သၟာကမၠောန်ဆုဲပြံၚ် ကောန်ဍုၚ်ဗၟာတအ်ဂှ် ကြဴနူဒပ်ပၞာန်သီအဝဵုတုဲ အခေါၚ်ကမၠောန် အောန်ကြဳကၠုၚ်ကီု၊ ဟိုတ်နူပရေၚ်ဍုၚ်ကွာန် ဟွံညိၚ်ဝတ်ကီု သွက်ဂွံက္လိဂွံ အခေါၚ်အရာကမၠောန်ဂှ် မ္ၚးနူဂၠံၚ်လုပ်သၞောဝ်တုဲ ပရေၚ်တတ်ကၠောံပယျဵုဒၞက် လုပ်စိုပ်ဒၟံၚ် ဍုၚ်သေံ ဆက်နွံကၠုၚ်ရ။ သၟာကမၠောန် စိုပ်အာကၟိန်ဍုၚ်သေံတအ်ဂှ် ဟိုတ်နူဒးဒုၚ်ဖံက်ပ္ကဝ် အခေါၚ်အရာသၟာကမၠောန်ကီု၊ ဒးဒုၚ်ရေက်ကး သြန်ဂိတုကီု၊ ဟိုတ်နူပရေၚ်လုပ်စိုပ်ကၠုၚ် ဟွံလုပ်ကဵုသၞောဝ်ကီုတုဲ ဒးဒုၚ်ရပ်ဒၟံၚ် ခြာဟွံလအ်ဟွံလအ်ရ။
ဟိုတ်ဂှ်ရ စပ်ကဵုအခက်ခုဲသၟာကမၠောန်ဆုဲပြံၚ် ကောန်ကၟိန်ဍုၚ်ဗၟာတအ် ဒးဆေၚ်ဒၟံၚ်မုက် ပ္ဍဲဍုသေံကီု၊ ပရေၚ်ကံၚ်ဇြဳပၞာန် ရီုဗၚ်ကဵုလဝ်ကီု၊ အပြံၚ်သၠာဲဝန်ဇၞော်သေံဂှ် ကောန်ကမၠောန်ဆုဲပြံၚ်ကၟိန်ဍုၚ်ဗၟာတအ် မုဂွံစၟဳစဂွံရောကီုတအ်ဂှ်တုဲ ဆက်စၠောံသၟာန်လဝ်ကဵု ဒါရိုက်တာရေၚ်တၠုၚ်ဖိုလ် ဖံၚ်ဒေယှေန်ပရေၚ်ပညာ ကေုာံပရေၚ်ဖောအ်ဗြေဝ်တဴတက် ရေၚ်တၠုၚ်ကဵုဒၟံၚ်ရီုဗၚ် ပွိုၚ် (၂၀)သၞာံပြၚ် ဥူထူချေတ်ရ။
၁။ ကၠာအိုတ်ဏံ ပ္ဍဲဍုၚ်သေံဂှ် သၟာကမၠောန်ဆုဲပြံၚ်ကောန်ဍုၚ်ဗၟာတအ် ဒးဆေၚ်ဒၟံၚ်မုက်ကဵု အခက်ခုဲ ဗီုပြၚ်လဵုနွံရော။ နအ္စာတအ် ဗီုပြၚ်လဵု ကၠောန်ကဵုဒၟံၚ်ပရေၚ်ရီုဗၚ်သောၚ်ကလး နွံဒၟံၚ်ရော။
အဓိကဂှ် အခိၚ်ဒပ်ပၞာန်သီအဝဵု ၂၀၂၁ ဂှ် သၟာကမၠောန်ဆုဲပြံၚ် ကောန်ဍုၚ်ဗၟာတအ် ဂၠိုၚ်နူအခိၚ်အရိုဟ်ဟ်တွဵုရ။ ပြဒ္ဒညာ သာနွံကၠုၚ်ဂှ်တှ်ေ ညးတအ်သၟးဟွံသေၚ်ပုဟ်။ သီုကဵုဂကောံအိန်ထံၚ် ညးတအ် ကော်နၚ်လဝ် နွံရ။ ဒးပသောၚ်ဒၟံၚ်အဓိကဂှ်တှ်ေ ၁ – တၚ်ဂှ် ပြဿနာဒးဒုၚ်ဖံက်ပ္ကဝ်ဒၟံၚ် အခေါၚ်အရာသၟာကမၠောန်၊ ဒးဒုၚ်ဖံက်ပ္ကဝ်ဒၟံၚ် အခေါၚ်အရာမၞိဟ်တီတီဖိုဟ်ဂှ် အခိၚ်တေၚ်စိုပ်ဂှ် နကဵုအလဵုအသဳ ရေၚ်တၠုၚ်ကဵု ညံၚ်ဂွံစိုပ်တရဴဟွံမာန်တအ်၊ တုဲမွဲတၚ်ပၠန်ဂှ် သၟာကမၠောန်ဟွံလုပ်သၞောဝ် တၞးကာဒ်ဟၟဲတအ် သာဂၠိုၚ်ကၠုၚ်ဒၟံၚ်ဂှ် ဂွံညာတ်ကေတ်ရ လၟုဟ်ဏံဂှ်။
၂။ ပ္ဍဲအရာရီုဗၚ်ကဵု ပရေၚ်သၟာကမၠောန်ဆုဲပြံၚ် လက်ထက်အလဵုအသဳ NLD ကဵု လက်ထက်ကံၚ်ဇြဳပၞာန်ဂှ် ပရေၚ်တၞဟ်ခြာ ဗီုပြၚ်လဵုနွံရော။
ပရေၚ်ဆဵုဂဗပိုဲဂှ် ဟွံဗက်မုက်တုဲ ယဝ်ဒးဟီုတှ်ေ အလဵုအသဳလဵုဒှ်ဒှ် ပ္ဍဲအရာရေၚ်တၠုၚ် ကဵုရီုဗၚ်ပရေၚ်သၟာကမၠောန်ဂှ် ဇြဟတ်ဍိုန်ဒၟံၚ်ရ။ သာတုဲ ပၟိက်ဇၞော်ဒၟံၚ်ဂှ် ပရေၚ်ပလေဝ်ပလေတ်သၞောတ်စှ်ေစှ်ေ ရီုဗၚ်ကဵုလဝ် ဟွံသေၚ်ဂှ်ရ ယဝ်ဒးပ္တဝ်ကဵု သၞာဲဒဴကလုတ် ကၟိန်ဍုၚ်တၞဟ်တှ်ေ သၞာဲဒဴကလုတ်ရေၚ်တၠုၚ်ကဵုဒၟံၚ် အရီုဗၚ်ပရေၚ်သၟာကမၠောန်ဆုဲပြံၚ်ကောန်ဍုၚ်ဗၟာဂှ် ကၠောန်ကဵု ညံၚ်ဂွံစိုပ်တရဴ ဟွံမာန်ဒၟံၚ်ဂှ် အဓိက ပိုဲဂွံညာတ်ကေတ်ဒၟံၚ် ဗွဲမဂၠိုၚ်ရ။
၃။ ဟိုတ်နူလုပ်စိုပ်ကၠုၚ် ဟွံလုပ်သၞောဝ်တုဲ သၟာကမၠောန်ဆုဲပြံၚ် ကောန်ဍုၚ်ဗၟာ ဒးဒုၚ်ရပ်ဒၟံၚ်တအ်ဂှ် ဗီုပြၚ်လဵု ရေၚ်တၠုၚ်ရီုဗၚ်ကဵုဒၟံၚ်ရော။
အဓိကဂှ် ပ္ဍဲကၟိန်ဍုၚ်ဗၟာလေဝ် စပ်ကဵုပရေၚ်သၟာကမၠောန်ဆုဲပြံၚ်တုဲ ရီုဗၚ်ရေၚ်တၠုၚ်ကဵုဒၟံၚ် နွံရ။ ဒးဒုၚ်ရပ်လဝ်တုဲ သၟာကမၠောန်က္လေၚ်အာ လ္ၚဵုဂှ်တှ်ေ ကၠာနူဟွံဂွံက္လေၚ်ပလံၚ်ဖျဴ ဍုၚ်ဗၟာဏီ ပ္ဍဲကဵုအချုက်ကောပ်ကာဲပရေၚ်မၞိဟ်လုပ်တိတ်တအ်၊ ဗ္ဒမ်အချုက်လဝကတအ်ဂှ် သၟာကမၠောန်ဍေံတအ်ဂၠိုၚ်တုဲ အခေါၚ်အရာထေက်ဂွံ ပ္ဍဲကဵုဗ္ဒမ်အချုက်ဂှ် ဟွံဂွံဒၟံၚ်ဂှ် ဂွံဆဵုကေတ်ရ။ ပ္ဍဲကဵုသၞာံတုဲကၠုၚ်တေံလေဝ် ပိုဲကၠောန်လဝ် စၟတ်သမ္တီ မွဲဏီရ။ ပြဿနာသၟာကမၠောန်ဆုဲပြံၚ်တအ် ဒးဆေၚ်ဒၟံၚ်မုက် ပ္ဍဲကဵုဗ္ဒမ်အချုက်ရလေဝ် တအ်ဏံဂှ် ဒှ်ပြဿနာ ဒးဆဵုဂဗဒၟံၚ်လၟိုန် ဟီုစဂွံရ။
၄။ သၟာကမၠောန်ုဆုဲပြံၚ်ကောန်ဍုၚ်ဗၟာတအ် အာကၠောန်ဒၟံၚ်ကမၠောန် နကဵုလိက်ကသုက် MOU တအ်လေဝ် ပ္ဍဲဍုၚ်သေံဂှ် ဒးဆဵုဂဗဒၟံၚ်ကဵု အခက်ခုဲဂၠိုၚ်ကဵုဂကူ ဂွံမိၚ်ကေတ်ဒၟံၚ်ရ။ မုဟိုတ် ဂွံဒှ်ဒၟံၚ် ဗီုဏံရော။
သၟာကမၠောန်ပလံၚ်ဗစိုပ်ဏာလဝ် နတၞးလိက်ကသုက်ပရေၚ်ကၠိုဟ်ခၠၚ် ၜါကၟိန်ဍုၚ်တအ်လေဝ်။ သၟာကမၠောန်ပလံၚ်ဗစိုပ်လဝ်ကဵု MOU တအ်ဂှ်လေဝ် ပလံၚ်ဗစိုပ်လဝ် နလိက်ကသုက်ပရေၚ်အလဵုအသဳၜါလ္ပာ် ကၠိုဟ်ခၠၚ်ဂှ်ရဟီုတှ်ေ သၟာကမၠောန်တအ်ဂှ် မုဟီုဟီုရ အတိုၚ်အခေါၚ်အရာညးတအ်ရ။ မိက်ဂွံဟီုဂှ်တှ်ေ ယဝ်ရဒးဟီု အခေါၚ်အရာလၟိုန်ဂှ်တှ်ေ အခေါၚ်အရာ ပိုဲမိက်ဂွံဂွံဒၟံၚ်ဂှ် အာတ်မိက်ဒၟံၚ် ဟွံသေၚ်ပုဟ်။ အခေါၚ်အရာသၟာကမၠောန် ပျးဌာန်လဝ် ပ္ဍဲဍုၚ်သေံ၊ အခေါၚ်အရာဒုၚ်စသိုၚ် ပရေၚ်ဖဲသ္အဳ၊ အခေါၚ်အရာဂွံဒုၚ်စသိုၚ်ၚုဟ်လေဲ တအ်ဏံဂှ် နအလဵုအသဳညးတအ်လေဝ် ချူဓဇက်လဝ် ချိုတ်တ်ပၠိုတ်တ် နွံရ။ သၟာကမၠောန်ပိုဲဂှ် အခေါၚ်အရာသၟာကမၠောန်သ္ဇိုၚ်တအ်ဓဝ် အခေါၚ်ဂွံဒုၚ်စသိုၚ် ဟၟဲပုဟ်။
သၟာကမၠောန် MOU တအ်ဂှ် ပရေၚ်အေဂျေန်ဂၠာဲကမၠောန်ဍုၚ်သ္အာၚ်တအ် ဗက်စအဂတိကီု၊ ပရေၚ်ဒးဒုၚ်ရေက်ကး ဟွံဗဗွဲဓဝ်ကီုတအ်ဂှ် သၟာကမၠောန်တအ် သာတုဲ ဒးဒုၚ်ဒၟံၚ်ရ။ မိက်ဂွံဟီုဂှ်တှ်ေ လၟုဟ်ဏံ ဂွံဆဵုဒၟံၚ်ရ။ လ္ၚဵုဂှ် အေဂျေန်သၟာကမၠောန်တအ်ဂှ် ပ္ဍဲဍုၚ်သေံလေဝ် ကမၠောန်ဟၟဲမွဲသာ် ကော်နၚ်သၟာကမၠောန် နူဍုၚ်ဗၟာရ။ သၟာကမၠောန်တအ်ဏံ ဟွံဂွံကမၠောန်ပုဟ်။ အာမံၚ်ထောံအတေံ မံၚ်ထောံအဏံ လကြဴအိုတ်ဂှ် ဒှ်အာကိစ္စ ဟွံလုပ်သၞောဝ် ဂွံညာတ်ကေတ်ဒၟံၚ်ရ။
ယဝ်ရဒှ်ကၠုၚ်ဗီုဏံတှ်ေလေဝ် နကဵုအလဵုအသဳဂှ် ရေၚ်တၠုၚ်ကဵု ညံၚ်ဂွံစိုပ်တရဴ ဟွံညာတ်ကေတ်ပုဟ်။ ကိစ္စဗီုတအ်ဏံတှ်ေ အလဵုအသဳကၠာတေံ ပိုၚ်ခြာလဝ်ၚုဟ်မးတအ် လၟုဟ်ဂှ် ပရေၚ်ပြံၚ်သၠာဲ နွံကၠုၚ်ဏောၚ်။ ဂွံဟီုချိုတ်တ်ပၠိုတ်တ်ဂှ် ဝါတ်ဒၟံၚ်။ စေဝ်ပၞောန်အလဵုအသဳဗၟာ ပျးဌာန်ကၠုၚ်လဝ် အဆက်က်ဂှ် အေဂျေန်ဂၠာဲကမၠောန်လ္ၚဵုဂှ် ဟွံဒ္ဂေတ်ဗက်ပုဟ်။ လၟုဟ်တှ်ေ ဍုၚ်ပိုဲဂှ် ဒှ်ဒၟံၚ်ဍုၚ် ဒှ်ပၞာန်ဂှ်ရလေဝ်။ သၟတ်ဗွဲမဂၠိုၚ် အခိၚ်ဂစာန်တိတ်ဒၟံၚ်ဍုၚ်မ္ၚးဂှ် လီဠာန်ဒၟံၚ် ဗီုပြၚ်ဏံရ။ ကဵုၚုဟ်မွဲချမွဲတာန်တုဲ ဒးကၠုၚ်ဒၟံၚ် ဍုၚ်သေံရ။
စိုပ်ကၠုၚ်ဍုၚ်သေံပၠန် အခိၚ်ဂၠာဲကမၠောန်ကၟိတ်ဂှ် ညးစအကြာတအ်ဂှ် ဟွံဂၠာဲကဵုကမၠောန်မွဲသာ်တုဲ ကေတ်ဏာလဝ်သြန်ရ။ တုဲမွဲပၠန်ဂှ် သၟာကမၠောန်လုပ်ကၠုၚ် အတိုၚ်သၞောဝ်လ္ၚဵုဂှ် ဒှ်အာဟွံလုပ်သၞောဝ်။ နကဵုအဲ သာတုဲ ဒးဒှ်ဓဝိၚ် ပ္ဍဲဍာ်ဇမၠိၚ်ရ။ မုဒှ်ရောတှ်ေ အကာဲအရာသၟာကမၠောန်ဆုဲပြံၚ် လောန်ကၠုၚ်ပန်၊ မသုန်တြဴသၞာံတုဲကၠုၚ်တေံကဵု သၟာကမၠောန်ဆုဲပြံၚ်လောန်ကၠုၚ်ၜါသၞာံ၊ ပိသၞာံတအ်ဂှ် တၞဟ်ခြာဒၟံၚ် ကွေံကွေံရ။ သၟာကမၠောန်ပလံၚ်ဗစိုပ်နၚ် နတၞးလိက်ကသုက်တုပ်စိုတ်ၜါကၟိန်ဍုၚ်တအ်ဂှ်လေဝ် ဒးကဵုအရီုဗၚ်သၞောတ်စှ်ေစှ်ေထေက်ဏောၚ် နကဵုအဲမိက်ဂွံဟီုဏာရ။
၅။ သၟာကမၠောန်ဆုဲပြံၚ် ဒးဒုၚ်ဆောံလေၚ်ဒၟံၚ်အခေါၚ်အရာသၟာကမၠောန်တအ် သွက်ဂွံက္လိဂွံပရေၚ်စဵုဒၞာသၞောဝ်ဥပဒေ မုဒးကၠောန်ထေက် ညာတ်ကေတ်ရော။ လ္တူဏံ သဳကၠဳကဵုညိပၠန်။
အလဵုသၟာကမၠောန်တအ်လေဝ် တာလျိုၚ်နွံဒၟံၚ်ရ။ ဣဏံဂှ် မွဲတၚ်။ ၜါတၚ်ဂှ်တှ်ေ ညံၚ်ဂွံစဵုဒၞာကဵုသၟာကမၠောန်တအ် အတိုၚ်ဂၠံၚ်တရဴ သၞောဝ်ဥပဒေမာန်ဂှ် သၞာဲဒဴကလုတ်အလဵုအသဳအဆက်က်ခါန်ကၞက်လဝ်တအ်ဂှ်လေဝ် သာတုဲ လျိုၚ်နွံဒၟံၚ်ရ။ ယဝ်ရဒးဟီုဥပမာတှ်ေ အခိၚ်ဒးဆက်စၠောံကဵု သၞာဲဒဴသၟာကမၠောန်တှ်ေ ကမ္ဘောဒဳယာတအ် ပြဟ်ဒၟံၚ်ကွေံကွေံဏောၚ်။ ဍေံတအ်ဒှ်တှ်ေ အခိၚ်ဟွံရုဲ အာရုၚ်စက်တအ်ဂှ်ရ။ သဳကၠဳကဵု တၠကမၠောန်တအ်။ ယဝ်နွံပၟိက်တှ်ေ အာတ်အရီုဗၚ် အလဵုအသဳသေံရ။ ပ္ဍဲကဵုဍုၚ်ပိုဲဂှ်တှ်ေ အရာဏံ တၚ်ဍိုန်လျနွံဒၟံၚ်ညာတ်ရ။ ယဝ်ရဒးဟီုကၠးကၠးတှ်ေ ပ္ဍဲပိုဲဂှ် အလဵုအသဳနွံဒၟံၚ်ၜါမွဲတဲ ယဝ်ရဒးဟီုကၠးကၠးတှ်ေ နူအလဵုအသဳလဵုလေဝ် ရီုဗၚ်ကဵုဟွံမာန်ပုဟ် ပိုဲညာတ်ကေတ်ရ။ ယဝ်ရီုဗၚ်ကဵု ပရေၚ်သၟာကမၠောန် သၞောတ်စှ်ေစှ်ေဏောၚ်တှ်ေ ပ္ဍဲအလဵုအသဳမဆေၚ်စပ်တအ် သာတုဲလျိုၚ်နွံဒၟံၚ်ရ။ မုဒှ်ရောတှ်ေ နကဵုဍုၚ်သေံလေဝ် ပရေၚ်အလဵုအသဳလုပ်သၞောဝ်တအ် ဟီုဂးသဳကၠဳဂှ် သာတုဲသ္ပဂရု ဒ္ဂေတ်ဗက်ရ။ ဟိုတ်ဂှ်ရ နကဵုမၞိဟ်ဟီုဂးလဝ် အလဵုအသဳတအ်ဂှ် ထေက်ကဵုဒးရီုဗၚ်သၟာကမၠောန်ဆုဲပြံၚ် ကောန်ဍုၚ်ဇကုထေက်ဏောၚ် နကဵုအဲမိက်ဂွံဟီုဏာရ။
၆။ အပြံၚ်သၠာဲဝန်ဇၞော်သေံဂှ် သွက်သၟာကမၠောန်ဆုဲပြံၚ်ပါလုပ်သီကောန်ဍုၚ်ဗၟာတအ် မုတၚ်သွက်ဂွံစၟဳစနွံမာန်ရော။
လၟုဟ်ဏံ ဒှ်ကၠုၚ်အလဵုအသဳရ Pheu Thaiလေဝ်။ ဗော် Pheu Thai ဂွံဇၞးကေတ်လဝ်မာဲလၟိဟ်ဂၠိုၚ်အိုတ်ဒုတိယလေဝ်။ ဇေတ်တ်တေံဂှ် ပရေၚ်ဍုၚ်ကွာန်သေံဂှ် စိုတ်လုပ်စဒၟံၚ်မမိက်ကဵုမွဲမွဲရ။ ဇၟာပ်ပ်ဂကောံကၠောန်ဒၟံၚ်ကမၠောန်ဆက်စပ် ပ္ဍဲဍုၚ်သေံတအ်ဂှ်တှ်ေ Pheu Thai ဂှ် ကၠာတေံ ယၟုဒယှ်ဒၟံၚ် ဗက်စဒၟံၚ်အဂတိရ။ လၟုဟ်လေဝ် ဗော်ပရေၚ်ဍုၚ်ကွာန်တက်ဇြေန် ဒးဒုၚ်ဒၟံၚ်ထံၚ် ၈ သၞာံရဏောၚ်ပိုဲကၠိုဟ်ကေတ်လဝ်ရ။ ပ္ဍဲကဵုဂဗုတ်စောဲစပ်လဝ် တက်ဇြေန်ဂှ်လေဝ် နူၜိုတ် ၂၀၀၄ အလဵုအသဳပၞာန်တုဲကၠုၚ်တေံ ဂလေံကဵုလဝ်သြန်ကုဍုၚ်ဗၟာ ပန်ဗဳလျာန်ပြၚ် ဂဗုတ်စောဲစပ်လဝ်ပါလုပ်ဒၟံၚ်ရ။ မိက်ဂွံဟီုဂှ်တှ်ေ ဗော်သ္ကိုပ်ဝန်ဇၞော်တြေံတက်ဇြေန်က္ဍိုက်လဝ်က္ဍိုပ်ဂှ် ကိတ်ညဳဒၟံၚ်ကဵုအလဵုအသဳပၞာန်ကွေံကွေံဏောၚ်။ ညးတအ်ဂှ်ပရေၚ်ပိုန်ဒြပ်သၟးရလေဝ်။ လၟုဟ်လေဝ် ဗော်ပရေၚ်ဍုၚ်ကွာန်စွံအဓိကကဵုပရေၚ်ပိုန်ဒြပ်ပူဂဵုညးတအ်ရဂှ် ပိုဲကၠိုဟ်ကေတ်လဝ်ရ။ ဟိုတ်ဂှ်ရ စပ်ကဵုပရေၚ်ဍုၚ်ဗၟာတုဲ မုလေဝ်တၚ်စၟဳတၟေၚ်ၚ်တၟဟ်ဟ်ဟၟဲပုဟ် နကဵုအဲညာတ်ကေတ်ဂွံရ။ ဆ္ဂး မွဲအခိၚ်ဓဝ်ဂှ် ဗော် Pheu Thai ဂှ် ကၠာဟွံစိုပ်ပေါဲရုဲမာဲဏီတေံ ညးတအ်ဟီုလဝ် ပ္ဍဲတံၚ်ဂြဲမာဲပေါဲရုဲမာဲဂှ် နွံဒၟံၚ်။ ဇၟာပ်ကောန်ဂကူသေံ ဂွံလဝ်တဆိပ်ကြာ ပ္ဍဲဍုၚ်သေံညးတအ်မွဲမွဲတၠတှ်ေ အောန်အိုတ်သြန်ဂိတုသ္ဇိုၚ် သြန်ၝာတ် ၜါလက်ဘာ်ဟီုဂှ် စန္ဒက်ဆဝ်ပ္ၚုဟ်လဝ်နွံရ။ ဣဏံဂှ် ယဝ်ရဂလိုၚ်ပတိုန်ကဵုသြန်ဂိတုသၟာကမၠောန်သေံတအ်ဏောၚ်တှ်ေ သၟာကမၠောန်ဆုဲပြံၚ်ကောန်ဍုၚ်ဗၟာတအ်လေဝ် မုဟီုဟီုရ အောန်ကဵုဂၠိုၚ်ဂှ်တှ်ေ ဂၠိုၚ်တိုန်ကၠုၚ်ဏောၚ် ၜိုတ်ဏံ စၟဳစဂွံရ။ နကဵုအလဵုအသဳဏံဂှ် သြန်ဂိတုသ္ဇိုၚ်သၟာကမၠောန်ဆုဲပြံၚ်တအ်ဂှ် ဂလိုၚ်ပ္တိုန်ကဵုမမိက်ကဵုမွဲမွဲဏောၚ် ဆၜိုတ်ဏံ ပိုဲတအ်စၟဳပတှ်ေကေတ်မာန်ဏောၚ် နကဵုပိုဲမိက်ဂွံဟီုရ။
၇။ အလန်လကြဴအိုတ်ဏံ စပ်ကဵုပရေၚ်သၟာကမၠောန်ဆုဲပြံၚ်တုဲ မုမိက်ဂွံထပ်ဟီုဗပေၚ် နွံဏီရော။
ပရေၚ်ဆဵုဂဗအဲ ရေၚ်တၠုၚ်ကဵုဒၟံၚ် ပရေၚ်သၟာကမၠောန်ဆုဲပြံၚ် အပံၚ်သၞာံ မွဲကာလပွိုၚ် (၂၀) သၞာံပြၚ် မိက်ဂွံကဵုကသပ် သၟာကမၠောန်ဆုဲပြံၚ် ဘဝတုပ်တအ်ဂှ် သၟာကမၠောန်ဆုဲပြံၚ် ကၠောန်ဒၟံၚ်ကမၠောန် ပ္ဍဲဍုၚ်သေံအခိၚ်လၟုဟ်ဏံကီု၊ သၟာကမၠောန်ဆုဲပြံၚ် ကၠုၚ်ကၠောန်ကမၠောန် ပ္ဍဲဍုၚ်သေံတအ်ဂှ် အရာထေက်ကဵုဒးတီလဝ်ဂှ်တှ်ေ အဓိကဂှ် အခေါၚ်အရာသၟာကမၠောန် နွံဒၟံၚ်ပ္ဍဲဍုၚ်သေံတအ် ဒးတီလဝ် မမိက်ကဵုမွဲမွဲထေက်ရ။ ဒးလ္ၚတ်လဝ် အခိုက်အလေံယေန်သၞာၚ် ကၟိန်ဍုၚ်သေံထေက်ရ။ မွဲအခိၚ်ဓဝ်ဂှ် အောန်ကဵုဂၠိုၚ်ညံၚ်ဂွံဆက်စၠောံရေၚ်တၠုၚ်ကဵု ကောန်ဂကူသေံ၊ တၠကမၠောန်သေံ၊ ညးပိုၚ်အဝဵုသေံတအ်ဂွံဂှ် ဘာသာသေံလေဝ် ဒးဗ္တောန်လဝ်ထေက်ဏောၚ် နကဵုအဲမိက်ဂွံဟီုရ။
အလဵုအသဳလဵုဒှ်ဒှ် ပိုဲဟီုဒၟံၚ်တွဵုရ။ သၟာကမၠောန်ဆုဲပြံၚ် ကောန်ဍုၚ်ဗၟာတအ်ဟီုဂှ် ဆၜိုတ်ဂၠာဲကဵုဒၟံၚ်သြန်လုပ်ကၟိန်ဍုၚ်ဓဝ် ဟွံသေၚ်ပုဟ်။ သွက်ဂွံသုၚ်စောဲ ပ္ဍဲကမၠောန်ဖောအ်ဗြေဝ်တဴတက်ကၟိန်ဍုၚ်ပိုဲဂှ် ပရေၚ်ဆဵုဂဗညးတအ် နဲကဲကွတ်ပညာတအ်ဂှ် ဂၠာဲတုဲ ဒှ်ကဆံၚ်မၞိဟ် ကၠောန်ဒၟံၚ်မွဲရ။ ဣဏံဂှ် မုပိုဲဟီုဟီု တုပ်ညံၚ်အာဇာနဲအညတြလေဝ် ဟီုဂွံရ။ ပ္ဍဲဍုၚ်သေံသၟး ဟွံသေၚ်ပုဟ်။ သၟာကမၠောန်ဆုဲပြံၚ် ဂၠိုၚ်ကဵုပြကောဋိကိုတ်တအ်ဂှ် အလဵုအသဳလဵု ဒှ်ဒှ် ဖျေံမဟာဗျူဟာ နဲကဲဗျူဟာတုဲ သြန်လေဝ် ၜိုတ်ဒးသုၚ်စောဲဂှ် သုၚ်စောဲတုဲ ထေက်ကဵု ဒးရေၚ်တၠုၚ်ကဵု ပရေၚ်ပညာ၊ ပရေၚ်ထတ်ယိုတ်၊ ပရေၚ်အခေါၚ်အရာသၟာကမၠောန်တအ်ထေက်ရ။ သၟာကမၠောန်ဆုဲပြံၚ် ကောန်ဍုၚ်ဗၟာတအ်ဂှ် အနာဂတ်ကၟိန်ဍုၚ်ဗၟာ၊ ပရေၚ်ဒက်ပ္တန်ကၟိန်ဍုၚ်ဗၟာ သွက်ကၟိန်ဍုၚ်ဗၟာဂှ် ဒှ်ကဆံၚ်မၞိဟ်လုပ်အသုၚ် ဗွဲမဂၠိုၚ်မွဲကဆံၚ်ရ။ ဟိုတ်ဂှ်ရ အခေါၚ်အရာသၟာကမၠောန်ဆုဲပြံၚ်တအ်ဂှ် စဵုဒၞာကဵု သၞောတ်စှ်ေစှ်ေညိ နကဵုပိုဲ မိက်ဂွံဟီုဏာရ။