ဟိုတ်နူမာဲထံက်ဂလာန်ကၠတ်ထဝ်သေံၜါတန်တုဲ တၠကမၠောန်သ္ၚိကၠံ ဇြဳရက်တာ တာဗဳဇြေန် အာယုက် ၆၀ နူဗော်ဖွေထိုၚ်ဂှ် ဒှ်ကၠုၚ်ဝန်ဇၞော်ဍုၚ်သေံ မရနုက်ကဵု (၃၀)တၠရ။ ဗော်ဖွေထိုၚ်ဂှ် ကြဴနူပါ်ထောံဍာန်ကဵု ဗော် Move Forward က္လိဂွံဇၞးလဝ်မာဲဂၠိုၚ်အိုတ် ပ္ဍဲပေါဲရုဲမာဲတုဲဂှ် ဟိုတ်နူပံၚ်တောဲလဝ်ကဵု ဗော်ဒစေၚ်လ္ပာ်ဒပ်ပၞာန်တအ်တုဲ က္လိဂွံလဝ်မာဲကၠတ်ထဝ်သေံ သီုၜါတန်တုဲ ဒှ်ကၠုၚ်သ္ကိုပ်ဝန်ဇၞော်ရ။
ဟိုတ်ဂှ်ရ စပ်ကဵုအပြံၚ်သၠာဲဝန်ဇၞော်သေံတၟိ ပရေၚ်ဇီုကပိုက် လ္တူပရေၚ်ကၟိန်ဍုၚ်ဗၟာ ဗီုပြၚ်လဵုနွံကၠုၚ်မာန်ရော။ ပရေၚ်ဆက်ဆောံကဵု ကံၚ်ဇြဳပၞာန် ကေုာံ လ္တူဂကောံဒစဵုဒစးတအ် အကာဲအရာဒှ်ကၠုၚ်မာန်တုဲ ဆက်စၠောံသၟာန်လဝ်ကဵု ဒါရိုက်တာ ဆက်ဆောံဍုၚ်သ္အာၚ် ISP Myanmar ဥူအောၚ်ဒူညုၚ် မဒှ်ညးသ္ၚဳဂၠိပ်ပါ်ပါဲ ပရေၚ်ဍုၚ်ကွာန်မွဲတၠရ။
၁။ ကၠာအိုတ်ဏံ နဒဒှ်သ္ကိုပ်ဝန်ဇၞော်တၟိ ဇြဳရက်တာ တာဗဳဇြေန် နူဗော်ဖွေထိုၚ် ဂွံဒုၚ်ရုဲစှ်လဝ်ဂှ် သွက်ကၟိန်ဍုၚ်ဗၟာ ပရေၚ်ဇီုကပိုက်ဗီုပြၚ်လဵု နွံကၠုၚ်မာန်ရော။
ပ္ဍဲသေံဂှ်တှ်ေ ဒက်ပ္တန်အလဵုအသဳတၟိတုဲယျလေဝ်ဏး။ အလဵုအသဳဇေတ်တ်ဂှ် ယဝ်ဒးဟီုတှ်ေ တြေံတေံဂှ်ရ။ မၞိဟ်နူကဵု အလဵုအသဳတြေံတေံဂှ်ကီု၊ ဗော်ဖွေထိုၚ်လၟုဟ်ဂှ်ကီု ဗီုပြၚ်ပံၚ်တောဲလဝ်ရ။ ပ္ဍဲအကာဲအရာဏံဂှ် အဓိကဂှ် ကိစ္စ သွက်ပရေၚ်ပိုန်ဒြပ် ဂွံဖောအ်ဗြေဝ်တဴတက် ဒှ်အဓိကဟီုလဝ်ရ။ နအလုံဂကောံအလဵုအသဳဗော်ဖွေထိုၚ်မွဲဂှ် လ္တူပဝ်လဇြဳပရေၚ်ပိုန်ဒြပ် ကၠုၚ်ဗီုပြၚ်လဵုရောဂှ်။ ဗီုဏံဂှ် ပိုဲဟွံတီဏီရ။ တုဲမွဲပၠန်ဂှ် မၞိဟ်နူကဵုအလဵုအသဳတြေံတေံဂၠိုၚ်ဒၟံၚ်တုဲ ပဝ်လဇြဳပရေၚ်ဂီုကၠီု၊ ကိစ္စကေၚ်ကာပယျဵုဒၞက်တအ် ပြံၚ်သၠာဲကွေံကွေံဏောၚ်ဂှ် ဟွံထေၚ်ရလေဝ်။
၂။ ဟိုတ်နူအကာဲအရာပရေၚ်ဍုၚ်ကွာန်ကၟိန်ဍုၚ်ဗၟာတုဲ ကောန်ဍုၚ်ဗၟာ စိုပ်ဒၟံၚ်သေံဗွဲမဂၠိုၚ်တအ်ဂှ် သွက်ဂွံက္လိဂွံအခေါၚ်မံၚ်တန်တဴပ္ဍဲသေံ ပ္ဍဲအရာကၠောန်တၞးကာဒ်သက်သဳဂှ် ဒးဆဵုဂဗဒၟံၚ် ပရေၚ်ပတေၚ်ဂြတ် ဗွဲမဂၠိုၚ်ရ။ပ္ဍဲလက်ထက်အလဵုအသဳတၟိဏံဂှ် ပရေၚ်ဖ္အောန်ယှအ်ဖျေံကဵု နွံကၠုၚ်ဏောၚ် ညာတ်ကေတ်ဟာ။
ဗော်ဖွေထိုၚ်ဂှ် ဃောကၠောန်ပေါဲရုဲမာဲတေံ ကတိကဝတ်ညးတအ် နွံဒၟံၚ်မွဲရ။ သြန်ဂိတုကောန်ကမၠောန်သေံတအ် သဝ်အိုတ်ဂှ် ဒးဒှ် ၆၀၀ ဏောၚ်လေဝ် ပ္ဍဲသၞာံ ၂၀၂၇ ဂှ်။ ကတိကဝတ်ဗီုဏံ နွံရ။ ယဝ်ရသ္ပကဵုကောန်ကမၠောန်တအ် ညံၚ်သြန်ဂိတုဂွံဂၠိုၚ်တိုန်တှ်ေ ကောန်ကမၠောန်သေံသၟး ဟွံသေၚ်ပုဟ်။ ကောန်ကမၠောန်ဆုဲပြံၚ်ပိုဲလေဝ် သွက်ဂွံဒုၚ်စသိုၚ် နွံရ။
၃။ အလဵုအသဳပံၚ်ကောံ ဗော်ဖွေထိုၚ်က္ဍိုက်က္ဍိုပ်ဂှ် လ္တူကၟိန်ဍုၚ်ဗၟာ လစွံစိုတ်ဗီုပြၚ်လဵု နွံကၠုၚ်မာန်ရော။ ပ္ဍဲလ္တူဏံ သ္ၚဳဂၠိပ်ကဵုမွဲဝါညိ။
ကၠာအိုတ်ဏံ ဗော်ဂွံဇၞးလဝ်မာဲဂၠိုၚ်အိုတ် move forward ဂှ် ယဝ်ရဒက်အလဵုအသဳမာန်ဏောၚ်တှ်ေ ဒှ်အာ မွဲဗီုဏောၚ်လေဝ်ဏး။ လၟုဟ်ဂှ် ဗော် (၁၁) ဗော် ဖွေထိုၚ်က္ဍိုက်လဝ်က္ဍိုပ်ဂှ် ဒှ်အာမဟာမိတ်ညးသ္ကအ်ရ။ မူဝါဒညးတအ် နွံကၠုၚ်ဗီုလဵုရောဟီုဂှ်တှ်ေ ဟီုချိုတ်တ်ပၠိုတ်တ် ဟွံဂွံပုဟ်။ ဟီုဗွဲယျေဘုယျမာန်ဂှ်တှ်ေ ပရေၚ်ပိုန်ဒြပ်ရ သာတုဲ ပ္တဝ်အာက္ဍိုပ်ဏောၚ် ဟီုဂွံရလေဝ်ဏး။
၄။ ပ္ဍဲသေံဂှ် နူကဵုဍုၚ်ဗၟာ လၟိဟ်ညးလုပ်ဗ္ဒဗ္ဒာဲ အတိုၚ်ပရေၚ်ဍုၚ်ကွာန် နွံဒၟံၚ်ဗွဲမဂၠိုၚ်ရ။ အပြံၚ်သၠာဲသ္ကိုပ်ဝန်ဇၞော်သေံလၟုဟ်ဏံဂှ် ပ္ဍဲလ္တူဂကောံဇြဟတ်တအ်ဏံ ပရေၚ်ဇီုကပိုက်ဒး ဗီုပြၚ်လဵု နွံကၠုၚ်မာန်ရော။
ယဝ်ရဒးဟဵုကဵု အလဵုအသဳတြေံတေံတှ်ေ ဍေံတအ်ဂှ် ကဵုအလဵုအသဳပၞာန် ပြေပြံၚ်ဒၟံၚ်ရလေဝ်ဏး။ ကဵုအလဵုအသဳပၞာန်ဂှ် ပရေၚ်အာကၠုၚ် နွံဒၟံၚ်။ ဗီုပြၚ်ကောံဓရီုလေဝ် နွံ။ မူဝါဒဍုၚ်သ္အာၚ် အလဵုအသဳတၟိလၟုဟ်ဏံဂှ် ဟွံတီလဝ် ချိုတ်တ်ပၠိုတ်တ်ဏီပုဟ်၊ ဂွံဟီုဝါတ်ဒၟံၚ်။ ဆ္ဂး ဟီုဂွံဒၟံၚ်မွဲဂှ်တှ်ေ ကၠောန်သ္ပကဵု ဗွဲမဂၠိုၚ်မာန်ဒၟံၚ်ရ။ ပ္ဍဲပယျဵုဒၞက်ဂှ် ဟွံဂွံကဵုအခေါၚ်သၟာဒဒိုက်တအ် လုပ်စိုပ်ဏီပုဟ်။ ဗီုပြၚ်တအ်ဏံ ဖ္အောန်ယှအ်ဖျေံကဵု ကၠောန်ကဵုကၠုၚ်မာန်ဒၟံၚ်။ လ္တူနူဏံဗီုပြၚ်ကၠောန်သ္ပကဵုမာန်ဂှ်တှ်ေ လ္ၚဵုဂှ် ပံက်ကၠုၚ်ကဵု ဗဒိုပ်သၟာဒဒိုက် ဗီုပြၚ်တအ်ဏံရ။
၆။ ပ္ဍဲလက်ထက်အလဵုအသဳသေံတိုန်ကၠုၚ်တၟိဏံ သွက်သၟာကမၠောန်ဆုဲပြံၚ်ကောန်ဍုၚ်ဗၟာ နွံဒၟံၚ်ပ္ဍဲဍုၚ်သေံတအ်ဂှ် ဖိုလ်လ္ပာ်ခိုဟ် လ္ပ်ာပရေံ ဗီုပြၚ်လဵုနွံကၠုၚ်မာန်ရော။
အဲထေၚ်ကေတ်တှ်ေ ကဵုအလဵုအသဳသေံမွဲဓဝ် ဟွံဒးဆက်ဆောံပုဟ် ခယျကေတ်ရ။ လ္ပာ်ဍုၚ်ဒုၚ်တဲလ္ပာ်တေံလေဝ် နွံဒၟံၚ်ပၟိက်ရ။ တုဲပၠန် စရိတ်ညးတအ်အာဏောၚ် ကၠုၚ်ဏောၚ် စရိတ်ဖျေံသ္ဇိုၚ် နွံဒၟံၚ် ဗီုပြၚ်တအ်ဏံရ သေံမွဲဓဝ် ဟွံသေၚ်ပုဟ်။ ဒဵုကဵုအခိၚ်လၟုဟ် ပ္ဍဲသေံဂှ် သၟာဒဒိုက်လ္ၚဵုတအ်ဂှ်တှ်ေ လအ်လောန်ဒၟံၚ် ကွေံကွေံယျ ဒးမၚ်ဒၟံၚ် ပ္ဍဲဗဒိုပ်ဂှ်။ က္လေၚ်ကၠုၚ်ပၠန်ဟာ၊ ဟွံက္လေၚ်ကၠုၚ်တုဲ ဆက်အာ အတိုၚ်ဏံဟာဂှ် ပိုဲ ဟီုချိုတ်တ်ပၠိုတ်တ်ဟွံမာန်ပုဟ်။
၇။ အလန်လကြဴအိုတ်ဏံ လ္တူပရေၚ်ပြံၚ်သၠာဲဝန်ဇၞော်သေံဂှ် မုမိက်ဂွံထပ်ဟီုဗပေၚ် နွံဏီရော။
ယဝ်ရဒးဟီု ဗွဲယေဘုယျတှ်ေ ကၟိန်ဍုၚ်သေံဂှ် ထ္ပက်လဝ်စၟတ်တဲ သၞောဝ်ဥပဒေကောန်ၚာ်သၟတ်ရ။ ကောန်ၚာ်သၟတ် သၟာကမၠောန်ဆုဲပြံၚ်တအ်လေဝ် ဍေံတအ်ကဵုလဝ် အခေါၚ်တိုန်ဘာတအ် ဗီုပြၚ်ဏံ နွံကၠုၚ်ရဏး။ ဇေတ်တ်တေံ ပ္ဍဲလ္ပာ်ဏံ ယဝ်ရဍေံတအ် သၠုၚ်ပ္တိုန်ကဵု သြန်ဂိတုသ္ဇိုၚ်သဝ်အိုတ်ဏောၚ်တှ်ေ သၟာကမၠောန်ဆုဲပြံၚ်တအ်လ္ၚဵုဂှ် အခေါၚ်ဂွံဒုၚ်စသိုၚ် နွံရ။ အခိၚ်လၟုဟ်ဏံ အဲထေၚ်ကေတ်တှ်ေ စဵုကဵုကၠောန်ကၠုၚ် ပရေၚ်လလောၚ်တြးမူဝါဒအလဵုအသဳဂှ် ပိုဲဒးမၚ်ထေက်ဏောၚ်။ ဗီုဂှ်ဟွံသေၚ် ချိၚ်ခယျတုဲ ယဝ်ဟီုဏောၚ်တှ်ေ ဗီုပြၚ်လဵု ဇီုကပိုက်ဒး လ္တူကၟိန်ဍုၚ်ဗၟာရော ဂွံဟီုဂှ် ဝါတ်ဒၟံၚ်ရ။