မြဝတဳ၊ အဝ်ဂါတ် (၂၄)
ပ္ဍဲဗ္ဒါဲဍာ်ဆၚ် တဝ်နဝ်၊ ဂၠံၚ်အာယှမြဝတဳ−ကအ်ကြိက်၊ ပွိုၚ်ဍုၚ်ကအ်ကြိက် တွဵုရးကရေၚ်ဂှ် တုဲကၠုၚ်ပ္ဍဲဂိတုအဝ်ဂါတ် (၂၂) ၜိုတ် (၉) နာဍဳပယျာံဂယးဂှ် ကွဳစက်ဂကောံရီုဗၚ်ပရေၚ်မၞိဟ် ခရိုၚ်မြဝတဳ ဒးဒုၚ်ပန်ပှော်လဝ်ဂှ် ညးမစုက်လုက်ကဵု ဂကောံတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကွဳစက် ဂကောံရီုဗၚ်ပရေၚ်မၞိဟ် မဖ္ဍိုက်ကၠုၚ်မၞိဟ်ယဲ နူမြဝတဳတုဲ စှ်ေကၠုၚ် လ္ပာ်ဘာအၚ်ဂှ် ဂကောံရပ်လွဟ်မွဲဂကောံ ပန်ပှော်လဝ် ကဵုသေနာတ်ရ။
ဒၟါနူပန်ပှော်လဝ် ကဵုသေနာတ်တုဲ ကွဳစက်ရီုဗၚ်ပရေၚ်မၞိဟ် ဒးလဝ်သေနာတ် မွဲတဲကီုလေဝ် မၞိဟ်ဒဳယာန်ကဵု မၞိဟ်ယဲတံ ဇီုကပိုက်ဂွံဝပ်ဟွံမွဲပုဟ်ဂှ် သ္ဂးရ။
“ပန်ဂှ်တှ်ေ ၜိုတ် (၁၀) တဲ နွံဏောၚ်၊ ဆ္ဂး မွဲတဲရ ကၠုၚ်ဒးဗ္ဒါဲကွဳစက်ဂှ်ရ၊ ကွဳစက်ဂှ် မကမ်ကၠိုဟ်အာရ၊ ပ္ဍဲကွဳစက်ဂှ် တဆိပ်သမ္တီ ကွဳစက်ဖ္ဍိုက်မၞိဟ်ယဲ၊ ပၟတ် တံ ပါဒၟံၚ်ဖအိုတ်ရ၊ ဣဏံဂှ် ပန်ပှော်စုတ်လဝ်ရ” သာ်ဝွံ ညးမစုက်လုက်ကဵု ဂကောံဂှ် မွဲတၠ ဟီုရ။
ယဝ်ရပန်ပှော် စွံပွန် ကုကွဳစက်ဖ္ဍိုက်မၞိဟ်ယဲတံ က္တဵုဒှ်ဆက်ကၠုၚ်မ္ဂး သွက်ဂွံပလံၚ် ကုမၞိဟ်ယဲကာမံက်တိုန် အပ္ဍဲဒေသ ဗစိုပ်ရုၚ်ဂဥုဲ၊ ဗ္ဒမ်ဂဥုဲတံဂှ် အခက်အခုဲနွံကၠုၚ်မာန်ရောၚ် သ္ဂးလဝ်ရ။
လ္တူဂၠံၚ်ဇၞော် မြဝတဳ−ကအ်ကြိက်ဂှ် ယာန်ဖ္ဍိုက်ညးအာတရဴ၊ ကွဳစက်ဖ္ဍိုက်ဗၞိက် ကေုာံ ယာန်ဖ္ဍိုက်ကၠေၚ်တံ မွဲဏှမွဲဏှ ဒးဒုၚ်ပန်ပှော်ဒၟံၚ်တုဲ က္တဵုဒှ်လဝ် စဵုကဵုမၞိဟ်ဒးချိုတ်တံ နွံရ။
ပရိုၚ်−သြၚ်လောန်တိုၚ်(မ်)