ်ဍေံတအ် နွံၜိုတ်လဵုရော၊ တုဲပၠန်အကာဲအရာတိဍာ်ရ။ တအ်ဏံဂှ် ဒးပတှ်ေလ္တူဇြဟတ်ညးဍုၚ်ကွာန် နွံဒေသဂှ် ကဵုပရိုၚ်ရ။ တအ်ဏံလေဝ် သာတုဲရေၚ်တၠုၚ်ကဵုဒၟံၚ် နွံရ။ ဗဒိုပ်ဒပ်ပၞာန် နွံကရပ်ညးတအ်လေဝ် နွံရ။ မၞိဟ်မံၚ်ဒၟံၚ် ဒၞာဲဗ္ဒာဲကရပ်ဂှ် ၜိုတ်သ္ပမာန် သွက်ဂွံပြံၚ်ဆုဲ ဒၞာဲဂီုကၠီု ပၟိက်ဇၞော်ဒၟံၚ်။ ၜိုတ်သ္ပမာန်ဂှ်တှ်ေ သွက်ဂွံမံၚ် ပ္ဍဲဒၞာဲသ္ၚောဲခြာနူဏံဂှ် အန္တရာယ်အောန်အိုတ်ရဂှ် မိက်ဂွံဟီုဏာရ။
၈။ အကာဲအရာဒပ်ပၞာန်လၟုဟ်ဏံ နဒဒှ်အလန်လကြဴအိုတ် မုမိက်ဂွံဟီုကဵု ညးဍုၚ်ကွာန်တအ် နွံရော။
လ္ပာ်ထဝါဲ ဗိုလ်ဇၞော်ဒးဒၟံၚ်တာလျိုၚ် ပ္ဍဲကွာန်ပကာရဳမွဲတၠဂှ် ကော်ကောံဓရီုလဝ်ရ။ PDF နွံဒၟံၚ်ပ္ဍဲပကာရဳဂှ် တီဒၟံၚ်ရ။ PDF တအ်ဂှ် ဟွံရပ်လွဟ်တုဲ အာကၠုၚ်ကဵု ကယျိုၚ်ကောန်အရာပ် ဂွံဒၟံၚ်။ အဓိကဂှ် ပန်ပှော်ဍေံတအ်ရ၊ ဟွံဂၠာဲပြဒ္ဒညာတုဲ ကောန်ကွာန်တအ်လေဝ် လ္ပဖေက်လကိုတ်တုဲ စဴကၠုၚ်က္လေၚ်မံၚ် ဒၞာဲဇကု ဂွံဒၟံၚ်။ အဓိကဂှ် ဟီုကဵု PDF တအ်မွဲတဲ။ လ္ပကၠုၚ်ဗတိုက်ဍေံတအ်ဟီုတုဲ ကော်လဝ်ကောံဓရီု နွံရ။ စိုတ်ဖေက် ပ္ဍဲဍေံတအ် နွံဒၟံၚ်။ ဒေါံဟွံဂွံ ဒးတိတ်ဒၟံၚ်ပေါဲဗတိုက်ဂှ် နွံရ။ အဓိကဂှ်လ္ပကၠုၚ်ဗတိုက်ဍေံတအ်ကီု PDF တအ်လေဝ် အာကၠုၚ်ကဵု ကယိုၚ်ကောန်အရာပ်ဗၠးဗၠးၜးၜး ဂွံဂွံမံၚ်။ မံၚ်ညးသ္ကအ်ၜိုဟ်ဟ်သြိုဟ်ဟ်စိုအ် ဟီုကၠုၚ်လဝ်နွံရ။
အဓိကဂှ်အလုံမွဲကၟိန်ဍုၚ် မုက်ပၞာန်ဂှ် ပံက်ဒၟံၚ်သီုဖအိုတ် ဟီုဂွံဒၟံၚ်ဂှ်ရ ပ္ဍဲဍေံတအ် တိတ်ကၠုၚ်နူဗဒိုပ်ဗက်ဂှ် စိုပ်အာတိဍာ်သၞဟဂှ်ရ။ ဇၟာပ်ပ်ဒၞာဲ မုက်ပၞာန်ပၠန်ဂတးဒစဵုဒစးကဵုဍေံတအ် နွံဒၟံၚ် ဗွဲမဂၠိုၚ်ရ။ ပရေၚ်ဂီုကၠီုဍေံတအ်ဟၟဲရပုဟ်။ ဇြဟတ်ဍေံတအ်လေဝ် အောန်စှ်ေကၠုၚ်ဒၟံၚ် ကွေံကွေံယျ။ လ္ပာ်စိုတ်ဓာတ်လေဝ် စှ်ေကၠုၚ်တုဲ ဟွံမိက်ဗတိုက်ပၞာန်ရပုဟ်။ ဍေံတအ်မိက်ဂွံဂွံဒၟံၚ်ပရေၚ်ၜိုဟ်လလံ ပြဟ်ဟ်မွဲဂှ် စိုပ်ဒၟံၚ်အကာဲအရာဏံတုဲ သွာၚ်စိုတ်ဓာတ်ကီု၊ အတိုၚ်ပရေၚ်ကောံကလောံကီု ဆုတ်စှ်ေဒၟံၚ်ကွေံကွေံတုဲ လ္ပာ်ပရေၚ်ဗတိုက်ပၞာန် ဍေံတအ်စိုတ်ဟွံထတ်ရပုဟ် ဂွံဆဵုကၠုၚ်ဒၟံၚ်ဗွဲမဂၠိုၚ်ရ။